مناسب سئچیم نئجه اولمالیدیر؟
یازار : میرزه عبدالصمد ملکی | بؤلوم : دین
+0 به یه ن
 | ||
هر انسان عمرو بویو نفرلری سئچیب اونلارلا ارتباط قورمالیدیر. یولداش، حیات یولداشی، کوره‌کن، گلین، شریک و . . . سئچمک هر انسانین باشینا گلن سئچیملریدیلر. آما چوخ اولور کی انسانلار سئچدیکلریندن پشیمان و اونونلا ارتباطدا اولماقدان ناراضی‌دیرلار. پشیمان شخصدن سوروشسان کی « بو قدر ناراضی اولارکن نه‌دن اونو سئچدین؟» معمولا بئله جواب وئرر: «اوّلدن بوجور دئییلدی کی. اوّل‌لر چوخ ادبلی و خوش صحبت ایدی. یالان دانیشان دئییلدی و . . .» بو جوابلار گؤزو آچیق سئچیملرین‌ده کیریخا بیله‌جکلرینی گؤستریر. هله قالسین کی گؤزو باغلی و شیفته‌لیکله سئچن انسانلار. سئچیمین لاپ یاخشی اولماسی اوچون پیغمبریمیزدن (ص) نقل اولان بیر روایته باخاق. ابن عباس پیغمبردن (ص) سوروشور: هانسی یولداش یاخشیدیر؟ پیغمبر (ص) بویوردو: «مَنْ یُذَکِّرُکُمُ اللَّهَ رُؤْیَتُهُ وَ یَزِیدُ فِی عِلْمِکُمْ مَنْطِقُهُ وَ یُرَغِّبُکُمْ فِی الْآخِرَةِ عَمَلُهُ» ائله انسان کی 1. اونو گؤرنده الله یادینا دوشه‌سن. 2. دانیشیغی سنین علمینه آرتیرا. 3. عملی سنی آخرته ترغیب ائله‌یه. (اصول کافی، ج۱، ص۳۰) پیغمبر بو درین سؤزلری ایله بؤیوک سؤزلری بیان بویورور. بویورمور اوزو گولر اولسون و یا مرتب اولسون بلکه مقابل طرفی تانیماق اوچون اساس آچارلاری اؤیردیر. مرتب اولماق یاخشیدیر آما حقیقتین اؤلچوسو ظاهر دئییل. انسانین نه قدر ظاهری وضعی الله‌ین ذکری ایله سنخیتلی اولسا بیر او قدر قابل اعتماد اولار. ایکیمینجی آددیمدا باخاجی‌یوقی اونون علمی نه‌قدردیر. اونونلا دانیشاندا علمیمزه آرتاجاق یا یوخ. نیاز دئییل مقابل طرفیمیز علامه دهر اولسون بلکه سؤزلری‌نین علمه دایانماسی کفایت ائلر. اوچومونجو آددیم مقابل طرفین عملیدیر. باخ گؤر عمل‌لری فقط شخصی منفعت دالیسیجا گئدیر یوخسا آخرتی و جامعه‌نی‌ده نظرده آلیر. جامعه‌نین و انسانلارین سعادتیندن دانیشماق چوخ راحت ایشدیر آما باخ گؤر عملده ده دئدیگی کیمی وار یا یوخ؟ بیر انسان سئچدیکلرینده بو اوچ مفهومو درین شکلده رعایت ائله‌یه بیلسه سئچدیگی یولداشدان هئچ واخت پشیمان اولماز. | ||
هند 30 دولارلیق عاغیللی موبایل بازارا وئره‌جک
یازار : میرزه عبدالصمد ملکی | بؤلوم : عمومی
+0 به یه ن
| ||
سی‌نت‌ین وئردیگی خبره گؤره، هند جمعیتی‌نین بیر میلیاردی‌نین موبایلی یوخدور. ائله بونا گؤره هند دولتی موبایل تولیدچی‌لریندن 30 دولارلدان اوجوز اولان عاغیللی موبایل دوزلتمه‌سینی ایسته‌ییب. بیر مدت بوندان اوّل‌ده بو اؤلکه‌نین مقاملاری میکروماکس، اینتکس، لاوا و کاربن کیمی شرکت‌لریله جلسه قوروب اونلاردان محصول‌لاری‌نین داها آرتیق اوجوزا وئرمه‌لرینی ایسته‌میشدیلر. عاغیللی موبایل‌لارین قیمتی 30 دولاردان آشاغی یئنسه، داها چوخ هندلی اونو آلا بیلر. آیری طرفدن موبایل پول کیفی‌نین رایج اولماسی ایله الکترونیک اؤده‌مه‌لرین سایی چوخالار. Counterpoint شرکتی‌‌نین وئردیگی آمارا گؤره ایندیلیکده هندوستاندا 260 میلیون موبایل ایشله‌دن وار کی دونیانین ایکیمینجی لاپ بؤیوک عاغیللی موبایل بازاری حسابا گلیر. بو یؤنده هند دولتی محلی تولیدچیلره یاخین گله‌جکده 20 الی 25 میلیون عاغیللی موبایلین بازارا وئرمه‌سی اوچون فشار گتیریر. | ||
اهل بیت کریمه‌سی‌نین (س) یاشاییشی
یازار : میرزه عبدالصمد ملکی | بؤلوم : دین
+0 به یه ن
| ||
امام رضا (ع) هجرتیندن بیر ایل سونرا عزیز باجیسینا بیر نامه یازیر. حضرت معصومه (س) نامه‌نی آلاندان سونرا زینبی رسالتینی یئرینه یئتیرمک اوچون قارداشلاری و قارداشی اوشاقلاری ایله یولا دوشور. ائله بو مقامدا ملعون مأمون بو سفرین هدفلریندن خبردار اولوب بو رسالتین یئرینه یئتیریلمه‌سینه مانع اولدو. مأمونون کؤمکلری ساوه شهرینده خانم معصومه‌نین (س) کروانی ایله ساواشدی و نامردلکله کروانین کیشیلری‌نین چوخونو او جمله‌دن خانم معصومه‌نین (س) قارداشلارینی شهید ائله‌دی. حضرت معصومه (س) بو حادثه‌دن سونرا ناراحتلیق شدیتیندن و بیر نظره گؤره مسمومیت تأثیرینده ناخوشلادی و سفرین ادامه‌سی امکانسیز اولدو و قم شهرینه گئتمگه امر ائله‌دی. قم شهری‌نین بؤیوکلری بو خبری ائشیدن کیمی او حضرتین استقبالینا گلدیلر. بیر حالداکی موسی بن خزرج او حضرتین دوه‌سی‌نین یوینی‌نی توتموشدو 201 هجری قمری ایلی‌نین ربیع الاول آییندا چوخلو همراه جمعیت ایله بیرلیده قم شهرینه وارد اولدولار. او حضرت بو شهرده 17 گون موسی بن خزرجین ائوینده قوناق اولدو و نهایتده ربیع الثانی‌نین اونوندا شیعه‌لرین گؤز یاشی ایچینده دونیایا گؤز یومدو. خانم معصومه‌نین دفنیندن سونرا موسی بن خزرج مقبره‌نین اوستونه بوریادان بیر کؤلگه‌لیک دوزلدیر. سونرالار امام جوادین (ع) بالاسی عمه‌سی قبری اوستونه بیرینجی گونبذی دوزلتدیریر و بئله‌لیکله او حضرتین شریف مزاری اهل بیت عاشقلری‌نین قبله‌گاهینا چئوریلیر. | ||
نهج البلاغه‌نین تورکجه ترجمه‌سی تبریزده نباتی نشریاتی طرفیندن چاپ اولدو
یازار : میرزه عبدالصمد ملکی | بؤلوم : دین
+0 به یه ن
روحیه‌لی اولون و روحیه‌لی قالین
یازار : میرزه عبدالصمد ملکی | بؤلوم : اجتماعی
+0 به یه ن
| ||
بو گونلر جامعه‌میزین احتیاجی اولدوغو لاپ مهم مسأله‌لردن بیری روحیه‌لی اولماقدیر. ایش بیلنلرین نظرینه گؤره آشاغیداکی یوللارلا روحیه قازانماق اولار: 1. تصمیمیزده جدی اولون مسیری آخرینه قدر گئتمگه قرارلی اولون. بیر ایشی باشلامیش اولساز و او باره‌ده تصمیم توتموش اولساز، ذهنیزی ایشین آخرینه قدر گئتمگه حاضرلایین. بئله‌لیکله ذهنیز اوچماغا حاضرلاشاجاق. سیز «گؤردویوم ایشده لاپ یاخشی اولماق ایسته‌ییرم» دئمه‌یینجه سیزین حیاتیز تپه‌نین قارانلیق بوجاغیندان باش قووزامیش بیر کؤلگه کیمیدیر. بو سؤزو دئدیگیزده گونشه طرف یوللانیرسیز و یاشاییشیز ابده قدر فرقلی و فوق العاده اولور. پس قرارلی اولون و داها بئخیال یاشامایین. 2. محدودیتلری تانیین سیزین قاباغیزی باغلایان محدودیتلری تانیین. ایشیزده داها یاخشی اولماغا مانعلری تانیین. آیریلاریندان‌دا سوروشون. داها جدی و گوجلو آددیملار گؤرتورمگه یول تاپین. هر جدیتله آتیلان آددیم سیزی موفقیته یاخینلادار. 3. مناسب انسانلارلا رابطه‌ز اولسون کیملر مناسبدیلر؟ وضعی خوش انسانلار یوخسا مثبت دوشوننلر؟ اؤزلرینه هدف و برنامه‌سی اولان انسانلارلا رابطه‌ز اولسون. روحیه‌لی انسانلارلا ارتباطیز اولسون. قارتال‌لارلا اولون. زیگ زیلانین دئدیگی کیمی : «قارتال‌لارلا اوچماق ایسته‌سن هشترخانلارلا گزمه». منفی و مسموم دوشنجه صاحبلریله و همیشه شکایتچی اولوب آغلایان انسانلاردان اوزاق گزین. 4. اؤزوزدن موغایات اولون اؤزوزدن چوخ یاخشی موغایات اولون یعنی یئدیگیز ایچدیگیزه دقت ائله‌یین و همیشه ورزش ائله‌یین. هامی یاخشی خورک یئمه‌لی و ورزش ائتمه‌لی و یاخشی استراحت ائتمه‌لی اولدوغونو بیلیر. هفته‌ده بئش گون آغیر ایشله‌مه‌لی اولساز گئجه‌لری تئز یاتین. 5. اؤزوزو یوخاریدا گؤرون گؤردویوز بوتون ایشلرده اؤزوزو لاپ یاخشی بیلین. یادیزدا اولسون قازاناجاغیز بوتون موفقیتلر اؤزوزدن یاراتدیغیز تصویرلردن اولوشور. 6. اؤزوزله گؤزل دانیشین ذهنیزده اؤزوزله دانیشماغی کنترل ائله‌یین و اؤزوزله همیشه مثبت دانیشین. اؤزوزه «من لاپ یاخشی‌یام» دئیین. «من اؤزومو سئویرم»، «من بو ایشی گؤره بیلرم» «من ایشیمی سئویرم» کیمی جمله‌لری تئز تئز تکرار ائله‌یین. بو دئدیکلریزه اینانماساز دا، بو ایش هله واقع اولمامیش حقیقتین بیانیدیر. هاردان گلدیگین مهم دئییل، هاردا گئتمک ایسته‌دیگین و مقصدی‌نین نه اولدوغو مهمدور. اؤزوزله مختلف شرایطه گؤره ایندی اولدوغوز کیمی یوخ، بلکه اولماق ایسته‌دیگیز کیمی دانیشین. یادیزدا اولسون ایندیکی وضعیتیز ساده بیر شانس‌سیزلیق نتیجه‌سینده اولموش اولا بیلر. آما گله‌جکده چاتاجاغیز موقعیت ایندی قوردوغوز برنامه تأثرینده اولاجاق. 7. فعال اولون سرعتلی اولون. احتیاج حسی و بیر ایش گؤرمگین ضرورتی سیزده تقویت اولمالیدیر. بو حس سیزی آیریلاندان فرقلندیرر. تعصبوز اولسون و اونو تقویت ائله‌یین. ذهنیزه یاخشی ایده گلن زمان اونا عمل ائله‌یین. هر نه قدر تئز باشلاساز بیر او قدر تئز مقصده چاتارسیز. هدفه داها یاخشی چاتدیغیزدا اؤزوزو داها آرتیق سئوه‌جکسیز، اؤزوزو داها چوخ سئودیگیزده عزتیز داها دا آرتاجاق. نظم انضباطیز آرتاجاق و مقصده داها راحت شکلده چاتاجاقسیز. | ||