الغدیر نسلیندن تبریزلی بیر كیشی
یازار : میرزه عبدالصمد ملکی | بؤلوم : دین
+0 به یه ن
الغدیر نسلیندن تبریزلی بیر كیشی
عبدالحسین امینی تبریزی اجتهادا یئتیشمیشدی آما آرام – قراری یوخیدی. دئدیگینه گؤره شیعه‌یه ظلم اولان گونه قدر تاماشایا اوتورماق اولماز و مبارزه ائله‌مك لازمدی.
علامه امینی بو گون متواتر حیدثلره دایانماقلا شیعه‌لیگین حقانیت سندی اولان كتابی یازماغا گئجه – گوندوزونو صرف ائلیردی. ایش اورا چاتدی كی بو 11 جلدیق كتابی یازماق اونو گؤز قاباغیندان قیراغا چكدی. آزاراق دوستلار جمعینده گؤروشوردو. چوخ آز یاتیردی و بعضاً كتابخانا یولوندا دا مطالعه ائلیردی و آختاردیغی كتابلاری تاپماق اوچون بعضاً اوزاق اؤلكه‌لره گئدیردی. بعضاً شوخلوقلا دئییردی: «بو الغدیر بیزی آداملیقدان سالدی» آما بو گون علامه امینی‌نین آدی فقط الغدیر ایله اسلام دنیاسیندا تانینیر. اونون 40 ایل بویونجا شیعه مخالفلری ایله مبارزه‌سی‌نین ثمره‌سی اولان كتاب كی هله ده شیعه حقانیتینی ثابت ائله‌مگه اَن مهم مرجع ساییلیر.
عبدالحسین امینی تبریزی هجری شمسی ایلی 1281-ده دنیایا گؤز آچدی. او سراب كندلرین بیرینده و یا تبریزده آنادان اولدو. 16 یاشا قدر وطنده دینی علملر تحصیل ائله‌یندن سونرا مقدس نجف شهرینه یوللاندی و 32 یاشیندا اجتهاد درجه‌سینه چاتاندان سونرا تازادان تبریزه قاییتدی. بیر مدّت تبریزده قالیب تدریس و تحقیق ائله‌یندن سونرا تازادان نجفه گئتدی.
دئییلنلره گؤره، علامه او گؤردوغو ایشه اوقدر جوموردو كی مطالعه و تحقیق زمانی اطرافا اولان دقتی آزالاردی. بؤیوكلرین بیری دئییر: علامه تحقیق اوچون نئچه آیلیق هندوستانا گئتمیشدی. اوردان قاییداندا سوروشورلار هندوستانین ایستیسی ایله نئینه‌دیز؟ او بیر آز دوشونوب دئییر: عجبا، اصلا اورانین ایستیسینی بیلمه‌میشم!»
او زمانین كتابلاری‌نین ال یازما اولدوغو اوچون كتابخانالار هر كسه كتاب امانت وئرمزدیلر. علامه ده كتابلاری سطر- سطر دقتلی اوخودوغو اوچون اولاردی كی امانت آلدیغی كتابلارا صدمه دَیسین. بو اوزدن كتابخاناچیلار بعضاً اونا كتاب امانت وئرمكدن چكینردیلر. علامه‌نین شاگردلرین اولان علامه طباطبایی دئییر: بئله‌نچی زمانلار اوستادیمیز حضرت علی‌نین (ع) زیارتینه گئدیب اوردا حضرته خطاب دئیَردی: «آغا سیزین شیعه‌لریزین آراسیندا دا مظلوم قالمیشام. من سیزه خدمت ائله‌مگه چالیشیرام آما بونلار مانع اولورلار». آما دفعه‌لرله اولموشدو كی آز تاپیلان كتابلار صاحبلری طرفیندن علامهیه گؤندریلر كی تحقیقلریندن اونلاردان استفاده ائله‌سین.
دها آرتیق كتابا ال تاپماق اوچون چتین سفرلر
اسلامی و شیعه منبعلرین آز سایدا و مختلف شهرلرده اولدوغو اوچون علامه اونلارا ال تاپماق اوچون اوزون سفرلره چیخماق مجبوریتینده قالیردی. بعضاً او كتابلار اوزاق و داغلیق كندلرده اولوردو كی علامه مجبور قالیردی اونلاری اوخوماق اوچون چتین سفرلره دؤزسون. حیدرآباد، دكن، جلالی، رامپور، خولمه، معرفه، قاهره، حلب، نیل و دمشق شهرلری علامه‌نین تحقیق اوچون گئتدیگی شهرلردندیر. 11 جلدلیك الغدیر كتابینی یازماق اوچون علامه 20 مین آرتیق كتاب اوخودو. علامه بو 40 ایللیق یولوندا بعضاً شاگرلریندن‌ده كؤمك آلیر و اونلارا دا كتابلارین اوزونو یازماغی و تحقیق ائله‌مگی تاپیشیریردی. الغدیردن سونرا علامه‌دن آیری كتابلار دا قالیب كی اونلاردان تبریزده یازدیغی فاتحه‌الكتاب تفسیرینی، شهدا الفضیله، السنه و السیره، ریاض‌الانس كتابلارینی آد آپارماق اولار.
علامه‌نین كتابیندا هئچ ایراد یوخدور
نجف حوزه‌سی‌نین اوستادلاریندان اولان شیخ محمد رضا مظفردن الغدیر كتابی‌نین نثری باره‌ده جالب بیر نقل قول اولونوب. او دفعه‌لرله شاگرلری‌نین جمعینده دئیَردی: «من بو مسأله‌یه تعجب ائلیرم كی شیخ محمد حسین كاشف الغطاء جد- آباسی عرب اولماسینا و نثری‌نین روان اولمساینا رغماً اصول شیعه باره‌سینده بالاجا بیر كتاب یازاندا نثری‌نین 7 اشكالی اولور آما علامه امینی تورك و تبریزلی اولا- اولا كی لهجه‌لری‌ده توركیدیر 11 جلیدلیك الغدیر كتابیندا بیر دانا دا اشكال تاپماق اولمور».
شاگردلری‌نین دئدیگینه گؤره علامه سفرده اولاندا دا مطالعه‌دن ال چكمزدی و همان جدّیت ایله تحقیق ائلردی. بیر دفعه او علامه طباطبائی‌یه دئییر: هندوستان رامپور شهرینه سفر ائله‌ینده گونده 18 ساعت مطالعه و نوت یازماغا مشغول اولوردوم». ائله بو جدّیت الغدیرین رقیبسیز اولماسینا سبب اولدو و بو گونه قدر غدیر خطبه‌سی و اونا مربوط اولان خبرلرین اَن جامع كتابی ساییلیر.
بیزیم‌ده اؤز اربابیمیز وار . . .
بیر زمان عراقدا كاغذ قیتلیغی اولدو. علامه 11 جلدلیك الغدیر كتابی‌نین چاپی اوچون كاغذ آلماغا نجفدن بغدادا گئتمه‌لی اولدو. اوردا شیخ محمد رضا مظفر ایله قیسا گؤروشلری اولدو. او، علامه‌دن نه اوچون گلدیگینی سوروشاندا علامه الغدیرین چاپی اوچون 300 بند كاغذین آلماق قصدینده اولدغونو دئییر. شیخ مظفر گولومسنیب دئییر: بوتون رابطه و دوستلاریما رغماً «كتاب السقیه» كتابی‌نین چاپینا 15 بند كاغذ آلا بیلمیرم». سؤز بورا چاتیر كی علامه دئییر: «من كاغذ مركزینه گئدیرم، بیزیم‌ده اؤز اربابیمیز وار.» صاباحیسی گون علامه مركزه گئدیر. اورانین مسؤولو آیریلارین ترسینه علامهیه چوخ احترام قویور و سوروشو نه قدر كاغذه احتیاجیز وار. علامه دئییر: «300بند». او شخص گؤزلنیلمه‌دن دئییر: «بوردا تحویل آلیرسیز یوخسا نجفده تحویل آلماق ایستیرسیز؟» علامه: « نجفده تحویل آلارام» دئییر و حسابینی گؤروب گئدیر. سونرالار كاغذ مسؤولون انتقاد ائلیرلر كی او قدر كاغذی نییه وئردی؟ جواب وئریر: «بو شیخ من ایله ائله دانیشیدی كی آمبارین بوتونون ایسته‌سه‌یدی وئرمك مجبوریّتینده‌یدیم».
الغدیر كتابی‌نین خصوصیتلری‌نین بیری ولایت و شیعه عقیده‌سینی ثابتله‌مك اوچون سنّی‌لرین اثرلریندن واسطه‌سیز استفاده ائله‌مك ایدی. علامه‌نین 68 ایل علم یولوندا چالیشماقدان سونرا باشا چاتسا دا اونون الغدیر كتابی هله ده دنیانین باشا باشیندا معتبر و مرجع كتاب كیمی ساییلماقدادیر.
علامه‌نین مطهر پیكری تهران، بغداد، كاظمین، كربلا و نجف شهرلرینده عظمتلی و طنطنه‌لی صورتده تشییع اولاندان سونرا مولاسی‌نین جواریندا نجف شهرینده تورپاغا تاپیشیریلدی.
امام هادی‌نین (ع) غیبته شرایط یاراتماسی
یازار : میرزه عبدالصمد ملکی | بؤلوم : دین
+0 به یه ن
امام هادی‌نین (ع) غیبته شرایط یاراتماسی
ذی حجه‌نین اون بئشی امام هادی لقبی اولان، امام ابوالحسن علی النقی‌نین(ع) ولادتیدیر. شیعه‌لرین اونونجو امامی 212 هجری قمری ایلینده ذیحجه یاریسیندا مدینه اطرافیندا «صریا» آدلی یئرده دنیایا گلدی. او حضرت و اوغلو امام حسن (ع)، عسكریین آدینا مشهور اولدولار، چونكی بنی عباس خلیفه‌لری طرفیندن 233-جو ایلینده سامرایا (عسكره) آپاریلدیلار و مبارك عمرلری‌نین آخریناجان اوردا گؤز آلتیندا ساخلاندیلار. امام هادی‌نین (ع) نقی، عالم، فقیه، امین و طیب كیمی لقبلری واریدی و مبارك كنیه‌سی ابوالحسن ایدی.
كراملتی آتاسی « امام جواد (ع)» و محترم آناسی «سمانه» ایدی كی چوخ تقوالی و فضیلتلی خانیم ایدی. امام هادی هجری قمری ایلین 220-جی ایلینده آتاسی امام جوادین (ع) شهادتیندن سونرا 6 و یا 8 یاشیندا اماملیغا چاتدی. او حضرتین 33 ایللیك امامتی معتصم، واثق، توكل، منتصر، مستعن و معتز خلیفه‌لری ایله بیر زماندا اولدو. امام هادی‌نین (ع) شخصیّتی‌نین بؤیوكلویونه دوشمنلر ده اعتراف ائلیردیلر.
امام هادی‌نین (ع) غیبت عصرینه داخل اولماق اوچون گؤردویو ایشلر:
غیبت زمانینا یاخینلاشدیقجا عباسی خلیفه‌لرین نظارتی چوخالیردی و امام هادی‌نین (ع) زمانیندا دا بو نظارت چوخ شدتلی صورتده اولوردو ائله كی بو امام شیعه‌لرله مستقیم یوخ بلكه وكیل‌لرین واسطه‌سی ایله رابطه قوروردو.
امامین غیبت عصری‌نین یاخینلاشماغینا گؤردویو اقداملاردان بونلاری آد آپارماق اولار:
ـ غیبت زمانی‌نین چاتماسی و یاخینلاشماسی باره‌ده روایتلرین بیان ائتمه‌سی.
ـ حضرت حجتین (عج) ولادتینه و اونون گیزلی اولماسینا بشارت وئرمك و بونا هشدار وئرمك كی اولمایا بو مسأله‌نین گیزلیلیگی شیعه‌لری تردیده سالا.
ـ شیعه‌لرین او حضرت ایله تماسلارین آزالتماق، او حده‌جن كی سامرادا بوتون رابطه‌لر مكتوبلا و غیر مستقیم اولوردو.
ـ شیعه‌نین بعضی فقهی و روایی كتابلارینی تأیید ائله‌مك.
ـ شیعه‌لری وكیل‌لره ارجاع وئمك و وكیل‌لری سؤال‌لارا جواب وئرمگه توجیه ائله‌مك.
ـ غدیریه و جامعه زیارتلری ایله امامت مقامینی تبیین ائله‌مك.
واختین مدیریّتی
یازار : میرزه عبدالصمد ملکی | بؤلوم : اجتماعی
+0 به یه ن
واختین مدیریّتی
واختلاری قیزیلدان دَیَرلی اولانلار اونون مدیریتلی اداره اولونماسینی چوخ یاخشی بیلیرلر. فقط آیلار و ایللرین تلف اولماسینا واختین تلف اولماسی دئییلمز بلكه ائله ثانیه‌لرین و ساعتلرین تلف اولماسی‌دا بعضی ارزشلی فرصتلری الیمیزدن آلا بیلر. بونا گؤره هر كس واختی‌نین تلف اولمادان دوزگون استفاده‌سینه تصمیم توتوبسا بو یازینی اووخوسون.
اتفاقاتی دفترچه‌ده یازین:
ایندی گونده‌لیك زمانیزدان نئجه استفاده ائلیرسیز؟ بونو بیلمك زمان مدیریتی‌نین بیرینجی آددیمی ساییلیر. یعنی ایندی ایشه سالدیغی مئتودو تحلیل ائله‌مگیز لازمدیر. بو ایشین ائله‌ده تخصصه احتیاجی یوخدور یعنی سیز اؤزوز ده بو ایشی گؤره بیلرسز. باشلانیش اوچون گونده‌لیك ایشلریزی بیر دفترچه‌ده یازین. دئمه‌یین كی یادیمدا قالار یازماق لازم دئییل حتماً یازین. بو ایش سیزه لازم اولمایان ایشلری تاپماغا كؤمك ائلر. بو ایشلری تاپماق بیرینجی بؤیوك داشی قاباغیزدان گؤتوره‌جك.
مهمّ ایشلری تاپین:
هر گون نه ایشلر گؤرورسوز؟ هانسی ایشلره اولویّت وئریرسیز و هانسی ایشلرین اهمیتی داها آزدیر؟ زمان مدیریتینده بو ایكی سؤال چوخ مهم ساییلیر. زمانین مدیریتی اوچون بیرینجی آددیم ایشلری اولویت باخیمیندان دوزمكدیر. لذتلی ایشلرین حذف اولماسینا قورخمایین. عكسینه گوجوز چاتمایان ایشلری فوری ایشلرین لیستیندن حذف ائدین. گونده‌لیك مسئولیتلریزی معقول بیر مقدارا آزالداندان سونرا برنامه تؤكمك واختی چاتیر.
واختیزا مزاحم اولانلاری تاپین:
هر كسین دؤره‌سینده واخت مزاحملری اولا بیلر. اونلار گون بویو انسانلارین واختلارین تلف ائلیرلر. بئله سانمایین كی سیزین دؤره‌زده بئله انسانلار یوخدو. بیر آز دقتلی باخساز اونلاری تاپارسیز. اونلارا، مشغول اولدوغوزو و آرتیق واختیزین اولمادیغینی آنلاتمالیسیز. بو گونون حیاتیندا مزاحملرین چوخو تلفن و یا اجتماعی شبكه‌لر واسطه‌سی ایله واختیمیز تلف ائلیرلر. یاخشی اولار ایشیز اولان زمانلار تلفونوزو خاموشلایاسیز و یا سس‌سیزه قویاسیز.
واختی یاراتماق یاخشی یول ساییلیر:
«قراردی سیز زمانی مدیریت ائلیه‌سیز نه زمان سیزی» بو جمله‌نین معناسی بودور كی سیز اؤزوزه واخت یارادا بیلرسیز. تعجبلنمه‌یین، لازم دئییل ساعتین عقربه‌لرین دالی‌یا چكه‌سیز. سیز اؤلو واختلاری تاپیب اونلاری فایدالی واختلارا چئویره بیلرسیز. بو ائله‌ده بوروشوق ایش دئییل. بئش آلتی گون تمریندن سونرا بو ایشی باشاراجاقسیز. فقط دقتیز، واخت اوغورلولاریندا اولمالیدیر كی واختیزی سرقت ائله‌مه‌سینلر.
ایشیزی دوزگون گؤرون:
چوخلاری ایشلری یئیین گؤرومكله داها چوخ واختلاری‌نین اولماسینی دوشونورلر. لطفا سیز بو اشتباهی ائله‌مه‌یین و اؤزوزدن داها آرتیق راضی اولماغیز اوچون ایشلرین دوزگون یئرینه گتیرمگینه فكر وئرین.
ایشلری یئرسیزجه‌سینه یئیین گؤرنده، دقّتیز آزالیر و چوخ واختلار همان ایشی تازادان گؤرمك مجبوریتینده قالیرسیز. ائله بیر ایشی تازادان گؤرمك واختی تلف ائلیر.
گونده‌لیك ایشلرین نوعلرینی تانیین:
زمان مدیرتینده ایشلرین نوعلرینی بیلمك چوخ مهمدیر. ایشلری اوچ مهم، آز اهمیتلی و اهمیتسیز یئره بؤلمك اولار. مهم ایشلری تعویقه سالمایین چونكی اونلاری واختیندا گؤرمه‌سز سونرا سیزین داها چوخ واختیزی آلاجاقلار و هئچ واخت‌دا همان ایش اولامایاجاقلار. اهمیتی آز اولان و اهمیتسیز ایشلری سونرایا ساخلایا بیلرسیز.
چتین و واخت توتان ایشلره بیر چاره تاپین:
نظریزه بیر ایش چتین و یا واخت توتان گلسه اونون آلتیندان قاچمایین مخصوصاً مهم ایشلرین سیراسیندا اولسا. بئله ایشلری واختیندا یئرینه گتیرمك لازمدیر. یاخشی اولار امكان داخلینده بو ایشلرین گؤرمه‌سینه تازا و فرقلی یول تاپیلسین آما سونرایا ساخلانیلمالاری اصلاً مصلحت دئییل.
واختیزین مدیری اولماغا نئچه توصیه:
زمانین دوزگون مدیریتی اوچون خصلتلریزین بیر سیراسینی اصلاح ائتمه‌لی و یا حتی دَییشمه‌لیسیز. سیزین بعضی قاباقكی خصلتلریزی زمان مدیریتی اوچون ضررلی اولا بیلر.
1ـ برنامه تؤكن اولون:
ایش بیلنلرین دئدیگینه گؤره بیزیم قازانجلاریمیزین یوزده هشتادی چالیشماغیمیزین یوزده ایگیرمیسی ایله اله گلمه‌لیدیر. بو سیزین دوزگون برنامه تؤكدوگوز زمان اله گلر. برنامه تؤكه بیلمه‌سز مطمئناً زمان مدیریتینده موفق اولا بیلمیه‌جاقسیز.
2ـ اعتمادیز اولسون:
ایشلرین گؤرولمه‌سینده آیریلارینا اعتمادیز اولماسا زمان مدیریتی سیزه چوخ چتین اولاجاق. بعضاً سیز بونا گؤره ایشلریزی واختیندا گؤره بیلمیز سیز كی ایشین بیر قمستینی آیریسینا تاپیشیرماغا جرأت ائله‌میرسیز. شاید ایشی تاپیشیردیغیز شخص او ایشی سیزین كیمی یاخشی و دقتلی یئرینه گتیره بیلمه‌سین آما ایشین اونلارین طرفیندن گؤرولمه‌سی اونون یئرده قالماسیندان و یا سیزین استراحت واختلاریزی آلماقدان داها یاخشیدیر.
3ـ یوخ دئمگی باجارین:
هر سؤزون و ایستگین قاباغیندا تسلیم اولماق و «گؤزوم اوسته» دئمك نیّتیز اولسا، یاخشی اولار زمان مدیریتیندن واز كئچه‌سیز. سیز زمان مدیریتینی اله گتیرمك اوچون «یوخ» دئمگی باجارمالیسیز. بونون آیری یولو یوخدور. بیر ایشی گؤرمگه واختیز اولماسا چوخ احتراملا بونو مقابل طرفه چاتدیرین. مقابل طرف نه قدر ده اصرار ائله‌سه گوجوز و یا واختیز چاتمایان ایشی عهده‌زه گؤتورمه‌یین.
تفریح ائله‌یین، اوولانین، پول خرجله‌یین !
یازار : میرزه عبدالصمد ملکی | بؤلوم : اجتماعی
+0 به یه ن
تفریح ائله‌یین، اوولانین، پول خرجله‌یین !
دنیانین بؤیوك آلیش- وئریش مركزلری مصرف جامعه شناسلیق نظریه‌لریندن استفاده ائله‌مكله بازارلیق ائله‌مگی داها راحت و لذتلی ایشه چئویرمك و داها چوخ ساتماق اوچون بو مركزلرده تفریح ابزارلاری‌نین آرتیرماسینا چالیشیرلار.
ایكینجی دنیا ساواشیندان سونرا انسانلارین بازارلیق شیوه‌سی ساتیجیلارین تازا برنامه‌لرینه گؤره دَییشدی. او زماندان بو طرفه مصرف جامعه شناسلاری مشتری‌لرده آلماغا رغبتی آرتیران تازا پتانسیل‌لری گؤردولر.
اونلار هر آلیش وئریش مركزینه گئدن مشتری‌نین همیشه بیر شئی آلماق قصدینده اولمادیغینی بیلدیلر بلكه مشتری‌لرین آلیش وئریشله تفریح ائله‌مك قصدلری اولدوغونو بیلدیلر. جامعه شناسلار بازارلیغا، بیر طرفی لازم اولان بازارلیقلار و او بیری طرفی تفریح اوچون اولان بازارلیقلارا شامل اولان بیر طیف حاضرلادیلار. گونده‌لیك بازارلیقلار و فنی بازارلیقلار بیرینجی طیفده یئر آلیر و بزك وسایلی و پالتار كیمیلرین آلماسی ایكینجی طیفده یئرلشیر.
بو زمینه‌ده نظریه صاحبی اولان «استون» مشتری‌لری دؤرد یئره بؤلور: اقتصادی، شخصی، قومی و علاقه‌سیز. اونون نظرینه گؤره اقتصادی مشتری‌لرین آلماق منظورلاری فقط محصولو اله گتیرمكدیر و آیری منظورلاری یوخدور. شخصی مشتریلر بازارلیغا شخصی بیر تجربه كیمی باخیرلار و فقط اجتماعی رابطه قورماق اوچون تجارت مركزلرینه گئدیرلر. قومی مشتریلر ده فقط خانواده تجارت مركزلرینده آلیش وئریش ائله‌مك ایسترلر و آیری یئردن هئچ نه آلمازلار. علاقه‌سیز مشتریلر ده آلیش وئریش مركزلره فقط بیر شئی آلماق اوچون گئدرلر و اوردا واخت گئیچیتمگه اصلاً بازلیقلاری اولماز.
بو زمینه‌ده آیری نظریه صاحبی اولان «بلاچ» دا مشتری‌لری دؤرد مختلف دسته‌یه بؤلور: بیرینجی دسته تجارت مركزلرینده چوخ واخت گئچیردن سّنتی شخصلر كی بازارلیغین سنّتی منفعتلرینه بازلیقلاری وار. اونلار تجارت مركزلرینه خاص خدماتدان استفاده و بازارلیق ائله‌مك اوچون گئدرلر. او بیری دسته تجارت مركزلرینه گزیب دولانماق و واخت گئچیرمك اوچون گئدرلر. مصرف نظریه‌لری بو دسته اوچون و اونلارا داها چوخ وسایل ساتماق اوچون چوخلو برنامه‌لری وار. آخر دسته‌ده اَن آزا بازلیقلاری اولانلاردیلار كی تجارت مركزلرینده اَن آز واخت گئچیرتمگه بازلیقلاری اولار.
آلماقدان لذّت آپاران شخصلر تورا دوشورلر
مصرف نظریه‌لری تجارت مركزینه تفریح اوچون گلن شخصلرین اوستونده مطالعه ائله‌ییب اونلارا داها چوخ محصول ساتماغا چوخلو طرحلری وار. اونلار بیر عدّه‌یه آلیش- وئریش ائله‌مگین لذّتلی اولدغونون آنلاییبلار.
بو نظریه‌نین قاباغا گئتمه‌سی ایله دنیانین باشا باشیندا آلیش- وئریشله تفریح آراسیندا باغلیلیق یارادان آدلیم تجارت مركزلری یاراندی. بو مركزلرده داها چوخ محصول ساتماق اوچون بو ایكی موضوعون آراسینداكی اوچ جور فعالیته تأكید ائله‌دیلر:
1ـ بوش واختلار اوچون بازارلیق ائله‌مك. خرید مركزلرینده فیلم، موسیقی، كتاب و سایر كیمی محصول‌لار ساتانلار. مشتریلر لازملری اولان محصول‌لاری آلماغین كناریندا بو محصول‌لاری‌دا آلیب بوش واخلاریندا اونلاردان استفاده ائلیرلر.
2ـ بازارلیق زمانیندا بوش واختلاری دولدورماق اوچون رابطه. مشتریلر آلیش- وئریش زمانیندا تفریح اوچون مختلف محصول‌لار آلیرلار. مثلاً رستورانلار، سینما سالونلاری و اویون سالونلاری تجارت مركزلرینده مشتریلره خدمات وئریرلر.
3ـ تجارت مركزلرینی او قدر جذّاب و گؤزل ائلیرلر كی مشتریلر اوردا دولانیب تماشا ائله‌مكله لذّت آپاریب داها چوخ محصول آلماغا تشویق اولورلار.
ایكینجی مصنوعی قلب پیوندی فرانسه‌ده حیاتا كئچدی
یازار : میرزه عبدالصمد ملکی | بؤلوم : ساغلاملیق
+0 به یه ن
ایكینجی مصنوعی قلب پیوندی فرانسه‌ده حیاتا كئچدی
پاریسدن سونرا دنیانین ایكینجی مصنوعی قلب پیوندی فرانسه‌نین نانت شهرینده حیاتا كئچدی.
مهرین وئردیگی خبره گؤره دنیانین بیرینجی مصنوعی قلبی 2013-ده 76 یاشلی بیر مریضه پیوند وورولدو. دكترلرین گؤزلدیگی‌نین خلافینا ناخوش چوخ دیری قالمادی و پیونددن سونرا وفات ائله‌دی.
ایكینجی مصنوعی قلب پیوندی‌نین خبری نئچه هفته پیونددن سونرا یاییلدی و هله ده بو خبرین بوتون جزئیاتی یاییلماییب.
بو جراحلیق بیرینجی جراحلیقدا دا حاضر اولان پروفسور «دانیل دیوو» توسطی ایله اولدو. آما بو خبرین جزئیاتی یعنی ناخوشون كیملیگی و ایندیكی وضعیتی باره‌ده معلومات یاییلماییب.
بیرینجی مصنوعی قلبین آغیرلیغی بیر كیلو جیواریندا ایدی كی طبیعی قلبدن اوچ دفعه آغیریدی.