din xadimi دین خادمی

ائوه تبدیل اولا بیلن80 سانتیمترلیک سیغیناجاق

طبیعی و غیر طبیعی بؤیوک بلالارین باش وئردیگی زمان سیغیناجاغین اولماسی دایمی دغدغه‌لردندیر. آما ایندی تورکیه‌لی بیر عالم و مخترع ییغیلا بیلن و راحت حمل اولان بیر سیغیناجاق دوزلدیب کی بو مشکلی حل ائلیر. A' Design 2016 طراحلیق مسابقه‌سی‌نین قیزیل جایزه‌سینی اله گتیرن «هاکان گورسو» ییغیلمیش حالتینده 80 سانتی متر اولان بو سیغینجاغی طراحلیق ائله‌ییب. بو سیغیناجاق آچیلاندا بوتون تجهیزاتی ایله 4 تختلی بیر خواب اوتاغی، آشپزخانا و یئمک ائوی اولور. بو سیغیناجاغین 12 عددی بیر کامیون ایله داشینا بیلیر و اونون قوشماسی فقط نئچه ساعت زمان آپارار. بو سیغیناجاغین پنجره‌لری سقفینده‌دیر کی بو جهتندن مصنوعی ایشیقدان استفاده‌یه چوخ آز احتیاجی اولور. دیوارلاری سو کئچیرمز و نئچه ‌لایه‌دیر کی انرژی‌نین اتلافی‌نین قاباغینی آلیر. بو کابین 129 فوت مربع یئر توتور و نئچه آی یاشاماغا مناسب شرایطه مالکدیر.

اسلام پیغمبری (ص) تاریخ بویو دیانت و بنده‌لیک محوریدیر

الله تعالی قرآن کریمده بویورور: «یا ایها الذین آمنوا قوا انفسکم و اهلیکم نارا» یعنی ائی ایمان گتیرنلر اؤزوزو و اهلیزی اوددان قورویون. دونیا جغرافیاسی و تاریخ بویوندا دیانت و بنده‌لیک محوری پیغمبریمیزین مبارک وجودودور. اؤزو الله‌ین مطلق عبدی اولان بیری، عبودیتی دونیایا یایماغا گلیب. عبدلیگین بوتون یوکونو و حتی اؤزگه‌لرین یوکونو ده چیگنینده داشیماغا گلیب. پیغمبر اکرم (ص) انسانلیغین سرپرستی کیمی بو بؤیوک عایله‌نی سعادته چاتدیرماغا چالیشیب. صافی تفسیری‌‌نین اوّل‌لرینده امام صادقدن (ع) بئله بیر حیدث نقل اولور کی او حضرت بویوردو: روحلار عالمینده بیزیم پیغمبریمیز بوتون انبیانین نبیسی ایدی. یعنی بوتون پیغمبرلر او حضرتین ولایتی آلتیندایدیلار. علل الشرایع کتابیندا دا بئله نقل اولوب: بیر نفر امام رضانین (ع) محضرینه گلیب سوروشور: نییه پیغمبره ابوالقاسم دئییلیر؟ امام بویورور: پیغمبرین قاسم آدلی اوشاغی اولدوغونا گؤره او حضرته ابوالقاسم دئییلیر. او شخص عرض ائله‌دی: منی اهل بیلسز بیر آز آرتیق بویورون. امام بویوردو: مگر علی بن ابی طالب (ع) قاسم دئییل؟ (قسیم النار و الجنه معناسیندا). عرض ائله‌دی: بلی. حضرت بویوردو: پیغمبر ابوالقاسمدیر یعنی امیرالمؤمنین و بوتون ایلاهی اولیالار، پیغمبرین نظری آلتیندادیلار. مجمع البیان تفسیرینده یازیلدیغی کیمی پیغمبر بوتون انسانلارا بیر آتا گؤزو ایله باخاردی. گؤرسه‌ ایدی بیری اونون دعوتینی قبول ائله‌مه‌ییب ضلالتده قالیر. عیبی و ضعفی اؤزونده آختاریردی و عبادتلرینه آرتیریردی. گئجه‌لری او قدر آیاق اوسته قالیردی کی آیاقلاری شیشیردی و یوخوسوزلوقدان مبارک چهره‌سی سارالیردی. سونرا «مَا أَنزَلْنَا عَلَیْکَ الْقُرْآنَ لِتَشْقَی» آیه‌سی نازل اولدو. یعنی ائی پیغمبر بیز سنی اؤزونو مشقّته سالماقدان اؤترو بو قرآنی نازل ائله‌میشیک.

تبریز مشهد قطار حادثه‌سی‌نین ویژه کمیته‌سی آراشدیرما نتیجه‌لرینی اعلام ائله‌دی

قطار حادثه‌سی‌نین ویژه کمیته‌سی‌نین مسئولو دئدی: بو حادثه اتوماسیون سیستمینده یوخ بلکه ال حرکت سیستمی نتیجه‌سینده باش وئردی. او آرتیردی: گؤروشلرین و آراشدیرمالارین نتیجه‌سینده بللی اولدو کی بو اسفناک حادثه، هله بللی اولمایان دلیل‌لره گؤره اتوماسیون سیستمی‌نین خاموشلانماسی و ال سیستمی کنترل اولماغیله باش وئریب. بو زمینه‌ده قصور و تقصیرین کیمده اولدوغو هله بللی اولماییب. رئیس جمهورون باش معاونی‌نین امری ایله، رئیس جمهورون مخصوص مشاوری اکبر ترکان، رئیس جمهورا مخصوص بازرسی دفترین رئیسی، دمیر یولونون اسبق رئیسی، رئیس جمهور باش معاونی‌نین مشاوری و شرقی آذربایجان و سمنان استانلارینی اوستاندارلاری‌نین حضورو ایله، قطارلارین چاققیشماسینی آراشدیرماق اوچون، مخصوص کمیته تشکیل تایپ.

یول و شهر سالما وزیری آذربایجان ملتینده عذر ایسته‌دی

یول و شهر سالما وزیری بیر نامه ضمنینده آذربایجان ملّتیندن عذر ایسته‌دی. جناب وزیر کی قاباقکی صحبتلرینده حادثه‌دن سونرا قطارین و بوتون مسافرلرین بیمه اولدوغونا اشاره ائله‌مکله نگرانچیلیغا یئر اولمادیغینی بیان ائله‌میشدی بو نامه‌نین بیر بؤلومونده بئله یازیب: ایندی بیلمیشم کی سؤزلریمین بعضیسی، سیزلرین ناراحتلیغیزا سبب اولوب. اجازه ایستیرم او چتین شرایطده دانیشیقلاریمدا نقص اولموش اولسا کی بیریلرینی ناراحات ائله‌میشم، بونا گؤره اونلارین تک به تکیندن عذر ایسته‌یم. من سیزین خدمتیزده وارام.

امام زمانین (عج) و حضرت رسول اکرمین (ص) اوخشارلیقلاری

حضرت مهدی‌ ایله (عج) رسول اکرمین (ص) اوخشارلیقلاری باره‌ده چوخلو روایتلریمیز وار. امام زمانین رسول اکرمین نوه‌لریندن اولدوغونا گؤره او حضرته اوخشاماغی طبیعیدیر. آد و کنیه جهتیندن‌ده اوخشارلیق وار. هابئله پیغمبرین اُحُد جنگینده گئیدیگی کؤینک، عمامه، سابغه زره و او حضرتین قیلینجی‌دا امام زماندا (عج) اولاجاق. بو حدیثلرین لاپ جامعی کیمی پیغمبرین (ص) بو فرمایشینی خاطرلاتماق اولار: رسول اکرم (ص) بویویوب: مهدی منیم ائولادیمداندیر. آدی منیم آدیم، کنیه‌سی منیم کنیه‌مدیر. خلقت و اخلاقدا جماعتین منه لاپ چوخ اوخشایانیدیر. بو ایکی کرامتلی‌نین اوخشارلیقلاریندان بونلاری سایماق اولار: رحمت الله تعالی قرآندا بویوروب: وَ ما اَرسَلناکَ الاّ رَحمَةً للعالَمینَ.(انبیاء/107) بیز سنی گؤندرمه‌میشیک مگر عالمیانا رحمت اوچون و حدیث قدسی‌ده امام زمان باره‌سینده بئله بویورور: ... و أکمل ذلک بابنه م ح م د رحمة للعالمین علیه کمال موسی و بهاء عیسی و صبر ایوب. (محمدبن یعقوب کلینی، الکافی، ج1، ص 527؛ محمدباقر مجلسی، بحارالانوار، ج36، ص196)  . . . و اونو عالمیانا رحمت اولان و موسی کمالی و عیسی عظمتی  ایوب صبری صاحبی اولان م ح م د ایله کامل‌لشدیردیک. یاخشی و عظمتلی اخلاق الله تعالی پیغمبره بویورور: وَ إِنَّکَ لَعَلی خُلُقٍ عَظِیمٍ(سوره قلم/4) و البته سن یاخشی و عظمتلی اخلاقا صاحبسن. پیغمبر ده بیر حدیثده بویوروب: « الْمَهْدِیُّ مِنْ وُلْدِی اسْمُهُ اسْمِی وَ کُنْیَتُهُ کُنْیَتِی أَشْبَهُ النَّاسِ بِی خَلْقاً وَ خُلْقا (بحارالانوار، ج36، ص309) مهدی منیم اوشاقلاریمداندیر آدی منیم آدیم و کنیه‌سی منیم کنیه‌مدیر. او جسم روح و اخلاق جهتیندن جماعته منه لاپ چوخ اوخشایانیدیر. امنیت وئرن الله تعالی پیغمبر باره‌سینده بویوروب: وَ ما کانَ اللَّهُ لِیُعَذِّبَهُمْ وَ أَنْتَ فیهِمْ(سوره انفال/33) (ائی پیغمبر) سن اونلارین آراسیندا اولدوغون سوره‌جه، الله اونلارا عذاب وئرمیه‌جک. امام زمان‌دا اؤز وصفینده بویورور: «إِنِّی أَمَانٌ لِأَهْلِ الْأَرْضِ کَمَا أَنَّ النُّجُومَ أَمَانٌ لِأَهْلِ السَّمَاءِ»( بحارالأنوار، ج75، ص380) اولدوزلار گؤی اهالیسی‌نین امنیت وئرنی اولدوغو کیمی البته من‌ده یئر اهالی‌سینه امنیت وئرنم. عدالتی احیاء ائدن پیغمبرین رسالتیندن هدف، عدالتین اجراسی ایدی.  قرآندا بئله بویورور: لَقَدْ أَرْسَلْنا رُسُلَنا بِالْبَیِّناتِ و أَنْزَلْنا مَعَهُمُ الْکِتابَ وَ الْمِیزانَ لِیَقُومَ النَّاسُ بِالْقِسْطِ(حدید/25) بیز رسول‌لاریمیزی آیدین دلیل‌لرله گؤندردیک و جماعتین عدالتی احیاء ائله‌مک اوچون اونلارلا کتاب و میزان نازل ائله‌دیک. امام زمانین قیامی‌نین‌دا هدفی عدالتی احیاء ائله‌مکدیر: یَمْلَأُ الْأَرْضَ عَدْلاً وَ قِسْطاً کَمَا مُلِئَتْ جَوْراً وَ ظُلْما(الغیبة، النعمانی، ص58) یئر اوزونو ظلم و جورونان دولدوغو کیمی عدالت و قسط ایله دولدوراجاق.