قدیمین باغ-شهرینی دوز طوفانی تهدید ائلیر
یازار : میرزه عبدالصمد ملکی | بؤلوم : اجتماعی
+0 به یه ن
قدیمین باغ-شهرینی دوز طوفانی تهدید ائلیر
تبریز شهری بیر زمانلار باغ-شهریدی، ایندی نه اینكی او گونلردن بیر شئی قالمیر بلكه هوا چیركلیگی بورولغانیندا قالماقدان علاوه دوزلو یئللرله ده تهدید اولور.
تبریز كلانشهری بیر طرفدن سایسیز كرخانالار و ماشینلاری ایله و بیر طرفدن‌ده اورمیه گؤلو معضلی ایله جدّی شكلده هوا چیركلیگی ایله اوزلشیب. ائله كی اؤلكه‌نین اَن چیركلی شهرلریندن بیرینه چئوریلیب.
تبریز باغلاری‌نین داغیلماسی بو شهرین هواسی‌نین چیركلنمه‌سینده بؤیوك رولو وار.
صنعتی چیركلندیرنلردن علاوه، بیر مدّت اولار كی عرب اؤلكه‌لریندن گلن توز-تورپاق تبریز هواسینی شدّتلی شكلده چیركندیریر. بو توز-تورپاق تبریزلی‌لری صاف هوادان محروم ائله‌مكدان علاوه، اونلارین ساغلاملیغینی‌دا تهدید ائلیر.
گؤزدن یاش گلمه، قاشینما، بوغاز، بورون و گؤزده آجیشما بو توز-تورپاغین قیسا عوارضیدیر كی آغ جیگرلره تأثیر قویوب اؤسكورمگه و تنگی نفسه‌ده سبب اولور.
تبریزه دوز حمله‌سی، بو گونلرین دانیلماز حقیقتی
صنعتی چیركلندیریجی‌لردن علاوه، تبریزی بؤیوك بیر دوز حمله‌سی تهدید ائلیر. پاییز فصلی‌نین باشلاماسی و فصلی یئللرین گلمه‌سی ایله بو تهدیدلر آجی واقعیته تبدیل اولوب و بو خطردن قورتولماق اوچون داها نظریه وئرمك وقتی كئچیب و عمل وقتیدیر.
غربی و شرقی آذربایجان، اورمیه گؤلو قوروماسی‌نین صدمه گؤرنلرین مقدّم صفینده‌دیلر و بو خطر او بیری استانلاری‌دا تهدید ائلیر.
اورمیه گؤلونو قورتارماغا، اوزون مدّت یوللاردان علاوه، قیسا مدّت یوللار دا وار كی اونا سو چاتدیرماق اوزون مدّت یولدور و او ایش باشا چاتمامیش قیسا مدّت ایشلر ده گؤرولمه‌لیدیر. یوخسا منطقه‌میز بؤیوك بیر قورولوق و شورازارلیقلا اوز به اوزدور.
خبری تنظیم ائله‌دی: یاسمین مولانا
آغیزداكی باكتری‌لرله ملیّتی معیّنلشدیرمك
یازار : میرزه عبدالصمد ملکی | بؤلوم : تكنولوژی
+0 به یه ن
عالیملرین تازالیقدا بیلدیگینه گؤره، انسان آغزینداكی باكتری‌لر هر كسین اؤزونه مخصوصدور و كیملیگی معیّنلشدیرمك اوچون بارماق اثری كیمی اوندان استفاده ائتمك اولار.
تحقیقاتین گؤستردیگینه گؤره، بو باكتریلرین فقط یوزده 2-سی بوتون انسانلاردا مشتركدی كی اونلارین‌دا غلظتلری هانسی ملّته عاید اولدوغونا اساساً فرقلی اولور. باكتریلرین یوزده سككیزی‌ده آنالیز اولانلارین یوزده دوخسانیندا واریدی.
اوهایو دانشگاهی‌نین پریودنتولوژی اوستادی، "پورنیما كاپور" بو باره‌ده دئییر: بو، بیرینجی دفعه‌دیر كی آغیز تركیباتی‌نین ملیّت تشخیصینده ال وئریشلی اولدوغو گؤستریلیر.
او آرتیردی: بو زمینه‌ده هئچ كس آیریسینا تای دئییل. عیناً بارماق ایزینده اولدوغو كیمی.
DNA طریقی ایله ملیّتلرین معیّنلشمه‌سی فقط یوزده 62 دوز چیخیر آما بو مئتوددان استفاده ائدنده یوزده یوز، دوز تشخیص وئرمك اولور.
كومار و همكارلاری بو آزمایشده آغیز سویو، دیشلرین سطحی و دیش اتی آلتینداكی باكتری‌لردن استفاده ائدیبلر.
دنیانین اَن بؤیوك ساعتی مكّه شهرینده
یازار : میرزه عبدالصمد ملکی | بؤلوم : دین
+0 به یه ن
نمرود اودونون حضرت ابراهیمه (ع) گولوستان اولماسی
یازار : میرزه عبدالصمد ملکی | بؤلوم : دین
+0 به یه ن
نمرود اودونون حضرت ابراهیمه (ع) گولوستان اولماسی
حضرت ابراهیمین (ع) نسبی حضرت آدمه (ع) قدر تورات كتابیندا گلیب. توراتین نسب‌نامه‌لری اسلامی كتابلارا دا یول تاپیب و اصلینه و منشأینه دقّت ائله‌مه‌دن قبول ائدیلیب.
كتاب اهلی‌نین اینادیغینا گؤره، (توراتدا كی یازیلان حادثه‌لری حسابلایاندا) حضرت ابراهیم تقریباً میلاددان ایكی مین ایل اوّل، یعنی دؤرد مین ایل بوندان اوّل، اور شهرینده دنیایا گؤز آچدی. توراتدا یازیلانا اساساً او اوّل‌لر یوخاری مرتبه معناسیندا اولان «ابرام» آدلانیردی. دوخسان دوققوز یاشیندا اولاندا، الله تعالا اونون آدنیی «ابراهیم»ـه (ملّتلر آتاسی معناسیندا) چئویردی.
اور شهری یوز ایل بوندان اوّل عراقدا «فرات» قیراغیندا تورپاق آلتیندان چیخاردیلدی.
توراتین دئدیگینه اساساً حضرت ابراهیمین آتاسی[1] «تارح»، اوغلو ابراهیمی و اونون حیات یولداشی «ساره»-نی و اؤز نوه‌سی «لوط»-و گؤتوروب اؤزو ایله فلسطینین غربینده كنعان یوردونا یوللاندی. اونلار یولدا سفرین ادامه‌سیندن واز كئچیب، ایندی توركیه تورپاقلاریندا یئرله‌شن «حران» شهرینده قالدیلار.
حضرت ابراهیمین (ع) تاریخینده، ایندی‌كی توراتدا اونلارا اشاره اولمایان، ایكی مهم حادثه وار :
1. او حضرتین بت‌لاری سیندیریب اودا آتیلماسی.
2. كعبه‌نین بناسی.
قرآن كریم انبیاء و صافات سوره‌لرینده اونون بت سیندیرماسی و اودا آتیلیب اودون اونون اوچون گولوستانا چئوریلمه‌سی باره‌ده یازیب. بو جریاندا حضرت ابراهیم (ع) بت‌لارین گوجسوز اولدوغونو گؤسترمك اوچون اونلاری سیندیریب، بالتانی بؤیوك بُتین چیگنینه قویوب ثابت ائلیر كی بو جانسیز شئیلر عبادت ائله‌مه‌لی دئییل‌لر. اور پادشاهی نمرود، بؤیوك اودون قالانیب، حضرت ابراهیمی (ع) اونون ایچینه آتیلماسی‌نین امرینی وئریر. اونلارین حیرتلی گؤزلری قارشیسیندا الله-ین اذنی ایله اود سویویوب سؤنور و گولوستانا چئوریلیر.
[1]. قرآندا حضرت ابراهیمین (ع) آتاسی بت پرست آزر ده یازیلسا، شیعه‌نین ایناندیغینا گؤره حضرت ابراهیم (ع) حضرت محمد پیغمبرین (ص) اجدادلارینداندیر و پیغمبریمیزین (ص) بوتون بابالاری حضرت آدمه (ع) قدر بیر الله-ی عبادت ائدیبلر. و انعام سوره‌سی‌نین 74-جو آیه‌سینده صحبتی اولان آزر، حضرت ابراهیمین عمیسی اولوب. عرب دیلینده بعضاً عمی‌یه أب سؤزوندن‌ده استفاده اولونار.
نوح طوفانی‌نین بیتمه‌سی
یازار : میرزه عبدالصمد ملکی | بؤلوم : دین
+0 به یه ن
نوح طوفانی‌نین بیتمه‌سی
حضرت نوح (ع)، الله-ین بیرینجی اولو العزم پیغمبریدیر. اونون رسالت مدّتی قرآنین تصریحینه گؤره دوققوز یوز اللی ایل ایدی و بو مدّتده آز عدّه‌دن سونرا -كی دئییلنلره اساساً 40 نفر كیشی و قیرخ نفر خانیم ایدی- هئچ كس اونا ایمان گتیرمه‌دی و هامیسی كفر و الحاد یولونا گئدیب اونو چوخلو اذیّت ائله‌دیلر. حتّی حیات یولداشی و اوغلانلاریندان بیری اونا ایمان گتیرمه‌دیلر، اورا قدر كی حضرت نوح (ع) اؤز ملّتینی نفرین ائدیب الله-ـا بئله دئدی: «و قال نوح رب لا تذر علی الارض من الكافرین دیارا » ای الله كافرلردن بیر نفری‌ده یئر اوزونده باقی قویما. (نوح سوره‌سی). الله دا، نوحا اونون امری ایله گمی دوزلتماغی و كافرلر حقّینده شفاعت ائله‌مه‌مگی وحی ائله‌دی. «واضع الفلك باعینا و وحینا و لاتخاطبنی فی الذین ظلموا انهم مغرقون»گمی دوزلمه‌سی قورتولانا قدر كافرلر او حضرتی گمی دوزلدركن گؤرنده مسخره ائلیردیلر. دوزَلن گمی اوچ مرتبه‌دن عبارت ایدی: بیر مرتبه‌سی دؤرد آیاقلی‌لاردان اؤترو، بیر مرتبه‌سی قوشلاردان اؤترو و بیر مرتبه‌سی انسانلاردان اؤترو.
طوفانین باشلانما علامتی نوح پیغمبرین ائوی‌نین تندیریندن سو قایناماغیدی. «فلما جاء امرنا و فار التنور» امریمیز چاتاندان سونرا تندیر قاینادی (قرآن كریم) نوح گمیده اوتورماغا، مؤمنلری‌ده میندیریب حیوانلارین هره‌سیندن بیر جوت گمی‌یه میندیرمگه امر اولدو. «قلنا احمل فیها من كل زوج اثنین» اونا، هر زوجدان بیر جوت گمی‌یه میندیرمگی امر ائتدیك.
سو گؤیدن یاغیب یئردن قاینادی و داغلاری بورویه‌نه قدر چوخالدی. نهایتده الله-ین امری ایله گؤی یاغماقدن و یئر قاینماقدان دایاندی و نوح گمیسی آغری داغلاریندا یئر آلان جودی داغیندا آراملاییب، حضرت نوح (ع) مؤمنلرله برابر گمیدن چیخیب اوتوراق ائله‌دیلر. طوفان زمانی یئر-گؤیو سو توتان آنلاردا، نوح اوغلونو سو ایچینده گؤرنده اوندان ایسته‌دی گمی‌یه مینسین. اوغلو جواب وئردی: داغا گئدَرم و سودان آماندا قالارام. نوح دئدی: الله-دان سونرا ساخلایان یوخدور. بو آندا بیر دالغا گلیب اوغلونو غرق ائله‌دی. نوح، الله-ـا عرض ائله‌دی: ای الله بو بالا منیم اهلیمدندیر و سنین وعده‌ن حقدیر. (الله، كافرلری غرق ائدیب نوح اهلینی نجات وئرمگه وعده وئرمیشدی.) الله بویوردو: «انه لیس من اهلك» او سنین اهلیندن دئییل سنی موعظه ائلیرم كی نادانلاردان اولمایاسان. نوح الله‌دان عفو ایسته‌دی.