din xadimi دین خادمی

یول و شهر سالما (راه و شهرسازی) وزارتی تبریز- سهند اتوبانینی سالماغا مكلف اولدو

فارسین تبریزدن شرقی آذربایجان استاندارلیغی‌نین عمومی رابطه‌لریندن وئردیگی خبره گؤره، رئیس جمهور حسن روحانی‌نین ریاستی ایله تشكیل تاپان بو جلسه‌ده، بئش میلیارد تومن اعتبار، هزینه كیمی و 64 میلیارد تومن اعتبار، تملّك سرمایه‌ای شكلده 1392-جی ایلینده اعتبارین تخصیص تاپماماسینا گؤره، مساوی نسبت ایله تازادان دوزلتمه، خسارتلرین جبرانی و بورجلارین وئریلمه‌سی اوچون شرقی آذربایجانین استاندارلیغینا وئریلدی.

دولت هیأتی‌نین تصویبی ایله، یول و شهر سالما وزارتی مكلف اولدو 20 كیلومتر اوزونلوغوندا تبریز- سهند اتوبانینی مطالعه، طراحلیق، مسیرین بوشالتماسی، اتوبانین احیاسی، ساخلاماسی و استفاده‌سی اوچون جانبی تجهیزاتی‌نین قوشماسی اوچون ضابطه و قانونلاری رعایت ائله‌مكله احداث، ساخلاما و استفاده شركتی ایله قرارداد باغلاسین.

هدیه وئرمك آدابی

جامعه‌لرده‌كی رابطه‌ و تعامل‌لرین اهمیّتلی بؤلومونو هدیه وئرمك اؤزونه اختصاص وئریر. هدیه خانواده عضولری، دوستلار و حتّی تجاری طرفلرین‌ده رابطه‌لرینی محكم‌لدیر. انسانلارین بیر- بیرینه هدیه وئرمه‌سی‌نین بیرینجی معناسی اونلارین بیر- بیرلرینه دَیَر و اهمیّت وئرمكلریدیر. بونون نتیجه‌سینه اونلار بیر- بیرلرینه داها آرتیق فكرلشیب دقّت یئتیریرلر. هرچند مختلف فرهنگلرده و موقعیتلرده هدیه وئرمگین اؤزونه مخصوص معناسی اولا بیلر آما اوست- اوسته هدیه‌ وئرمك مقابل طرفه دقت یئتیرمك معناسیندادیر.

هدیه وئرمك مقابل طرفه علاقه‌ نشان وئرمگین اَن آیدین علامتی ساییلیر. حتیّ عكسینه بیری ایسته‌سه بیریله اَن آز صدمه ایله رابطه‌‌سینی قیرسین، بونو هدیه وئرمكله ده ائده بیلر. هدیه مسأله‌سینه دقت یئتیرمه‌ین انسانلار، معمولا بو اجتماعی علامتلر و اشاره‌لری الدن وئریرلر.

روانشناسلیق باخیمدان‌دا هدیه وئرمگین یوخاری اهمیتی وار. پای وئرمك هر ایكی طرفین روحی باخیمدان ساغلام اولماسینا كؤمك ائلر. بو عمل هر ایكی طرفده خوشا گلیم حسّ یارادار و صمیمیّتی چوخالتماقلا امنیت حسّینی‌ده چوخالدار. هدیه وئریب آلماق انسانلارین بئینینده شادلیغا سسب اولان «سروتونین» هورمونونون ترشح تاپماسینا باعث اولار.

هدیه وئرمك عوضسیز نیّت ایله اولدوغو زمان داها چوخ فایدالی اولور و هدیه وئرنین دئپرئسیوندان اوزاق اولماسینا سبب اولار.

هدیه وئرمك ساده ایش نظره گلسه‌ ده اؤزونه مخصوص آدابی وار. هدیه وئرمگین بیرینجی چتین مقامی مقابل طرفین نه‌یه علاقه‌لی اولدوغو و نه‌یی سئودیگیدیر. حقیقتده بو راحتلیقدا اونون بئینینه نفوذ ائدیب نه‌ ایسته‌دیگینی بیلمك اولماز. بعضاً ده بو مسأله هدیه‌نین،‌ آلانین طرفیندن ارزشسیز گؤروندوگونه سبب اولور.

آشاغیدا یاخشی هدیه‌نین بیر سئری علامتلرینی ساییریق:

غرض‌سیز هدیه

هر شئیدن اوّل یاخشی هدیه، غرضسیز و توقّع اولمادان وئریلمه‌لیدیر. چونكی غرضلی اولسا و عوض-عوض نیّتی ایله وئریلسه مقابل طرف، اؤزونو عوضینده آیری بیر هدیه آلماق مجبوریّتینده گؤره‌جك، هم‌ده اونا وئریلن هدیه‌نین صمیمیت اوزو ایله اولمادیغینا ایناناجاق.

مناسب قیمتی اولان هدیه

وئریلن هدیه مقابل طرفده یوخسول‌لوق حسّی یاراتسا، حقیقی هدیه ساییلماز، بلكه بو ایش هدیه وئرنین وارلی اولماسینی گؤسترن عمل ساییلیر. انسانلارین هدیه آلماق همان، اونون جبرانینا فكرلشدیكلری اوچون باهالی هدیه اونلاری دردسره سالار و اَن آجی خاطره‌لرینه چئوریلر. بونا گؤره هدیه آلاندا آرتیق دقّت ائتمك لازمدیر.

مخصوص هدیه

بعضیلری هدیه‌نی مجبوری و بویونلاریندا بورج اولدوغو اوچون وئریرلر كی معمولاً بیر كؤینكلیك، جوراب و بو كیمی شئیلر اولار. بونلار لازم اولان شئیلر اولسا دا اونلاری هدیه وئرمك مقابل طرفده اهمیتلی اولماق و مخصوص اولماق حسّی  یاراتماز. اوندا بو حس یاراتماق اوچون اونون چوخ سئودیگی شئیلر مثلاً آلماق ایسته‌دیگی بیر كتابی هدیه وئرمك لازمدیر.

هدیه نقد پول اولمامالیدیر

بعضیلری هدیه آلماق یئرینه پول وئریرلر. بو ایش مقابل طرفین هدیه وئرن اوچون اهمیتسیز اولدوغونو القا ائلیر. یعنی او شخصین او قدر اهمیتی یوخیدی كی اونون اوچون فكرلشیب بیر هدیه آلماغا زحمت چكیلسین. هدیه آلانین اهمتلی اولدوغونو بیان ائتمك لازم اولان یئرده، هئچ واخت هدیه نقد پول اولمامالیدیر.

هدیه‌نین ارزشینی پول ایله اؤلچمك اولماز. هدیه، مقابل طرفه علاقه‌نی بروزا وئرمك معناسیدندادیر. بونا گؤره همیشه بیر شئی آلماق لازم دئییل. بلكه اونون سئودیگی یئمگی حاضرلاماق و یا اونا مهم اولان بیر گون مثلاً تولّد گونونده، اونو قوناق چاغیرماق، اونون سیزه نه قدر اهمیتلی اولدوغونو ثابت ائلر.

هدیه‌نین دالیسینداكی دوشونجه

هدیه‌نین اؤزو، او قدر ده اهمیتلی دئییل بلكه اونون دالیسیندا اولان دوشونجه مهمدیر. بونا گؤره هدیه، مقابل طرفین سئودیگی بیر شئی اولمالیدیر. بو مسأله‌نی اونون دانیشیقلاریندان آنلاماق اولار. حتی بیر كنسرت، تئاتر بلیطینی‌ده هدیه كیمی وئرمك اولار. بئله‌لیكله اونون ذهنینده شیرین بیر خاطره یاراتماق اولار.

هدیه آلان باشی مشغول و واختی آز اولان آدام اولسا، اونا واخت ایسته‌ین هدیه مثلاً بئش مین قطعه‌لیك پازل آلماق دوز اولماز. آما اونون ایش واختی قولاق آسا بیله‌جگی سسلی كتاب آلماق یاخشی بیر هدیه ساییلار.

پیچَتلی هدیه‌ آلماقدان گؤزل بیر شئی یوخدور. حتی بو هدیه بیر بلیط اولسا اونو بیر هدیه پاكتی‌نین ایچینده آلماق لذتلی اولار. هم‌ده بو پاكت هدیه آلانین سئودیگی طرحده اولسا لاپ یاخشی اولار.

گؤزل یازیلار

هدیه كاغذی‌نین اوستونده همیشه گؤزل سؤزلر یازماق لازمدیر. البته تكراری و كلیشه‌لی یازیلار یازماقدان چكینماق یاخشی اولار. چونكی او جمله‌لرین هدیه وئرنین اؤز ایچیندن گلمیش یازیلار اولماماسی بللی اولار. بونا گؤره هدیه وئرن حتی ساده جمله‌لرله اورك سؤزلرینی یازسا دا مقابل طرفه اهمیتلی اولار.

اونا واخت آییرماق

هدیه همیشه بیر شئی آلماق دئییل. اولا بیلر زمان و واخت هدیه كیمی مقابل طرفه وئریله. مثلاً اونون تولّد گونونده و یا اونا مهم ساییلان بیر گونده اونون گؤروشونه گئدیله و یا اونون اورك سؤزلرینه قولاق آسیلا.

معظم انقلاب رهبرین حكمی ایله، محمد سرافراز رادیو تلوزیون رئیسی اولدو

معظم انقلاب رهبری حضرت آیت الله خامنه‌ای بیر حكمده عزت الله ضرغامی‌نین چالیشمالاریندان قدردانلیق ائله‌مكله، محمّد سرافرازی بئش ایللیك دؤره اوچون، جمهوری اسلارمی رادیو تلوزیونون رئیسی عنوانیندا تعیین ائله‌دی.

معظم انقلاب رهبری‌نین اطلاع‌رسانی سایتی‌نین وئردیگی گزارشه گؤره، بو حكمون متنی بئله‌دیر:

بسم الله الرحمن الرحیم

جناب آقای محمّد سرافراز دام توفیقه

مهندس سید عزت الله ضرغامی‌نین یورولماز و اورك یاندیران و ابتكارلی اولان مسئولیت دؤره‌سی‌نین باشا چاتماسی ایله سیزین صلاحیتلریزه دقّت یئتیرمكله و ملی رسانه‌ده اوزون تجربه‌زدن و بو بؤیوك و مهم مجموعه‌دن وسعتلی تانیشلیغیزدان خبردار اولماقلا، سیزی بئش ایللیك دؤره اوچون، جمهوری اسلامی رادیو تلوزیون سازمانی‌نین رئیسلیگینه منصوب ائلیرم.

رادیو تلوزیون سازمانی، خطرلی «جامعه‌نین عمومی افكاری و فرهنگی‌نین مدیریتی و هدایتی» مأموریّتی‌ ایله عمومی دانشگاه كیمی، رسانه ساحه‌سینده مترقی و درین حرفه‌ای برنامه‌لره دایانماقلا، ملت آحادیندا دین، اخلاق، اومید، آگاهلیق و اسلامی- ایرانی یاشاییش طرزینی ترویج ائله‌مك وظیفه‌سینی داشییر. ملی رسانه‌نین ایندیكی مقطعده تاریخی مسئولیتی، اسلامی ایران انقلابی‌نین كیملیك و فرهنگی‌نین استقلالینی ساخلاماق و ارتقا وئرمكدیر. اسلامی نظامین یوكسك هدفلری مسیرینده، ملت آحادی‌نین «ملّی عزم، معنوی شادلیق و انقلابی نشاط»ی، درین و وسعتلی عمومی معرفت و آگاهلیغا باغلیدیر و احتیاجی وار كی اسلامی انقلابین فرهیخته و انگیزه‌لی دلبسته‌لری و ناب دینی فكری‌نین تولید سرچشمه‌لری ایله بیرلشسین. رادیو تلوزیون سازمانی هابئله اؤلكه‌نین ترقّیسینه تشویق ائله‌ین و حركتلندیرن موتور كیمی، ملتین عمومی بسیجینده هر طرفلی و ابتكارلی مدیاسال حمایت وظیفه‌سی و همچنین اؤلكه اُفقونون و نظامین كلان سیاستلرین اجراسیندا و هدفلری‌نین تأمین ائله‌مه‌سینده اجرایی مدیریّته كؤمك ائله‌مك وظیفه‌سینی داشیر. ملی رسانه‌نی انشاء الله بو بؤیوك مسئولیتده كؤمك ائله‌ین راهبردلارین اهمیتلی‌لری ضمیمه‌ده ابلاغ اولور.

نهایتده اؤز مسئولیت دؤرونده ملی رسانه‌نین سیاسی، اجتماعی، و فرهنگی قسمتلرده گؤزه گلیم شكلده نقش اوینایا بیلمه‌سی اوچون، ترقّیسینه شرایط یارادان جناب مهندس ضرغامی‌دن صمیمانه تشكر ائلیرم.

الله تعالی درگاهیندان سیزین كی اسلامی انقلابین عزیز شهیدلری خانواده‌سینه منسوبسوز، الله‌ین عنایتلرینه دایانماقلا بو خطرلی و حساس مسئولیتین یئرینه یئتیرمگینده توفیقیزی ایستیرم و سیزه و حرمتلی همكارلاریزا دعا ائلیرم.

سیّد علی خامنه ای - ۱۵آبان ۱۳۹

مراغالی شاعر اوستاد میرزه حسین كریمی مراغه‌ای

بو شاعر 82 ایل بركتلی عمرو بویوندا 150 مین بیتدن آرتیق اهل بیت (ع) مدحی و مرثیه‌سینده شعر یازیب كی 23 جلد كتاب قالیبیندا چاپ اولوب. اوستادین سون كتابی «مصیبت طوماری» آدیندا اهل بیتین (ع) مدحی و مرثیه‌سینده چاپا یئتیشیب.

اوستاد میرزه حسین كریمی مراغه‌ای اؤز شعرلرینی تورك دیلینده یازسا دا شعرلرینی كلاسیك وزنلرله یادیغینا گؤره اونلاردا عرب و فارس اصطلاحلارینا چوخ راست گلمك اولار. اوستادین شعرلرینه گؤره دكترا تئزی‌ده یازیلیب.

اوستاد مراغه‌ای اؤز طنز شعرلرینده زمانین رسوماتینی نقده چكیر. اونون طنز شعرلری 6 جلدده «رنگارنگ» آدلی كتابدا چاپ اولوب.

اوستاد میرزه حسین كریمی مراغه‌ای ایندی (1393) مراغه شهرینده كتاب ساتیجیلیغی ایله عینی زماندا اثر یاراتماغا دوام ائدیر.

موز داوادان داها یاخشیدی

1ـ قان فشاری‌نین چوخلوغو

فشارین نورمال اولماسی اوچون قانداكی پوتاسیومون مقدارینی متعادل ساخلاماغین چوخ اهمیّتی وار و موز دا لاپ یاخشی پوتاسیوم منبعلریندن بیردیر. هر گون سحرلر بیر موزون یئمه‌سی قان فشاری‌نین همیشه‌لیك یاخشی وضعیتده قالماسی اوچون فایدالیدیر.

2ـ دپرئسیون

موزداكی تریپتوفان، سروتین و شادلیق هورمونلارین ترشّحینی آرتیران پروتئین شكلینده‌دیلر. گونده بیر عدد موزون یئمه‌سی بو هورمونلارین تحریكی اوچون كفایت ائلر. بو هورمونون نئچه دقیقه ایچینده چوخالماسی سیزه شادلیق و دینجلیك احساسی وئرر.

3ـ استرس

بدنین متابولوسیمی استرس نتیجه‌سینده آرتار و بو دا بدنین پوتاسیوم مقدارینی آزالدار. موزون مصرفی پوتاسیوملی اولدوغو اوچون بو تعادلی ساخلار و اورگین ایشینی طبیعی حالا قایتارار. هابئله بدنده‌كی سو و مایعاتین تعادلی‌نین ساخلاماسینا كؤمك ائلر.

4ـ خشكیت

موزدا بیر جور فیبر اولان پكتین وار كی هضمه سرعت وئرر و سمّلرین بدندن خارج اولماسینا كؤمك ائلر. هابئله موزدا پروبیوتیك خاصیتی وار كی هضمی تقویت ائلر و باغیرساقلارداكی خشكیت تأثیرینده یارانان فشاری آزالدار.

5ـ عادتدن قاباق علامتلری

موز قانین گلوكوزونا مثبت تأثیر قویان 6B ویتامینیندن غنیدیر. تحقیقلره گؤره ده B ویتامینی عادتدن قاباق علامتلری آزالتماقدا فایدالیدیر. موز بئل و قارین آغریسینی آزالدار.