din xadimi دین خادمی

Gigas-ین ال یازیلاری توراتین متنلری و دانیشقلارینی محاوره شكلینده احتوا ائله‌ین، 800 ایل بوندان اوّلدن (اورتا عصرلردن) ایندی‌یه قالمیش عظمتلی و دئو آسا كتابدیر.

اورتا عصرلردن قالمیش بو اَن بؤیوك كتاب، اینك و اوزون قولاق دریسی اوستونده یازیلیب. آما بو كتابین «شیطان انجیلی» آدینا معروف اولماسینا سبب، اونون 299-جو صفحه‌سینده اولان شیطانین مرموز و یئرسیز بیر تصویری‌نین چكیلمه‌سیدیر.

افسانه‌لره گؤره، بو تصویر شیطان طرفیندن مسخ اولونموش اؤزونو شیطانا ساتمیش راهبین الی ایله بو كتابا چكیلیب. بو تصویرده شیطان انسانلارا آغزینی اَییب یاندی – قیندی وئریر. بو كتابین هر صفحه‌سی‌نین بویو 92 سانتیمتر و اَنی 50 سانتی متردیر. بو 310 صفحه‌لیك كتابین جلدی تخته، مئتال و گؤندندیر و 74 كیلو آغیرلیغی وار.

بو كتاب 13-جو عصرده چك اؤلكه‌سینده یازیلیب. 1648-جی ایلینده سوئد ایله 30 ایللیك جنگ زمانی سوئد ارتشی طرفیندن یاغمالانیب و ایندیلیكده سوئدین استكهلم شهری‌نین موزه‌سینده‌دیر.

آیت الله سید مصطفی محقق داماد دنیا كاتولیك مسیحی‌لری‌نین رهبری پاپ فرانسیس ایله واتیكاندا گؤروشوب دانیشدی. بو گؤروش «مؤمنلرین جامعه‌ده‌كی تربیتی رولو» موضوعسوندا مسلمان و مسیحی عالملری‌نین اوچونجو اجلاسی چرچیوه‌سینده و كاردینان تورانین دعوتی ایله اولدو.

حوزه آژانسی‌نین وئردیگی خبره گؤره، واشینگتونون بؤیوك اسقفو كاردینال توران، امیر حسین بن طلال اردن‌دا بین الادیان مطالعه‌لر مؤسسه‌سی‌نین هیأت امنا رییسی، لبنانین سابق مفتیسی شیخ محمد رشید قبانی و بیت المقدس، مالزی، اندوزی، الجزایر و انگلستانین كلیسا اسقفلاری حاضر اولان بو اجلاسدا، ایكی دین عالملری‌نین دانیشیقلاری ایله اجرا اولدو.

بو مراسمده پاپ دئدی: مقصده چاتماغا چتین یول قاباغیمیزدا وار آما بو یولون هامار اولماسینا دعا ائتمه‌لی‌ییك.

بو اجلاسدا مدرسه‌لرده و دانشگاهلاردا مناسب تعلیم یوللاری ایله دینی معارفی و معنویاتی جوان نسله انتقال وئرمگین ضروری اولماسینا تأكید اولدو.

ژاپن اؤلكه‌سینده سوبارو تلسكوپون واسطه‌سی ایله یئددی تازا كهكشان كشف اولوندو. نظره گلیر بو كهكشانلار بیردن بیره اوردا ظاهر اولوبلار.

كهكشان سالخیملاری كایناتین اَن جرملی وارلیقلاریندان ساییلیرلار و یوزلر و حتی مینلر كهكشانی اؤزلرینده یئر وئریرلر. بو كهكشانلار جاذبه گوجو ایله بیر- بیرلرینه باغلیدیلار.

نظریه‌لره گؤره دنیا 13.8 میلیارد ایل بوندان اوّل بؤیوك پارتلاما (Big Bang) آدلانان حادثه‌دن سونرا یاراندی. ائله او زمان اولیه اولدوزلار و كهكشانلار فورمالاشدیلار سونرا اونلارین ماوراء بنفش ایشیغی یونیزه اولدو كی بو پروسه‌‌یه كوسمیك تازادان یونیزه اولماق (cosmic reionisation) دئییلیر.

منجّملر، فضایی یونیزه اولماق حادثه‌سینی آراشدیرماق اوچون ایلكین لیمن – آلفا (LAEs)‌ اشعه‌سینی ساچان كهكشانلاری، 13.1 میلیارد ایشیق ایلی فاصله‌ ایله آراشدیرماغا باشلاییبلار.

آراشدیرما تیمی دكتر «ماسامی اوچی»نین باشچیلیغیندا ژاپندا لیمن- آلفا (LAEs) اشعه‌سینه ساچان كهكشانلاری تانیماق اوچون سوبارو تلسكوپوندان استفاده ائله‌ییبلر.

منجملر حیرت ایچینده بو كهكشانلارین 13 میلیارد ایل بوندان قاباقدا ظاهر اولماسینی گؤردولر.

بو آراشدیرمانین یازانلاریندان بیری اولان «آكیرا كونو» تأكید ائله‌دی: بو كهكشانلارین پاریلداماسی بیردن بیره یئددی سككیز یوز ایل بؤیوك پارتلامادان سونرا ظاهر اولدو. بو مسأله فضایی یونیزه اولماغین داها یاخشی دركینه كؤمك ائلیه‌جك.

بو تحقیقین نتیجه‌لری Astrophysical Journal مجله‌سینده منتشر اولوب.

امام حسین (ع) بویورودولار: اسلام امتی یزید كیمی حاكمه مبتلا اولسا اسلاملا وداعلاشماق لازمدیر.

عزادارلیق اسلام و دین فرهنگینی ساخلاماق اوچون بؤیوك ایشدیر. مین ایلدن آرتیقدیر كی شیعه مذهبی اقلیتده و مظلوم موقعیتده واقع اولوب. بنی امیه زمانیندا اهل بیتین (ع) آدینی آپارماق جرم ساییلیر. چونكی دوشمنلر او حضرتلرین آدلاری‌نین دالیسینجا فرهنگلری‌نین‌ده گلمه‌سینی بیلیرلر. اونلارین فرهنگی‌ده چوخلو ایشلرین پرده‌سینی آچار و ریاكارلارین ریاسینی اوزه چیخارار.

آما عزادارلیقدا اسلام و اهل بیت (ع) فرهنگی و سیره‌سی بیان اولمازسا او عزادارلیق یزیدی عزادارلیقدیر. چونكی امام حسینه (ع) بیرینجی رسمی عزادارلیق مراسمی توتان یزید اؤزو اولدو. او دئدی من ابن زیادا بئله دئمه‌میشدیم او افراط ائله‌ییب. ایندی بو سهوین جبرانینا عزادالیق مراسمی قورمالی‌یام. بیلیرسیز كی كربلا اسیرلری شاما قدر شكنجه‌ و تحقیرله آپاریلدیلار آما شامدان مدینه‌یه حكومتی احتراملا انتقال تاپدیلار.

یزید امام حسین (ع) اوچون عزادارلیق مراسمی توتاندان، عزادارلیق ایكی نوع اولوب. بیر دسته‌سینده صرفاً عزادالیق اولور و بیر دسته‌سینده عزادارلیقدان علاوه ائمه‌نین (ع) سیره و سؤزلری مطرح اولور. بو مسأله‌‌نین ایندی‌ده ادامه‌سی وار.

امام رضادان (ع) روایت وار كی شیعه یالان دانیشماز. مشهدین شیعه‌لری امام رضانین (ع) گؤروشونه گئتدیلر. امام اونلاری آلتی آی بویوندا قبول ائله‌مه‌ییب بویوردو: یالان دانیشان بیزیم شیعه‌میز دئییل. اونلار جواب وئردیلر: بیز امام حسینه (ع) عزادارلیق ائدریك و احسان وئره‌ریك. امام بویوردو: شیعه، ائوده و بازاردا یالان دانیشماز، بیری‌نین باشینا بؤرك قویماز، ربا وئرمز و نزول یئمز. شیعه باها ساتماز، صادق اولار. امام رضا بویوردو بو خصوصیتی اولمایان شیعه‌لر یالانچی شیعه‌دیلر و اسلامین آبروسینی آپاریرلار.

روایتلریمیزده وار كی امام حسینه آغلایان و یا آغلادان جنّته گئدر. دوزدور بیری واقعاً امام حسینه آغلایا بیلسه البته جنّت اهلیدیر. آما دوغرودان و حقیقتاً امام حسینه آغلایا بیلمك اوچون او شخصیتی تانیماق و اونون سؤزلرینه عمل ائله‌مك لازمدیر. چوخلاریمیز نماز قیلیریق آما كیمین نمازی واقعاً خالص اولور. انسانین بیر ركعت نمازی خالص اولسا الله‌لا رابطه‌سی قورولمازمی؟ پس بو آرادا نا خالصلیق وار! بیری‌ده خالصاً مخلص امام حسینه آغلایا بیلسه، یعنی بو آدام الله و اسلام دئیَنلره عمل ائلر كی امام حسینه آغلایا بیلیر.

انسان تمرین ائله‌دیگی شخصه تبدیل اولار. سیزه كؤمگی كئچمه‌ین عادتلریز اولسا سیزه ضررلیدیلر و اونلاری ترك ائله‌مه‌لیسیز.

فقط آیریلارین یاشاییشیندا متمركز اولماق

موفق انسانلارین یاشاییشینی بیلمك فایدالیدیر آما بعضیلری اونلارا ائله مجذوب اولورلار كی اؤز یاشاییشلارینی یاددان چیخاردیرلار و اؤزلری‌نین موفق اولا بیلدیكلرینی اینانمیرلار. آما هر انسانین موفقیته گوجو و امكانی وار. بونا گؤره انسانلار داها چوخ اؤز یاشاییشلارینا دقّت یئتیرمه‌لی و گوجلریندن شاد یاشاماق اوچون استفاده ائله‌مه‌لیدیلر.

كمال گونونو گؤزله‌مك

عیبسیز و كامل گونو گؤزله‌مك هاوا سؤزدور. كمالا یاخینلاشماغا چالیشماقدیر كی فایدالیدیر. بونا گؤره هر آنی یاشاماق لازمدیر. او گونو گؤزله‌ین آرزیسینا چاتمامیش عمرونون آخرینا چاتار.

فقط پول قازانماق اوچون ایشله‌مك

علاقه‌سیز ایشله‌مك اؤزونو شاقّه عمل‌لرله حبس ائله‌مك آنلامیندادیر. انسان مشتاق اولدوغو ایشی‌ اله گتیره بیلمه‌سه ده هئچ اولماسا بیر آز سئوه بیلدیگی ایشده مشغول اولمالیدیر. انسان سئومه‌دیگی ایشله مشغول اولسا آز مدت سونرا روح دوشگونلویونه مبتلا اولار.

متنفّر اولماق

قارانلیغینان قارانلیقلا ساواشماق اولماز، بو ایش اوچون ایشیق لازمدیر. نفرت انسانین ذهنین قارالدار و شادلیغی الیندن آلار. هر شئیه مثبت طرفدن باخین. بو، منفی طرفلری گؤرمه‌مك معناسنیدا دئییل بلكه اونلاری منطقی صورتده گؤرمك معناسیندادیر. مثلاً بیر گوله یاخینلاشاندا اونون تیكانلارینی نظرده آلماق لازمدی آما ایلك اولاراق گولو نظرده آلیب تیكانلارا دقّت ائد‌ریك ترسینی یوخ.

قورخولاردان و نگرانچیلیقلاردان آسلانماق

كئچمیشی نظرده آلساز، قورخولارین و نگرانچیلیقلارین چوخونون جیبدن گئتمه اولدوغونو گؤره‌جكسیز. بونا گؤره قورخولاردان ال چكیب غمدن اوزاق اولماغیز لازمدیر.

دائماً مشكل‌لره متمركز اولماق

پیس بیر گون فقط بیر گوندور، اوندان آرتیق اونا فكر وئرمه‌یین. كئچمیشده‌كی پیس خاطره‌لره احساس اوزو ایله یوخ بلكه بیر روبات كیمی باخماق لازمدیر. فقط اوندان لازم اولان درسی آلین گئریده قالان اثرلرینی ائشیگه آتین. ذهنیزی كئچمیشده اولان پیس خاطره‌لرله دولدورساز اونون شادلیغینا امكان وئرمیه‌جكسیز.

بؤیوك دَییشیمی آز زماندا اله گتیرمك

یاشاییشیزدا اساسلی دَییشیكلیك یاراتماق ایسته‌سز، اونا مناسب واخت آییرمالیسیز. بعضیلری آز زماندا بؤیوك ایشلری گؤرمگی نظرده آلیرلار و بو ایشی گؤره بیلمه‌یَنده ناراحت و مضطرب اولورلار. آما طبیعتین قانونلارینی دَیشمك اولماز. هر ایشین اؤز اندازه‌سینه گؤره انرژی و واخت لازمدیر.

تحمل ائدیلمز آداملارلا بیر یئرده اولماق

بعضی انسانلار سیزی اذیّت ائلرلر. شاد و موفق بیر یاشاییش دالیسیجا اولساز بئله آداملاردان اوزاق اولامالیسیز.

حددن آرتیق ظاهره فكر وئرمك

مرتب و گؤزل ظاهر هامی‌نین ایستگیدیر. آما بو مسأله‌ده واسواسی اولماق زندگانلیغی عذابا چئویرر. یادیزدا اولسون یاخشی رفتار انسانلاری داها آرتیق جذب ائلر.