یوخولارین قایناغی هارادی؟
یازار : میرزه عبدالصمد ملکی | بؤلوم : ساغلاملیق
+0 به یه ن
یوخولارین قایناغی هارادی؟
انسان گؤزونو یومدوقدا ذهنی، آییقلیقدا گؤره بیلمه‌دیگی، عجیب - غریب افسانه‌لر دنیاسینا آددیم قویور. اورداكی حادثه‌لر ایندیه قدر هئچ قطعی علمی متودلا ایضاح ائدیلمه‌ییب.«پاپ ساینس»ین وئردیگی خبره گؤره، بیر دسته فرانسه‌لی عالم یوخولارین انسان تخیّلی نتیجه‌سی اولدوغونو و یا بئیین عكس العملی اولدوغو باره‌ده بیر سئری تحقیقلر ائدیبلر و یوخولارین «بئیین سغه«- سی آدلانان، بئینین بیر بؤلومو، واسطه‌سی ایله یارانماسینی بیلیبلر. اونورغایا وصل اولان بئینین بیر بؤلومو كی انسان یوخوسونون تنظیمینده نقشی وار.
عالملر بو تحقیقده لمس اولما (آنستزیا) سندرومونا مبتلا اولان ناخوشلار اوستونده مطالعه ائله‌دیلر. بو شخصلر دال به دال تانیما و حس پروسه‌لرینی فعالیق گوجلرینی ایتیررلر. عالملر بئله‌نچی انسانلارین دوشونمه‌دیكلری و ذهنی بوشلوغا مبتلا اولدوقلارینی بیلدیلر. بو شخصلر معمولاً گون بویو ترپنمه‌دن و دانیشمادان بیر یئرده قالارلار. اونلاردان بیر شئی ایستَنیلسه سؤال‌لارا جواب وئره بیلرلر و یا بیر سئری خاطره‌لر یادا سالا بیلرلر آما اونلارین ذهنی سرعتله سیلینیب بوشالار.
گؤره‌سن بئیینلری هر جور دوشونمكدن بوش اولان بئله شخصلر ده یوخو گؤررلر؟
محققلر 13 نفر سالم شخص و 13 نفر بوجور ناخوشلاردان گونده‌لیك گؤردوكلری یوخولارینی یازماقلارینی ایسته‌دیلر. محققلر بو یوخولاری اوزونلوق، بوروشوقلوق و عجیب اولما جهتدن آراشدیردیلار. عالملرین دئدیگینه اساساً، ناخوشلارین هامیسی یوخو گؤرموردو و 13 نفرین یالنیز 4 نفری یوخو گؤروردو كی بو یوخولار دا سالم شخصلرین یوخولاری ایله مقایسه‌ده چوخ قیسا و ساده ایدی. بو شخصلر یول یئریمك و اوز قیرخماق كیمی بسیط حادثه‌لر باره‌ده یوخو گؤروردولر.
عالملر بو تحقیقده ناخوشلارین داها ساده یوخو گؤرمكلری و سالملرین بوروشوق و عجیب-غریب یوخو گؤرمكلریندن بو نتیجه‌یه چاتدیلار كی بوروشوق و عجیب-غریب یوخونون داها بوروشوق بئیین عكس العملینه احتیاجی وار.
یئری وار بو زمینه‌ده داها گئنیش تحقیقلر اولسون.
معروفا چاغیریب منكردن نهی ائتمك، حقّی و قانونو قوروماق آنلامیندا
یازار : میرزه عبدالصمد ملکی | بؤلوم : دین
+0 به یه ن
معروفا چاغیریب منكردن نهی ائتمك، حقّی و قانونو قوروماق آنلامیندا
معروفا چاغیریب و منكردن نهی ائتمك اسلاما چاغیرماق، تجاوز و ظلمدن ساخلاماق، عمومی ثروتلرین دوزگون بؤلونمه‌سی معناسیندادیر.
جماعتین دقّت و فكری‌نین رشد تاپماسی باعث اولار قانونون دوزگون اجرا اولماسی‌نین هامی اوچون فایدالی اولماسی بیلینسین. نتیجه‌ده انسانی و دینی عاطفه‌لر اونلاری حقسیز و قانونسوزلوق قارشیسیندا دایانماغا وادار ائدر و جامعه انسانلارینی معروفا چاغیریب و منكردن نهی ائتمگه و حقدن دفاع ائدیب قانونو قوروماغا وادار ائلر.
اسلامین اجتماعی نظامیندا بو مسأله‌یه چوخلو تأكید اولوب و هامینی اونون اهمیّتینی بیلمگه چاغریلیب. اسلامین بو مسأله‌یه وئردیگی اهمیّتی بیلمك اوچون نئچه آیه و روایته اشاره ائدیریك:
- سیزدن یاخشیلیقلارا چاغیران و پیسلیكلردن اوزاقلادان بیر امّت یارانمالیدیر و یالنیز بئله انسانلار سعادت و خوشبخلیگه چاتاجاقلار.
- سیز بشریّتین اَن یاخشی امّتی‌سیز. یاخشی ایشلری ترویج ائلیرسیز، قولای و پیس ایشلرین قارشیسینی آلیرسیز و الله-ـا اینانیرسیز. كتاب اهلی‌ده ایمان گتیرسه ایدی، اونلار اوچون داها یاخشی اولاردی. البته اونلارین بعضیسی‌نین ایمانی وار آما چوخو تبهكاردیلار.
- اونلارین هامیسی بیر دئییل، كتاب اهلی ایچینده حقّه باغلی اولانلار دا واردیر. گئجه یاریسیندا سجده ائدیب الله آیه‌لرینی اوخویورلار و الله-ـا و قیامته اینانیرلار، دوزگون ایشلر گؤرورلر و پیس ایشلرین قارشیسینی آلیب و خیر ایشلرده قاباغا دوشورلر. البته بونلار یاخشی آداملار سیراسیندادیلار و هئچ خیر ایش اجرسیز قالمایاجاق. الله، تقوالی انسانلاری تانی‌ییر.
- ایكی اوزلو آروادلار و كیشیلر بیری بیرلری‌نین بئزلری‌نین ایكی رنگی و اوزودولر. بونلار پیس ایشلری ترویج ائدیب یاخشی ایشلرین قارشیسینی آلیرلار.
- ایمانلی و دینلی آرواد و كیشیلر ده بیری بیرلرینه كؤمكدیلر. بونلار خیر ایشلری ترویج ائلیرلر، نماز قیلیرلار، زكات وئریرلر و الله و رسولونونون سؤزونه باخیرلار. الله‌ین رحمتی بونلارا شامل اولاجاق. الله یوخاری مرتبه‌لی و ایش بیلندیر.
اسلامی روایتلرده ده بونون اهمیّتینی بیلدیرن بو باره‌ده چوخلو حال‌لارا راست گلیریك.
پیغمبر (ص) بویورور: منیم امّتیم معروفا چاغیریب و منكردن نهی ائتدیگی گونه قدر همیشه یاخشی وضعیّتده اولاجاق آما بو ایكی عملدن ال چكن آندان اعتباراً بوتون بركتلردن محروم اولاجاق. بیر دسته آیری دسته‌نی استثمار ائلیه‌جك، نه یئرده بیری اونلارین هارایینا چاتاجاق نه گؤیده.
امیرالمؤمنینعلی(ع) بویوروب: الله، اسلام عالملرین او اوزدن دانلادی كی متجاوزلرین فساد و تبهكارلیقلارین عیاناً گؤروردولر آما اونلارین قارشیسینی آلماغا بیر ایش گؤرموردولر چونكی اونلارین باغیشلادیقلارینا طمع سالمیشدیلار غلبه‌سیندن قورخوردولار. بونونلا بئله كی الله دئییب مندن سووای هئچ كسدن قورخمایین. الله دئییر: ایمانلی كیشیلر و آروادلار بیری بیرلرینه كؤمكدیلر، یاخشی ایشلری ترویج ائدیب پیس ایشلرین قارشیسینی آلیرلار.
الله، اونون طرفیندن مقرّر اولان مهم وظیفه كیمی، اوّلده معروفا چاغیریب و منكردن نهی ائتمگه چاغیردی. چونكی بیلیردی بو وظیفه‌یه عمل اولونسا بوتون آیری وظیفه‌لره ده عمل اولوناجاق. ایستر راحت ایستر چتین، معروفا چاغیریب و منكردن نهی ائتمك اسلاما چاغیرماق، ظلم و تجاوزین قارشیسینی آلماق، ظالمله چالماق، عمومی ثروتلرین دوزگون بؤلونمه‌سی، وئرمه‌لی اولدوقلاری مالی، اونلاردان آلماق و مصرف اولمالی یئرده مصرف ائتدیریلمه‌سی معناسیندادیر.
امام صادقین (ع) سكوتو قرآندا تفكّر ایدی
یازار : میرزه عبدالصمد ملکی | بؤلوم : دین
+0 به یه ن
امام صادقین (ع) سكوتو قرآندا تفكّر ایدی
امام صادقین (ع) اوزونه باخان انسانین نظرینده قرآن تجلّی تاپاردی، قرآنی گؤرنده ده امام صادق (ع) گؤزونون اؤنونه گلردی. او، قرآن آیه‌لری‌ایله دانیشاردی، قرآنلا استدلال ائلردی و سكوتو قرآندا تفكّر ایدی.پیغمبرین (ص) بویوردوغونا اساساً قیامته قدر بیری-بیریندن آیریلمایان ایكی امانت وار؛ بیری قرآن و او بیری، پیغمبر عترتی (علیهم السلام). بو ایكی یادگار الهی پیغمبرلرین بوتون علملرینی یادا سالیرلار و هر زاد اونلارین نزدینده‌دیر. اماملار الهی كتابین حقیقتلرینه عالم و وارلیق عالمی سرّلاری‌نین وارثلریدیلر. امام صادق (ع) كتاب علمی‌نین وارثی، سینه‌سی قرآن سرّلری ایله دولو اولان اونلارین بیریدیر كی مبارك وجودی قرآنلا بیرلشیب.
امام جعفر صادق(ع) بویورور: «وَ اللهِ إنِّی لَاعْلَمُ كِتَابَ اللهِ مِنْ أوَّلِهِ إلَی آخِرهِ كَأنَّهُ فِی كَفِّی. فِیهِ خَبَرُ السَّمَاءِ وَ خَبَر الارْضِ وَ خَبَرُ مَا كَانَ وَ خَبَرُ مَا هُوَ كَائِنٌ. قَالَ اللهُ عَزَّوَجَلَّ: فِیهِ تِبْیَانُ كُلِّ شَیْءٍ؛
آند اولسون الله-ـا من الله كتابینی اوّلدن آخره بیلیرم، ائله بیل كی منیم اووجومدادیر. اوندا گؤیون و یئرین خبری، كئچمیش واقعه‌لرین خبری، ایندی‌نین و گله‌جگین خبرلری وار. الله تعالا بویوروب؛ قرآندا هر شئیه آیدینلیق گتیریلیب.»
منصوربن حازم دئییر: «امام صادقه (ع) عرض ائله‌دیم: «الله، مخلوقلاری واسطه‌سی ایله تانینماقدان داها یوخاریدیر، بلكه مخلوقلار الله-ین واسطه‌سیله تانینیرلار».
امام صادق (ع) بویوردو: «دوز دئییرسن.» دئدیم: «هر كیم اونو یارادان تك الله‌ین وارلیغینی اینانسا، بیلمه‌لیدیر كی او الله-ـا رضا وار و او فقط وحی و پیغمبر یولو ایله تانینار. نتیجه‌ده بیرینه وحی اولونماسا، دوزو بودور الله رسوللاری‌نین اتگینه ال آتا، اونلاری گؤرسه، گؤره‌جك كی اونلار حجّتدیلر و اونلاردان اطاعت ائتمك واجبدیر.
سونرا امام صادقه (ع) دئدی: جماعتدن، رسول الله‌دان سونراكی حجّت باره‌ده سوروشدوم. جواب وئردیلر: «قرآن» آما من اونلاری آییق سالدیم كی قرآن قیّم‌سیز كفایت ائله‌مز، چونكی مرجئه، قدریه و حتّى زنادقه كیمی قرآنا اینانمایان مختلف دسته‌لر ده، اؤز سؤزلرینده قرآنا استدلال ائلرلر و ائله بونا گؤره قرآنا قیّم لازمدیر كی اونون باره‌سینده دئدیكلری‌نین هامیسی حقّ اولسون.
بو آرادا ابن مسعود و عمر و حذیفه كیمی انسانلار قیّم آدینا دئییلدیلر. آما من سوروشدوم: «اونلار قرآنین هامیسینی بیلیردیلر؟» جواب وئردیلر: «یوخ فقط علی (ع) قرآنین هامیسینا عالم ایدی». من دئدیم: نتیجه‌ده شهادت وئریرم علی (ع) قرآنین قیّمی‌دیر و اوندان اطاعت ائتمك واجبدیر و پیغمبردن (ص) سونرا جماعته حجّت ساییلیر و او، قرآن باره‌سینده هر نه دئسه حقّدیر.
امام صادق (ع)اونون سؤزلرینی و محكم و گؤزل استدلال‌لارینی ائشیدندن سونرا اونا «رحمك الله» دئمكله دعا ائله‌دی. (اصول كافى، ج 1، ص 168)
امام صادقین (ع) صحابه‌سیندن بیری دئییر: « ائشیتدیم امام صادق (ع) بئله بویوردو: « نحن ولاه امر الله و خزنه علم الله و عیبه وحى الله؛ بیز امامتین و الله خلیفه‌لیگی‌نین و الله علم خزانه‌سی‌نین ولی امری و الله-ین وحی صاندیغی‌ییق. (اصول كافى، ج 1، ص 192)دكتر محسن هشترودی
یازار : میرزه عبدالصمد ملکی | بؤلوم : اجتماعی
+0 به یه ن
دكتر محسن هشترودی
محسن هشترودی 1286-جی ایلین دی آیی‌نین 22-سینده هشتری شهرینده دنیایه گلدی. آتاسی شیخ محمد خیابانی‌نین مشاورلریندناولان، مجتهد شیخ اسماعیل ایدی.محسن هشترودی ابتدایی تحصیلینی تبریز شهری‌نین سیروس و اقدسیّه مدرسه‌لرینده اوخویاندان سونرا تهرانین دارالفنونوندا طبابت اوخودو. او 1304-جو ایلده دولتی بورسیه‌سی ایله ریاضیات اوخوماغا فرانسه‌یه یوللاندی.
او، 1314-ده فرانسه‌نین سوربون دانشگاهیندان لیسانس درجه‌سی ایله فارغ التحصیل اولدو. سونرا پروفسور «الی كارتان» نین باشچیلیغی ایله دیفرانسیل هندسه‌سی زمینه‌سینده تحقیقه باشلادی و 1316-جی ایلینده ریاضیات رشته‌سینده اؤز دكتراسینی آلدی.
پروفسور هشترودی وطنه قاییداندان سونرا عالی دانشسرانین علملر دانشكده‌سینده اوستادیار كیمی ایشه باشلادی. 1320-ده عالی دانشسرانین اوستادلیغینی آلدی. 1320-ده تبریز دانشگاهی‌نین رئیسی اولدو و 1336-دا تهران دانشگاهی‌نین علملر دانشكده‌سی‌نین رئیسی اولدو.
پروفسور هشترودی عمرو بویو، رابطه‌سینی بین‌المللی علمی مجمعلرله ساخلادی. او 1329-دا تهران دانشگاهی‌نین نماینده‌سی كیمی هارواردین بین‌المللی ریاضیچیلار كنگره‌سینه قاتیلدی. مؤسسه‌نین رئیسی پرفسور اوپنهایمرین ایستگی ایله پرینسون دانشگاهی‌نین پیشرفته مطالعه‌لر مؤسسه‌سینه عضو اولدو و هاروارد دانشگاهیندا دا بیر ترم درس وئردی.
پروفسور هشترودی دیفرانسیل هندسه‌سینده متخصص ایدی. اونون اَن مهم علمی اثری، دیفرانسیل هندسه‌سی زمینه‌سینده یازدیغی دكترا تزیدیر. بو تزده، اوستادی الی كارتالینین مدل‌لری‌نین بیرینی تعمیم وئریب كی بو گون Hachtroudi Connection (هشترودی التصاقی) آدینا تانینیر.
ساری كؤك، درمان خاصیّتی اولان ادویه
یازار : میرزه عبدالصمد ملکی | بؤلوم : ساغلاملیق
+0 به یه ن
ساری كؤك، درمان خاصیّتی اولان ادویه
تازا تحقیقلر ساری كؤكون سوموك پوكالماسی و آرتریت روماتوئید كیمی بعضی ناخوشلوقلارین قارشیسین آلدیغینی گؤستریر.ساری كؤك قدیم ایللردن، مخصوصاً آسیادا مفصل التهابی اوچون درمان كیمی استفاده اولور. ساری كؤكون تأثیرلی مادّه‌سی كاركامین آدیندا مادّه‌دیر.
بو تحقیقدن اؤترو آریزونا بیتكی طبّ مركزینده ساری كؤكون مختلف عصاره‌لری حاضرلاندی. نتیجه‌لرده بو مادّه‌نین، التهاب آزالتماسیندا تأثیرلی اولدوغو بللی اولدو.
بو محققلرین نظرینه گؤره، گونده‌لیك 1.5 گرم كاركامین، مفصل التهابی‌نین آزالتماسینا لازمدیر.
متخصصلرین دئدیگینه اساساً ساری كؤكده اولان آیری آنتی اكسیدان مادّه‌لرین‌ده آنتی التهاب خاصیّتلری اولا بیلر.