لیتوانیدان بیر تیجاری فرهنگی گروه تبریزه گلدی
یازار : میرزه عبدالصمد ملکی | بؤلوم : خبرلر
+0 به یه ن
لیتوانی اؤلكه‌سی‌نین تیجاری تحقیقاتی تیمی شرقی آذربایجانا اولان سفرلرینده ایپك یولو و كهریبا یولونون فرهنگی موبادیله‌لری‌نین تازادان رونق‌لشمه‌سینه اومودوارلیق اعلام ائله‌دی.
كهریبا یولونون بامتیك شیركتی‌نین خدمات بؤلومونون رئیسی دئدی: كهریبا و ایپك یولونون اصلی شهرلرندن اولان تبریزین, بو تحقیقاتی سفرده بیزیم اوچون یوخاری اهمیتی وار.
روكاس والونگویشس بو گروه و شیركتین تحقیقاتی سفرلردن نظرده آلدیغی مقصدینه ایشاره ائدیب دئدی: بیزیم اجدادیمیز یوزلر ایل بوندان اوّل لیتوانیدا كهریبا داشی تیجارتی ائدیردیلر و بیز ایللر سونرا بو تیجارتی ایپك یولو و كهریبا یولوندان تازادان باشلامیشیق.
او كهریبا یولونون تحقیقاتی گروهونون تبریزه گلماقلارینی لیتوانی ایله شرقی آذربایجان آراسیندا بیرینجی رابیطه‌نین یارانماسی بیلیب آرتیردی: بو سفر فقط تانیشلیق سفری ایدی و تبریزین موختلیف فرهنگی و تیجاری زمینه‌لردن پوتانسیئل‌لرین نظرده آلماقلا بو رابیطه داها دا گئنیشله‌نه‌جك.
والونگویشس هابئله دئدی: سیزین اؤلكه‌نین جماعتی مهریبان, چوخ یاخشی و فرهنگلی جماعتدی و بیزه چوخ جالیب ایدی كی هر كیمدن سوروشودوق لیتوانی هاردادی, بیلیردیلر كی هاردادیر.
بو تحقیقاتی گروهون رئیسی دئدی: بو اوستانا اولان گله‌جكده كی سفرلریمیزده تبریزدن علاوه آیری شهرلر و منطقه‌لره‌ده گئده‌جگیك.
كهریبا یولونون تحقیقاتی تیجاری گروهو آذربایجان موزه‌سی, مشروطه موزه‌سی, جومعه مسجیدی و تبریزین بؤیوك تاریخی بازاریندان گؤروش ائله‌دیلر.
سوریه‌ده نیظامی موداخیله دونیا نظمینی بیر-بیرینه ووراجاق
یازار : میرزه عبدالصمد ملکی | بؤلوم : اجتماعی
+0 به یه ن
آمریكانین اسبق خاریجی ایشلر وزیری بونا ایشاره ائله‌مكله كی اینسان سئور موداخیله‌لر باعیث اولوب دؤولتلرین وستفالیایی اصوللاری رعایت اولماسین, اعلام ائله‌دی سوریه‌ده هر نوع نیظامی موداخیله دونیانین نظمین قاریشدیراجاق.
«هنری كیسینجر» آمریكانین اسبق خاریجی ایشلر وزیری واشنگتن پست روزنامه‌سینده یاییلان یازیسیندا, سوریه‌ده هر جور نیظامی موداخیله‌نین اؤلكه‌لرین میلّی حاكمیت اصلی‌نین آرادان گئدمه‌سینه سبب اولاماسینی بیلدیردی و تأكید ائله‌دی كی عرب اؤلكه‌لرینده‌كی خلق حركت‌لری باعیث اولوب اینسان سئور موداخیله دوكترینی یا «جماعتین جانین قوروما مسئولیتی» دولتلرین وستفالی اصولونون –كی تمامیت ارضی‌نین قوروماغی لازمیدیر- یئرینی توتسون.
كسینجر آرتیردی: بو زمینه‌ده داخیلی بؤحرانلار بین‌المیللی منظردن دموكراتیك و فیرقه نیگرانلیغینا سبب اولار. خاریجی قودرتلر, دولتلریدن ایسترلر كی قودرتی تحویل وئرمك اوچون موخالیفلرله موذاكیره ائله‌سینلر. آما بونا گؤره كی هر ایكی طرفین هدفی «قالماق»دیر بو توصیه‌لرین فایداسی اولماز.
او دئدی: ایكی طرفین قودرتی بیر سطحده اولسا, اوندا نیظامی ایقدام كیمی خاریجی موداخیله بو دویونو حل ائله‌مگه وارید اولار.
بو یول كئچن ایل لیبی موریدینده ایجرا اولدو و ناتو و عرب اؤلكه‌لرین نیرولاری معمر قذافی‌نین رژیمینی ییخماق اوچون موخالیفلرین نفعینه نیظامی موداخیله‌یه ال ووردولار.
كسینجر ایدامه‌ده بو مسأله‌دن تأسوفون بیلدیرمكله كی اینسان سئور موداخیله میلّی منفعتلر و قودرت تارازلاماسی خیدمتینده اولوب, آیدینلاتدی كی بوجور توجیه ائد‌مك, دونیادا حیكومتی اصولونون نقض ائله‌مگیدیر.
آمریكانین بو كؤهنه‌كار دیپلوماتی دئدی: بو مسأله خاریجی سیاستین بیر بؤلومو كیمی قبول ائدیلسه, بئله موداخیله آمریكانین ایستراتئژیسی باره‌ده چوخلو سوآللار مطرح ائدر. آیا آمریكا اؤزونه وظیفه بیلیر كی خلقلرین قیاملاریندان غیری دموكراتیك دؤولتلر موقابیلینده حیمایت ائلیه؟ حتّی او اؤلكه‌لر كی وارلیقلاری ایندی كی دونیا نظمی‌نین قالماسینا چوخ موهومدو؟
او آرتیردی: میثال اوچون عربستان, او گونه‌دك كی بو اؤلكه‌ده خلق حركاتی اولمایا آمریكانین هم پیمانی قالاجاق.
كسینجر دئدی: اولا بیلر كی بشار اسدین ساقیط اولماسی آمریكانین منفعتیه اولا آما هئچ ایستراتژیك سببه گؤره تازا جنگ باشلاماق اولماز. بونا گؤره, ائله دونیا نظمی كی مرزلری آرادان آپارا و داخیلی و خاریجی جنگلری بیر-بیرینه قاتا, وجودا گلمیه‌جك.
قان ایچنلرین قبری
یازار : میرزه عبدالصمد ملکی | بؤلوم : خبرلر
+0 به یه ن
اوروپالی‌لارین خورافاتلاری
بلغارستانلی آرخئولوقلارلار اورتا عصرلردن قالان ایكی ایسكلت تاپیبلار كی قان ایچن اولمالاری‌نین قاباغین آلماقدان خاطیره دمیر میخلا دئشیبلر.
اتریشین «او ار اف» خبری شبكه‌سی معلومات وئردی: بلغاریستانین میلّی تاریخ مؤسیسه‌سی‌نین رئیسی «بوشیدار دیمیتروف» (Boschidar Dimitrow)، دئدی: بو كشف بونو گؤرسه‌دیر كی ایگیرمینجی عصرین اوّل‌لرینه‌دك بو رسم بلغارستانین كندلرینده ایجرا اولاردی.
اونلارین اینامینا گؤره, یاشاییشلاریندا شیطانین یولون گئدنلری, اؤلندن سونرا سینه‌لرین دئشنه‌ایله دئشردیلر.
دیمیتروف دئییر: بئله‌لیكله اونلار اؤز تابوتلارینا میخلاناردیلار كی گئجه یاریسی قبردن چیخانماسینلار.
اونون دئدیگینه گؤره, ایندیه‌دك بونا بنزر 100 ایسكلت تاپیلیب.
حضرت زینبین واقعی مزاری هاردادیر؟
یازار : میرزه عبدالصمد ملکی | بؤلوم : دین
+0 به یه ن
حضرت زینبین (س) مزاری باره‌ده اوچ نظر
حضرت زینبین(س) مزاری باره‌ده اوچ نظر «مدینه»، «قاهره» و «دمشق» وار, آما بو اوچ نظرین هانسی‌سی بنی هاشم عقیله‌سی‌نین مزاری باره‌ده دوزدور؟
حضرت زینب كبری سلام الله علیهانین یئری باره‌ده موختلیف ریوایتلر و نظرلر دئییرلر كی هر گروه بعضی دلیل‌لرله اؤز ایدّعالارینی ثابیت ائدیرلر. بعضیلری او حضرتین قبرین دمشقده, بیر عیدّه قاهره‌ده و آیریلاری مدینه‌ده بیلیرلر. چالیشدیق بو نظریه‌لرین دوز و یا سهو اولماسینی آراشدیراق.
قاهره
بعضی نظرلرده اوخوروق كی حضرت زینب(س) بنی امیه دستگاهی علئیهینه ائتدیگی آچیقلامالارا گؤره, مجبور قالدی مدینه‌دن مصره گئتسین. اوردا ساكین اولوب و نهایتاً اوردا دونیاسین دگیشیب. ایندی قاهره ده «سیده زینب» موجلل و عظمتلی زیارتگاهدیر. (حضرت فاطمه(س) و قیزی‌نین یاشاییشی. هاشم رسولی محلاتی)
نسابه عبیدلى «اخبار الزینبات» كیتابیندا ائله ریوایتلر نقل ائلیر كی اونلارین مضمونونا گؤره گرك حضرت زینب (س) مصرده قویلانمیش اولا. آما بیز بو ریوایتلره سند و مؤحتوا باخیمدان اعتماد ائلیه‌بیلمیریك, نییه كی«مرقد العقیله زینب (س)» كیتابی‌نین یازانی محمد حسنین سابقى بو حدیثلره ایشكال وارید ائله‌ییب و دئییر كی بو راویلارین چوخو كی عبیدلی بو ریوایتلری اونلاردان نقل ائدیب, مجهولدولار و ریجال و تراجوم و نسب كیتابلاریندا اونلاردان بیر اثر یوخدور. بو بیر حالدادیر كی بو ریوایتلرین اؤزلری‌ده ایشكالسیز دئییل‌لر.
بعضیلری دئییرلر: قاهره‌ده قویلانان زینب, زینب بنت یحیى المتوج بن الحسن الانور بن زید بن حسن بن على بن ابیطالب‌دیر, آما اوردان كی اینسان نئچه نفرین آراسیندا موشترك بیر آدی ائشیدنده اونلارین ان مشهورو ذهنه گلر, جماعتین چوخو بئله بیلیبلر كی بو همان مشهور زینب یعنی على بن ابیطالبین (ع) قیزیدیر. حال بو كی بو گومان اساس‌سیزدیر. البته اشخاصی اؤز بؤیوك جدّلرینه نیسبت وئرمك معمولدور, نئجه كی بیزیم ایماملاریمیزا پیغمبرین اؤولادی دئییلر. بونا گؤره زینب بنت یحیى‌نی, زینب بنت على علیهما السلام اوخوسالار, هئچ ایشكالی یوخدور.
مدینه
بعضی ریوایتلرده گلیب كی حضرت زینب(س) مدینه‌یه گلیب و ایل یاریم بویو آغلاماق و عزادارلیغا مشغول اولوب و نهایتده همان شهرده وفات ائدیب و قویلانیب و ایندی او مؤحترم خانیمین قبریندن اثر قالماییب. بو نظری علامه سید محسن امین دئییر و آیری نظرلردن اعتیبارلیدیر.
گرچه حضرت زینبین (س) مدینه (بقیع)ده قویلانماسی كامیلاً طبیعی و مومكون نظره گلیر, چون قارداشی ایمام حسنین(ع) و بنی هاشمین بیر چوخ بؤیوكلری بو قبریستاندا قویلانیبلار. آما بوكی حضرت زینبین(س) او عظمت و شخصیتی‌اینن قبری موشخص اولماسین سوآل یئری وار. بیر حالداكی مدینه شهری و قبریستانلاری باره‌ده یازیلان كیتابلاردا او حضرتین قبریندن آد گلمه‌ییب. بونونلا بئله كی «ام البنین» كیمی خانیملارین آدلاری كی بو قبریستاندا قویلانیبلار«وفاء الوفاء» كیمی كیتابلاردا یازیلیب.
دمشق
بعضیلری‌ده دئییرلر: حضرت زینب (س) مدینه‌یه وارید اولوب مجلیسلر و محفیل‌لرده یزدیلرین جینایتلرین آچیقلایاییردی. مدینه‌نین فرمانداری ماجرانی یزیده یازیر و یزید اونا دستور وئریر زینبی _مكه و مدینه‌دن سووای_ هر هانسی شهره ایسته‌سه یوللاسینلار. حضرت زینب(س) شاما گئدیر و بیر مودّت سونرا اوردا دونیاسین دگیشیر. رحمتلیك شیخ عباس قمی اؤز اوستادی رحمتلیك محدث نوری و آیریلاریندان نقل ائله‌مكله شام احتیمالینی داها گوجلو بیلیر. حسنین سابقى «مرقد عقیله زینب» كیتابیندا یازیر كی حضرت زینبین (س) قبری دمشقین یاخینلیغیندا زینبیه‌ده‌دیر.
بو نظرین طرفدارلاری اؤز دلیل‌لرین بئله بیان ائلیرلر: مدینه‌ده قیتلیق و یوخسوللوق اولدو, عبدالله جعفر تصمیم توتدو خانیمیسی حضرت زینبله (س) شاما –كی اوردا اكین یئری واریدی- كؤچسون, شاما سفر ائلیه‌ندن سونرا حضرت زینب(س) دونیاسین دگیشدی.
شاید بو نظریه‌ده بو مسأله‌نین مطرح ائله‌مه‌سی دوشونمه‌لی اولا چون كی هئچ تاریخی كیتابدا دمشقده بئله اكین یئریندن بیر سؤز گلمه‌ییب و آیری طرفدن عبدالله ائله الی آچیق آدامیدی كی اونون الینده مال اموال تاب گتیرمزدی, پس نئجه ایمكانی وار كی بئله بیر كندی و مزرعه‌سی اولسون؟
سؤزون خولاصه‌سی بو كی مصر احتیمالی‌نین ایشكالی چوخدور, مدینه احتیمالی دلیل‌سیزدیر و نهایتده دمشق احتیمالی نظره داها دوز گلیر. گرچی یئنه یقینی صورتده دئمك اولماز كی حضرت زینبین(س) قبری هاردادیر. آما بونا دیقت یئتیرمكله كی اهل بیت خانیدانینا منسوب اولان زیارتگاه بو شریفه آیه‌نین میصداقیدیر«فِی بُیُوتٍ أَذِنَ اللَّهُ أَن تُرْفَعَ وَیُذْكَرَ فِیهَا اسْمُهُ», بیر ده اهل بیتین (ع) دفن اولان یئری هر هارا اولسا, یاد و خاطیره‌لری دیریدیر و عاشیق جماعتین سینه‌لرینده یئرلری وار.
مراغانین نجوم مركزی پیشرفته تلسكوپلارا موجهّز اولدو
یازار : میرزه عبدالصمد ملکی | بؤلوم : خبرلر
+0 به یه ن
مراغانین اختر فیزیك و نجوم تحقیقاتی مركزی‌نین رئیسی بو مركزین پیشرفته تلسكوپلار و آیری رصد ابزارینا موجهّز اولماسیندان خبر وئردی.
فارسین مراغا‌دان وئردیگی معلوماتا گؤره, مراغانین آماتور مونجّیملری بو شهرین اختر فیزیك و نجوم تحقیقاتی مركزینده حاضیر اولوب ایكی تلسكوپلا زؤهره سیّاره‌سی‌نین گون قاباغیندان كئچمه‌سینی تاماشا ائله‌دیلر.
مراغا‌دا زؤهره‌نین گون قاباغیندان كئچمه‌سی سحر ساعت 6-دا باشلادی و 21:22َ-دك سوردو.
مراغانین اختر فیزیك و نجوم تحقیقاتی مركزی‌نین رئیسی بو مركزین اولدوزلار, گون توتولما, آی توتولما و گونش قاباغیندان سیاره‌لرین كئچمه‌سینی رصد ائدن تلسكوپلارا موجهّز اولماسیندان خبر وئردی.
علی عجبشیر‌زاه دئدی: رصد اوچون بو مركزه 12 اینچلیك بیر تلسكوپ اوچ میلیارد بئش یوزمین تومنه آلینیب.
او آرتیردی: زؤهره سیاره‌سی‌نین گون قاباغیندان كئچمه‌سی 105 ایل سونرا یعنی میلادی 2117 ایلینده اولاجاق.