مسكودان واشینگتونا؛ تحریف ائتمه‌یین سیلاح گؤندرمه‌یین
یازار : میرزه عبدالصمد ملکی | بؤلوم : خبرلر
+0 به یه ن
روسیه‌نین خاریجی ایشلری‌نین «توییتر»ده كی صفحه‌سینده گلیر: غربی خبرگوزاریلرین بیر تعدادی روسیه‌نین خاریجی ایشلر وزیری سرگئی لاوروفون تهرانداكی دانیشیقلارین غلط ترجومه ائدیب تحریف ائله‌دیلر.
روسیه‌نین خاریجی ایشلر ویزارتی توضیح وئردی كی «غربی خبرگوزاریلرین بیر تعدادی معلومات وئردیلر كی دئیه‌سن سرگئی لاوروف آمریكانی موتهم ائدیب كی سوریه‌نین اپوزیسیونونا دمشق مقاملاری‌نین علئهینه ایستیفاده ائتمك اوچون سیلاح وئریر.»
ریا نووستی‌نین معلوماتینا گؤره, حقیقتده روسیه‌نین خاریجی ایشلر وزیری سرگئی لاوروف دئییب كی: «بیز سوریه‌یه و یا آیری اؤلكه‌یه اسلحه گؤندرمیریك كی سیلاحسیز تظاهور ائدنلرین علئهینه ایستیفاده ائله‌سین. آمریكانین ترسینه كی همیشه بوجور وساییلی منطقه‌یه گؤنده‌ریر و او جومله‌دن نئچه مودّت قاباق بوجور وساییلی خلیج اؤلكه‌لرین بیرینه تحویل وئرمیشدی. آما بللی دئییل نیه آمریكالیلار بو ایشی عادی بیلیرلر.»
بئله‌لیكله لاوروف آمریكانین خاریجی ایشلر وزیری هیلاری كلینتونون بیانیّه‌سینی تفسیر ائله‌ییب كی روسیه‌نین سوریه‌یه نیظامی هلیكوپتر وئرمگه موتهم ائلیردی.
بیتگیلرین دانیشیق سسی عالیملرین قولاقلارینا چاتدی !
یازار : میرزه عبدالصمد ملکی | بؤلوم : تكنولوژی
+0 به یه ن
برسیتول دانیشگاهی‌نین موحقیقلری قودرتلی دستگاهلارلا مكه شیتیلی‌نین سسینی كی كیلیكه بنزر نارین سسدی, ضبط ائله‌دیلر.
انگلیستانلی موحقیقلرین ایدّعاسی وار بیتگیلر, كؤكلرینده نارین سسلرله بیر-بیرلری‌ایله دانیشیرلار !
تازا تحقیقلر گؤرسه‌دیر كی بیتگیلر نه اینكی اطراف سسلره عكس‌العمل نیشان وئریرلر بلكه اطرافداكی بیتگیلرله نارین سس تولید ائله‌مكله دانیشیرلار !
بریستول دانیشگاهی‌نین موحقیقلری مكه شیتیلی‌نین سسین ائشیتمك اوچون قودرتلی میكروفونلاردان ایستیفاده ائدیب اونلارین كیلیكه بنزر نارین سسلرینی ضبط ائدیبلر.
بیتگی‌نین ریشه‌لری سودا موعلّق اولاندا و اوخشار بیر فرئكانسلا داواملی سس یاییلاندا, بیتگی‌نین كؤكلری سسه طرف گئتدیلر.
موحقیقلرین دئدیگینه گؤره, نباتلارین بیر-بیرلریله مخصوص دیلده دانیشماغا بو بیرینجی نمونه‌لردیر كی اینسان او سسی ائشیده بیلمز.
بریستول دانیشگاهی‌نین زیست شیناسی موحقیقی پورفوسور «دانیل رابرت» دئدی: كیلیكه بنزر نارین سسلرده بو پوتانسیئل وار كی بیتگیلرین كؤكلری آراسیندا بیر رابیطه كانالی قورسونلار.
نظره گلیر كی سس و تیتره‌مگین بیتگیلرین یاشاییشیندا موهوم رولو وار.
بو میلادی ایلین اوّل‌لرینده ده انگلیسین اگزتر دانیشگاهی‌نین موحقیقلری بیلمیشدیلر كی كلمه باغبان قیچیسی و یا بیتگی یئین قورت یاخینلاشاندا, خطر اعلامی اوچون اؤزوندن هوشدار وئرن گاز بوراخیر.
جمعدن قورخما ایختیلالی
یازار : میرزه عبدالصمد ملکی | بؤلوم : اجتماعی
+0 به یه ن
جمعدن قورخما بیر ایضطیرابی ایختیلالدیر و جمعدن قورخان شخص, او ایجتیماعی موقعیت و ایشدن آشكار قورخوسو وار كی اوردا تانیمادیغی آداملارلا اوز به اوز اولور و یا ایمكانی وار اونلارین دیقّت مركزینده اولا. بو زاماندا شخص قورخور ائله رفتار ائلیه یا ایضطیراب علامتی گؤرسه‌ده كی اونون تحقیر و شرمنده اولماسینا مونجر اولا.
جمعدن قورخماغا موبتلا اولان شخص شفاهی سوآللارا جواب وئرن زامان و یا سوخنرانلیق زامانی تحقیر اولماقدان و اوتانماقدان بتر قورخار. جمعدن قورخماغا موبتلا اولان شخص اؤز قورخوسونون ایفراطی و غیری منطیقی اولماسینا موتوجیهدیر. بو ایختیلالدا شخص ایجتیماعی موقعیتلردن و ایشلردن ایجتیناب ائلر, یوخسا ناراحاتلیق و شیدّتلی ایضطیرابا دوچار اولار.
بو ایختیلال اشخاصین معمول برنامه‌لرینده, ایشتیغال‌لاریندا و تحصیل‌لرینده موشكول یارالدار. بو ایختیلالین عؤمور بویو قالماسی 3 دن 13 درصده قدر گوزاریش اولوب و خانیملار آقالاردان چوخ بو ایختیلالا موبتلا اولورلار. جمعدن قورخمانین شایع اولان یاشی یئنی‌یئتمه یاشلاریدیر آما آشاغی یاشلاردا (حتی 5 یاشدا) و یوخاری یاشلاردا دا اولور (حتی 35 یاشدا). بو ایختیلال شخصین یاشاییشیندا درین موشكوللر یارالدا بیلر و اونون درمانیندا روان درمانی و داوادان ایستیفاده اولور.
تبریز بازاری بؤیوك بیر شهر كیمی‌دیر
یازار : میرزه عبدالصمد ملکی | بؤلوم : اجتماعی
+0 به یه ن
لیتوانی اؤلكه‌سی‌نین «بامتیك» تیجاری تحقیقاتی شیركتی‌نین عضوی دئدی: تبریز بازاری‌نین اسرار انگیز و ایچ-ایچه معمارلیق قورولوشو, اونو بیر شهر كیمی عظمتلی و بوروشوق ائدیب.
رابرت جودكا تبریز بازاریندان گؤروش زامانی فارس خبرنیگاری‌ایله دانیشیقدا دئدی: بو بازارین راستالاری و بؤلوملری بؤیوك بیر شهرین خیابانلاری كیمی بیر-بیرینه یاپیشیر كی چوخ جالیبدیر.
جودكا ایدامه وئردی: بازاردا اولان فرهنگ و تمدّون و بو اوزن تاریخی‌ایله اوندا جاری اولان یاشاییشین و ایش-پئشه چوخ گؤزل و تأثیر قویاندیر.
او شرقی آذربایجانین جماعتین چوخ مهریبان و قان ایستی بیلیب دئدی: تبریز بازارین یونسكودا ثبت اولماسی بو عظیم تاریخی اثرین تانینماسینا سبب اولوب, آما بو اثری یاخیندان گؤرندن سونرا گؤردوك كی تبریز بازاری تصویرلری و فیلیملریندن داها عظمتلی‌دیر.
جودكا هابئله مشروطه موزه‌سیندن اولان گؤروشه ایشاره ائدیب دئدی: مشروطه ائوی و موزه‌سی بین‌المیلل ساواشلارین بیر بؤلومونون و اونلارین ایراندا قویدوقلاری تأثیرین دقیق و شفاف تصویریدیر.
«بامتیك» تیجاری تحقیقاتی شیركتین مودیر هیئتی عضوی آیدینلاتدی: مشروطه دؤورونون تاریخی, موقاویمتلرین عكسلری و ریوایتلر و جماعت و رهبرلری‌نین موباریزه‌لری چوخ جالیبدیر و اینسانی تعجوبه سالیر.
او تبریزی گؤزل و یاخشی شهر آدلاندیریب دئدی: بو شهر تاریخی و فرهنگی سمبول‌لار و اثرلرینی تئكنولوژی و گؤزل بینالارین كناریندا ساخلایا بیلیب و بونا دیقّت یئتیرماقلا كی كهریبا یولونون اوستونده دایانیر و آیری موهوم خصوصیتلری‌ده وار, بیز ترغیب اولموشوق كی بو اوستانلا فرهنگی و تیجاری ایرتیباطلاریمیزی چوخالداق.
كهریبا یولونون تحقیقاتی و مئدیا گروهی, آذربایجان موزه‌سی, تبریزین جومعه مسجیدی, مشروطه موزه‌سی و تبریزین بؤیوك بازاریندان گؤروش ائله‌دی.
سنت آگوستین و آللاهین ابدی و ازلی اولماغی
یازار : میرزه عبدالصمد ملکی | بؤلوم : دین
+0 به یه ن
مسیحی فیلسوف و موتألّیه سنت آگوستینین زامان حقّینده كی دوشنوجه‌سیندن عصرلر سووشور آما اونون زاماندان تلقّی‌سی باره‌ده یئنه‌ده موختلیف نظرلر وئریلیر.
آگوستین یارانیش مذهبی نظریه‌سینه توتولان ایرادین توضیحینده یئنه‌ده زامان مسأله‌سینه یئتیشیر.
ایراد بئله‌دیر: آللاه یئر و گؤیو یارالتمامیش نه ائدیردی؟ اگر ساكین ایدی؛ نیه او حالدا قالمادی؟ اگر یارالتماق ایراده‌سی تازا بیر ایراده‌ایدی؛ بو حالدا آیا یئنه ازلی اولماقدان سؤز دانیشماق اولار كی اوندا بیر ایراده تاپیلدی كی قاباقجادان یوخیدی؟
آما اگر ایراده ازلی‌دیر, نیه یارانیش ازلی دئییلدیر؟ آگوستین جواب وئریر كی زامان قئیدینده اولان موجودات اوچون آللاهین ازلیّتینی درك ائتمك ایمكانسیزدیر او زامانادك كی اؤزلرینی تغییر و دگیشمكدن قورتارماییبلار. اصلاً یئر و گؤیون یارانیشیندان قاباق «زامان» یوخیدی كی سوروشولسون آللاه او حالدا نه ائدیردی.
موقدس كیتابدا دئییلیر كی جهنّمی یارالدیردی, آما بو او كسلره جواب ساییلیر كی بو مؤعضلی راحاتلیقلا حل ائلیه بیلمیرلر. یارانیش و دونیانین تاریخی بیر درین شعرین تدریجاً تشریح اولماسی و آشكار اولماسیدیر؛ بیر شعر كی اونداكی هر كلمه كولّی معنادا شریك اولماقلا یاناشی اؤز تكلیگینده كامیل و خاص معناسی وار.
ائله بیل بیر شعردیر كی بوتون كلمه‌لری بیرلیكده و بیر یئرده ذهنده حاضیر اولور. پس بوتون عصرلر آللاهین قاباغیندا آچیقدیر و آللاهین علمی بیزیم علم‌میزدن داها اسرار انگیزدیر و داها آرتیق گوجو و احاطه‌سی وار. بو آرادا مسیح بشر و آللاه آراسیندا واسیطه‌دیر, او كی كلمه‌نین تجلّیسی‌ایدی و حقیقتده بشرین اولما زامانی و آللاهین ابدیّتی آراسیندا رابیطدیر. او كلمه كی آتانین حیات باغیشلایان و ازلی دوشونجه‌سیدیر. آیری سؤزله, كلمه, آتانین اؤزونو تانیماقدان عیبارتدیر و دقیق معنادا كلمه آتانین اوزو و تماماً اونا اوخشاردیر.
كلمه كاملاً موطلق وارلیغا اوخشور و هر وارلیغین و مومكونون نمونه‌‌سیدیر. كلمه موجوداتین بوتون معقول اولگولرینی اؤزونده داشیر؛ یا آیری سؤزله كلمه اؤزو اونلارین هامیسیدیر. بو ازلی معقول اولگولر و یا همان نمونه‌لر, ایلاهی موثول آدلانیرلار. كلمه دونیانین ایشیغی و گؤزل‌لیك و خیردین منبعیدیر. آما آگوستین كئچمیش و گله‌جكده‌كی زامان آراسیندا مونقطیع اولوب و روحو تیكه پارچا اولوب. دگیشمه‌لر دونیاسیندا اولماغین بو نتیجه‌لری‌ده وار و اوندان قیریلماغین و حیات وئرن ابدیّتده ساكین اولماغین تكجه یولو آللاهدیر.
آگوستین بونا خاطیر زامانین ماهیّتینه دوشونوردو كی, اونون سیرّینی آچماقلا آللاهین ازلی و ابدی اولماق معناسیندان باش چیخارتسین. و بیر یول آختاریر كی ابدیّته دویونله‌نسین. او آللاه كی بیزیم حافیظه‌میزده وار و بیز ایچه‌ری‌یه دیقّت یئتیرسك اونا بیر یول تاپاریق. حافیظه روحون ایچه‌ری‌یه دؤنمه‌سی‌نین نوماینده‌سیدیر, تا دونیا لذّتلریندن اوز چئویرن –كی حواس یولو ایله اله گلیر- خیر و ابدیّتی اؤز ایچینده آختارسین.
گؤروروك كی آگوستینین ایستیدلالی افلاطونون ضیافت ریساله‌سینده كی ایستیدلالا بنزیر, كی نئجه اینسان محسوس عالمدن داییمی خیره یول تاپسین. افلاطون دونیایی عشقدن باشلاییب و آددیم-آددیم حقیقی عشقه و نهایتده موطلق علمه آددیم قویور.
بیز داخیلی صورتده دئیتالارین اِعمالینی یوكسلده بیله‌ریك. آگوستینین دوشونجه‌سی اساسیندا بو مسأله‌یه یاناشساق, ایتّیفاقلارین گئدیش زامانی قیسسا اولمالیدیر. آما بئله نظره گلیر كی زامان ذهنی بیر قالیبدیر كی ایتّیفاقلار اونون قابینا تؤكولور. پس بیزیم معاریفیمیزین یولوندان داها چوخ تصویر كئچسه, ثابیت و موشخص قابا تؤكولنده ایتّیفاقلارین سورعتی آزالار, آما زامان داها اوزون اولار.
بوگونون سینما كامئرالاری موشخص زاماندا داها چوخ قابلاردا عكس سالا بیلرلر, آما اونلارین متحرّیك حالتده پخش زامانی, تصویرلر آهیسته گؤروشرلر و اونون سیپری اولما واختی اوزونلاشار. بیزیم ذهنیمیز آگوستینین دئدیگی كیمی مثلاً اوّلده بیر شعرین هامیسینی ذهنده حاضیرلیر و سونرا سسلندیریر.
سسلندیرمه زامانی سكوت یارانسا یئنه همان واخت كئچه‌جك, آما سسلندیرمه زامانی اوزاناجاق. ایندی فرض ائله‌یین بیز گئدیب-گلن تصویرلرین آراسیندا بوش قابلار یئرلشدیرك, آما بو تَوالی صیرفاً عاریفلیگه باغلی دئییل و گاهدان بیزیم عاریفلیك گوجوموزدن ائشیكده‌دیر.
دئمك اولار كی یوخاریداكی فرضلره گؤره آگوستینین نظری‌نین خیلافینا زامانین موشخص جوهریّتی وار. آگوستینین نظرینده بیزیم ذهنیمیز خاطیره‌لری خطله‌‌ییب ابدی امره قووشا بیلر آما زامانین جوهریّت فرضی بو گوجو بیزدن آلیر. بیز زامان داخیلینده بیر وارلیقیق و آگوستینین نظریه‌سی كی دئییر اوندان قوپماق اولار, دقیق ایستیدلالی یوخدور و نظری بیر آتلاماغا بنزیر.