اوشاقلارلا نئجه دانیشماق لازیمدیر
یازار : میرزه عبدالصمد ملکی | بؤلوم : اجتماعی
+0 به یه ن
 |
||
|
سؤزلر اوشاغین ذهنینی دگیشه بیلر. چالیشین اونلارلا دانیشاندا اَن یاخشی سؤزلری ایشلدین. آتا-آنا اولماق اَن چتین ایشلرین بیری و عین حالدا ایشلرین اَن معنالیسیدیر. تأسوفله مسئولیتلی اوشاقلارین تربیتی بارهده موجود فیكیرلر بعضاً ایشتیباه رابیطهلره مونجر اولور. بعضی والدینلر ایجازه وئرمك مئتودلاریندان ایستیفاده ائدیرلر اوشاغین ایستیقلالینی الیندن آلیرلار. بعضی والدینلر ده ایجازه وئرمكده حددن آرتیق بوش توتورلار اوراجن كی اوشاق فردی محدودیتی اؤرگشمیر. تحقیقلر گؤرسدیر كی بو یوللارین هر ایكیسیده اوشاقلاردا بویوگندن سونرا سالیم رابیطه قورماغی چتینلدیر.اَن یاخشی تربیت احتیراملی و عدالتلی مئتوددور كی اونون هدفی اوشاغین تسلیم اولماسی یوخ بلكه اؤرگشمهسی اولسون. اوشاغین احساسلارین ائشیدیب و اونا احتیرام قویماق, اونا سئچیم حقّی وئرمك و قبول اولونا بیلمهین عمللرین قاباغیندا عادیلانه و موشخص محدودیتلر قویماق, سالیم بیر دنگه یارادار. بو مقالهده سیزه اؤرگدیریك كی اوشاقلارلا رابیطهده نتیجهسیز و اثرسیز یوللاردان ایجتیناب ائدهسیز. 1. چوخ دانیشماق والدین حددن آرتیق دانیشسالار اوشاقلار قولاق آسمازلار. موحقیقلر دئییرلر كی اینسانین بئینی بیر زماندا فقط دؤرد تیكه ایطّیلاعات و یا مخصوص ایده, قیسا مودّت حافیظهده ساخلایا بیلر. بو میقدار 30 ثانیه و یا ایكی جومله اولور. فایداسیز نمونه: «بیلمیرم بو تئرم سنین والیبال و اوزماق كیلاسینی نه ائدیم. حتماً جور گلمز كی اونلارین هر ایكسینهده گئدهسن چونكی والیبال كیلاسین شنبه، دوشنبه و چرشنبه ساعت 16 اولور كی اوزماق كیلاسینا حاضیرلاشاندان سونرا واختین اولمایاجاق, مگر بو كی او كیلاسین وساییلینیده قاباقجادان ییغاسان و اؤزونله آپاراسان و بو یعنی پالتارلارین جومعه گونو یویولمالیدیر . . .» بو پیامدا موختلیف ایدهلر وار كی اوشاغی گیج قویار و بو دا باعیث اولار داها سیزین دانیشیغیزا قولاق آسماسین. هابئله بو دانیشیغین كولّی پیامی ایضطیرابلی و منفیدیر كی باعیث اولار اوشاق ایسترس و تردیدله عكسالعمل نیشان وئره. لازیم دئییل بو ایطّیلاعاتین هامیسی بیر یئرده اوشاغا وئریله. اونو نئچه یئره بؤلون كی بیلمگی راحات اولسون. مانعلری دئمهمیش ایجازه وئرین اوشاق اؤز اولویّتلرین دئسین. فایدالی نمونه: «ایستهسن كی بو تئرم, هم والیبال و هم اوزماق كیلاسینا گئدهسن, مجبورسان بیریندن قورتولوب فوراً او بیرسینه گئدهسن. بونا گؤره یاخشی اولار بو موریدده تصمیم توتاق.» بو نمونهده دانیشیغی ایكی جوملهده خولاصه ائدیبسیز و بو باعیث اولار اونون دركی اوشاغا راحات اولسون. ضیمناً اساس هدفیده دئمیسیز و ایكینجی مرحلهده تقاضانی مطرح ائلهمیسیز (كی اوتوروب بو موریدده دانیشاسیز.) و نهایتده بو كی اوشاغین ایستكلرین نظرده آلماغا اؤز مئیلیزی بللی ائلهمیسیز. 2. حددن آرتیق دئیینمك و هوشدار وئرمك آتا-آنالارین چوخو هر شئیین تئز حاضیرلانماسی اوچون سحر اوّل واختلارین تلسمهسی, ناهارلار, ورزیش پالتارلاری, ایمضالانمیش مشقلر و بوجور زاددلارلا تانیشدیلار. واختیندا حاضیر اولانمایان اوشاقلار مشغول والدین اوچون جیدّی دردسر ساییلیر. آتا-آنالارین چوخو احساس ائدیرلر كی كونترول اللریندن چیخیب و اومیدسیزلیكله ایستیرلر دئیینمكله موقعیتی كونترول ائلهسینلر. دئیینمگینده بو موشكولو وار كی اونونلا اوشاقلارا اؤرگدیرسیز كی سیزی گؤرمهدیم توتسونلار چونكی بیلیرلر كی یئنهده همان مسألهنی تیكرار ائدهجكسیز. كیچیك اوشاقلارین داها چوخ كؤمگه احتیاجلاری اولسا دا آتا-آنا اونلارین بؤیومهسیله اونلارا داها چوخ مسئولیت و آزادلیق وئرمهلیدیلر. فایداسیز نمونه (10 یاشلی اوشاغا) «سنی بیر ساعت تئز یوخودان اویادارام چونكی هئچواخت واختیندا حاضیرلانمیرسان. ایندی پالتارلاینی گئیمهلیسن. مشقلرینی حاضیرلاییبسان كی ایمضالایام؟» 10 دقیقه سونرا «سنه دئدیم حاضیرلاش و سن هله واخت تلف ائلیرسن؟ گؤرومدا ائله ایش گؤرهسن كی هامیمیز یوباناق؟ تئز اول گئت دیشلرینی یو و پالتارلارینی گئی.» 10 دقیقه سونرا «مشقلرین هانی؟ دئدیم گتیر ایمضالاییم, پالتارینی هله گئیمهمیسن؟ یوباناروق.» و یئنه تیكرار . . . بو اوشاغین آناسی چوخ مسئولیت بوینونا آلیر و غیر موستقیم او اوشاقلا دانیشیر و موقعیتی كونترول ائلهمك اوچون اونا اینانمیر. بو مودئل ترپشمك اوشاغین اؤزونه اعتیمادینی آرادان آپاریب اونو بؤیوكلره باغلی ائلر. آنانین لحنیده حیرصلی و منفیدیر كی اوشاغین حیرصی و موقاویمتینه باعیث اولار. فایدالی نمونه: «45 دقیقهیه جن ائودن چیخیریق. لازیم اولان وساییلی حاضیرلایانماسان, اؤزون موعلیملرینه توضیح وئررسن.» بو امرلر قیسادیلار و اوشاق او ایشلری گؤرمهسه بللی و موشخص بیر عاقیبتی مطرح ائلیر. بو یولونان اوشاغا ایمكان وئریلیر كی اؤز ایشلرینین طبیعی عاقیبتینی درك ائلهسین. 3. اوشاغی یولا گتیرمك اوچون تقصیر و اوتانماقدان ایستیفاده ائلهمك موهوم بیر مسأله وار كی كیچیك اوشاقلار سیزین احتیاجلاریزی درك ائلهمیرلر. اونلار بؤیودوكجن سیزی مولاحیظه ائده بیلیرلر. بونا گؤره بو اینتیظار كی اونلار اؤزلرین سیزین یئریزه قویالار و سیزین گؤزوزله باخالار, منطیقلی دئییل. ایندی كی بو ایشی گؤرنمیرلر, بو معنایا دئییل كی پیس اوشاقدیلار. فقط اوشاقدیلار و آنی لذّتلر و محدودیلتلرینی آزماییش ائلهمگه مشغولدولار. والدینلرین چوخونون باشی شولوغ اولور و نئچه ایشی بیر یئرده گؤرورلر و بعضاً یادلاریندان چیخیر كی اؤزلریندن موغایات اولسونلار. اوندا كی احساس ائدیرلر اوشاق اونلارینان همكارلیق ائلهمیر حیرصلهنیرلر. چوخ موهومدور كی بوندان قاباق كی بو احساس ائشیگه چیخا و سیزینله اوشاغیزین رابیطهسینی كورلایا, اؤزوزله خلوت ائلیهسیز و درین نفس چكمك و یا آیری یوللارلا حیرصیزی سویوداسیز. فایداسیز نمونه: «نئچه دفعه دئدیم كی اویناتمالیلارینی سهمانا سال, باخ گؤر اویناتمالیلار اوتاغین هر یئرینه داغیلیب. نیه بیر ذره دیقّت ائلهمیسن؟ گؤرمورسن كی سحردن آیاق اوستهیم؟ ایندی ده گرك گلم سنین اویناتمالیلارینی ییغام و واختیمی تلف ائدم؟ نیه بو قدر خودبین آدامسان؟» بو آنا چوخ منفی انرژی تولید ائلیر. بونونلا كی بیز اونون یورقونلوغون درك ائلیه بیلیریك آما اونون اوشاقلا رابیطهسی غیر مؤحترمانهدیر. اوشاغا «خودبین» دئمك چوخ موخرّیب ایشدیر. اوشاقلار بو منفی ماركلاری ایچلرینه تؤكرلر و یاواش-یاواش بیله فیكیرلشرلر كی كیفایت قدر یاخشی دئییللر. اوشاغی تحقیر ائلهمك و موقصیر بیلمك اونون بئینینی منفی ائلر. گرك قبول اولمایان ماركی عمله ووراسیز آما یئنهده اوشاغیزی سئوهسیز. فایدالی نمونه: «گؤرورم كی اویناتمالیلارینی هله ییغیشدیرمامیسان. بو منی ناراحات ائلیر. منه چوخ موهومدیر كی ائو مورتّب اولا و هامیمیز راحات اولاق. ائشیكده اولان اویناتمالیلار گئدیب یئرلرینده یاتمالیدیلار. صاباح سحر یئنه اونلاری ائشیگه اؤتوره بیلرسن.» بو آنا حیصرلنمهدن و بیرینی موقصر ائلهمهدن اؤز احساسلارین و ایستكلرین مطرح ائلیر و اوشاغینا دا پیس عاقیبت خط-نیشان چكمیر و اونا توضیح وئریر كی صاباح تازادان ایمتحان ائلهسین. او اوشاغا منفی انگیزه یاپیشدیرمیر و یا اونون شخصیتینه توخونمور. قولاق آسماماق هامی سئور كی اوشاغی آیریلارینا احتیرام قویسون. بونون اَن یاخشی یولو اؤز رابیطهلریمیزده احتیراملی رفتارلا اولگو دوزتمكدیر. بو باعیث اولار اوشاق احتیرامین ارزیشینی بیلسین. چوخ واختلار دیقتله قولاق آسماق والدینلر اوچون چتین ایش اولور چونكی اوشاقلار معمولاً سؤزون آراسینا آتیلارلار و بیزیم ذهنیمیز ده گؤرولمهلی ایشلرله دولودور. بو صورتده اوشاغا دئیه بیلریك كی ایندی اونا قولاق آسا بیلمریك چونكی كیتاب اوخوروق, آما 10 دقیقه سونرا اونون یانینا گئدیب و سؤزلرینه قولاق آساق. چوخ یاخشی اولار كی اونو دیقّتلی ائشیتمك اوچون اونون سؤزلرینه قولاق آسماغا موشخص زمان آییراق. البته یادیزدا اولسون كی اوشاقلار چوخ دؤزه بیلمزلر. فایداسیز نمونه: آنانین عكس العملی بیر اوشاغا كی دئییر فوتبالدا بیر قول ووروب. (گؤزلرینه باخمادان) «اوغلوم! چوخ قشنگدی. ایندی گئت باجینلا اوینا (اؤز-اؤزون زمزمه) گازین شؤعلهسین نیه بوقدر چوخاتدیم؟» فایدالی قولاق آسماق, گؤزونه باخماق و ال-اوز حركتی كیمی كلامسیز رابیطهلر و موناسیب كلمهلردن ایستیفاده ائلهمكله مونعكیس اولار. بو آنا اوشاغا بیلیندیریر كی اونو اذیّت ائلهمهسین و اونا موهوم اولان زادلار آنایا موهوم دئییللر. بو باعیث اولار اوشاق تكلیك احساس ائلهسین. فایدالی نمونه: آنانین عكس العملی بیر اوشاغا كی دئییر فوتبالدا بیر قول ووروب. «بهبه! قول ووردون؟ چوخ عالیدی! اعلادی! من سنه فخر ائلیرم. بیر آزدان سونرا گلیرم یانینا ایستیرم منه تعریفلیهسن!» بو آنا اؤز شوق و علاقهسینی گؤرسدیر؛ و اوشاقدان ایستیر كی تعریفلهسین. او اؤز احساسینی فایدالی صورتده گؤرسدیر و اوشاغا ایجازه وئریر اؤز عكسالعمللرینه آگاهلیغی اولسون. بوجور عكسالعمل باعیث اولار اوشاق بیلسین كی موهوم و ارزیشلیدیر و دیقّت مركزینده اولماغا لیاقتی وار. اوشاقلاری تربیت ائلهمك چوخ چتین ایشدیر و هامی بعضاً ایشتیباه ائلر. اوشاقلا دوزگون رابیطه چوخلو زمان و انرژییه احتیاجی وار. اؤز احساسلاریمیزدان و عكسالعمللریمیزدن خبریمیز اولمالیدیر كی اَن دوز یولو سئچك. ایشلرین عاقیبتین اوشاقلارا نیشان وئرمك, اونلارا محدودیتلری اؤرگدیر و سؤزلرینه قولاق آسماق احتیرام قویماغی اونلارا اؤرگدیر. اؤزوزدن یاخشی موغایات اولمالیسیز كی اوشاقلارین تربیتینه لازیم اولان انرژیز اولسون. مؤحترم, موتعهید و انرژیلی آتا-آناسی اولان اوشاقلار احساسلارینی داها دوز تعدیل ائلیه بیلرلر و بؤیوگندن سونرا داها یاخشی رابیطهلری اولار. |
||
ساندویچ یئمگین جرمهسی وار
یازار : میرزه عبدالصمد ملکی | بؤلوم : خبرلر
+0 به یه ن
|
||
|
ایتالیا پایتختی رم شهرینین تاریخی مركزینده ساندویچ یئمك قادغان اولدو و بو خیلافا مورتكیب اولانلار جرمه وئرمهلی اولاجاقلار. فرانسه خبرگوزاریسینین وئردیگی خبره گؤره, رم شهرداریسی تازالیقدا بو قانونی ایجرا ائدیر و اونون اساسیندا بو شهرین تاریخی مركزینده ساندویچ یئمگین 25 دن 500 یورویا دك جرمهسی وار. رم شهرداریسی اؤز ایطیلاعیهسینده تأكید ائدیب بونا گؤره كی تاریخی بینالارین یانیندا ساندویچ یئییب نوشابه ایچمك مانع اولور كی جماعت و توریستلر بو بینالارین منظرهسیندن لذّت آپارسینلار, بونا گؤره بو محدودهده هر جور ساندویچ و نوشابه یئییب-ایچمك قدغاندیر و بو خیلافا مورتكیب اولانلار 25 دن 500 یورویا دك جرمه وئرمهلی اولاجاقلار. بو قانون هلهلیكده آزماییشی صورتده دسامبرین 31-دك ایجرا اولاجاق. عین زماندا ایتالیانین ونیز, فلورانس و بولونیا كیمی آیری شهرلریده شهرین تاریخی مركزینده ساندویچ یئمك قادغانلیغینی ایجرا ائدیبلر. |
||
پیس فیكیرلری بیلمك/خطرلی فیكیرلری نوطفهده خفهلهین تكنولوژی
یازار : میرزه عبدالصمد ملکی | بؤلوم : تكنولوژی
+0 به یه ن
|
||
|
تازالیقدا موحقیقلر ائله بیر تكنولوژییه ال تاپیبلار كی ائلیه بیلیر پیس و خطرلی فیكیرلری هله اینسانین بئینینده تشكیل تاپمامیش تاپسین. تحقیقلر گؤرسدیر كی اینسانین گؤرمه محدودیتی, گؤرمه منطقهنین گئنیشلیگی و گؤزون یورقونلوغو, باعیث اولور فقط گؤرمه علمیندن ایستیفاده ائلهمك چتین اولسون. بو تكنولوژی «خطری تانیییب و هوشدار وئرمه» سیستمیندن(CT2WS) ایستیفاده ائلهمكله و شبكهیه وصل اولموش ایكی گؤزلو بیر دوربینله, ائلیه بیلیر خطرلی فیكیرلری كی ایمكانی وار سربازلارین ذهنینده یارانسین, تانیییب مهار ائلهسین. دالغالاری تشخیص وئرن بؤرك شاید بو تكنولوژی تخیّولی ناغیللارا بنزهیه آما دئمك لازیمدیر كی CT2WS تكنولوژیسی بیر واقعی و علمی اساسدا قورولوب. بو علم ثابیت ائدیر كی آداملار ذاتی صورتده بیر-بیرلرینین فیكیرلرینی اوخویا بیلرلر. دستگاه بالقوه بیر خطرلی حركتی تشخیص وئرنده مثلاً بئیینده آنی بیر حركت گؤرنده, بئینین دالغا شومارهسینی 300 نیشان وئریر. CT2WS سیستمی بو دالغالاری درجهبندلیك و ترجومه ائدیب و آخیرده بیر هوشدار زنگیله او قورخولو فیكری موشخص ائدیر. بیرینجی آددیم بئییندن یوللانان دالغالاری ثبت ائلیه بیلن بؤركوله شخصین فیكیرنی كونترول ائلهمكدیر. اوندا كی دستگاه ائلیه بیلدی 120 پیكسللی و 120 درجهلی بیر دوربینله فیكیری موشخص ائده, شخصین باشینا قویولان و سیستمه وصل اولان بؤرك تصویرلر ثبت ائدیر. بو پروسهنین آخیر مرحلهلری ده بوروشوق اعمالدیر كی بیر لپتاپدا ایجرا اولور. |
||
هاوانین شاختاسی زلزلهزدهلرین اورك داغینی چوخالدیر
یازار : میرزه عبدالصمد ملکی | بؤلوم : خبرلر
+0 به یه ن
|
||
|
جام جم آنلاین: قیش یئتیشیر, شاختا یاواش-یاواش اؤزونو گؤرسدیر و صیفردن آشاغی درجهده هر ساختیماندا یاشاماق چتیندیر, هله قالسین كی او شاختادا موناسیب اولمایان چادیر ایچینده كیچیك اوشاقلار و خسته قوجالاریلا قالاسان. كندلیلر دئیرلر ایستیلتمه وساییلدنده خبر یوخدور, چادیرلار سو كئچمز دئییرلر و بیر طرفدنده یاغیش سویو اونلارین آلتیندان كئچیر. «بوردا گئجهلر چوخ سویوق اولور, بیزیم ائو-ائشیگیمیز یوخدور و گئجهنی سحرهجن تیر-تیر تیترهییروق.» بو زلزلهزدهلرین سسیدیر كی ایستیرلر سسلری مسئوللارین قولاغینا چاتسین. دئییرلر ایندی كی خاروارلار تورپاغین آلتیندان سالیم چیخمیشیق اومیدواریق كی قیشی اَن آز ایمكانلارلا باشا وئرك. منطقهده پاییز یاغیشلاری باعیث اولوب زلزلهزدهلرین چادیرلارینا سو دولسون. درهلرده قورولموش چادیرلاری سو آپاریر و اوجالیقلاردا قورولموش چادیرلاری پاییز كولگی آپاریر. ایندی شاختا فصلینین یاخینلاشماسیله كندلیلرین چارهسی قالماییب كی, هر جانلی وارلیغا یاشاییشی چتینلهدن سویوقدا, قیشی باشا وئرسینلر. زلزلهزده كندلرین هامیسینین وضعیتی بئلهدیر؛ بیر حالدا كی مسئوللار زلزلهزدهلرین ائولرینی تحویل وئرمكدن دانیشیرلار. آما یئتیشن گوزاریشلره گؤره جماعتین چوخو چادیردا و بؤحران شراییطده یاشیرلار. بو منطقهنین هاوا شراییطی گؤرسدیر كی چوخ تئز یاغان قار نه ورزقان, اهر و هریس ائولرینین دامی بلكه زلزلهزدهلرین چادیرلاری اوستونده اوتوروب. زلزلهزده منطقهلرین تازادان دوزلتمهسینده كمكارلیق, ایندی اوستانین نومایندهلرینینده سسینی چیخاردیب. ائله كی اهر, ورزقان و هریس شهرلرینین ایكی نومایندهسی عباس فلاحی و الله وردی دهقانی, جام جم آنلاینا دئدیدیلر كی ایشلر بئله گئتسه زلزلهدن دیری قورتولانلار شاختا و ناخوشلوق اثرینده آرادان گئدهجكلر. |
||
نوبل جاییزهسی
یازار : میرزه عبدالصمد ملکی | بؤلوم : تكنولوژی
+0 به یه ن
|
||
|
یئر سیّارهسی میلیاردلار آدامینان دولودور كی هامیسی ایشلهمك, اویناماق, دوشونمك و گیجللندیرن یوللارین ایچیندن دوز یولو تاپماغا مشغولدولار. بو قارما-قاریشلیغین ایچینده اینسانلارین بیر عیدّهسی دیقّتلرین الدن وئرمیرلر و حیاتلا اوز به اوز اولماغا تازا یوللار تاپیرلار و بونلارین بیر عیدّهسیده نوبل جاییزهسینی آلیرلار. نوبل جاییزهسی هركسه وئریلن جاییزه دئییل. بو جاییزه 1895-جی ایلینده موخترع و اینسان حقوقی زمینهسینده چالیشان سوئدلی آلفرد نوبل طرفیندن قویولدو و علمی-فرهنگی, ادبیات, ایقتیصاد, صولح و باریش, فیزیك و طیب زمینهسیندهكی قاباغا گئتمكلری تشخیص وئریر. نوبل جاییزهسی ارزیشلیدیر آما نوبل جاییزهسینه باعیث اولان ایشلر داها ارزیشلیدیر. نوبل جاییزهسینی قازانانلار ائله موتفكیرلردیلر كی اؤز یاشاییشلارینی اینسان حیاتینین رازلارینین آشكار اولماسینا وقف ائدیبلر, اونلار اینسانین جمعی عاغلینین چوخالماسینا كؤمك ائدیب و اونلارین بیر عیدّهسی اؤز موطالیعهلریله اینسانین یاشاییشینی تپ-چئویر ائدیبلر: ماری كوری بو فرانسهلی-لهستانلی خانیم اؤز موطالیعهلریله عالیملرین باخیشلارینی دونیایا نیسبت دگیشه بیلدی. كوری 1867-ده دونیایا گلدی و عؤمرونون چوخونو رادیو اكتیو قایدالاری موطالیعهسینده كئچیتدی. 1903-ده حیات یولداشی پیر و هنری بككوئرل ایله بیرلیكده فیزیكده تشعشوعات (رادیو اكتیو) حادیثهسی زمینهسیندهكی موطالیعهلرینه گؤره نوبل جاییزهسینی آلدیلار. ماری كوری 1911-ده و بو دفعه رادیوم و پولونیومون كشفینه گؤره نوبلین شیمی جاییزهسینی آلدی. آلبرت انشتین فیزیك نوقطه نظریندن, انشتین دونیایا و بوتون وارلیغا تازادان باخماغا كؤمك ائلهدی. او شیمی و ریاضی ریشتهسینده تحصیلینی قورتاراندان سونرا سوییسین ایختیراع ثبت دفترینده ایشه باشلادی و بئكار واختلاریندا جرم-انرژی برابرلیغینی كشف ائدیب نیسبیّت نظریهسینی ایرائه وئردی. 1921-ده فوتو الكترونیكین تأثیرینین كشفینه گؤره فیزیك نوبل جاییزهسینی قازاندی و بو كشفین اثرینده تیلویزیون و سینما كیمی كشفلر اولوندو. ایوان پاولوف او 1904-ده نوبلین فیزیولوژی جاییزهسینی قازاندی. اونون اَن مشهور تحقیقلری شرطی عكسالعمللر زمینهسینده اولوب. او اؤز مشهور آزماییشینده هر دفعه ایتلره یئمك وئرنده, زنگ چالیردی و بو آزماییشی نئچه دفعه تیكرار ائدندن سونرا, ایتلر زنگ سسی ائشیدنده آغیزلارینین سویو آخیردی. چوخ چكمهدی كی بللی اولدو آداملاریندا اوخشار خصوصیتلری وار. پاولوفون باخیشی روانشیناسی علمینده تازا قاپیلار آچدی. |
||