قاباغین فایدالاری
یازار : میرزه عبدالصمد ملکی | بؤلوم : ساغلاملیق
+0 به یه ن
قاباق، كولسترول و ایشباع اولموش یاغی اولمایان آز كالوریلی تره‌وزلردن ساییلیر. آما فیبر، آنتی‌اوكسیدانلار، املاح و ویتامینلرله دولودور.
قاباق A، C و E ویتامینلریله دولودور. بتاكاروتن و آلفا كاروتن، كرپتوگزانتین، لوتئین، زئاگزانتین كیمی پلی‌فنولیك فلاوونوئید تركیباتی اوچون یاخشی منبع ساییلیر. (كاروتن بدنده A ویتامینینه چئوریلر). B كومپلكس ویتامینلریله دولودور. میس، كلسیوم، پتاسیوم و فوسفور كیمی املاحلا دولودور. قاباق توخومو ایشباع اولمامیش یاغلار و فیبره یاخشی منبع ساییلیب اورگه فایدالیدیر. قاباغی گؤیچولردن آلا بیلرسیز.
آلاندا دیقّتیز اولسون الیزده آغیر اولوب ایچی دولو اولسون هابئله دریسی ساغلام و قیوریشمامیش اولسون. قاباغی كسدیكدن سونرا یخجالدا ساخلایین. بئله‌لیكله هر دیلیمین نئچه گون بویو ایستیفاده ائده بیلرسیز. قاباغی آلاندان سونرا تر-تمیز یویوب آرادان ایكی بؤلوب توخوملارینی چیخارداندان سونرا دیلیم دیلیم ائدین. اونو موختلیف صورتلرده پیشیره بیلرسیز آما اَن یاخشی یول اونو بوخاردا پیشیرمكدیر. چینده قاباغین یارپاقلارینی آشا و سالادا قاتارلار. بعضی اؤلكه‌لرده قاباقدان شیرنی و كیك پیشیررلر. قاباق ناگتی‌ده خوروشلار و آشلاردا ایشله‌نر.
آرتیریت درمانی
قاباق توخومو مَفصللرین آرتیریتینی آزالتماقدا فایدالیدیر. اونون بو زمینه‌ده كی تأثیرینی ایندومتاسین كیمی آرتیریت داوالارلا موقاییسه ائدرلر، بو تفاووتله كی قاباق توخومونون یان اثرلری یوخدور.
خوش خاصیّتلی پروستات
قاباق توخومو خوش خاصیّتلی پروستات درمانی‌نین بیرینجی و ایكینجی مرحله‌سینده ایستیفاده اولار. خوش خاصیّتلی پروستات بیرینجی مرحله‌ده ناخوشو گئجه‌لر نئچه دفعه یوخودان آییلدانا قدر سودوك دفعی‌نین سایی چوخالار. ایكینجی مرحله‌ده مثانه‌نین فعالیتی چوخ ضعیفلر و سودوك كامیل صورتده دفع اولماز. قاباق توخوملاری تحریك اولان مثانه‌نین توختاماسینا فایدالیدیر.
هابئله اوشقلاردا مثانه داشی‌نین یارانماسینا مانع اولار. بولغاریستان، توركیه و اوكراین كیمی اؤلكه‌لرده كیشیلر قدیم عادتلره گؤره پروستاتا موبتلا اولماسین دئیه اوشاقلیقدان قاباق توخومو یئیرلر. قاباق توخوملاریندا «تستوسترون»ون «دی‌هیدروتستوسترون»ونا تبدیل اولماسینا مانع اولان «كیوكربیتاسین» آدیندا شیمیایی مادّه وار. دی‌هیدروتستوسترون اولماسا پروستات سلّول‌لارین یارانماسی چتینلشر.
روح دوشگونلوگو
قاباق توخوموندا اولان «ال – تریپتوفان» ماده‌سی روح دوشگونلوگو ناخوشلوغونا درماندیر.
بؤیرك داشی
قاباق توخومو یئمك، بؤیرك داشی‌نین لاپ شایع داشی اولان «كلسیوم اوگزالات» داشی‌نین یارانماسینا مانع اولار. بو توخوملار سودوكده داش یارادان مادّه‌نین سطحینی آزالدار. گونده 10 گیرم قاباق توخومو یئمك بؤیرك داشی‌نین یارانماسینا مانع اولار.
سوموكلردن موحافیظه
یاش چوخالدیقجا سوموك پوكالما احتیمالی چوخالیر و قوجالار «روی» مادّه‌سی اولان یئمكلردن ایستیفاده ائله‌مه‌لیدیلر. قاباق‌دا دا بو مادّه بوللو میقداردا وار.
قاباق چین فرهنگینده فراوانلیق و ریفاه رمزی كیمی ساییلیر. بو تره‌وز بیرینجی دفعه هیندوستاندا تاپیلدی و ایندیلیكده دونیانین هر طرفینه یاییلیب.
ایمام حسن عسكری‌نین (ع) علمی مقامی و شاگیردلری
یازار : میرزه عبدالصمد ملکی | بؤلوم : دین
+0 به یه ن
ایمام حسن عسكری (ع) چتین و محدودیّتلرله دولو دؤوراندا یاشاماقلارینا باخمایاراق موختلیف ساحه‌لرده شاگیرد تربیت ائله‌مك و دینی معاریف تبلیغیندن قالمادیلار. ایمام حسن عسكری (ع) چتین و حساس دؤوراندا یاشادیلار. او حضرتین بیرینجی درجه‌ده‌كی وظیفه‌سی ایسلام مكتبینی قوروماق و اونون حریمینده مودافیعه ائله‌مك، بو حیات باغیشلایان دینه دعوت ائله‌مك و اونون اصول و دَیَرلرینی گوستریش وئرمك ایدی.
اهل بیتین (ع) هامیسی شریعتین یاییلماسی، علمین تبلیغی، اونو آیریلارینا خصوصاً علم طالیبلرینه تانیتدیرماقدا و ایسلامی عقیده و تفكّورون حریمیندن مودافیعه ائله‌ماكده چوخلو فیكری و عملی چالیشمالار ائدیبلر. او عظمتلی اینسانلار، اومّت ایچینده نوخبه، عالیم و معریفت و عمل منبعی ساییلیردیلار.
ایمام حسن عسكری (ع) كرامتلی آتالاری كیمی اؤز دؤورانلاریندا عمل ساحه‌سینده موهیم نقشلری واریدی عین حالدا اهل بیت (ع) مكتبی‌نین معاریفینی"كیتاب" و "سونّت" محورلیگی ایله تبلیغ ائله‌مگی اؤز برنامه‌لرینده یئریدیردیلر.
ایمام حسن عسكری‌نین (ع) دؤورانی یعنی هیجری اوچونجو عصر، حادیثه‌لی دؤورانیدی. موختلیف فیكری مكتبلر "فلسفه"، "كلام"، "اصول"، "فیقه"، "تفسیر" و "حدیث" ساحه‌لرینده گوجلنمیشدیلر و موقابیله گوجلری چوخالمیشدی.
بو دؤورانین مكتبلری چوخیدی. بو آرادا اهل بیت (ع) فیقه، حدیث، تفسیر، سیاسی دوشونجه، علم، كلام، فلسفه و ایسلامی معریفتده مومتاز مكتبه صاحیب ایدیلر. ایمام حسن عسكری (ع) اؤز علمی فعالیتلرینی موختلیف شاگیردلرین تربیتی، موكاتیبه یولو ایله شوبهه‌لره جواب وئرمك كیمی موختلیف حوزه‌لره بؤلموشدو.
ایمام حسن عسكری‌نین (ع) شاگیردلری
ایمام حسن عسكری‌نین (ع) محضرینده اولان شاگیردلرین چوخو بو حضرتین آتاسی و جدّی‌نین دؤورانیندان اهل بیته(ع) ایرادتلری واریدی و بعضیلری ده ایمام (ع) زمانی اونلارا قوشولموشدولار. بو اینسانلار، علملری، معاریفی و حقیقتلری او حضرتدن آلیب آیریلارینا چاتدیریردیلار.
ابو عبدالله آدینا معروف اولان بؤیوك لوغت شوناس "احمد بن ابراهیم بن اسماعیل" ایمام حسن عسكری (ع) و ایمام هادی‌نین (ع) مخصوص صحابه‌لریندن ساییلیردی. احمد ابن ابراهیم ایمام حسن عسكرینن (ع) مسأله‌لری و خبرلری واریدی كی نئچه جیلد كیتابدا مونتشیر ائدیب. ایمامین (ع) شاگیردلری موختلیف علمی و معرفتی ساحه‌لرین پیشرفتینده نقشلری اولوب.
هابئله دَیرلی اینسان "احمد بن اسحاق بن عبدالله بن سعد بن احوص اشعری" ایمام حسن عسكری‌نین (ع) خاص صحابه‌لریندن ساییلیردی و ایمام زمانی‌دا (عج) درك ائله‌دی. او هابئله قوملولارین اوستادی و شئیخی ایدی. اونون دا تألیفاتی واردیر.
چوخلو كیتابلاری اولان "حسین بن شكیب مروزی" و "صالح بن ابی حماد" دا ایمام حسن عسكری‌نین (ع) شاگیردلریندن ایدیلر. هابئله "كتاب الرحمه" كیتابی كیمی چوخلو كیتاب مؤلیفی، شأن و منزیلت صاحیبی"سعد بن عبدالله قمی" ده ایمامین (ع) شاگیردلریندن ایدی.
مرّیخده حیات ایزلری تاپماغا بیر آددیم
یازار : میرزه عبدالصمد ملکی | بؤلوم : تكنولوژی
+0 به یه ن
كئچن ایلین آذرینده "كیپ كاناورال" فضایی مركزدن گؤیه بیر اطلس راكتین توللانماسیله ایكی میلیارد یاریملیق پروژه‌نین سون مرحله‌سی باشلاندی. «گؤره‌سن مرّیخده حیات ایزلری وار؟» قدیمی سوآلینا جواب وئرمك اوچون.
دوققوز آی اون بیر گوندن سونرا "كیوریاسیتی" مریخ گزنی موفقیّتله 2.4 كیلومتر خطایلا مریخین موشخص اولان نوقطه‌سینه یئندی.
"كیوریاسیتی" بوتون سوآللارا جواب وئره بیلمه‌سه‌ده یئردن كنارداكی حیاتین علامتلرینی تانییا بیلر.
كئچن هفته، حاضیرلاماسی آلتی آی چكن بیر پروژه‌نین ایجراسیله بو علامتلرین تاپیلماسینا اومید چوخالدی.
"كیوریاسیتی" مریخ گزنی بیرینجی دفعه اولاراق مریخین اوستواسینداكی قایالارین بیرینه نفوذ ائدیب آزماییشگاهی تحقیقلر اوچون نمونه گؤتوره بیلدی. بو نمونه‌ده تحقیق ائله‌مگین، مریخ كؤره‌سی‌نین كئچمیشده حیاتین اولوب اولماماسی باخیمدان اهمیتی وار.
"كیوریاسیتی"، مریخین "گیل" جولاسیندا –مریخ اوستواسیندا درین بیر جولا- اؤز قازینتی‌سینی آپاردی. 6.4 سانتی متر درینلیگی و 1.6 سانتی متر ائنلیگینده بیر دلیك آچیب بوز رنگده یوموشاق پودر چیخارتدی.
بو، اینسانین آیری كؤره درینلیگینه بیرینجی نفوذ ائتمه‌سیدیر.
بو دلیگین تصویرلری صاباحیسی گون یئره موخابیره اولدو.
پروژه‌نین ارشد عالیمی پروفسور جان گروتیزینگر، بو نمونه گؤتورمگی، كیوریاسیتی‌نین مریخه یئنمه‌سیندن سونرا بو تیمین اَن بؤیوك موفقیّتی آدلاندیردی.
"كیوریاسیتی" مته‌سینی حاضیرلاماق آلتی آی چكدی. بو مته 2.2 مترلیك مریخ گزن روباتین قولونون آخیرینه قوشولوب. بو مته مریخ گزنین اون اساس علمی ابزارلاری‌نین آخیرینجی‌سیدیر.اؤگئی آتا ایله اؤگئی قیز ائولنمه‌سی قدغان اولدو
یازار : میرزه عبدالصمد ملکی | بؤلوم : اجتماعی
+0 به یه ن
دوننه‌جن اؤلكه قانونلاریندا یئری اولمایا قانون ولی‌سیز و ولی‌لری پیس اولان اوشاقلاردان حیمایت ائتمه لاییحه‌سی‌نین تصویبی ایله بو گوندن ایجرا اولور.
مهرین وئردیگی خبره گؤره، مجلیس نوماینده‌لری یكشنبه گونو بو لاییحه‌دن بیر تبصیره تصویب ائله‌دیلر كی اونون اساسیندا ولی و اؤگئی اوشاق آراسیندا حضانت زمانی و اوندان سونرا دا ازدواج قدغان اولدو. مگر دادگاه موعیّن ائدن خاص شراییطده.
آما بو قانونون تصویبیندن اوّل نئجه‌ایدی؟
اؤگئی اوشاغین محرملیك شراییطینده ایسلامین قایدالارینا گؤره، دده‌لیكله قیزلیق آراسیندا ائولنمگه منع یوخدور.
بوتون تقلید مرجعلری‌نین نظرینه گؤره بئلنچی شراییطده محرمیّت یارانمالیدیر و بو محرملیك معمولاً ازدواج و نسبی رابیطه‌لرله باش وئرر.
آیت الله‌العظمی خامنه ای، اؤگئی اوشاغین محرمیّت حؤكمونه گؤره بویورور: «اؤگئی اوشاغین حؤكمو اوشاق حؤكمو دئییل و اونو بؤیودن كیشی و آرواد اونا محرم اولمازلار مگر رضاع وسیله‌سی و یا بلوغدان سونرا و اوشاغین مصلحتین رعایت ائله‌مك شرطی ایله بلوغدان قاباق شرع حاكیمی‌نین ایجازه‌سیله موقّت ازدواجلا كی ایشكالی یوخدور.»
آیت‌الله محمد سعید حكیم بیر قیزی اوشاقلیغا گؤتورموش كیشی‌نین -كی بو قیز اونون عیالیندان سوت یئمه‌ییب -ایستیفتاسی جوابیندا دئییر:
سنه محرم اولماز، سنین فامیلین اولماز، او سندن ایرث آپارماز، سن اوندان ایرث آپارمازسان، بؤیوسه اونا باخا بیلمزسن.»
آیت الله فاضل لنكرانی‌نین نظرینه، محرم اولماق یوللاری:
آیت الله فاضل لنكرانی بیر ایستیفتا جوابیندا دئییبلر: «قیز سوت امر اولسا بو یوللارلا اؤگئی دده‌یه محرم اولار:
- كیشی‌نین عیالیندان سوت یئیه بئله‌لیكله كیشی‌نین رضاعی قیزی اولار.
- كیشی‌نین آناسیندان سوت یئیه بئله‌لیكله كیشی‌نین رضاعی باجیسی اولار.
- كیشی‌نین باجیسیندان سوت یئیه بئله‌لیكله كیشی‌نین رضاعی باجی‌قیزی اولار.
- كیشی‌نین قارداش آروادی‌نین سوتون یئیه بئله‌لیكله كیشی‌نین رضاعی قارداشی قیزی اولار. و یا قارداشی قیزی‌نین سوتونو یئیه.
- اوشاق سوت امر اولمازسا و یا سوت امر اولا آما سوت وئرمگه دئییلن شخصلر اولمایا، آتا ایله قیز و یا بؤیوك آتا ایله قیز آراسیندا موقّت صیغه‌ایله محرمیّت یاراتماق اولار. بئله‌لیكله قیز كیشی‌نین آنالیغی اولار. آما دیقّت یئتیرمك لازیمدیر كی قیز بالیغ اولمایان دورومدا ذیكر اولان صیغه، قیزین شرعی ولیسی و اونون یوخلوغو دورومدا جامع الشرایط موجتهیدین ایجازه‌سیله اولمالیدیر.
هر حالدا محرملیك صیغه‌سی قیز اوشاغینا مفسده‌سی اولمامالیدیر. بلكه اونون مصلحتینی رعایت ائله‌مك لازیمدیر. نئجه كی قیز بالیغ اولورسا آتانین و یا آتا جدی‌نین ایجازه‌سی واجیب احتیاطا گؤره اعتیبارلیدیر.
اؤگئی اوشاق سوت امر اوغلان اولورسا آشاغیداكی یوللارلا اونونلا آنالیق آراسیندا محرملیك یاراتماق اولار.
- همن آروادین سوتونو یئیه بئله‌لیكله اونون رضاعی اوشاغی اولار.
- آروادین آناسی‌نین سوتونو یئیه بئله‌لیكله آروادین رضاعی قارداشی اولار.
- آروادین باجیسی‌نین سوتونو یئیه بئله‌لیكله آروادین رضاعی باجی اوغلوسو اولار و یا آروادین باجیسی قیزی‌نین سوتونو یئیه.
- آروادین قارداش آروادی‌نین سوتونو یئیه بئله‌لیكله آروادین رضاعی قارداش اوغلو اولار و یا آروادین قارداشی قیزی‌نین سوتونو یئیه.
منیم و دؤلت عضولری‌نین سیزه اولان ایرادتی همیشه‌لیكدیر
یازار : میرزه عبدالصمد ملکی | بؤلوم : خبرلر
+0 به یه ن
همشهری
آنلاین: رییس جومهور موعظم رهبرلیك مقامینا یازدیغی بیر نامه‌ده اؤزو و دؤلت
عضولری‌نین ایرادتلرینی بیلدیرمكدن سونرا تصریح ائله‌دی: منله دؤلتده‌كی
همكارلاریم مسئولیّتین سون لحظه‌لرینه قدر ایسلامی اینقیلابین ارزیشلرینه اورك
باغلاییب اؤلكه و جماعت خیدمتینده اولاجاغیق.
دؤلتین رسمی وبسایتی‌نین وئردیگی خبره گؤره، محمود احمدی نژادین كامیل نامه‌سی بئله‌دیر:
بسم الله الرحمن الرحیم
حضرت آیت الله خامنه‌ای (مدظله العالی)
موعظم رهبرلیك مقامی
سلام و تحیّتله
سیزین شنبه گونونده 91.11.28 اولان فرماییشلریزه عطف اولاراق استحضاریزا چاتدیریر: من و دؤلتده‌كی همكارلاریم مسئولیّتین سون لحظه‌لرینه قدر ایسلامی اینقیلابین ارزیشلرینه اورك باغلاییب اؤلكه و جماعت خیدمتینده اولاجاغیق و آرخایین ائدیرم جماعت خادیمی عنوانیندا بیزیم بوتون چالیشماقلاریمیز، اؤلكه‌نین اوجالماسی و موشكوللری‌نین حل اولماسی یولوندا اولوب اؤلكه مصلحتلریندن قیراق، كیچیك آددیم‌دا آتمایا‌جاغیق.
منله دؤلت عضولری‌نین سیزه اولان ایرادتی همیشه‌لیكدیر. حضزتعالی‌نین سلامت و توفیقاتی‌نین دوامینی موتعال آللاهدان ایستیرم.
محمود احمدی‌نژاد