امام رضانین (ع) دیلیندن پیغمبرین (ص) توصیفی
یازار : میرزه عبدالصمد ملکی | بؤلوم : دین
+0 به یه ن
امام رضانین (ع) دیلیندن پیغمبرین (ص) توصیفی
قرآن كریم دفعه‌لرله پیغمبردن آد آپاریب و اونو عظیم اخلاق صاحبی، رئوف و رحیم، حسنه اسوه و . . . آدلاندیریب. ائمه ده (ع) پیغمبریمیزین خصوصیّتلری باره‌ده دَیَرلی سؤزلر دئییبلر. او جمله‌دن امام علی بن موسی الرضا(ع) پیغمبرین شخصیتی و او حضرته احترام قویماغین واجبلیگی باره‌ده بویوربلار: «اذا سمیتم الولد محمداً فاكرموه و اسعوا له فی المجالس و لا تقبحوا له وجهاً؛ بیر اوشاغین آدینی محمد قویدوغوزدا، اونو عزیزله‌یین و مجلسلرده اونا یئر وئرین و اونونلا قباحتلی اوز به اوز اولمایین». (1)
او حضرت آیری یئرده بو باره‌ده بویوربلار: «ما مِن مائدةَ وُضِعَتْ فَقَعَدَ عَلَیها مَن اسمه محمّدٌ أو أحمدُ إلاّ قُدِّس ذلكَ المنزِلُ فی كُلِّ یَومٍ مَرَّتَین؛ احمد و یا محمد آدیندا اونون باشیندا اولمایان هئچ سفره آچیلماز، مگر او ائو گونده ایكی دفعه تقدیس اولار».(2)
امام رضا (ع) هابئله محمد آدی‌نین عظمتی و بركتی باره‌ده بویوروب: «لا یَدْخُلُ الفَقْرُ بَیْتاً فِیه اسمُ محمّدٍ أو أحمد أو علیٍّ أو الحسنِ أو الحسینِ أو جَعْفَرَ أو طالب أو عبداللهِ أو فاطمة مِنَ النساء؛ بو آدلار اولان ائوه یوخسوللوق داخل اولماز: محمد، احمد، علی، حسن، حسین، جعفر، طالب، عبدالله، و خانیملاردان فاطمه».(3)
امام رضا(ع) پیغمبرین (ص) و اونون اهل بیتی‌نین (ع) مقامی باره‌ده او حضرتین دیلی ایله بئله یویورور: «قال رسول الله صلی الله علیه و آله: یا علی، خلق الناس من شجر شتی، و خلقت أنا و أنت من شجرة واحدة، أنا أصلها، و أنت فرعها و الحسن و الحسین أغصانها... فمن تعلق بغصن من أغصانها أدخله الله الجنة..؛ رسول الله (ص) بویوردو: ای علی! جماعت مختلف آغاجلاردان یارانیبلار آما من ایله سن بیر آغاجدان یارانمیشیق. من او آغاجین ریشه‌سی، سن گؤوده‌سی، حسن و حسین اونون بوداقلاری و سئونلریمیز اونون یارپاقلاریدیلار. هر كس او آغاجین بوداقلاریندان بیرینه ال آتا، الله تعالا اونو جنتّه داخل ائلر». (4)
امام رضا (ع) آیری بیر روایتده پیغمبره نئجه صلوات گؤندرمك باره‌ده بویوربلار. ابن اَبى‌نَصْر دئییر: امام رضانین (ع) محضرینه عرض ائله‌دیم: نمازدان سونرا رسول الله-ا نئجه صلوات گؤرندرمك لازمدیر؟ جوابدا بویوردو كی دئیَرسن: «اَلسَّلامُ عَلَیْكَ یا رَسُولَ اللّهِ وَرَحْمةُ اللّهِ وَبَرَكاتُهُ اَلسَّلامُ عَلَیْكَ یا مُحَمَّدَبْنَ عَبْدِاللّه اَلسَّلامُ عَلَیْكَ یا خِیَرَةَاللّهِ اَلسَّلامُ عَلَیْكَ یاحَبیبَ اللّهِ اَلسَّلامُ عَلَیْكَ یا صِفْوَةَ اللّهِ اَلسَّلامُ عَلَیْكَ یا اَمینَ اللّهِ اَشْهَدُ اَنَّكَ رَسُولُ اللّهِ وَاَشْهَدُ اَنَّكَ مُحمَّدُ بْنُ عَبْدِ اللّهِ وَاَشْهَدُ اَنَّكَ قَدْ نَصَحْتَ لاِمَّتِكَ وَجاهَدْتَ فى سَبیلِ رَبِّكِ وَعَبَدْتَهُ حَتّى اَتاكَ الْیَقینُ فَجَزاكَاللّهُ یا رَسُولَ اللّهِ اَفْضَلَ ما جَزى نَبِیّاً عَنْ اُمَّتِهِ اَللّهُمَّ صَلِّ عَلى مَحَمِّدٍ و آلِ مُحَمِّدٍ اَفْضَلَ ما صَلَّیْتَ عَلى اِبْراهِیمَ وَ آلِ اِبْراهیمَ اِنَّكَ حَمیدٌ مَجیدٌ.
سنه سلام اولسون ای رسول الله و الله-ین رحمت و بركتلری. سنه سلام اولسون ای عبدالله اوغلو محمد. سنه سلام اولسون ای اللهین سئچیلمیشی. سنه سلام اولسون ای اللهین حبیبی. سنه سلام اولسون ای اللهین سئچیلمیشی. سنه سلام اولسون ای اللهین امینی. شاهد گئچیرم كی سن اللهین گؤندرمیشی‌سن و شاهد گئچیرم كی سن عبدالله اوغلو محمدسن و شاهد گئچیرم كی سن اؤز امّتین اوچون خیرخواه ایدین و الله یولوندا جهاد ائله‌ییب یقین (اؤلوم) سنه گلینجه اونو عبادت ائله‌دین. ای رسول الله، الله سنه اجر وئرسین، امتی طرفیندن پیغمبرلرینه وئریلن اَن یاخشی اجر. الله‌یم! محمد و اونون اهلینه، ابراهیم و اهلینه گؤندردیگین اَن یاخشی سلامدان گؤندر. البته كی سن حمید و مجیدسن».(5)
هایئله امام رضا (ع) بویوروب: «اِنّا اَهلُ بَیْتٍ نَرى وَعدَنا عَلَینا دَینا كَما صَنَعَ رَسولُ اللّهِ صلى الله علیه و آله؛ بیز اهل بیت وئردیگیمیز وعده‌لری اؤزوموز اوچون بورج و دین حسابلاریق، رسول اللهین ائله‌دیغی كیمی».(6)
هابئله امام رضا (ع) رسول اكرمین (ص) امامت و ولایت مقامی‌نین وصفینده بویوروب: «امامت، ابراهیم نسلینده قالیردی و بیر-بیر نسلدن نسله اونو ارث آپاریردیلار. اسلام پیغمبری (ص) اونو ارث آپاراندا الله تعالا بویوردو: «انّ اولی الناس بابراهیم للذین اتبعوه و هذا النبی والذین آمنوا والله ولی المؤمنین؛ البته ابراهیمه اَن یاخین اولان انسانلار، اونو تبعیّت ائدنلر و [هابئله] بو پیغمبر و ایمان گتیرنلر و الله، مؤمنلرین ولیسیدیلر». و بو امامت رسول الله-ا مخصوص ایدی كی اللهین امری ایله حضرت علی‌نین (ع) عهده‌سینه قویولدو سونرا او دسته، حضرت علی‌نین (ع) نسلیندن سئچیلدی و الله تعالا اونلارا علم و ایمان وئریب. . . بو امامت قیامت گونونه قدر علی‌نین (ع) اوشاقلاریندا قالاجاق.(7)
امام رضا (ع)، رسول الله باره‌سینده بویوربلار: «إن رسول الله(ص) یوم القیامة آخذ بحجزه تعالى ونحن آخذون بحجزه نبینا وشیعتنا آخذون بحجزتنا ثم قال: والحجزة النور وقال فی حدیث اخر: معنى الحجزة: الدین؛ قیامت گونو رسول الله (ص)، اللهین اتگیندن توتار، بیز ده پیغمبریمیزین اتگینه و بیزیم شیعه‌لریمیز ده بیزیم اتگیمیزه ال آتارلار». سونرا بویوردو: «اتكدن منظور ایشیقدیر». و آیری حدیثده بویوردولار: «اتكدن منظور دیندیر».(8)
امام رضا (ع) بیر آیری روایتده پیغمبریمیزین (ص) اخلاقی خصوصیتلری باره‌ده آتالاریندان و امام حسن مجتبی‌دن (ع) بئله نقل بویورور: «كانَ رَسولُ اللّه صلى الله علیه و آله فَخْما مُفَخَّما... یَتَـكَلَّمُ بِجَوامِعِ الكَلِمِ فَصْلاً لا فُضولَ فیهِ و لا تَقصیرَ. دمثا، لَیْسَ بِالجافى و لا بِالْمَهینِ تَعظُمُ عِنْدَهُ النِّعْمَةُ و اِنْ دَقَّت لا یَذُمُّ مِنها شَیئا غَیْرَ اَنَّهُ كانَ لا یَذُمُّ ذَواقا و لا یَمدَحُهُ و لا تُغضِبُهُ الدُّنْیا و ما كانَ لَها، فَاِذا تُعوطىَ الحَقّ لَم یَعْرِفهُ اَحَدٌ، و لَم یَقُمْ لِغَضَبِهِ شَى ءٌ حَتّى یَنتَصِرَ لَهُ...؛ رسول الله (ص) عظمتلی ایدی . . . آرتیق-اسكیكسیز جامع سؤزلر دانیشاردی. مهربان ایدی، هئچ كسه ظلم ائله‌ییب هئچ كسی تحقیر ائله‌مزدی. نعمتی آز دا اولسایدی عظمتلی سایاردی و اونو مذمّت ائله‌مزدی. یئمگین دادینی نه تعریفلردی و نه پیسلردی. دنیا و اونا مربوط اولانلار اونو غضبلندیرمزدی. حق ضایع اولان زمان، اونو حاكم ائلیه‌نه قدر هئچ زاد اونون غضبین سویوتمازدی و هئچ كسی تانیمازدی».(9)
__________________________________________________
1 ـ عیون اخبار الرضا،ج2، ص 16، ح 29
2 ـ صحیفة الرضا(ع)، ص88، ح20؛ عیون أخبار الرضا(ع)، ج2، ص29، ح31
3 ـ فروع كافی، ج6، ص19، ح18
4 ـ عیون أخبار الرضا(ع)، ج2، ص134، ح324
5 ـ مفاتیح الجنان، اسوه نشریّاتی ، قم، ص 56
6 ـ تحف العقول، ص 446
7 ـ عیون اخبار الرضا ج 1 ص 217 و 218
8 ـ عیون اخبار الرضا ج 1 ص 254 ح 20
9 ـ عیون اخبار الرضا، ج 2، ص 635،ح 1
پیغمبرین ولادت یئری
یازار : میرزه عبدالصمد ملکی | بؤلوم : دین
+0 به یه ن
پیغمبرین ولادت یئری
پیغمبریمیزین (ص) ولادت مكانی، ابی طالب شعبی‌نین اوّلینده‌دیر و ایندیلیكده میلاد مكانیندان مسعی‌یا قدر داش دؤشنیب.
رسول الله مدینه‌یه كؤچنده بو ائوی ابوطالب اوغو عقیلین اختیاریندا قویدو و اوندان سونرا اونون اوشاقلاری و نوه‌لری‌نین اختیاریندا اولدو. سونرالار هارونون آروادی خیزران اورانی آلدی.
مسلمانلار بو یئری عزیزلردیلر و مخصوصاً پیغمبریمیزین (ص) ولادت گئجه‌سی اوردا مراسیم قوراردیلار. سعودیلر ایش اوستونه گلنده، بونا تای یئرلرین ییخیلماسی ایله عین زماندا، مولد النبی ده خرابلاندی.
مكه‌نین او زمانكی شهرداری‌نین ایستگی ایله قرار اولدو همان مكاندا كتابخانا دوزلسین كی بو گون همان كتابخانا «مكتبة مكة المكرمه» آدی ایله فعالیّتده‌دیر.
تورپاق آلتیندا یاتان گئچمیشلریمیز/ 700 ایللیك ربع رشیدی دانشگاه خراب اولور
یازار : میرزه عبدالصمد ملکی | بؤلوم : اجتماعی
+0 به یه ن
تورپاق آلتیندا یاتان گئچمیشلریمیز/ 700 ایللیك ربع رشیدی دانشگاه خراب اولور
اؤلكه‌نین اَن بؤیوك و اَن قدیمی علمی مجموعه‌سی‌نین قالیقلاری بو گونلر مسئول‌لارین دقّتسیزلیگی نتیجه‌سینده خرابلیغا اوز قویوب و تورپاقدا قویلانیر.
هر دؤرد بوجاغیندا بیر دانشكده اولان بو وسعتلی دانشگاهین بناسینی، رشیدالدین فضل الله همدانی قویدو. ربع رشیدی دانشگاهی‌نین وسعتی او قدر آرتدی كی كتابخانا، مدرسه، حمام ، مسجد، مریض خانا، قوناق ائولری و دانشگاهی اولان كیچیك بیر شهره چئوریلدی.
او عظمتلی دانشگاهدان، بو گونه فقط دؤرد عمارت پایاسی و داش و تورپاق قالیر و مسئول‌لارین دقّتسیزلیگی تأثیرینده گوندن گونه داها خراب وضعیّته قالیر.
ربع رشیدی‌نین احیاسی و تازادان قورولماسی اسلامی تمدّنون مظهری كیمی، اؤلكه‌نین فنّی و علمی زمینه‌لرده قاباغا گئتمه‌سینه سبب اولا بیلر.
1381-جی ایلینده اؤلكه‌میزین بیر تعداد فرهنگی و دانشگاهی فعّال‌لارین چالیشماسی سایه‌سینده ربع رشیدی فرهنگی-تاریخی-علمی مجتمعین اساسنامه‌سی انقلاب فرهنگی‌نین عالی شوراسیندا تصویب اولدو آما بو گونه قدر بو زمینه‌ده هئچ مثبت آددیم گؤتورولمه‌ییب.
زهری بدندن نئجه آلماق اولار؟
یازار : میرزه عبدالصمد ملکی | بؤلوم : ساغلاملیق
+0 به یه ن
زهری بدندن نئجه آلماق اولار؟
مختلف سمّ‌لر و هوا چیركندیریجی مادّه‌لرین تولیدی بو گونكی صنعتی دنیاسی‌نین دغدغه‌لریندندیر. انسان و سایر موجوداتین یاشاییشینی خطره سالان زهرلی مادّه‌لر. صنعتی چیركندیرنلری تصفیه ائله‌مك، قورقوشوم، جیوه، مادیوم و آرسنیك كیمی مادّه‌لرین زهری‌نین تمیزلنمه‌سی اوچون اَن مناسب یولدور.
بو سمّ‌لر انسانین بدنینه نئجه داخل اولور؟ و اونلاری بدندن نئجه چیخارتماق اولار؟
اوست-اوسته بدنده اولان زهلری ایكی دسته‌یه بؤلمك اولار: بیتكی سمّ‌لری، حشره داوالاری، هوا چیركلیگیندن عمله گلن آغیر فلزّلر و مختلف دخانیات كیمی بو زهرلرین بؤیوك قسمی، ائشیكدن بدنه داخل اولورلار.
زهرلرین آیری قسمی‌ده، غذا و داوالارین بدنده تجزیه اولماسیندان تولید اولورلار.
سیگار چكماق بدنه زهر داخل ائله‌مگین بللی یوللاریندان بیریدیر، آما آیری یوللار دا وار كی مختلف زهلری انسانین بدنینه داخل ائلیر. تنفّس ائله‌دیگیمیز هوا، یئدیغیمیز غذا، ایچدیكلریمیز و آتدیغیمیز داوالار بدنیمیزه زهر داخل اولماغین آیری یوللاریدیر.
هابئله جسمی و روحی فشارلار بدنده بیر سئری زهرلرین تولیدینه سبب اولور.
ترله‌مه قاباغینی آلان اسپری‌لر، فلورسنت لامپلار، تصفیه اولموش قند و بزك و بهداشتی لوازماتی، بو زهلرین منبعی ساییلیر. بعضی ایچمه‌لیلرده یوخاری قندین اولماسی، دیشلری آرادان آپارماقدان علاوه بدنه چوخلو مقداردا سدیم كربنات داخل ائلیرلر.
كنسرو اولونموش غذالاردا اولان آرتیریلمیش مادّه‌لر گونده‌لیك بدنه داخل اولان زهرلردن ساییلیرلار. آیری طرفدن، حشره داوالارینداكی فلوراید و كلر چوخ راحت شكلده سودا حل اولوب انسانین بدنینه جذب اولور.
هابئله موبایل كیمی وسیله‌لردن عمله گلن مغناطیس دالغالاری‌نین معرضینده اولماق، بدنه ضرر وورا بیلن بیر سئری زهلرین تولیدینه سبب اولور.
زهرلر بدنه داخل اولان زمان، بیرینجی اولاراق قره جیگر و سونرا بؤیركلر اونو جذب ائدیب دفع ائله‌مگه چالیشیرلار. بو عمل غذانین داها یاخشی هضمی و بدنه لازم اولان انرژینی‌نین تأمینی اوچون فایدالی اولور.
تازا میوه و تره‌وزلرین گونده‌لیك مصرفی بدنین زهرینی آلماقدا، یوخاری نقشی اولا بیلر. مثلاً فیبر، كربوهیدرات و آنتی اكسیدنلا دولو اولان مادّه‌لرین مصرفی، بدنه، سمّلرین دفیعینده كؤمك ائلر.
فیبرلر باغیرساقلارین حركتینی آرتیرماقلا و آیری طرفدن باغیرساقلاردا اولان سمّ‌لره یاپیشماقلا بدنده‌كی سمّلرین دفع سرعتینی آرتیریرلار.
بدنین زهرینی آلماقدا تأثیرلی اولان مادّه‌لردن، بیتكیلرده اولان كلروفیلدیر كی بیتكیلرین فتوسنتز پروسه‌سینه كؤمك ائلر. بئله اینانیلیر كی، بو مادّه‌نین ملكول قورولوشونون هموگلوبینه اوخشاماسینا گؤره، او، انسان ساغلاملیغینا فایدالیدیر. كلروفیل قان آخیمی‌نین تمیزلنمه‌سینه، آغیز ایی‌نین محو اولماسینا، سرطانلی مادّه‌لرین تأثیرسیز اولماسینا و دیشلرین چورومه‌سی‌نین قاباغینی آلماغا سبب اولا بیلر.
كلروفیل، استالید زهرلرینی (یورقونلوق عاملی) و هیستامینلری (آلرژی عاملی) دفع ائله‌مكله انسانین یاشاییشینا مثبت تأثیر قویور.
دنیانین كلروفیلدن لاپ غنی مادّه‌سی یاشیل یوسوندو، ائله بونا گؤره ژاپنلی‌لار بو مادّه‌نی چوخ مصرف ائلرلر. بو یوسونلاردا اولان كلروفیل، فیبر و پلی ساكاریدلی تركیبات، بدنده اولان آغیر فلزّلر و حشره سمّلریندن قالان زهرلر و سایر چیركلندیرنلرله قاریشیب، اونلاری مدفوع یولو ایله بدندن دفع ائلر.
تحقیقلرین نتیجه‌سینه اساساً بیر آی بویوندا گونده‌لیك 3-2 گرم یوسون مصرفی، انسان بدنینی زهرلردن تمیزلیر.
آیری طرفدن بیتكی فیبرلری، غذانین داها یاخشی هضمینه فایدالی اولورلار و باغیرساقلارین طبیعی حركتینی آرتیرماقلا یبوست كیمی مشكل‌لری آرادان آپاریب هضم سیستمی‌نین داها ساغلام اولماسینا كؤمك اولورلار.
آشاغیداكی مناسب غذا رژیمی ایله هضم سیستمینی ساغلام ساخلاماق و اونا زهرلرین دفعینده كؤمك ائله‌مك اولار:
1. فیبرلی غذالارین یئمه‌سی.
2. گونده‌لیك یاشیل چای و تازا لومو سویو ایچمك.
3. C ویتامینلی اولان مادّه‌لرین یئمه‌سی. بو ویتامین گلوتاتیون تولید ائله‌مكله بدن زهرلرینی دفع ائله‌مگه كؤمك ائلر.
4. گونده‌لیك 8 لیوان سوی ایچمك. چونكی سو طبیعی اولاراق بدنین زهلرین و لازم اولمایان مادّه‌لرینی سودوك و تر یولو ایله دفع ائلر. ترله‌مگی آرتیرماق اوچون سونا لاپ گؤزل یولدور.
5. اضطرابسیز و مثبت انرژی ایله دولو یاشاییش.
6. درین نفس آلماق و اكسیژنین بدنه داخل اولماسی.
7. ورزش و فیزیكی فعالیت. گونده‌لیك بیر ساعت ورزش بدن زهرلری‌نین دفعینه لاپ گؤزل یولدور. ورزش زمانی نفس آلماق یئیینلشیر و قان آخینی آرتیر. نتیجه‌ده ترله‌مك و سودوك مقداری چوخالیر.
8. ساریمساق، كلم، جعفری، كنگر، قند چوغوندورو و ساری كؤكون مصرفی، بدنه زهرلری مخصوصاً قورقوشوم و جیوه‌نی دفع ائله‌مكده كؤمك اولار.
9. قیرمیزی رنگده اولان میوه‌لر بدن زهرینی آلماق اوچون اَن تأثیرلی مادّه ساییلیرلار. بو میوه‌لر پتاسیم‌دان دولو اولورلار و قارا جیگرین تمیزلنمه‌سینده تأثیرلیدیلر.
گؤز لنزی ایله قانین قندینی اؤلچمك اولار
یازار : میرزه عبدالصمد ملکی | بؤلوم : تكنولوژی
+0 به یه ن
گؤز لنزی ایله قانین قندینی اؤلچمك اولار
گوگل شركتی‌نین وئردیگی خبره گؤره بو شركت قانداكی گلوكوزون اندازه‌سینی بیلمك اوچون گؤز یاشیندان استفاده ائله‌مگه آنالیزلر آپاریر. دوزلمه‌سی نظرده توتولان لنز، سیمسیز بیر چیپ و لنزین ایكی لایه‌سی آراسیندا یئرلشن مینیاتوری گلوكوز سنسوروندان تشكیل تاپاجاق.
بین المللی دیابت فدارسیونون اعلامینا گؤره، 2035-جی ایلینه قدر هر اون مین نفردن بیر نفرین دیابتی اولاجاق.
دیابتلی انسانلار قانلارینداكی گلوكوزو تئز-تئز اؤلچمه‌لیدیلر. چونكی گلوكوزون بیردن بیره آزالیب و یا چوخالماسی‌نین قورخولو عاقبتی اولار. ایندیلیكده قانین نئچه قطره‌سی ایله گلوكوزون اندازه‌سینی تعیین ائدن دستگاهلار وار.
گوگل شركتی‌نین دئدیگینه گؤره، بو شركت بو لنزین بیرینجی نمونه‌لرینی آزمایش ائلیر. بو لنز هر ثانیه‌ده بیر دفعه قانداكی گلوكوزون مقدارینی اؤلچور.
بو شركت بو محصولو بازارا وئرمك اوچون آمریكانین داوا و غذایا نظارت ائدن سازمانی ایله مذاكره‌یه باشلاییب. هابئله شركت بو محصولو تكمیل‌لتمكدن اؤترو اؤزونه شریك آختاریر.