اؤلندن سونرا وادی‌السلام قبریستانیندا گؤروشریك
یازار : میرزه عبدالصمد ملکی | بؤلوم : دین
+0 به یه ن
 |
||
|
وادی‌السلام قبریستانی بقیع و ابوطالب قبریستانیندان سونرا دونیا موسلمانلاری‌نین اَن موهوم قبریستانیدیر. ریوایتده گلیب كی مؤمینلرین روحلاری اؤلندن سونرا اورا مونتقیل اولار و دسته-دسته بو قبریستاندا بیر-بیرلریله دانیشار. وادی‌السلام قبریستانی بقیع و ابوطالب قبریستانیندان سونرا دونیا موسلمانلاری‌نین اَن موهوم قبریستانیدیر و خاص موقدّسلیگی واردیر. اورا بیر یئردیر كی ریوایتلره گؤره مؤمینلرین روحلاری اؤلندن سونرا اورا اینتیقال تاپار و اوردا دسته-دسته بیر-بیریله دانیشار و بؤیوك قیامته‌جن اوردا قالار. بو قبریستان جنوبدان ایمام علی‌نین (ع) موطهر حرمینه و نجف-كوفه‌نین اصلی خیابانینا (شارع علی بن ابیطالب), شرقدن نجف – كربلا جادّه‌سینه, شیمالدان حی المهندسین منطقه‌سینه و غربدن سابیق نجف دریاسینا دایانیر. ایمام صادق (ع) بو قبریستانلیق باره‌ده بویوروب: هر مؤمین كی غربده و شرقده دونیادان گئدیر, آللاه اونون روحونو وادی‌السلاما مونتقیل ائدیر. دئیه‌سن گؤرورم مؤمین اینسانلار دسته-دسته بیر-بیری‌نین یانیندا اوتوروب دانیشیرلار. بؤیوك پیغمبرلرین پاك مزاری بو قبریستانلیقدا بللی‌دیر. ایمكانی وار آیری پیغمبرلر ده اوردا اولسونلار آما حضرت هود و حضرت صالح پیغمبرین مزاری قبریستانین اوّلینده گونبذ آلتیندا بالاجا بیر اوتاغین وسطینده یئرلشیب. بحارالانواردا گلیب كی حضرت نوح و ابراهیمین (ع) و حدوداً 370 پیغمبرین قبرلری ایمام علی‌نین (ع) مزاری كناریندا یئرلشیب. |
||
تحصیلاتین موشترك یاشاییشداكی اثری
یازار : میرزه عبدالصمد ملکی | بؤلوم : اجتماعی
+0 به یه ن
|
||
|
ائولنمك معیارلاریندان بیری ایكی طرفین آگاهلیغی و تحصیلاتیدیر, البته تحصیلاتین موثب و یا منفی اثری باره‌ده موختلیف نظرلر وار. ار-آروادین باب اولماسی‌نین بحثی اولاندا, تحصیلی جهتدن باب اولماماغین مطلوب اولمایان اثرلریندن سؤز آچیلیر. 1. هر تحصیل مقطعی, مخصوص ایجتیماعی شأن یارادیر كی طبیعی صورتده اینسالار اؤزلرینه یاشاییش یولداشی سئچنده اونو موهوم معیار كیمی نظرده آلیرلار. 2. ایكی طرف تحصیلی جهتدن برابر اولمایان زمان, تحصیلاتی یوخاری اولان طرف موقابیل طرفدن آیری ایمتیازلار آختاریر. 3. هر تحصیل مقطعی (دیپلوم, لیسانس, دؤكتورا و ...) مخصوص دونیا گؤروشو و فیكری فضا یارادیر و بونا گؤره آغ-خانیمین تحصیل جهتدن اوخشار اولماقلاری اونلارین سلقه و دوشونجه باخیمدان اوخشارلیقلارینا اثر قویور. 4. بوتون شراییطده و دونیانین هر یئرینده, تحصیلاتین اوخشار اولماسینا كیشیلرین تحمولی خانیملارا نیسبت داها آزدیر. دؤكتورا سطحینده اولان بیر آغا دیپلوم بیر قیزلا ائولنسه جامیعه‌ده قبول اولونار آما اونون ترسه‌سی یعنی دؤكتوراسی اولان بیر خانیم دیپلوم بیر اوغلانلا ائولنسه جامیعه طرفیندن قبول اولونان بیر عمل دئییل. 5. ایجتیماعی حركتی اولمایان بیر جامیعه‌ده تحصیلاتین میزانی گلیرین آز-چوخلوغونا باغلیدیر. بئله بیر جامیعه‌ده, آشاغی طبقه‌لره تحصیل ایمكانی آزدیر و تحصیلات, ایجتیماعی ارزیشین چوخالماسی معناسیندا اولور. بئله جامیعه‌لرده تحصیلی اوخشارلیق ایجتیماعی و طبقاتی جهتدن اوخشارلیق معناسیندادیر. 6. شكسیز ایكی آیری-آیری سطحدن اولان اینسانلارین ائولنمه‌سی داها تئز صدمه معرضینده اولور و آیری عامیللر ایضافه‌لشنده طلاقا مونجر اولا بیلر. |
||
توركیه‌نین قصدی یوخدور سوریه‌ایله جنگ ائلیه/ هئچ كس بیزیم ایراده‌میزی سینایا بیلمز
یازار : میرزه عبدالصمد ملکی | بؤلوم : خبرلر
+0 به یه ن
|
||
|
توركیه‌نین باش وزیری بونا تأكید ائله‌مكله كی اؤلكه‌سی‌نین قصدی یوخدور سوریه‌ایله جنگ ائده, دئدی: هئچ كس گركمز بیزیم ایراده‌میزی مرزلریمز و شهروندلریمیزدن دیفاع ائله‌مكده سیناسین. العربیه‌نین وئردیگی خبره گؤره, "رجب طیب اردوغان" ایران رئیس جومهوری‌نین موعاوین اوّلی‌ایله گؤروشدن سونرا موشترك خبری كونفرانسدا تأكید ائله‌دی كی توركیه هئچ واخت جنگ دالیسیجان دئییل و توركیه‌نین جنوب شرقینه خومپاره‌لی حمله‌دن سونرا بو اؤلكه‌نین پارلیمانی, سربازلارین ایستیقرارینی, فقط قاباق آلما عنوانیندا تصویب ائدیب. چرشنبه گونو, ناهاردان سونرا سوریه طرفیندن توركیه تورپاغینا خومپاره گوللـه‌سی گلدی و نتیجه‌ده دؤردو اوشاق اولان 5 تركیه‌لی اؤلوب و 9 نفر یارالاندی. بو حمله‌دن سونرا توركیه ارتشی سوریه تورپاغیندا بعضی نیظامی هدفلری توپا باغلادی و بو حمله‌لرین پنجشنبه سحره‌دك ایدامه‌سی واریدی و نتیجه‌ده سوریه‌ده شیدّتلی پاتلاییشلار اولوب. سوری موخالیفلرین اعلامینا گؤره بو حمله‌لر نتیجه‌سینده ایكی سوریه‌لی نیظامی اؤلوب و بعضیسی‌ده اؤز موضعلریندن دالی قاییدیبلار. |
||
شرقی آذربایجانین اوستانداری: تبریز-باكی رابیطه‌لرین تقویتی‌نین اولویّتی وار
یازار : میرزه عبدالصمد ملکی | بؤلوم : خبرلر
+0 به یه ن
|
||
|
شرقی آذربایجانین اوستانداری اومیدوارلیق ایبراز ائله‌دی كی بو اوستانین ظرفیتلرین اؤلكه خاریجینده تانیتدیرماقلا, ایرانین خاریجی رابیطه‌لری و مخصوصاً ایقتیصادی حوزه‌ده قونشو اؤلكه‌لرله چوخالا. فارسین وئردیگی خبره گؤره, احمد علیرضابیگی شرقی آذربایجان و آذربایجان جومهوریسی آراسیندا رابیطه‌لرین چوخاتماق ایجلاسیندا -كی جومهوری ایسلامی‌نین بو اؤلكه‌ده‌كی تازا سفیری‌نین حضوری‌ایله بو اؤلكه‌ده برگوزار اولونوردو- تبریز و باكی‌نین قدیم رابیطه‌لرینه ایشاره ائله‌مكله دئدی: موختلیف زمینه‌لرده بو رابیطه‌لری و همكارلیقلاری گوجلندیرمك, اوستان مودیریتی‌نین اولویّتینده‌دیر و بو زمینه‌ده آذربایجانلی طرفله یاخشی موذاكیره‌لر و ییغینجاقلار اولوب. او بونا ایشاره ائله‌مكله كی جومهوری ایسلامی و آذربایجانین همكارلیقلاری‌نین چوخالماسی هر ایكی طرفین منفعتینه‌دیر, دئدی: شرقی آذربایجان اؤلكه‌نین شیمال غرب صنعتی و علمی قوطبی كیمی ائلیه بیلر بو زمینه‌ده تعیین ائدن همكارلیقلار ائله‌سین. علیرضابیگی ایرانین قاباقكی سفیری محمدباقر بهرامی‌نین زحمتلریندن قدردانلیق ائله‌مكله, موختلیف زمینه‌لرده آذربایجان جومهوریسی‌ایله رابیطه‌لرین گئنیشلندیرمكده شرقی آذربایجانین كامیل حاضیرلیگینی اعلام ائله‌دی و آرتیردی: شرقی آذربایجانین ایجرایی دستگاهلاری و خصوصی بخشی حاضیردی كی ایرانین باكیداكی سیفارتی‌ایله ایكی اؤلكه‌نین ایكی طرفلی رابیطه‌لرین گوجلنمه‌سی اوچون همكارلیق ائله‌سین. بو ایجلاسدا كی اوستاندارین برنامه‌ریزلیق موعاوینی و خاریجی ایشلری ویزارتی‌نین اوستانداكی نوماینده‌سی‌نین حضوری واریدی, ایقتیصادی و دارایی ایشلری, یول و شهر سالما, منطقه سویو, صنعت, معدن و تیجارت, حمل و نقل و ترمیناللار, گومروك ناظیرلری, تبریز و علوم پزشكی دانیشگاهلاری‌نین رئیسلری و مودیرلری, و هابئله جلفا, خداآفرین فرماندارلاری و آراز آزاد تیجاری صنعتی منطقه‌نین موعاوینی آذربایجان جومهوریسی‌ایله رابیطه‌لرین چوخالماسی باره‌ده نظرلرین دئدیلر. |
||
دونیانین اَن تمیز اؤلكه‌لری
یازار : میرزه عبدالصمد ملکی | بؤلوم : اجتماعی
+0 به یه ن
|
|||||||||||||||||||||||||||||||||||
|
بو اؤلكه‌لرده موحیطی تمیز ساخلاماق هامی‌یا واجیبدیر و هئچ كس شهر و یا طبیعتین تمیز ساخلاماسینی شهرداری‌نین بوینونا آتمیر. موحیطی ساخلاماق و اونو گله‌جك نسله چاتدیرماق بشریّتین موهوم هدفلریندن بیری ساییلیر كی بو هدف ایقتیصادی توسعه چوخالدیقجان خطره دوشور. قاباغا گئتمیش اؤلكه‌لرین بعضیسی موحیطه چوخلو ضررلر وورورلار كی اونلاردان چین, آمریكا و هندی نمونه سایماق اولار. آما دونیادا بعضی اؤلكه‌لر وار كی هم ایقتیصادی جهتدن قاباغا گئدیرلر و هم یاشاییش موحیطینی تمیز ساخلیرلار. بو اؤلكه‌لرده موحیطی تمیز ساخلاماق هامی‌یا واجیبدیر و هئچ كس شهر و یا طبیعتین تمیز ساخلاماسینی شهرداری‌نین بوینونا آتمیر. نمونه اولاراق اسكاندیناوی اؤلكه‌لرینده هر شخص اؤزو تولید ائله‌دیگی زیبلین محو اولان لحظه‌یه‌دك مسئولودور و زیبیللری آییرماق و مودیریتی بیر حدده‌دك اونون اؤز بوینونادیر. بو اؤلكه‌لرده موحیطی تمیز ساخلاماق بیر فرهنگدیر و بو اؤلكه‌لر دونیانین اَن تمیز اؤلكه‌لری ساییلیرلار. تأسوفله آسیا اؤلكه‌لری او جومله‌دن بیزیم اؤلكه ده یاشاییش موحیطین دوزگون مودیریّتین اولماماسینا گؤره یاخشی روتبه‌ده یئر آلمیر.
|
|||||||||||||||||||||||||||||||||||