تبریز شهری، اؤلکه‌نین عاغیللی شهرینه تبدیل اولور/ تبریزده گونده‌لیک 3.4 میلیون نفر تردد ائلیر
یازار : میرزه عبدالصمد ملکی | بؤلوم : خبرلر
+0 به یه ن
تبریز شهری، اؤلکه‌نین عاغیللی شهرینه تبدیل اولور/ تبریزده گونده‌لیک 3.4 میلیون نفر تردد ائلیر
تبریز شهرداری بو شهرین عاغیللی شهره تبدیل اولونماسیندان خبر وئریب دئدی: تبریز اؤلکه کلانشهرلری ایچینده لاپ کهنه‌لمیش عمومی حمل نقل ناوگانینا صاحبدیر و گونده‌لیک 3.4میلیون نفر بو شهرده تردد ائلیر.
تبریز شهرداریسی‌نین عمومی رابطه‌لری‌نین وئردیگی خبره گؤره، نجفی تبریز شهرداریسی‌نین 94-جو ایلینده حمل نقل برنامه‌لری‌نین و اولویّتلری‌نین آراشدیرما جلسه‌سینده دئدی: تبریز شهرداریسی‌نین 94-جو ایلینده حرکت و فعالیتلری، شورانین تصویب ائله‌دیگی بودجه برنامه‌سی و تؤکدویو برنامه‌لر اساسیندا اولاجاق و بو برنامه‌دن کنار هئچ ایش گؤرولمیه‌جک.
تبریز شهرداری، مناسب برنامه تؤکمکق و اجرا نتیجه‌سینده تبریز عاغیللی شهره تبدیل اولماسینا تأکید ائله‌مکله آرتیردی: ایندی تبریز خیابانلاری شهروندلری و قوناقلاری مقصده هدایت ائله‌میر. معبرلری تابلو و علامتلرله شهروندلری پیاده و سواره وضعیتده مقصده هدایت ائلیه بیلن شرایطه گتیرمه‌لی‌ییک.
تبریز شهرداری تبریزی اؤلکه کلانشهرلری ایچینده لاپ کهنه‌لمیش عمومی حمل نقل ناوگانینا صاحب اولان شهر اولدوغونو و گونده‌لیک 3.4میلیون نفر بو شهرده تردد ائتدیگینی دئییب آرتیردی: شهرین ایندیکی ناوگانی احتیاجلارا جواب وئرمیر و بو شهرین اتوبسرانی و تاکسیرانیسی توسعه وئریلمه‌لیدیر.
او دولتین عمومی حمل نقله سوبسید وئرمه‌سینه تأکید ائله‌مکله آرتیردی: تبریز شهرداریسی کئچن ایلین آخرلریندن قرارداد باغلاماقلا 170 دستگاه بیر و ایکی کابینلی و برقی اتوبوسون حمل نقل ناوگانینا قوشولماسی‌نین مقدماتین حاضرلاییب و اونون کناریندا آیری 100 اتوبوسون اساسلی تعمیری ایله شهر اتوبوسلارینی اوچده بیر آرتیراجاق.
نجفی دئدی: کئچن ایله قدر تبریز متروسونا 430 میلیارد تومن هزینه ائله‌میشیک و 94-ون آخرینه قدر شهرداری میدانینا قدر مترونون ایشه سالینماسینی اومید ائلیریک.
پیادا یئریمگی راحاتلادان باشماقلار
یازار : میرزه عبدالصمد ملکی | بؤلوم : ساغلاملیق
+0 به یه ن
پیادا یئریمگی راحاتلادان باشماقلار
کارنگی دانشگاهی‌نین محقق‌لریندن اولان استیون کالینز طبیعت ژورنالیندا طراحلیق ائتدیگی تازا باشماقلار باره‌ده بیر مقاله یازیب.
او همکارلاری ایله چکمه‌یه اوخشار بیر وسیله دوزلدیب تست ائدیبلر کی یئریمگی راحاتلادیر.
پوستچولار و کنتور اوخویان مأمورلار کیمی گونده‌لیک اوزون مسافه پیادا یئریمک مجبوریتینده اولان انسانلار بو چکمه‌لردن استفاده ائله‌مکله ایشلری راحاتلاشاجاق.
بو وسیله‌دن استفاده ائله‌ینده بدنین متابولیک هزینه‌سی (کالری مصرفی) یوزده یئددی آزالیر. بو وسیله‌نین ایشی ائله ده بوروشوق دئییل بلکه عضله و تاندون کیمی هر آددیمدا انرژینی ذخیره ائلیر و سونرا همان انرژینی آیاغین یئردن قالخماسیندا آزاد ائلیر.
آیت الله سیستانی عراقین هر یئرینده فقط عراق پرچمی‌نین دالغالانماسینی ایسته‌دی
یازار : میرزه عبدالصمد ملکی | بؤلوم : خبرلر
+0 به یه ن
آیت الله سیستانی عراقین هر یئرینده فقط عراق پرچمی‌نین دالغالانماسینی ایسته‌دی
شیعه‌لرین عالیقدر مرجعی آیت الله سیستانی عراقین امنیتی نیرولاری و جماعتین بسیجیندن حمایت اولونماغی ایسته‌دی.
المسله‌نین وئردیگی خبره گؤره، آیت الله سیستانی شیعه‌لرین عالیقدر مرجعی، عراق نخست وزیری «حیدر العبادی» و اونون معاونی «نوری المالکی» ایله گؤروشده تروریستلر الیندن آزاد اولان منطقه‌لرده اونلارین و یا آیری دینی شخصیتلرین عکسلرینی منتشر اولماماسینی ایسته‌دی.
اونلار دئدیلر: بو اؤلکه‌نین هر یئرینده فقط عراق پرچمی اسمه‌لیدیر. بو گؤروشده عراقین امنیتی موضوعلاریندان بحث اولدو کی آیت الله سیستانی عراق شهرلرینی تروریستلریندن الیندن قورتارما عملیاتلاری‌نین سرعت تاپماسینی ایسته‌دی.
آیت الله سیستانی هابئله عراقین امنیتی نیرولاری و عمومی بسیجیندن حمایت اولونماسینی ایسته‌دی.
حضرت داوودون هانسی دعاسی اجابت اولمادی؟
یازار : میرزه عبدالصمد ملکی | بؤلوم : دین
+0 به یه ن
حضرت داوودون هانسی دعاسی اجابت اولمادی؟
شیخ حر عاملی، «احادیث القدسیه» کتابیندا بئله بیر روایت نقل ائدیب: حضرت داوود ناخوشلور، دعا ائلیر و همیشه اللرینی گؤیه اوزادیب الله الله ائلیردی. وحی گلیر: «چیگینلرین یورولوب اللرین دوشنه قدر یالوارسان‌دا دعانی مستجاب ائتمیه‌جگم!» او تعجب ائلیر. یئنه وحی گلیر: «من دردی وئریب درمانی‌دا وئرمیشم. سن درمان دالیسیجان گئتمه‌لیسن».
دعانین معناسی ایسته‌مکدیر آما فقط دیلده ایسته‌مک یوخ، بلکه دوغرودان ایسته‌مک معناسیندادیر. دوغرودان دعا ائدن شخص هدفه چاتماق اوچون الیندن گلن هر ایشی گؤرر و اورکده الله‌ین اونا کؤمک ائله‌دیگینه اینانار.
تبریز شهری‌نین گیریشلرینده آذربایجانین فرهنگی مفاخری‌نین ائلئمانلاری قورولور
یازار : میرزه عبدالصمد ملکی | بؤلوم : خبرلر
+0 به یه ن
تبریز شهری‌نین گیریشلرینده آذربایجانین فرهنگی مفاخری‌نین ائلئمانلاری قورولور
تبریز شهرداریسی‌نین عمومی رابطه‌لری‌نین وئردیگی خبره گؤره، صادق نجفی منطقه یئددی شهرداریسی طرفیندن افتتاح اولان اوچ پروژه‌نین مراسمینده دئدی: شهرین گیریشلری شهره داخل اولان مسافرلرین بیرینجی گؤردوغو یئرلردی کی شهرین فرهنگی دورومونو گؤسترمه‌لیدیر.
او،تبریزین جنوب غرب گیریشنده دوزلن «اوستاد کریمی مراغه‌ای» پارکینی بو زمینه‌ده ساییب آرتیردی: بوندان علاوه، مرند گیریشینده «حکیم نباتی» ائلئمانی و تهران گیریشینده «شهاب الدین اهری» ائلئمانی جاری ایلین برنامه‌لریندن نظرده آلینیب.
او، فرهنگی چهره‌لری هر یوردون اَن اهمیتلی سرمایه‌لریندن ساییب تأکید ائله‌دی: بو غنی و تایسیز سرمایا، مدنیت یارادان تبریزده همیشه اجتماعی و فرهنگی زمینه‌لرده گؤزه گلیم تحول‌لره سبب اولوب.
او آرتیردی: اؤزوموزو «اوستاد کریمی مراغه‌ای» کیمی بؤیوکلردن تجلیل ائله‌مگه بورجلو بیلیریک. چونکی بو انسانلارین عزیزله‌مه‌سینی بیر شخصین عزیزله‌مه‌سی یوخ بلکه هنر و فرهنگین عزیزله‌مه‌سی بیلیریک.
«اوستاد کریمی مراغه‌ای» مسافر پارکی بیر میلیارد تومن آرتیق اعتبارلا افتتاح اولدو. 13 مین متر مربع اولان بو پارکدا مسافرلرین رفاهی اوچون، نمازخانا، آلاچیق، پالتار یوما خدمتلری، قاب یوما خدمتلری، اطلاعات مرکزی و اینترنت مرکزی کیمی خدمتلر نظرده آلینیب.