ذهنیمیزی نئجه آراملاداق؟
یازار : میرزه عبدالصمد ملکی | بؤلوم : ساغلاملیق
+0 به یه ن
ذهنیمیزی نئجه آراملاداق؟
ائویزه و ایش یئریزه مثبت باخیشیز اولسون
بو ایش اوچون ائویزی و ایش یئریزی جور به جور خاطره‌لر و خوش آنلارلا دولدورون. مثلاً اورانی مسافرتلریزدن اولان شاد عكسلریزله دولدورون. عكسلرین تكرارلی اولماماسی اوچون نئچه وقتدن بیر اونلاری دگیشین.
قدر بیلن اولون
اطرافیزداكیلارین قدرینی بیلمگی نشان وئره بیلسز، اونلارا مثبت و یاخشی تأثیر قویموش اولورسوز. بونا گؤره مخاطبیزین گؤزلرینه باخاراق «تشكر ائلیرم» دئیین. سونرا بوتون مثبت حادثه و ایشلریزی گونده‌لیك دفتریزه یازین.
آیریلارینی تعریفله‌یین
آیریلارین مثبت ایشلرینی كشف ائله‌مكله، بئینیزه آیریلارین یاخشیلیقلارینا فكرلشمگی اؤیرَدیرسیز و بو سیزین فردی یاشاییشیزدا چوخ مثبت تأثیر قویار و بو مثبت انرژی، سیزین اورگیزه و بئینیزه داخل اولار.
مدیتیشن ائله‌یین
انسانلار، ایچ دنیالاریندان خبردار اولماق اوچون مكاشفه و دوشونجه‌یه احتیاجلاری وار. تماماً آییق اولدوغوز زمان دوز اوتورون، نفس آلماغیزدا دقیق اولون و بدنیزین جوابلارینا دقّت ائدین. دقّتیز داغیلیرسا دا تازادان نفس اولماغیزا دقیق اولون.
بدن دیلینه چوخ دقّت یئتیرین
جامعه‌ده یاخشی گؤرونمك ایسته‌ییب انسانلارلا دوزگون ایلگی قورماق ایسته‌سز یاخشی اولار مختلف حال‌لاردا انسانلارین بدنلری‌نین عكس‌العمل‌لرینه دقّت یئتیره‌سیز. اؤز ایچیزده حدس ووراسیز كی او ایندی نه حسّ ائدیر. سونرا بو تمرینی دوستلاریزین اوستونده ائدین و گؤرون حدسیز نه قدر دوزدور.
گونده اون دقیقه دقیق اولون
دقّت گوجوزو آرتیرماق اوچون گونده اون دقیقه ساكت بیر اوتاقدا اوتوروب آچیق گؤزله اوز به اوزده‌كی سوژه‌یه مثلاً تابلو و یا آیری بیر شئیه دقیق اولون.
حسّلریزی تحریك ائله‌یَنلری تانی‌یین
همیشه متعادل اولماق ایسته‌سز و حسّلریزین اسیری اولماماق ایسته‌سز، حسّلریزی تحریك ائدن حادثه‌لری یازمالیسیز. سونرا نئچه درین نفس آلیب و ریلكس حالدا 15 دقیقه بویوندا او موضوعلار باره‌ده و وئردیگیز عكس‌العمل‌لر باره‌ده دوشونون.
مهربانلیغی و تسلّی وئرمگی تصوّر ائدین
مهربان و شفقتلی یاشاییشیز اولماغینی ایسته‌سز، هفته‌ده دؤرد بئش دفعه و هر دفعه بئش اون دقیقه بو تمرینی ائله‌مه‌لیسیز: تصوّر ائله‌یین دوستلاریزین بیری یاشاییشیندا مشكلی وار و سیز اونا تسلّی وئریب اونو آراملادیرسیز. هر نفس آلماغیزدا اونا تسلّی وئریب و هر نفس وئرمگیزده اونون تسكین تاپماسینی گؤرورسوز. بو انسانین دردلری‌نین بیر آز آزالماسینا سبب اولار.
استرالیادا تازا نوع حیوان تاپیلدی
یازار : میرزه عبدالصمد ملکی | بؤلوم : خبرلر
+0 به یه ن
استرالیادا تازا نوع حیوان تاپیلدی
جیمز كوك دانشگاهیندان "كونراد هاسكین" و نشنال جغرافیكین بیر تعداد فیلم دوزلدنلری جاری ایلین اوّل‌لرینده هلكوپترله «كیپ یورك» یاریم جزیره‌سینده یئر آلان «كیپ ملویل» داغلیقلارینا گئتدیلر و بو منطقه‌ده گؤردوكلرنیدن حیرته گلدیلر.
بو تاپینتیلار، قویروغو یارپاق كرتنكه‌له، ساری رنگده كرتنكه‌له و داش ساكنی قورباغایا شامل اولوردو كی اونلارین هئچ بیری اوّل‌لر گؤرونمه‌میشدی.
هاسكین دئدی: بو تازا نوع جانلی‌لاری بوردا تاپماق، تاریخی بیر كشف ساییلیر. بو اوچ مؤهره‌لی حیوانین، یاخشی آختاریلدیغینا ایناندیغیمیز اؤلكه‌دن تاپیلماسی حیرت آمیزدیر.
عالملر بو منطقه‌یه داخل اولدوقلاری‌نین اوّل گونلرینده بو نوع حیوانلاری كشف ائله‌دیلر و احتمالی وار آیری تانینمامیش نوعلار دا اولسون.
بو جانلی‌لارین بیری 20 سانتی‌لیق قویروغو یارپاق كرتنكه‌له‌دیر. بو جانلی استرالیادا ایستی جنگل‌لرین یاییلدیغی قدیم زمانلارین یادگاریدیر. بو كرتنكه‌له‌نین ایری گؤزلری و نازیك اوزون بدنی وار و آیری كرتنكه‌له‌لردن چوخ فرقلیدیر.
كیشیلر آروادلارین توزونا دا چاتمیرلار
یازار : میرزه عبدالصمد ملکی | بؤلوم : اجتماعی
+0 به یه ن
كیشیلر آروادلارین توزونا دا چاتمیرلار
بو تحقیقده 120 كیشی و 120 خانیم بیر كامپیوتر تستینده رقابت ائله‌دیلر. بو تست بیر سیرا عدد و شكلی بیرلشدیرمك ایدی. اونلاردان ایسته‌ینده كی خاص بیر موضوعنون اوستونده دقیق اولسونلار هر ایكی گروهون ذهنی گوجو بیر اولوردو، آما اونلاردان نظرلرینی سرعتله آیری موضوعا چئویرمكلرینی ایسته‌ینده كیشیلر دالی قالیب قاریشدیریردیلار.
بو پروژه‌نین مدیری‌نین دئدیگینه گؤره، بو معطل قالماق و یوبانماق نظره كیچیك‌ده گلسه اوزون مدّتده بؤیوك تأثیری اولار.
خانیملار مسأله‌لرین حلّینده عاغیللی یوللاردان استفاده ائلیرلر و بو یوللارین بعضیسی نئچه ایشی بیر یئرده مدیریّت ائله‌مگه ال وئریشلی اولا بیلر.
بو تستده آروادلارین و كیشیلرین ذهنی فرقلری‌نین، اونلارین نقاشی‌لری‌نین اوزوندن‌ده بللی اولماغی آشكار اولدو.
بو تحقیقین نتیجه‌سینده بللی اولدو: آروادلار و كیشیلرین بیر آیری فرقی‌ده بودور كی آروادلار ایشی باشلامادان اوّل اونون باره‌سینده دوشونورلر آما كیشیلر فاصله‌سیز ایشه باشلیرلار. هابئله ایشین گئدیشینده مشكلله اوزلشنده آروادلار ایشی دایاندیریب اونون باره‌سینده دوشونورلر و مناسب یول تاپاندان سونرا اونو ادامه وئریرلر.
بو تحقیقین كامل نتیجه‌لری، BMC Psychology مجله‌سی نین آخر شماره‌سینده چاپ اولوب.
نروژ شهری‌نین یوز ایللیك گونشسیزلیگی باشا چاتدی
یازار : میرزه عبدالصمد ملکی | بؤلوم : تكنولوژی
+0 به یه ن
نروژ شهری‌نین یوز ایللیك گونشسیزلیگی باشا چاتدی
ریوكان شهری، داغلارین آراسیندا قالیب سپتامبر و مارس آیلاری آراسیندا گون ایشیغیندان محروم اولوردو. بو شهرین بناسی، یوز ایل بوندان اوّل «سام اید» آدلی بیر شخصی واسطه‌سی ایله طبیعی كود تولیدینده بو منطقه‌ده یئرلشن آبشارین طبیعی گوجوندن استفاده ائتمك اوچون، قویولوب و بو شركتین ایشله‌ینلر اوردا قالیرلار.
شهر ساكنلری همان زماندان بو شهرده گون ایشیغیندان فایدالانماق اوچون چاره آختاریردیلار و اونون جبرانی اوچون داغ باشینا، گونشین ایشق سالدیغی یئره قدر، شهردن بیر تله‌كابین چكمیشدیلر.
آما شهرین بناسیندان یوز ایل سونرا ایندی داغ باشینا اوچ بؤیوك 17 متر مربعلیك آینا یئرلشدیریلیب كی كامپیوتر برنامه‌سی ایله گونه باخان كیمی گونشی ایله فیرلاناجاقلار و گونون ایشغینی شهرین مركزینه انعكاس وئره‌جكلر. بو آینالار 710 مین یورویا باشا گلیب.
2013-ون خوشبخت اؤلكه‌لری
یازار : میرزه عبدالصمد ملکی | بؤلوم : اجتماعی
+0 به یه ن
2013-ون خوشبخت اؤلكه‌لری
بیرلشمیش ملّتلر سازمانی طرفیندن 2013-جو ایلین خوشبخت اؤلكه‌لرین لیستی یاییلدی.بو سیاهیدا بیر اؤلكه‌نین ایمن و شاد یاشاییش اوچون امكانلاری، فرقلی شاخصلر واسطه‌سی ایله نئچه بؤیوك تحقیقاتی مؤسسه طرفیندن بیرلشمیش ملّتلرین نظارتی ایله اؤلچولوب. بو تحقیده اشتراك ائدن مؤسسه‌لردن كلمبیا بریتیش دانشگاهی، كانادا دانشگاهلاری‌نین تحقیقاتی مؤسسه‌سی، لندنین اقتصادی مدرسه‌سی و گالوپ مؤسسه‌سینی آد آپارماق اولار. ایللیك گلیر، یاشاییشا اومید، جامعه‌نین رفاهی، ساغلاملیق و اجتماعی آزادلیقلار بو تحقیقین معیارلاریندان ایدی.
156 اؤلكه‌نی اؤزونده احتوا ائدن بو سیاهیدا اسكاندیناوی اؤلكه‌لری بیرینجی رتبه‌لرده یئر آلدیلار. بو سیاهیدا روسیه 68، تركیه 77، ایران 115 ، آذربایجان 116 و ارمنستان 128-جی یئرده قرار تاپیب.