سیزین‌ده بو مشکل‌لریز اولسا حتماً هوشلو آدامسیز
یازار : میرزه عبدالصمد ملکی | بؤلوم : اجتماعی
+0 به یه ن
بعضیلری هوشلو انسانلارین مشکل‌سوز انسانلار اولدوقلارینی تصور ائله‌ییرلر نییه‌کی اونلار هر هانسی مشکلو چوخ راحات حل ائله‌یه بیلرلر. آما حقیقت بئله دئییل.
هوشلو انسانلار نه قدر ده هوشلو اولسالار نهایتده انساندیلار. حتی اولا بیلر اونلارین مشکل‌لری آیریلارینا گؤره داها چوخ و بوروشوق اولسون. سیزین اوچون هوشلولره مخصوص نئچه مشکلو بوردا گتیرمیشیک. بو مشکل‌لر سیزده ده اولسا بیلین کی هوشوز او بیریلره گؤره یوخاریدیر.
1. معمولی دانیشیقلار حوصله‌زی آپاریر
کئف احوال ائله‌مک و گونده‌لیک سؤزلری دانیشماق سیزه داریخدیرا بیلر. آخی سیزین ذهنیز داها بؤیوک ایده‌لرله دولودور. سیز واختیزین تلف اولدوغونو دوشونورسوز و اؤزوزو فایداسیز دانیشیقلارین ایچینده بوغولان بیر شخص کیمی گؤرورسوز. سیز اؤزوزه بیر هم‌فکر و یولداش آختاریرسیز آما اونو چوخ آز زمانلار اله گتیره بیلیرسیز.
2. دانیشماقدان چوخ، دوشونورسوز
سیزین بئینیز ائله قورولوب کی بیر مسأله‌نین مختلف یول‌لارین یوخلاییر. بونا گؤره بیر مسأله‌ده نظریزی دئمگه معمولی انسانلاردان داها چوخ زمانا احتیاجیز اولور.
چوخ احتمالا جوابیزین بیر او قدر ده دقیق اولمادیغینی دوشوندوغوز زمان اصلاً اونو مطرح ائتمه‌یه‌سیز. و ظاهرده سس‌سیز و دانیشمایان بیر شخص کیمی جلوه‌لنه‌سیز.
3. گونده‌لیک ایشلریز سیزه تکراری و یوروجو گلیر
سیزین بئینیز تازا و بوروشوق مسأله‌لرله مشغول اولماق ایستیر آما گونده‌لیک گؤردوگوز ایش سیزه ساده گلیر و داریخدیریر.
4. بعضاً ایش گؤرمگه و عمل ائتمگه انگیزه‌ز اولمور
چوخ ایشله‌ین و فعال انسانلارلا دولو بیر دونیادا کی ایشله‌مک، ایده وئرمکدن داها مطلوب اولور، اولا بیلر ذهنیز او قدر بؤیوک ایده‌لرله مشغول اولا کی عمل ائله‌مک یادیزدان چیخا. متأسفانه بو مسأله‌نی چوخلاری تنبل‌لیک کیمی بیلیر و بو مسأله سیزی ناراحت ائلیر.
5. اجتماعی رابطه‌لرده ناشی ساییلیرسیز
انسانلارلا بحث ائله‌ین زمان مطمئن اولمادیغیز مطلبی دئمه‌زسیز، و بعضاً حق اولدوغوز موضعلری مطمئن اولمادیغیز اوچون شک ایله مطرح ائلرسیز و بو دا باعث اولار جماعت سیزی اجتماعی رابطه‌لرده ضعیف بیر شخص گؤرسونلر.
6. چوخ چتین عاشق اولارسیز
سیزین عشق سفریز معمولی جماعتدن بیر آز چتین اولور. سیز داها آرتیق محافظه‌کار و داها آرتیق تحلیل ائدنسیز. بونا گؤره جماعت سیزی سویوق و خودبین حسابلار. بونلاردان علاوه سیزده اضطرار حسّین آز اولماسی، تصمیملریزین سرعتینی آزالدیر و نتیجه‌ده عشق آلوولانمامیش ساکتلشیر.
بونلارلا بئله جماعتین سیزی داها یاخشی باشا دوشه بیلمه‌سی اوچون اونلارا آرتیق توضیح وئرمه‌لیسیز. بئله‌لیکله ایده‌لریزی مطرح ائله‌ییب عمله یاخینلاتماق اوچون داها آرتیق امکانیز اولار.
پروین اعتصامی
یازار : میرزه عبدالصمد ملکی | بؤلوم : اجتماعی
+0 به یه ن
پروین اعتصامی‌یه مشهور اولان رخشنده اعتصامی آذربایجانین بؤیوک شاعرلریندن ساییلیر. او 1285-جی ایلین اسفند آیی‌نین 25-ده تبریز شهرینده دونیایا گؤز آچدی. آتاسی میرزا ابراهیم آشتیانی‌نین اوغلو یوسف اعتصامی، اعتصام الملک آشتیانی آدینا مشهور ایدی. آناسی مقدم العداله‌نین قیزی بانو اختر فتوحی ایدی.
او «تربیت نسوان» آدیندا کتابی یازان عالم آتاسی‌نین تربیتی ایله بویا باشا چاتیر. عرب و فارس دیل‌لرینی‌ده آتاسیندان اؤیرنیر و آتاسی ایله بیرلیکده تهرانا گئدیر. 8 یاشیندان شعر دئمگه باشلاییر.
پروین 28 یاشیندا یعنی 1313-ده کرمانشاهدا شهربانی رئیسی اولان عمیسی اوغلو ایله ائولنیر. آما اونون لطیف روحی نظامی خصلتله توتمور. و نهایتده ایکی آی یاریمدان سونرا بوشانیب آتاسی ائوینه قاییدیر.
بیر ایل سونرا یعنی 1314-ده پروین اعتصامی‌نین بیرینجی شعر کتابی چاپ اولور.
پروین بیر مدت تهرانین عالی دانشسراسیندا کتابچی کیمی چالیشیر و عینی حالدا شعر قوشماغا ادامه وئریر. نهایتده اجل، پروینی 35 یاشیندا یعنی 1320-جی ایلین فروردینین 15-ده ادب و شعر دونیاسیندان آلیر و پروین قم شهرینده عایله مقبره‌سینده آتاسی جیواریندا تورپاغا تاپیشیریلیر.
پروینین دیوانیندا 248 قطعه شعر وار کی اونلارین 65 قطعه‌سی مناظره کیمی یازیلیب.
لاپ معروف ضد سرطان یئمه‌لی
یازار : میرزه عبدالصمد ملکی | بؤلوم : ساغلاملیق
+0 به یه ن
بروکلی کلمی‌نین خاص ترکیباتینا گؤره ضد سرطان خاصیتی وار. بو تره‌وز اعصابی گئجلندیرر و گؤزلری ایشیقلاندیریب درینی گؤزللندیرر.
بروکلی‌نین چوخ فایدالی خاصیلری وار. او جمله‌دن:
ضد التهاب:
بروکلی التهابی آزالتماق اوچون طبیعی بیر درمان ساییلیر و مفصل‌لرین تحلیل سرعتینی آزالدار. بونا گؤره آرتروزو اولانلار اوندان استفاده ائله‌مه‌لیدیلر. بروکلی کلمی مفصل‌لری داغیدان آنزیملرین آخماسی‌نین قاباغینی آلماقلا اونلاردان محافظت ائلر.
اورک دامار درمانی
بروکلی کلمی بدنین لاپ حساس عضوونه ده فایدا یئتیریر. بو کلم پیس کلسترولو آزالتماقدان علاوه قان دامارلارینی‌دا گوجلندیریر. بو کلمده اولان «سولفور افن»، دامارلارین تخریبی‌نین قاباغینی آلار.
بروکلی‌ده اولان B دسته‌سی ویتامینلری «هموسیستئین» آمینه اسیدینی تنظیمه سالار و اورک دامار ناخوشلوقلاری‌نین قاباغینی آلار.
گؤزلری ایشیقلاندیران
بروکلی کلیمینده اولان آنتی اوکسیدانلار، گؤز سلول‌لاری‌نین داغیلماسینا مانع اولار و گؤزون مرجیمگیندن موغایات اولار.
بو تره‌وزین عوارضی
بروکلی کلمی‌نین بیر عوارضی اونون فیبرلی اولدوغوندان قایناقلانیر. بیری چوخ بروکلی کلمی یئسه اوندا روده گازی چوخالار.
بیر ده بروکلی کلمینده یوخاری مقداردا K ویتامینی وار. اونا گؤره قانلارینی رقیقلندیرمک اوچون داوا مصرف ائدن شخصلر بو کلمدن یئمه‌سه‌لر یاخشی اولار.
بروکلی کلمی هاردان گلیب؟
بو تره‌وزین وطنی ایتالیادیر. ایتالیالی‌لار بو کلمه «بروکولو» دئییرلر یعنی کلم اوستونده گول. اونلار بو تره‌وزی سودا پیشیریب و یا دا سالاتلارلا چیی چیی یئییرلر.
ناسا رسمی اولاراق فضایی آدام آختاریر
یازار : میرزه عبدالصمد ملکی | بؤلوم : تكنولوژی
+0 به یه ن
خبرآنلاینین وئردیگی خبره گؤره، جیمز وب تلسکوپو، 2018 ایلینده ایشه باشلایاجاق لاپ بؤیوک و گوجلو تلسکوپ ساییلیر.
بوندان اوّل بیزدن 40 ایشیق ایلی فاصله‌سینده حیاتا مناسب اولان بیر سیاره تاپیلیب. بیزدن 40 ایشیق ایلی فاصله‌ده اولان یاشانیلاجاق سیاره‌نین کشفی، تاریخی و حیرت آمیز بیر کشفدیر.
(JWST) تلسکوپی 20 ایل بویونجا دوزلماقدایدی و گلن ایل یئرین مدارینا یئرلشدیریله‌جک و فضادا حیاتین اولوب اولمادیغینا دایر چوخلو اطلاعات بیزه وئره بیله‌جک.
ناسا بو تلسکوپون واسطه‌سی ایله گؤیده احتمالی تمدنلر و حیات باره‌سینده آرتیق اطلاعاتی اله گتیرمگه اومید باغلاییب.
بایرام تعطیلاتیندان سونراکی روح دوشگونلوگو ایله نه ائدک؟
یازار : میرزه عبدالصمد ملکی | بؤلوم : اجتماعی
+0 به یه ن
چوخلاری قاباقکی عادی و استرسلی یاشاییشا قاییتماقدان ناراحت و شکایتچیدیلر. بو ناراحتچیلیق اونلارین چهره‌سیندن اوخونور و دیللرینه گتیرمکلری لازم دئییل.
استرسدن اوزاق اولماق اوچون استراحت ائله‌مک و ایشه فاصله وئرمک توصیه اولان و استفاده اولان یوللارداندیر. بایرام تعطیلاتی بو ایش اوچون مهم و یاخشی فرصت ساییلیر. بو فرصتده هامی خانواده‌سی‌نین یانیندا اولور و چوخلو جسمی و روحی مشکل‌لر آزالیر.
سفرلرین برنامه‌سیز و آز فاصله‌سی و مسافرتین اوزون اولماسی تعطیلاتین سونوندا‌کی روح دوشگونلوگونه سبب اولور. مسافرتده‌کی افراط و تفریطلر استرسین تماماً بوشالماماسی و مسافرت احتیاجی‌نین هله ده حسّ اولونماسی انسانلاری ایشه قاییتماق مجبوریتینده اولدوقلاری اوچون روح دوشگونلوگونه سالیر.
بیزیم فرهنگیمیزده سفر اوچون بیر سئری آداب و روسم وار کی اونلاری رعایت ائله‌مک بو کیمی مشکل‌لرین قاباغینی آلار.
هر حالدا تعطیلاتدان سونرا کی روح دوشگونلوگونو ساده یول‌لارلا درمانا ائتمک اولار. مثلاً ایش یئرینه و یا گونده طی ائله‌دیگیز قیسا مسیری پیادا و قاچا قاچا گئتمکله روح دوشگونلوگونون ساواشینا گئده بیلرسیز. بئله‌لیکله گونده‌لیک ایشلریزی ورزشه چئویرمیش اولورسوز.