شفاف بدنه‌سی اولان مسافری طیاره !
یازار : میرزه عبدالصمد ملکی | بؤلوم : تكنولوژی
+0 به یه ن
 | ||
پنجره‌سی اولمایان مسافری بیر طیاره‌نی تصور ائله‌یین. بو طیاره ایله مسافرت ائتمک نه داریخمالی اولار ! آما بو طیاره‌نین ایچ بدنه‌سی ائشیک منظره‌سینی 360 درجه‌ده گؤستره بیلن مانیتورلا اؤرتولسه نئجه؟ کلیکین وئردیگی خبره گؤره، فرانسه‌لی بیر شرکت پنجره‌سیز و داخلی بدنه‌سی مانیتورلا اؤرتولموش طیاره طراحلیق ائله‌ییب کی مانیتوردا ائشیگین منظره‌سی و یا هر ایستنیلن فیلمی اکرانا گتیرمک اولار. مسافر بو طیاره‌ده اوتوراندا ائله بیله‌جک کی طیاره‌نین بدنه‌سی شوشه‌دن دوزلیب و ائشیگی تماماً گؤره بیله‌جک. بو طرحین آدی IXION قویولوب. طیاره شرکتلری‌نین نظرینه گؤره پنجره‌لری حذف ائتمک طیاره دوزلتمک صنعتینده بؤیوک تحول یاراداجاق. بو ایش، طیاره‌نین وزنین آزالتماقلا یاناجاغیندا صرفه‌لی اولماغا سبب اولاجاق و مسافرلرین داریخماغی‌نین قاباغینی آلاجاق. IXION طرحی‌نین طراحی دئییر: بو گونلر انحنالی مانیتورلارین دوزلتمگی ایله بو ایده‌نی اجرایا گتیرمک اولاسی بیر ایشدیر. | ||
گونده ورزش ائتمگه واختیز اولماسا جمعه‌لر سلامتلیک دوپینگی ائله‌یین !
یازار : میرزه عبدالصمد ملکی | بؤلوم : ساغلاملیق
+0 به یه ن
| ||
گونده ورزش ائتمگه واختیز اولمور؟ نگران قالمایین تازا تحقیقلر “ستریر کی جمعه‌لر 150 دقیقه ورزش ائله‌مکله همان گونده‌لیک ورزشین فایداسینی گؤتوره بیلرسیز. دونیا بهداشت سازمانی، 18 – 62 یاش آراسی افرادا توصیه ائلیر هفته‌ده 150 دقیقه ورزش ائله‌یین. بو مقدار ورزش ائله‌مک یوزده 30 تئز اؤلومون قاباغینی آلار. تازالیقدا نتیجه وئرن لندنین لستر، لافبرو، یو سی ال دانشگاهلاری و سیدنی دانشگاهی‌نین تحقیقینه گؤره، سیز بو 150 دقیقه‌نی هفته گونلری آراسیندا بؤلمکده و یا هامیسینی بیر یئرده ورزش ائله‌مکده آزادسیز و نتیجه‌سینده تفاوت یوخدور. بو تحقیق 40 یاشدان یوخاری 64 مین نفرین اوستونده اجرا اولونوب. | ||
سرنگ و ایینه ایله وداعلاشین / نانو یاپیشقان یولدادیر
یازار : میرزه عبدالصمد ملکی | بؤلوم : ساغلاملیق
+0 به یه ن
| ||
استرالیالی محققلر واکسیناسیوندا ایینه‌نین یئرینی توتا بیلن نانو یاپیشقان دوزلدیبلر. بو یاپیشقان آغریسیز اولاراق داوا ترکیبینی و یا واکسنی بدنه تزریق ائلیر. کویینزلند دانشگاهیندا جناب مارک کندال بو طرحین اوستونده ایشله‌ییر کی بو یولونان 160 ایللیک عمرو اولان ایینه و سرنگین ایشینی باشا وئرمک اولار. بو نانو یاپیشقان فعال اچ یون آدلی یول ایله دوزلیب کی یونلار الکتریکی میداندا اوتوروب اونو تغییر وئریرلر. الکتریکی میدانی‌نین اولماسینا گؤره یونلاری چوخ یوخاری دقّت ایله کنترل ائله‌مک اولار. بو یولون راحاتلیقلاریندان بونو سایماق اولار کی بو یول بوندان اوّل گونش باطری‌لاریندا ایشلنمیشدی و ساده‌لیکله انبوه تولیده چاتدیرماق اولار. غیر مسلح گؤزله نانو یاپیشقانین اوستونده‌کی میکرو ایینه‌لری گؤرمک اولماز. اونونلا بئله اونلارین اوزونلوغو دری‌یه باتاجاق قدر اولار. بو میکرو ایینه‌لر حفاظتی نقشلری اولان دری سلول‌لارین اؤلو بؤلومونه نفوذ ائلیرلر. اؤلو لایه‌دن کئچندن سونرا دری‌نین دیری بؤلومنه چاتیرلار کی واکسنین ایشینده مهم رولو اولان بدنین ایمنی سلول‌لاری یئرلشیر. بو تیم گؤرستدیلر کی بو یول ایله میکرو ایینه‌لرین سطحینی واکسن موادی ایله اؤرتمک اولار کی بئله‌لیکله واکسن چوخ آشاغی دوزلا بدنه وارد اولار. دونیا جمعیتی‌نین یوزده اونو آمپولدان قورخورلار و دونیا سلامت سازمانین وئردیگی آمارا گؤره ایلده 3.1 میلیون نفر آمپول آلوده‌لیگی تأثیرینده جانلارینی الدن وئریرلر. بو تکنولوژی‌نین آیری بیر مزیتی‌ده وار: بو یول یئرینده اوتورورسا واکسنلری ساخلاماغا داها یخچال لازم اولمایاجاق و اونلاری قورو شکلینده ساخلاماق کفایت ائله‌یه‌جک. | ||
علامه طباطبایی المیزانی یازماق اوچون بحارلانوار اوچ دفعه اوخویوب
یازار : میرزه عبدالصمد ملکی | بؤلوم : دین
+0 به یه ن
| ||
علامه طباطبایی‌نین اَن عظیم اثری «المیزان فی تفسیرالقرآن» کتابی اولوب که المیزان تفسیری آدینا تانینیب. بو تفسیرین قرآندان قرآنا اولدوغو مشهوردور یعنی علامه بو تفسیری یازاندا قرآنین آیری آیه‌لرینه مراجعه ائله‌ییب و قرآنین تفسیرینه اونلاردان استفاده ائله‌ییب. بئله اولاندا اهل بیتین (ع) قرآنداکی تفسیر نقشلری هارا گئتمه‌لیدیر. قرآن اؤز دلالتینده تام و کامل ایسه بس ائمه‌نین (ع) تفسیرده‌کی نقشی هارا گئتسین؟ بونلار ذهنه گلن سؤآل‌لاردیلار. علامه طباطبایی قرآنی تفسیری یازماغا، احادیثه مسلط اولماغی شرط بیلدیگی اوچون المیزانی یازمادان بحارالانوار کتابینی اوچ دفعه اوخوموشدو. علامه طباطبایی‌یه گؤره اهل بیت (ع) و اونلارین روایتلری بوتون ایشلرده او جمله‌دن قرآنین تفسیرینده حجت ساییلیر. او «وَأَنْزَلْنَا إِلَیْکَ الذِّکْرَ لِتُبَیِّنَ لِلنَّاسِ مَا نُزِّلَ إِلَیْهِمْ وَلَعَلَّهُمْ یَتَفَکَّرُونَ»(نحل/۴۴) آیه‌سی‌نین تفسیرینده یازیر: بو آیه رسول الله‌ین سؤزونون آیه‌لرین تفسیرینده حجت اولدوغونا دلالت ائلیر، ایستر مدلول‌لارینا صراحتی اولان و ظهورو اولان آیه‌لرده، ایستر متشابه اولان آیه‌لرده و ایستر ایلاهی اسرار اولان آیه‌لرده. (المیزان ترجمه‌سی، ج ۱۲، ص ۳۸۰) بونا گؤره اهل بیتین و او حضرتین حجیّتی بوتون عرصه‌لرده محفوظدور. | ||
تبریزلی محققلر ضد سرطان ماکارونی دوزلتدیلر
یازار : میرزه عبدالصمد ملکی | بؤلوم : ساغلاملیق
+0 به یه ن
| ||
تبریزین علوم پزشکی دانشکده‌سی‌نین محققلری پری بیوتیک ماکارونی دوزلتمکله بؤیوک باغیرساق سرطانی‌نین قاباغین آلماغا تأثیرلی اقداما ال ووردولار. امیر امینی غذایی علملر ارشد ایش بیلنی مهر آژانسینا دئدی: بیز داوا خاصیّتی اولان یئمه‌لی ماکارونی دوزلتمیشیک کی یوکسک فایدالی غذالاردان ساییلیر. او اؤلکه‌میزده غیرمناسب تغذیه‌یه گؤره بؤیوک سرطان مبتلالارین یاشی‌نین آشاغی یئنمه‌سینه اشاره ائله‌مکله آرتیردی: بو ماکارونی‌نی یئمک شخصین ساغلاملیغینی آرتیرار و کلون سرطانی‌نین قاباغینی آلار. حقیقتده بو محصولون کؤمگی ایله کلون یا بؤیوک باغیرساق سرطانی‌نین ابتلا احتمالی آزالاجاق. او پرو بیوتیک و پری بیوتیکلرین فرقلرینه اشاره ائله‌ییب دئدی: پروبیوتیکلر، بؤیوک باغیرساغین دیوارلاریندا روشد ائله‌ین دیری میکرو اورگانیزملردیلر. آما پری بیوتیکلر، پرو بیوتیکلرین غذاسی ساییلیرلار. یعنی پروبیوتیکلر پری بیوتیکلریدن تغذیه ائله‌ییب اؤز ساغلاملیق تأثیرلرینی بدنه قویورلار. امینی، پروبیوتیک‌لی یا پری بیوتیک‌لی غذالارین فایدالی اولدوقلارین دئمکله آرتیردی: پری بیوتیک داها آرتیق فایدالی‌دیلار. چونکی بدنین اؤزونده آز سایدا پروبیوتیک وار و اونلاری پری‌بیوتیک ایله تغذیه ائله‌مکله سایلاری آرتار. بو محقق بونا اشاره ائله‌مکله کی بو اختراع ایندی تجاری اولماق عرفه‌سینده‌دیر آرتیردی: بو محصولون خارجی و داخلی نمونه‌سی و تایی یوخدور. او تأکید ائله‌دی: بو ماکارونی اولیه نمونه کیمی تولید اولوب و انبوه تولید اوچون حمایته احتیاجی وار. | ||