هاشمی رفسنجانی: معظم رهبرلیك مقامی اوچ یئرده دادیمیزا چاتدیلار
یازار : میرزه عبدالصمد ملکی | بؤلوم : خبرلر
+0 به یه ن
هاشمی رفسنجانی: معظم رهبرلیك مقامی اوچ یئرده دادیمیزا چاتدیلار
آیت الله هاشمی رفسنجانی آرتیردی: الله-ین كؤمكلیگی ایله تازا تحریملر اعمال اولونمادی. بیر عدّه بئله دوشونور كی، بیز بو وضعیّتی یاراتدیق آما ائله دئییل. جماعت بیلدی كی پیس شرایطده‌ییك، یا گرك تسلیم اولاق یا دا ساواشا حاضرلاناق، بئله بیر شرایطده میدانا گلدیلر و لازم اولان شخصی سئچدیلر و ایندی اؤلكه‌میز اعتدالا چاتیب.
هاشمی رفسنجانی ادامه وئردی: انتخاباتین یاخشی اولماسی بونا گؤره ایدی كی معظم انقلاب رهبری رأیلرین دوزگون اوخونماسینا امر بویوردولار و اعلام ائله‌دیلر كی رأیلر حق الناسدیر.
او آرتیردی: مذاكره‌لره باشلایاندا بیر عدّه اعتراض ائله‌دیلر و بونو تسلیم اولماق معناسینا بیلدیلر آما رهبر بویوردو بو مذاكره ائله‌ینلر انقلاب اوشاقلاریدیلار و ایشلرینی گؤرورلر، اونلارا سازشكار دئمه‌یین.
تشخیص مصلحت مجمعی‌نین رئیسی دئدی: توافق‌لرده بیرینجی امضانی آتاندا، یئنه بیر عدّه اعتراض ائله‌دیلر كی نیه امضالادیز. آما رهبر جوابلارینی وئریب دئدی گزارشده گلن، موفّقیّت ایدی و تشكر ائلیرم.
هاشمی رفسنجانی بونا تأكید ائله‌مكله كی معظم رهبرلیك مقامی معترضلرین آغزینی باغلادی، تصریح ائله‌دی: حقیقتده رهبر اوچ حساس مقطعده دادیمیزا چاتدی و ائله ولایت فقیهین‌ده خاصیّتی بودور كی چیخیلماز وضعیّتلری سیندیرا و طغیان اولمایا.
هر ائوده اولان طبیعی آغری كسنلر
یازار : میرزه عبدالصمد ملکی | بؤلوم : ساغلاملیق
+0 به یه ن
هر ائوده اولان طبیعی آغری كسنلر
1. گیلاس: گیلاسدا «آنتوسیانین» آدینداكی تركیبلر، حقیقتده گوجلو آنتی اكسیداندیلار كی ایكی یول ایله آغرینی آزالدارلار. بو تركیبلر التهابین قاباغینی آلماقلا و هابئله آغری آنزیملرینی آرادان آپارماقلا، آسپرین و ناپروكسن كیمی عمل ائله‌ییب، آغری‌نین ساكتلشمه‌سینه كؤمك ائلرلر. بیر تحقیقین نتیجه‌لری سحر یئمگینده چوخلو مقداردا گیلاس یئینلرین آغریلاری‌نین یوزده ایرمی بئشی‌نین آزالماسینی گؤستریر.
2. زنجفیل: بو كؤك، سنّتی قارین سانجیسی داواسیدیر و اورك بولانماسینی‌دا درمان ائلر. آسپرین و ضد التهاب خاصیّتلی اولان زنجفیل، عضله، میگرن و آرتریت آغریلارینی ساكتلشدیره بیلر.
3. قیرمیزی بیبر: بیبرده «كاپسایسین» آدیندا تركیب وار كی عصب ترمینال‌لارینی تحریك ائله‌مك و آغری سیگنال‌لارینی انتقال وئرن شیمیایی مادّه‌نین آزالتماسی ایله، آغرینی آزالدار.
4. بالیق اَتی: آز مقداردا جیوه‌سی اولان و یوخاری مقداردا یاغ اسید اومگا-3 اولان بالیقلارین مصرفی، آغرینی آزالتماقدا تأثیری وار. اومگا-3، قان دولانیشینی یاخشیلاتماقدا و عصب و قان دامارلاری‌نین التهابینی آزالتماقدا تأثیرلیدیر.
5. ساری كؤك: اوزون ایللر بویو بو ادویه‌دن آغرینی آزالتماقدا و غذا هضمینی یاخشیلاتماقدان اؤترو استفاده ائلیرلر. آما متخصصلرین دئدیگینه گؤره ساری كؤكون آنتی التهاب خاصیّتی‌ده وار و انسان بدنینی، مفصل التهابیندان قورویار و عصبی سلّول‌لارین فعالیّتینی تقویت ائلر.
6. یوغورت: طبیبلرین دئدیگینه گؤره، یوغورتدا، التهابی و آغرینی آزالدان نئچه جوره باكتری وار.
7. قهوه: قهوه‌ده‌كی كافئین، باش آغریسی تأثیرینده ملتهب اولان آچیلمیش قان دامارلارینی ییغماقلا، آغری‌نین شدّتینی آلار.
8. نانه: بو بیتكی عضله توتولماسی‌نین قاباغینی آلار و بونا گؤره، نانه عراغی تحریك اولان باغیرساق سندرومو تأثیرینده عمله گلن قارین سانجیسیندا، استفاده اولونار.
9. یاشیل سویا: اوكلاهما دانشگاهیندا بیر تحقیقده، بیر عدّه‌یه 40 گرم سویا پروتئینی و آیری عدّه‌یه سوتلو پروتئین وئردیلر. تحقیقین سونوندا سویا پروتئینی‌نین، آغری كسمكده داها تأثیرلی اولدوغو بللی اولدو.
10. زوغال میوه‌سی‌نین سویو: زوغال سویو معده و كیچیك باغیرساقدا، هلیكوباكتر پیلوری میكروبی تأثیرینده عمله گلن یارالارین قاباغینی آلار.
هابئله بونلاری شكر علاوه ائله‌مه‌دن ایچمك لازمدیر. چونكی شیرین اولاندا التهاب گتیررلر.
كربلانین عرفان و حماسه جنبه‌سی
یازار : میرزه عبدالصمد ملکی | بؤلوم : دین
+0 به یه ن
كربلانین عرفان و حماسه جنبه‌سی
كربلا حادثه‌لری و حركتلری‌نین تك به تكی معرفتله دولودور و بو جنبه‌لردن باشقا هئچ نه مثال وورماق اولماز، حتّی سوت امر اوشاغین شهادتی الهی معرفتدن دولودور. امام حسینین (ع) مدینه‌دن كربلایا حركت ائله‌دیكلری آن، پیغمبرین پالتارینی گئیمكلری و مخصوص مركبه مینمكلری، هامیسی الهی معرفت ایله توأم ایدی. او حضرت كربلایه وارد اولدوغو بیرینجی گونلرده، دوه‌یه مینیب هامی‌یا جنگ قصدینده اولمادیغینی اعلام بویوردو. آما سككیزینجی گون 20 مین نفردن آرتیق او حضرتی شهید ائله‌مك نیّتی ایله فرات چاییندا غسل ائلیردیلر. دوشمنلر او حضرتی تانیمایانلاردان دئییلدیلر و دفعه‌لرله امام حسینی (ع) پیغمبرین قوجاغیندا گؤرموشدولر، حتّی شمر اؤزو حدیث راویلریندن ایدی.
دوشمن قوشونو امام حسینی (ع) چوخ یاخشی تانییردی، اونلارین بعضیسی پیغمبری (ص) گؤرموشدولر و پیغمبرین عمامه و لباسینی امام حسینین (ع) اگنینده گؤرنده اونو قاباقجن پیغمبرین اگنینده گؤرموشدولر. كربلانین بوتون حركتلری‌نین معناسی وار و هئچ اضافه حركتین اولمادیغی، اسلامی تاریخینده بو عظیم واقعه‌نین معرفتی جنبه‌سیندن خبر وئریر كی اونلار مذهبی هیأتلرده مطرح اولمالیدیر. كربلانین معرفتی جنبه‌سی‌نین درس و عبرتلری وار كی بو درسلر و عبرتلر هیأتلرده مطرح اولمالیدیر آما تأسوفله چوخ آز مطرح اولورلار. هیأتلرده بو مسأله‌لر حل اولسا یئر اوزونون اَن گؤزل محفل‌لرینه چئوریلرلر.
امام صادقدن (ع) بئله بیر روایت وار كی بویوروبلار: «جنّت باغلارینا یولوز دوشرسه اونلاردا تفریح و شادلیق ائله‌یین». امامدان سوروشدولار: «بو باغلار هاردادیلار؟» بویوردو: «اهل بیتین (ع) ذكری اولدوغو محفل‌لر یئر اوزونده‌كی جنّت باغلاریدیلار».
مذهبی هیأت، ائله بیر محفلدیر كی اوردا اسلامی تعلیملر و مخصوصاً عاشورا و كربلا واقعه‌سی مطرح اولار و مختلف مناسبتلرده اهل بیتین (ع) عزاسی و شادلیغی بیان اولار.
تاریخ بویو مختلف اسلامی علملرده بؤیوك عالملر تربیت اولوب و بو علملر چوخ درین صورتده تفسیر و تحقیق اولونوب آما كربلا واقعه‌سی‌نین تحلیلی او بیری زمینه‌لر كیمی درین اولماییب و بؤیوك عالملر بو زمینه‌یه آزراق داخل اولوب و بونا گؤره بعضاً چوخ سطحی تحلیل‌لر ارائه اولونوب.
كئچمیش عصرلرده بو زمینه‌نین چالیشانلارین چوخو، آز ساوادلی و سطحی آداملار اولوب كی اونلار دا كربلا واقعه‌سینی فقط و فقط احساسی حدّینه یئندیریبلر. اونلارین نظرینه گؤره كربلا واقعه‌سی اهل بیت (ع) اوچون بؤیوك مغلوبیّت ساییلیر و بونا گؤره چالیشیبلار اغراق و شیشیرتمكله اونو جبران ائله‌سینلر. مثلاً بعضی كتابلاردا امام حسینین (ع)، عاشورا گونو بیر میلیون ایكی یوز مین نفری ، و حضرت ابوالفضلین (ع) 250 مین نفری اؤلدوردوگونو یازیبلار!
سویو بیر گؤز قیرپیمیندا قایناتماق !
یازار : میرزه عبدالصمد ملکی | بؤلوم : تكنولوژی
+0 به یه ن
سویو بیر گؤز قیرپیمیندا قایناتماق !
عالملر ثانیه‌نین بیر تریلیونیومدان داها آز زماندا، سویو قایناتماق اوچون تازا تكنیك تاپیبلار.عملده گؤستریلمه‌ین بو نظریه‌یه گؤره، آز مقداردا سویو بیر پیكو ثانیه‌ده (ثانیه‌نین بیر تریلیونیومدا) قایناتماق اولار.
عالملرین سویو قایناتماغا تاپدیقلاری تازا تكنیك، بیر گؤز قیرپیمیندان چوخ-چوخ آز زماندا باش وئریر. بونو توضیح وئرمگه بونو بیلمه‌لیسیز كی بیر پیكو ثانیه‌نین بیر ثانیه‌یه نسبتی، بیر ثانیه‌نین 32 مین ایله اولان نسبتی قدردیر! بو مسأله عالملرین تازا تكنیكینی، یئر اوزونده سویو قیزدیرماغا اَن یئیین یول ائلیر.
سویو بئله قایناتماق تراهرتز دالغالاری‌نین متمركز اولماسیندان اله گلیر. تراهرتز دالغالاری، رادیویی و مادون قرمز دالغالاری آراسیندا اولان فركانسدا، الكترومغناطیس دالغالارا شامل اولور.
تراهرز دالغالارینی متمركز ائتمگه، الكترونسوز لیزر دستگاهلاریندان استفاده اولونور. بو دستگاه سرعتلی الكترونلاری بللی و مارپیچ بیر مسیرده گؤندره بیلیر. بو ذره‌لر هر دؤنمه‌ده الكترومغناطیس دالغالار ساطع ائلیر و ضربه كیمی لیزره آرتیریلیر. تراهرتز ضربه‌لری سو مولكول‌لار‌ی‌نین آراسینداكی تعامل گوجونو چوخ قیسا بیر زماندا آرتیریر و اونلاری تیترمگه وادار ائدیر.
باغچه‌بان، سس‌سیزلیك دنیاسی‌نین نقّاشی
یازار : میرزه عبدالصمد ملکی | بؤلوم : اجتماعی
+0 به یه ن
باغچه‌بان، سس‌سیزلیك دنیاسی‌نین نقّاشی
سس‌سیزلیكده بوغولان دنیایا كلمه‌لر رنگینی سپن باغچه‌بان، بو ایشی جان و اوركله گؤردو و ایندی بو مملكتین اوشاقلارینا داها رنگلی دنیا صاحب اولماق امكانی وئردی.چوخلاری باغچه‌بانین فقط آدینی ائشیدیبلر، آما ائشیتمه‌ین اوشاقلار اوچون او مهربان آتا ایدی و خاطره‌سی كلمه‌لری اینن همیشه‌لیك دیری قالاجاق.
«قار دده» كتابی‌نین یازانی، ایراندا بیرینجی اوشاق كتابی یازیب نشر ائدنی‌دیر. او 1307-جی ایلینده بوتون چتینلیكلره رغماً، اؤز چكدیگی تصویرلرله اوشاقلارا مخصوص كتابلار یازدی. و نهایتده باغچه‌بانین «قار دده» كتابی، دنیا اوشاق كتابی شوراسی طرفیندن، لاپ یاخشی اوشاق كتابی كیمی سئچیلدی.
تبریزدن سونرا او، شیرازدا و تهراندا دا اوشاقلارین و مخصوصاً ائشیتمه‌ین اوشاقلارین تعلیمی اوچون مختلف مركزلر یولا سالدی و او زمانین ائشیتمه‌ین اوشاقلاری سس‌سیزلیكدن چیخماق و تعلیملرینی بو مهربان آتایا مدیون ایدیلر.
كار-لال‌لار اوچون مخصوص حساب كتابی‌نین یازماسی، ائشیتمه‌ینلرین تعلیمی اوچون تنظیملنمیش شفاهی یول، استخوانی گوشی‌نین اختراعسی، سس‌لرین خاصیّتلری‌نین كشفی و اونلاری بؤلمك و ائشیتمه‌ینلرین تدریسی اوچون مختلف بصری وسایلین حاضرلاماسی، باغچه‌بانین آیری خدمتلریندن ساییلیر كی اونلاری ثمره‌لی عمرونون بویوندا ائشیتمه‌ینلر اوچون یادگار قویدو.
ایندی بیر كار اوشاغی دانیشماغا قادر گؤرمگیمیزین سببی، شبهه‌سیز باغچه‌بانین بو یولدا چالیشماغی‌نین نتیجه‌سی‌دیر.
بو قهرمانین 82 ایل ثمره‌لی عمرو، اونو، ائشیتمه‌ین اوشاقلارین همیشه‌لیك آتاسینا چئویریب. كار اوشاقلارا گؤزلرینی قولاقلاری‌نین یئرینه استفاده ائتمگی، اؤیردن كیشی.