انسانین اَن خوشبخت اولدوغو یاش
یازار : میرزه عبدالصمد ملکی | بؤلوم : اجتماعی
+0 به یه ن
انسانین اَن خوشبخت اولدوغو یاش
انسانین اَن خوشبخت یاشی هانسی یاشدیر؟ بو سؤالا جواب وئرمك اوچون خوشبختلیگین تعریفینی بیلمك لازمدیر. روانشناسلار خوشبختلیگه اوچ فاكتور تانیرلار: بیرینجی عامل انسانین سالم اولماسی و هر جور خسته‌لیكدن كنار اولماسیدیر. ایكینجی عامل اجتماعی رفاهین اولماسیدیر. اجتماعی رفاه اؤزو ایله شادلیق و سئوینج گتیرر. اوچونجو عامل یاشاییشا اومود و اشتیاقین اولماسیدیر.
روانشناسلارین نظرینه گؤره، انسانین ساغلاملیغی و عمرونون اوزونلوغو، شادلیق و خوشبختلیك حسّی ایله سیخ باغلیدیر. چونكی روحون طراوتی و شادلیغی بدنین ساغلاملیغی ایله مستقیم رابطه‌لیدیر. مثلاً یاشاییشلاری اومود ایله دولو اولان قوجالار، اومودسوز یاشایان قوجالاردان ایكی ایل آرتیق یاشاییرلار.
خوشبختلیك، انسانین رفاهدا، شاد و یاشاییشا اومودلو اولدوغو زمانا دئییلیر. روانشناسلارین دئدیگینه گؤره خوشبختلیك انسان عمرونون اوچونجو اون ایلیندن باشلایار. آما بو یاش مختلف اؤلكه‌لرده فرقلی امكانلارا گؤره دَییشیك اولور.
مختلف مطالعه‌لر انسانلارین 40 یاشدان سونرا خوشبختلیگی حسّ ائله‌دیكلرینی گؤستریر. چونكی بو یاشدان سونرا رفتارلار عقل اوزو ایله اولور و قاباغا گئتمك مسیرینی راحتلادان چوخلو تجربه‌لر و دوستلار اله گلمیش اولور. انسانین 40 یاشدان سونرا عمرونون اوزو آشاغی گئتدیگینه رغماً اجتماعی رفاه، گونده‌لیك فعالیتلرین آزالماسی، اونون خاطر جمع اولماسینا و خوشبختلیق حسّینه كؤمك ائلیه بیلر. بو یاشداكی انسانلار گله‌جك اوچون اضافه استرسه دوشمزلر و یاشاییشدان داها آرتیق لذّت آپارارلار.
امامزادا موسی الجمال تبریزین گؤزل مكانلاریندان بیرینه چئوریلیر
یازار : میرزه عبدالصمد ملکی | بؤلوم : دین
+0 به یه ن
امامزادا موسی الجمال تبریزین گؤزل مكانلاریندان بیرینه چئوریلیر
تبریز شهرداری امامزادا سید جمالین تبریزین گؤزل مكانلاریندان بیرنه چئوریلمه‌سیندن خبر وئردی. تبریز شهرداریسی‌نین عمومی رابطه‌لری‌نین وئردیگی خبره گؤره، صادق نجفی تبریزین راستا كوچه محله‌سینده امامزادا ابوالحسن موسی الجمالین احیا و توسعه پروژه‌سیندن گؤروشده دئدی: دین بؤیوكلری و مجتهدلرین تأییدینه گؤره بو كرامتلی امامزادا‌نین نسبتی دؤرد نسل ایله امام موسی بن جعفره (ع) یئتیشیر. ائله بو سابقه، بو مكانین تبریزین تاریخی، مذهبی و گزمه‌لی یئرلریندن بیرینه چئوریلمه‌سینی واجب ائلیر.
تبریز شهرداری آرتیردی: بو مكانا كئچمیشده لازمینجه دقّت اولونماییب آما ایندی شهرداری و شهر شوراسی‌نین تعاملی ایله اونون احیا و توسعه‌سی سرعتله قاباغا گئدیر.
نجفی آرتیردی: تقریباً سككیز آی بوندا اوّل بو مكاندان گؤروش ضمنینده بو امامزادا‌نین احیاسینا قرار آلیندی و نظره گلیر یاخین گله‌جكده بورا تبریزین گؤزل یئرلریندن بیرینه چئوریله.
او، ایندیكی نسلین تبریزین كئچمیش افتخارلاری ایله تانیش اولماسی‌نین ضرورتینه تأكید ائله‌ییب دئدی: بیزیم بو طرحلرین اجراسیندان اساس هدفیمیز ایندیكی نسلی اسلامین افتخارلی تاریخی ایله تانیش ائله‌مكدیر. چونكی كئچمیش همیشه گله‌جگین چیراغی اولوب و كئچمیشی تانیماق قاباغا گئتمگه انگیزه یارادار.
نجفی، هابئه تبریز بازار محدوده‌سینده اجرا حالیندا اولان پروژه‌لره اشاره ائدیب دئدی: صادقیه‌نین احیاسی، راستا كوچه‌نین فلسطین خیابانینا متصل اولماسی طرحلری‌ده اجرا حالیندادیر كی بو گؤزل‌لندیرمه طرحلری ایله تبریزین تاریخی بازار منطقه‌سینی اؤزونه یاراشان رونقینه قاییتما‌سینا اومودوموز وار.
امامزادا موسی‌الجمال، امام موسی كاظمین (ع) نوه‌لریندندیر كی نَسَبی دؤرد نسل ایله او حضرته یئتیشیر.
بو امامزادا ابن‌اعرابی و صاحب طوق و صاحب حاجات آدینا دا تانینیر.
علامه جعفری (قدس سره)
یازار : میرزه عبدالصمد ملکی | بؤلوم : عمومی
+0 به یه ن
علامه جعفری (قدس سره)
علامه جعفری (قدس سره) جماعته و اونلارا وئردیگی سؤزه قایل اولدوغو دَیَر سونسوز ایدی. او قاباقجادان وئردیگی سؤزه گؤره قیزی‌نین وفات ائتدیگی گون منبره گئتدی و منبرینی تعطیل ائله‌مه‌دی.
تحصیل ایللری‌نین اوّل 20 ایلینی تبریزده، تهران و قم‌دا اولوب سونرا نجف شهرینه گئدن علامه 23 یاشیندا اجتهاد درجه‌سینه چاتدی.
علامه جعفری عرفان، فیزیك، فلسفه، ادبیات و ... كیمی چوخلو علم شاخه‌لرینده نظر صاحبی ایدی و بو اوزدن بؤیوك علامه آدینا تانیندی.
علامه‌دن قالان كتابلار اونون بو علملره نئجه مسلط اولدوغونون شاهدی‌دیر. علامه بو قدر علم صاحبی اولماسینا رغماً هئچ واخت ذرّه قدر غرورا مبتلا اولمادی و همیشه متواضع و بوتون قشرلرله دیل تاپان بیر شخصیت كیمی یاشادی.
آیدان یئره اوزاناجاق آسانسور
یازار : میرزه عبدالصمد ملکی | بؤلوم : عمومی
+0 به یه ن
آیدان یئره اوزاناجاق آسانسور
فضای آسانسورون دوزلمه‌سی ایندی‌یه قدر واقعیتدن اوزاق گؤرونن بیر ایده ساییلیردی. آما ایندی گلاسكوداكی Caledonian دانشگاهی‌نین عالملری 2020-جی ایله قدر بو پروژه‌نین اجراسینی پلاشدیریرلار. اونلارین طرحینه گؤره بو آسانسورون دوزلمه‌سی آیدان باشلایاجاق.
بو طرحین اولیه مطالعه‌لری اوچون ایندی‌یه قدر 100 مین دولار خرجلنیب.
یئرده هاوا تغییراتی، جاذبه، اوقیانوسلار و دریالار كیمی فاكتورلارین ثابت اولماماسی اوچون ایندی‌یه قدر بئله بیر آسانسورون دوزلمه طرحی، كاغاذدان ائشیگه چیخمامیشدی. آما نظره گلیر بو دفعه جریان فرقلی اولاجاق.
عالملر، آسانسورون آیدان یئره دوزلمه‌سی تقدیرده جاذبه كیمی مشكل‌لرین اولماماسینی بیلیبلر.
آناكوندانین انسان اودما لحظه‌سی+عكس
یازار : میرزه عبدالصمد ملکی | بؤلوم : عمومی
+0 به یه ن
آناكوندانین انسان اودما لحظه‌سی+عكس
دیسكاوری شبكه‌سی 2014-جو ایلینده دسامبرین 7-سینده «دیری اودولماق» آدیندا بیر مستند آنتنه یوللادی. بو شبكه چوخاندان ایدی بو مستند اوچون تبلیغ ائدیردی. قرار ایدی «پل روزالی» بیر آناكوندا ایلانی طرفیندن اودولوسون و بیر ساعت اونون قارنیندا قالسین.
آناكوندا ایلانلاری دنیانین اَن بؤیوك ایلانلاری كیمی تانینیرلار و معمولاً شكارلارینی اودماقدان اوّل بوغارلار.
روزولی‌نین بوغولماماسی اوچون بوتون حاضرلیقلار گؤرولموشدو. متخصصلر اونون اوچون كربن فیبریندن، نفس آلما و ارتباط سیستمینه مجهز اولان مخصوص پالتار حاضرلامیشدیلار كی ایلانین قارنیندا اؤلمه‌سین و ائشیكله دانیشا بیلسین.
روزالی دئییر: بیز بو سیستمین منیم اودولماغیمدان سونرا ایشله‌جگیندن مطمئن دئییلدیك. بونونلا بئله الیمیزدن گلن قدر امین اولماغا چالیشدیق.
او آرتیریر: بیز 60 گون بویوندا آمازونون پرو اؤلكه‌سینده اولان بؤلومونده مناسب آناكوندا آختاردیق. تاپدیغیمیز ایلك آناكوندانین 7.5 متر اوزونلوغو و تقریباً 135 كیلو آغیرلیغی واریدی. آما اونو تله‌یه سالانمادیق. سونرا بیر 6 مترلیك دیشی آناكوندا تاپدیق. ایلان اوّلده منی اودماق ایسته‌مه‌دی و قاچماق نیّتینده ایدی آما اونو تحریك ائله‌یندن سونرا منیم اوستومه یوگوردو و اودماغا چالیشدی.
روزالی‌نین محافظ پالتاری حیوان قانینا بلشیلمیشدی كی آناكوندا اونو یئمگه هوسلنسین.
روزالی، ایلانین گوجلو حلقه‌لری آراسیندا گرفتار اولدو و آز قالیردی قوللاری و سومكلری اوغولسون. اؤزونو ایلانین چنبره‌سینده گرفتار گؤرن روزولی‌نی قورخو بورویور. ایلان اونو اودماق اوچون آغزینی آچیر. آما بو آندا روزولی قورخوسونا مغلوب اولور و اوردان قورتورولماسینی ایستیر.
او، قورتولاندان سونرا اؤزو قورخوسونو توجیه ائله‌مك اوچون دئییر: ایلانین انگی‌نین گوجونو محافظ بؤركومده حسّ ائله‌دیم و آغزی‌نین سویونون سسینی ائشیتدیم. ائله بیل ایلانین بوتون گوجو، منیم بیر قولوم اوستونده متمركز اولموشدو. بیر آندا ائله بیلدیم قولوم اوغولور.
هر حالدا دیسكاوری كانالی ادعا ائله‌دیگی مستندی نمایشه قویمادی. بو شبكه بو برنامه‌نین تبلیغینده بیر گون قاباق انسانین بیر ساعت بویوندا ایلانین قارنیندا قالدیغینی و زمان دركی‌نین ایتیدیردیگینی ادعا ائله‌میشدی.
بو برنامه‌دن قاباق و سونرا حیوانلاردان حمایت انجمنی، ایلانی اذیت ائله‌مگه گؤره بو برنامه‌دن انتقاد ائله‌میشدی.
