din xadimi دین خادمی

حركت چوخ اولدوقجا عؤمر چوخالار

مونظم صورتده ورزیش ائتمك یاشلی اینسانلارین عؤمرون چوخالدار. استرالیانین موناش دانیشگاهی‌نین موحقیقلری تایوانلی موحقیقلرین ایش بیرلیگی‌ایله یاشلی اینسانلاردا بدنین حركتی و چكیسی‌نین اؤلومله رابیطه‌سینی بیلمك اوچون تایواندا 97-65 یاشدا اولان 1435 كیشی و خانیمی, 8 ایل بویوندا نظر آلتیندا ساخلادیلار. دؤكتور مارك والك ویست, موناش دانیشگاهیندان بو تحقیقین رئیسی دئییر اوست-اوسته یاشلی اینسانلاردا ضعیفله‌مك و یونگوللشمك دیری قالماغین خطره دوشمه‌سی دئمكدیر. اونون دئدیگینه گؤره, موحقیقلر بو تحقیقده باش تاپیبلار كی عضله‌سی آز اولان قوجالار (قوجالیق اثرینده قودرت و عضله‌ بافتینی الدن وئرمك) و اسكلتلری كیچیك اولانلار اؤلوم خطرینه داها چوخ یاخین اولورلار, مخصوصاً او زمان كی فیزیكی حركتلری آز اولا. اوندان علاوه طبیعی و آرتیق چكی‌لری اولان قوجالار و پیاده یئریمك و داغچیلیق كیمی ورزیشلر ائدنلر داها ساغلام اولورلار و یاشاماق احتیماللاری چوخ اولور. بو موطالیعه بویوندا دقیق نتیجه آلماق اوچون یاش, جینس, ایجتیماعی-ایقتیصادی وضعیت و شخصی كیردار نظرده آلینیب. دؤكتور مارك والك ویست آخیرده دئدی كی قوجالارین حركتی چوخالسا, اؤلوم میقدارینی گؤزه گلیم میقداردا آزالتماق اولار و بو ایش هفته‌نین موختلیف گونلرینده مولاییم و آز ورزیشلرله گؤروله بیلر.

	سئرچه و تله * العصفور والفخ
نقل اولوب كی سئرچه تله‌یه راست گلیر. سئرچه دئییر: «نیه یولدان اوزاق گزیرسن؟» تله دئییر: «ایستیرم خالقدان اوزاق گزم, اونلاردان اماندا قالام و اونلاردا مندن اماندا قالسینلار.» سئرچه دئییر: «پس نیه تورپاقدا اوتوروبسان؟» تله جواب وئریر: «تواضوعكارلیق اوچون.» سئرچه دئییر: «بو آغاج نه‌دیر؟» تله دئییر: «بو منیم عصامدیر, اونا دایانارام.» سئرچه دئییر: «بو یئم نه‌دیر؟» تله دئییر: «اونو صدقه وئریرم.» سئرچه دئییر: «ایجازه وار اونا دَیَم؟» تله دئییر: «اگر ایستیرسن ائله.» سئرچه یئمه یاخینلاشاندا تله اونا ایلیشدی و سئرچه آغریدان قیشقیردی. تله دئدی: دء گؤروم نه ایستیرسن و قورتولماغینا هانسی یول وار. هر كس قارداشلارینی اؤلدورمگه عادت ائدن دوشمنی تانیماسا, كؤمكلیگه استحقاقی یوخدور. عیبرت: دوشمن تله‌سینده اوتورماق آشكار ساده لوحلوقدور !     العصفور والفخ حُكی أن عصفورا مر بفخ , فقال العصفور : ما لی أراك متباعدا عن الطریق؟ فقال الفخ: أردت عزلة الناس ,لآمن منهم و یأمنوا منی .فقال العصفور : فما لی أراك مقیما فی التراب؟ فقال : تواضعا ! قال العصفور: وما هذه القصبة؟ قال الفخ: هذه عصای أتوكأ علیها. قال العصفور: فما هذه الحبة؟ قال الفخ: أتصدّق بها. قال العصفور: أیجوز أن ألتقطها؟ قال الفخ: إن احتجت فافعل. فدنا العصفور من الحبة فانطبق علیه الفخ فصاح العصفور ألما. فقال الفخ: قل ما شئت فما لخلاصك من سبیل، فمن لا یعرف عدوه الذی اعتاد قتل اخوانه لا یستحق المساعدة. العبرة : الوقوع فی فخ العدو الواضح قمة السذاجة!

گله‌جكده بیر ساواش وار

سیپاهین فرماندهی تأكید ائله‌دی كی دوشمنلر ایرانلا موقابیله ائله‌ممگین تكجه یولونو ساواشدا بیلیرلر و بئله فیكر ائلیرلر كی بو اونلارا قازاناجاق. آما اونلار او قدر قانمازدیلار كی بیلمیرلر بو ایش اونلارین محو اولما نوقطه‌سی و ماجرالاری‌نین سونو اولاجاق. سردار سرلشكر محمد علی جعفری سیپاهین جنگده بهداری گوجلری‌نین ایختیصاصی نوماییشگاهیندا دئدی: ایندیه قدر هئچ گوج و قودرت ایسلامی اینقیلابین قاباغا گئتمه‌سینه مانع اولا بیلمه‌ییب, نیه كی اینقیلابین توسیعه‌سی یئر اوزونده ایسلام دینی و ایلاهی ایشیغین توسیعه‌سی معناسیندادیر. او ایدامه‌ده بونو دئمكله كی بویون موسلح نیرولار و مخصوصاً سیپاهین قاباقجیل سیستملری وار, دئدی: بونو بیلمه‌لی‌ییك كی شراییط دگیشماقدادیر و تحمیلی سككیز ایللیك جنگ كیمی جنگ اولمایاجاق, آما آیری بیر جنگ پیش‌بینلیك اولور كی گله‌جكده باش وئره‌جك و بیز قطعاً بو جنگده موقدس دیفاع دورانی‌نینداكی مظلومیّتیمیز اولمایاجاق.

	اینسان یئرین موسیقی‌سینی ائشیدیر
یئرین مغناطیسی كمری گونش یئللری‌نین ذرّه‌لرینی آلماقلا, گؤیه بیر سس گؤندریرلر كی ناسا موحقیقلری اونو ضبط ائله‌ماغی باشاریبلار. ایسنانین خبرینه گؤره, ناسانین شوعاع ساچما كمر توفانی, ایكی اكیز آختارانی (RBSP) یئر اطرافینداكی بیضی مدارلاردا دولانیرلار و اونلارین یئرله فاصیله‌سی بعضاً 603 كیلومتر و بعضاً 32 مین كیلومتردن چوخ اولور. بو ایكی آختاران كی شوعاع ساچما كمرلرینی (وان آلن) تحقیقی اوچون گؤیه گؤندریلیبلر, سپتامبرین بئشینده (شهریورین 15-ده) یئرین مغناطیسی بؤلوموندن ساطع اولان«مگنتوسفر»آدیندا رادیویی دالغالارین ضبطینی باشارا بیلدیلر. بو سس كی «یئرین اوخوماسی» (Earth's chorus) آدینا مشهوردور, گؤیده ائشیدیلیر. آیووا دانیشگاهی‌نین موحقیقلریندن اولان «كریگ كلتسینگ» تأكید ائلیر: جماعت بو سسله اون ایللر قاباق تانیشیدی؛ قاباقلار بو سسه قولاق آسماق اوچون رادیودان ایستیفاده اولاردی كی قوشلارین های-كویونه بنزیر. كلتسینگین دئدیگینه گؤره, بو سسلر یئرین مگنوسفری‌نین یوخاری لایه‌لرینده‌كی قودرتلی ذرّه‌لردن ساطع اولور و اونلاری آلماق سحرلر داها راحت اولور و بونا گؤره اونا «سحر نغمه‌سی» آدی‌دا وئریلیب. بو رادیویی دالغالار, ائله فركانسلاردادیلار كی گؤیده‌كی اینسان فقط ایمنی بؤركونو چیخارتسا اونو ائشیده بیلر. «وان آلن» شوعاع ساچما كمرلر, ائله ذرّه جریانلاریدیر كی یئرین جیواریندا گونشین یئللریندن گلیب و یئرین مغناطیسی میدانیندا تله‌یه دوشورلر.

	آیت الله علامه محمد تقی جعفری + مجموعه سخنرانی
آیت الله علامه محمد تقی جعفری اوستاد علامه محمد تقی جعفری(ره) نین یاشاییشیندان خولاصه اوستاد علامه محمد تقی جعفری(ره) 1304-جو ایلده تبریزده دونیایا گؤز آچدی و تبریز، تهران، قوم و نجف اشرف شهرلرینده ایسلامی علملرین عالی تحصیلاتیندان سونرا بؤیوك عالیملرین محضرینده او جومله دن آیات عظام، میرزا فتاح شهیدی، شیخ محمدرضا تنكابنی، شیخ كاظم شیرازی، سید عبدالهادی شیرازی، سید ابوالقاسم خویی و سید محسن حكیم كیمی بؤیوكلردن فئیض آپاردی. ایندیه كیمی اوستادین اثرلریندن 80 اثر چاپ اولونوب و اونلارین بعضیسی نین چاپی مثنوی شرحی كیمی كی 15 جیلدده نئچه دفعه تجدید چاپ اولوب. هابئله اونلارین نیظارتی آلتیندا 12 ایل بویوندا مولانا مثنویسی نین كشف الآیاتی 4 جیلدده «دریادان دریایا» عونوانیندا یایلیبدیر. اوستادین گؤركملی اثرلریندن نهج البلاغه شرح و تفسیریدیر كی 27 جیلدده چاپ اولوب. اوستاد جعفری نین آیری نفیس اثری مولانانین دوشونجه لری، شرق و غرب جهانبینی و فلسفه لری نن موقاییسه سی زمینه سینده دیر كی «مولانا و جهانبینی لر» عونوانیندا چاپ اولوب. اینسان حاقلاری و اونون ایسلامدا اولان اینسان حاقلاری نن موقاییسه سینده، موفصّل و شرحلی كیتاب اوستادین قلمی اینن مونتشیر اولوب كی اونون تازا نظرلری ایسلامی كونفرانسدا مطرح و ایستیفاده اولوب. بو كیتاب اینگیلیسی دیلینه ترجومه و چاپ اولوب و ژاپونی دیلینه ده ناكویا دانیشگاهین اوستادلاری نین بیرینین الیله ترجومه اولماقدادیر. اوستاددان 60 دان آرتیق كیتابیدا هله چاپ اولماییب و گله جاقدا چاپ اولاجاق. كی بو ترتیب اینن چاپ اولمامیش اثرلری 150 عونوان اولور. اوستادین كیتابلاری بو زمینه لرده دیلر: فیقه ، سیاسی علملر ، روانشیناسی، تربیتی علملر ، ایسلامی معاریف، ایسلامدا هونر و گؤزللیك نظریه سی، فلسفی و كلامی بحثلر كی دولودور تازا و بدیع نظریه لری نن. دونیانین باشا باشیندان اونلارجا اوستاد و دوشونجه صاحیبلری اوستاد جعفری نن علمی موذاكره لری واریدی كی بو دانیشیقلارین 50دن چوخو 2 جیلد كیتابدا «دوشونجه لر تكاپوسو» آدیندا یاییلیب. علامه جعفری نین دانیشیقلارین بو لینكلردن دانلود ائده بیلرسیز: علامه جعفری نین تورك دیلینده دانیشیغی  41 مگابایت اینسانین گؤزللیگی و روحانی شخصیتی موختلیف زمینه لرده دانیشیقلار 1  260 مگابایت 2  250 مگابایت 3  240 مگا بایت 4  265 مگابایت 5  113 مگابایت 6   131 مگابایت