ایمام حسن (ع) و معاویه‌نین صولحنامه‌سی
یازار : میرزه عبدالصمد ملکی | بؤلوم : دین
+0 به یه ن
 |
||
|
ایمام حسن (ع) اوِّلده اؤزونو معاویه‌ایله جنگه حاضیرلادی, آما كؤمكلری‌نین ثابیت‌قدم اولمادیغی و ایسلام دینینه دَیَن ضربه‌یه گؤره مجبور قالدی معاویه‌ایله صولح ائلیه. ایمام حسن (ع) و معاویه‌نین صولحنامه‌سی بیرینجی مادّه: حسن بن علی حكومت و خیلافتی معاویه‌یه وئریر, بو شرطله كی معاویه قورآن دستوری و پیغمبرین سیره‌سی‌نه موطابیق حكومت ائلیه. ایكینجی مادّه: معاویه‌دن سونرا خیلافت حسن بن علی‌یه چاتاجاق و اونا بیر ایتّیفاق دوشسه حسین بن علی موسلمانلارین حكومتینی الینه آلاجاق. هابئله معاویه‌نین حقی یوخدور اؤزونه جانشین موعیّن ائلیه. اوچونجو ماده: ناماز واختی امیرمؤمنان علی‌یه(ع) لعنت اوخوماق و اهانت ائله‌مك دایاندیرمالیدیر و بوندان سونرا علی‌دن (ع) فقط یاخشی‌لیقلا یاد اولمالیدیر. دؤردونجو مادّه: كوفه بیت‌المالیندا اولان 5 میلیون دیرهم, معاویه‌یه تحویل وئریلمیه‌جك و گَرَك حسن بن علی‌نین (ع) نظری آلتیندا خرجله‌نه. هابئله معاویه اموال باغیشلاماقدا بنی هاشیمی بنی امیه‌دن اوستون توتمالیدیر. هابئله معاویه گرك «دارابگرد» خراجیندان بیر میلیون دیرهم, جمل و صفین جنگینده حضرت علی‌نین(ع) ریكابیندا ساواشیب شهید اولانلارین عاییله‌لری آراسیندا تقسیم ائلیه. بئشینجی ماده: معاویه تعهود وئریر كی جماعتین هامیسی, شاملی, حیجازلی, عراقلی و آیری میلّتلرین هامیسی تعقیب و اذیّتدن آماندا اولسونلار و اونلارین كئچمیشده‌كی سابیقه‌لرینه گؤز یومولسون. و اونلارین هئچ بیری كئچمیشده معاویه حكومتی علئیهینه ائتدیكلری فعالیتلره گؤره تعقیب اولماسینلار و مخصوصاً عراق اهلی كئچمیشده اولان كینه‌یه گؤره اذیّت اولماسین. اوندان علاوه معاویه, علی‌نین (ع) كؤمكلرینه, هر یئرده اولسالار آمان وئرسین و اونلاری اصلاً اذیت ائله‌مه‌سین. هر كسین حقّینی اؤزونه وئرسین و علی شیعه‌لری‌نین الینده, بیت المالدان اولان اموال اونلاردان آلینماسین. هابئله حسن بن علی و قارداشی حسین بن علی و پیغمبر خانیندانیندان هئچ كسه, معاویه طرفیندن هئچ جور خطر اولمامالیدیر و هئچ یئرده اونلار اوچون قورخو فضاسی یارادیلمامالیدیر.
صولحون آخیرینده معاویه تأكیدله تعهود وئردی كی صولحنامه‌نین بوتون مادّه‌لرینی دقیقاً ایجرا ائلیه‌جك. او بو مسأله‌یه آللاهی شاهید گتیردی و شامین بؤیوكلری‌ده شاهید اولدولار. بئله‌لیكله ایسلام پیغمبری‌نین(ص) حسن بن علی هله اوشاق اولاندا, دئدیگی فرماییش موحقق اولدو. پیغمبر بیر گون منبره‌ده اونو گؤرنده بویوردولار: «منیم بو بالام موسلمانلارین آغاسیدیر و آللاه اونون الی‌ایله موسلمانلارین ایكی دسته آراسیندا صولح یاراداجاق.» | ||
پنجره‌دن برق تولید ائتمك
یازار : میرزه عبدالصمد ملکی | بؤلوم : تكنولوژی
+0 به یه ن
|
|
||
|
تازالیقدا هلندین«دلف» دانیشگاهیندا بیر جور پنجره دوزلدیبلر كی انرژی تولید ائلیه بیلیر. بو پنجره‌لر باهالی دئییل و بیر جور نازیك لایه‌نی معمولی شوشه‌نین اوستونه یاپیشدیرماقلا اله گلیر. بو انرژی تولید ائدن پنجره‌لر انرژی اوچون اوجوز منبع ساییلا بیلر و ان آز هزینه‌ایله انرژی اله گتیرمگه كؤمك ائده‌جك. بؤیوك شهرلرده شوشه نومالی بورجلار و بینالاردا بو پنجره‌لردن چوخ یاخشی ایستیفاده ائله‌مك اولار. بو ایش اوچون كیفایت ائلر كی شوشه‌نین اوستونه پاریلدایان نازیك لایه یاپیشسین و پنجره اطرافیندا گونش سلول‌لاری نصب اولسون. پاریلدایان لایه گونشی جذب ائلیر و اونو گونش سلول‌لارینا گؤنده‌ریر. البته بو لایه‌نین رنگی‌ده موهومدور. بو پاریلدان لایه رنگی و كیفیتینه باغلی اولماقلا هر متر موربعده اونلار وات برق تولید ائلر. بیر نازیك لایه ان چوخ 20 وات برق تولید ائلیه بیلر. دوزدور كی شاید بو میقدار برق بینانین بوتون انرژیسین گؤرمه‌یه آما مثلاً 4 متر موربع اولان پنجره بیر كامپیوتر دستگاهین برقینی یئتیره بیلر. | ||
اینسانلار 33 ایله‌دك اؤلمز اولورلار
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
بیر روس عالیمی تحیقیق تیمی‌ایله بیرلیكده چالیشیر 33 ایله‌دك تماماً هلوگرافیك اینسان ایجاد ائله‌سین و اینسان اوچون اؤلومسوزلوك گتیرسین. او موحقیقلردن ایسته‌ییب مجازی اینسان مغزی اولان اینسانی هلوگرافیك آواتارلار دوزتسینلر و ایندی دونیا پوللولاریندان ایسته‌ییب كی اونا بو ایده‌آل پروژه‌نی یئرینه یئتیرمك اوچون مادی كؤمك ائله‌سینلر. دیمیتری ایتزكوف بو طرحین بیناسینی قویوب و قصدی وار گلن 33 ایلده موختلیف آواتارلار یاراتسین. بو طرحده, اوّل روبات بیر اینسان دوزه‌لیر كی بئیین كونترولون موشترك سطحیندن ایستیفاده ائدیب فرمانلاردان ایطاعت ائلیه‌جك. سونرا بیر اینسان نوسخه‌سی دوزه‌له‌جك كی اینسان اؤلندن سونرا بئیین پئیوند وورماغی‌نین ایمكانی اولوسون. سونراكی نوسخه‌نین, مجازی اینسان بئینی اولاجاق و نهایتده اینسان بدنی‌نین آواتارلارین تولید ائلیه‌جك كی اینسانی هوشلاری اولسون. ایتزكوف میلیاردرلره آچیق نامه یازیب و اونلاردان ایسته‌ییب اؤز عؤمرلرینی چوخاتماق اوچون‌ده اولسا بو پروژه‌یه كؤمك ائله‌سینلر. او ایدامه‌ده دونیانین پوللولارینا ابدی یاشاییش وعده‌سی وئرمكله اعلام ائدیب كی هر كسین بو مسأله‌ده شكّی اولسا ائلیه بیلر اونا ثابیت ائلیه. بو پروژه‌نین هدفی اینسانلاری عذاب و اؤلومدن قورتارماقدیر. بونونلا بئله كی چوخ بؤیوك موتخصیصلر بو پروژه‌ده ایشتیراك ائدیبلر, بو پروژه‌نین یاخشی ایستیقبالینا تضمین یوخدور. حقیقتده ایتزوكوفون قصدی وار اینساندان بیر هلوگروفیك نوسخه دوزلده و اینسانین مجازی بئینین بو بدن یا آواتارین ایچینه قویا و آیری جور دئسك اینسانین بئینین فیزیكی بیر بدندن آواتارا اینتیقال وئرمكله, اینسانین اؤلمزلیگین حقیقته چئویره. 2045 طرحینده 30 عالیم ایشلیر و ایتزوكوفون قصدی وار یایدا سان‌فرانسیسكو شهرینده بو ایش اوچون بیر دفتر آچا و عالیملر آراسیندا بیر شبكه یاراتماقلا اونلارا ایمكان وئره بیر-بیرلری‌ایله ایطیلاعات تبادول ائله‌سینلر. | ||
بئلی قوروماغین 9 ساده یولو
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
وساییل قالدیراندا دیزیزی بوكون ایشتیباه شراییطده یوك قالدیرماق بئل ناراحاتلیغینا سبب اولان بیلر. یئردن بیر شئی گؤتوردویوز زامان، دیزلریزی بوكوب یئره چؤمبه‌له‌یین و وساییلی بو شراییطده قالدیرین. بئلیزی چئویرمه‌یین مخصوصاً ماشیندا، آرخایا دؤنوب بیر شئی آلماق بئل آغریسینا سبب اولا بیلیر. اونورغانین(ستون فقرات) دؤنوب حركت ائتمه‌سینه گتیریب چیخاران بو تیپ خطرلی و آنی حركتلردن چكی‌نین. آریقلایین كؤكلمك مخصوصاً بئل ناحیه‌سینده‌كی یئرلری زورا سالیر. بوتون بد‌نین آغیرلیغی بئل ناحیه‌سینده‌كی اونورغا‌لارا مینیر و یوك اورا‌دان قیچلارا دوغرو داغیلیر. اگر آدام كؤكلسه اونورغایا مینن یوك آرتیر. آریقلاماغیز اوچون ساغلام یئمكلردن ایستیفاده ائدیب و نیظاملی ورزیش ائدین. اوجالیغا اوزانمایین بئل آغریسینا گتیریب چیخاران داورانیشلاردان بیری‌ده اوجالیغا اوزانماق و یوخاری‌داكی بیر یوكو گؤتورمكله مئیدانا گلیر. باشیزدان یوكسه‌یه اوزانمایین، یوكسك‌ده‌كی بیر یئردن آغیرلیق گؤتورمه‌یین. تمرین ائدین بئل اطرافینداكی عضله‌لرین گوجلندیریلمه‌سی اوچون ورزیش ائدین. دوز قاچماق و اوزمك ان چوخ یاخشی ورزیشلردن ساییلیر. فوتبال كیمی موباریزه‌لی یا دا هالتئر كیمی آغیرلیق قالدیریلان ایدمان‌لار ایسه بئل آغریسی شیكایتی اولانلارا توصیه ائدیلمیر. حركتسیز قالمایین كامپیوتئر باشیندا یاریم ساعت اوتوراندان سونرا بئش دقیقه قالخیب گزین. بو تكلیف میز باشیندا چالیشانلار اوچون‌ده اعتبارلیدیر. اوتورولان هر یاریم ساعتدا بیر وضعیتی دییشدیرمك و قالخیب گزمك، آغریلاردان قورونمادا اهمیت داشی‌ییر. یاتا‌راق كیتاب اوخومایین یاتار وضعیتده كیتاب اوخوماق بئل آغریسینا گتیریب چیخاریر. اؤنه دوغرو اگیلدی‌ییز اوچون اونورغانین دوروشو دگیشیر. عینی شكیلده یاتاقدا دیز اوستو كامپیوتئرله‌ده ائدین. یاتاق سئچیمینه اهمیت وئرین یاتاق‌لارین نه سرت(برك) نه‌ده چوخ یومشاق اولماسی لازیم‌دیر. راحت باشماق گئیین مخصوصاً قادینلار اوچون اوزون ساعتلار اوجا دیكدابان گئیمك خطرلی اولا بیلر. چونكی بوتون اونورغانین تارازلیغی و آغیرلیق مركزی دگیشیر. بوتون آغیرلیق بئله یوكله‌نیر. بونا گؤره ایشه گئدركن ورزیش باشماغی، ایشده ده ایش باشماغی گئیمه‌یه چالیشین | ||
یالانچی مودعی‌لرین ایدعاسی: ایمام زمانلا(عج) رابیطه‌میز وار
یازار : میرزه عبدالصمد ملکی | بؤلوم : دین
+0 به یه ن
|
|
||
|
مهدویت اعتیقادینا سطحی باخماغین عاقیبتین بیلمك اوچون او حضرتله رابیطه ایدعالاری اولانلار و حتی بیر عیده اؤزونو او حضرت تانیتدیرانلارین پرونده‌سینه باخماق اولار. آشاغیدا بو یالانچی مودعی‌لرین بیر سئریسی ایله تانیش اولوروق. - بیر قیزین اهواز كندلری‌نین بیرینده, ایدعاسی وار كی ایماملارلا رابطه‌سی وار و ناخوشلارا شفا وئریر. «ز ـ ج» 21 یاشلی قیزدیر كی بیر مودت قاباق ایدعا ائله‌دی ایمام حسین(ع) اونون یوخوسونا گلیب و اونا ناخوشلاری شفا وئرمگه ایجازه وئریب. سونرا اونون قارداشی و عمیسی اوغلو, اونون تبلیغینده فیلیم و سی‌دی پایلادیلار. بو ایش اورا قدر بویودو كی چوخلو جماعت اوزاق-یاخین كندلر و شهرلردن او قیزین ائوینه گلدیلر و اونون فامیللری جماعتین نذیرلرین ییغماغا باشلادیلار. او بیر مودّت سونرا ایدعا ائله‌دی حیاطلارینداكی خورما آغاجی ناخوشلارا شفا وئریر. - عوام ایچینده بیر شایعه یاییلدی كی بیر تقلید مرجعی ایمام زمانین (عج) قاتیلین گؤروب. شایعه‌چیلر كی بیر عیده فرهنگی محصولات تهیه‌ائدنلر ده اونلارین ایچینده واریدیلر بیر پارا كاغاذلار و سی‌دی‌لر چیخاتدیلار و ایدعا ائله‌دیلر: آیت الله العظمی . . . دستاماز آلاندا هوشدن گئدیر و هوشه گلیب حالیندان سوروشاندا دئییر كی, ائله ایندی ایمام زمانین (عج) قاتیلی دونیایا گلدی و بی‌هوشلوقدا اونو اوزونو گؤره بیلدیم ! بو خبر اصفهاندا و آذربایجاندا گئنیش صورتده یاییلدی و بئله یاییلدی كی با قاتیل ایرانلیدیر و بو خبر دیندار جماعتین ناراحاتچیلیغینا سبب اولدو. بونا گؤره بو تقلید مرجعین شاگیردلریندن بیری اوندان ایستیفتاء ائتدی و او, بو مسأله‌نی شیدّتلی صورتده تكذیب ائله‌دی. - سیدعلی برزنجی اوغلو مصطفی, مهدویت مودعی‌لریندن ایدی كی كردستاندا اؤزونو تبلیغ ائله‌دی و ایندی اؤلندن سونرا كوبرا غئیبتینده باش آپاراریر ! ایكی اینترنت سایتی دؤرد دیلده بو شخصین یازیلاری و سؤزلرین تبلیغ ائلیر. او 1955 ده عراقین سلیمانیه‌سی‌نین كندلرین بیرینده دونیایا گلیب و 1988-ده مهدویت ایدعاسی ائدیب و جماعتی اؤزونه طرف چاغیردی. بو شخص ایرانا گلیب چالیشدی شیعه موجتهیدلرین نظرین جلب ائله‌سین كی اوخو داشا دَیدی و سونرا عراقا قاییتدی. برزنجی‌نین ایدعاسینا گؤره, آللاهین كلامی فیریشته‌لر طرفیندن اونا ایلهام اولور و بو یازیلار آللاه طرفیندن اونا گؤنده‌ریلیب. بیر عیده عوامین اینامینا گؤره بو شخص بیر گون ظهور ائده‌جك, البته مكه‌ده یوخ بلكه عراقین كردستانیندا. - سید احمد الحسنین ایدعاسی وار كی ایمام زمانین (عج) وصی‌سی و گؤندریلمیشیدیر. او اؤزونو یمانی آدلاندیریب اینترنتده گئنیش صورتده اؤزونو تانیتدیریر و حتّی ایدعا ائلیر كی شیعه عالیملرین چوخونا دعوتنامه گؤنده‌ریب و اونلاری موناظیره‌یه چاغیریب. بو شخصین سایتیندا گلیب: سید احمد الحسن, آیت الله سیستانینی خاص صورتده علمی موناظیره‌یه چاغیریب تا اونون قاباغیندا فقط قورآنا ایستیناد ائدیب جواب وئره, آما او قبول ائتمه‌ییب. یالانچی یمانی, بو ایدعادان علاوه اؤزونو بیرینجی مهدی آدلاندیریب و بیر سئری ریوایتلردن سوءایستیفاده ائله‌مكله اؤزونو موعود مهدی آدلاندیریر. بو شخص اینترنتده «بلغ مبین شیخ ناظم العقیلی قلمی« كیتابین نئچه دیلده یاییب و اوندا ایدعاسی‌نین دلیل‌لرین و وظیفه‌لرین ساییب و هامیدان ایسته‌ییب كی اونا قوشولسونلار. - علیرضا پیغان، بللی اولمایان بیر نفردیر كی مونجی آدیندا بیر سایت قویوب و اؤزونو موعود مهدی عنوانیندا تبلیغ ائلیر و قائم آدیندا 673 صفحه‌لیك بیر كیتابی دا بو سایتدا یاییب. بو كیتابین بعضی یئرلرینده بئله ایدعا اولوب: شیعه‌لرین 12-جی ایمامی كوبرا غئیبتین اوّل‌لرینده وفات ائله‌دی و قبری مكه‌ده‌دیر. بو مدعی ایدامه وئریر: اون ایكینجی ایمامدان سونرا علی آدیندا ایكی ایمام ظهور ائدیبلر كی او اونلارین آخیریدیر و لقبی سید حسنی‌دیر. - هرمزگان كندلرینده یر نفر ایدعا ائله‌دی كی یوخودا مأمور اولوب بندرعباس یاخینلیغیندا بیر كندده مسجید دوزتسین. ایمام زمان (عج) آدیندا بیر مسجید دوزلماق حالیندادیر كی اونون موتوّلیسی همان بو شخصدیر. كرامت و ناخوشلارا شفا وئرمك شایعه‌سی جماعتی بو نوقطه‌یه ییغیب. - دشتستاندا بیر 45 یاشلی آرواد ایدعا ائلیر كی ایمام زمانی (عج) گؤروب و ناخوشلارا شفا وئرمك گوجو وار. او بیر ایمام حسین (ع) عزا مجلیسینده ایدعا ائله‌دی كی ایمام زمانلا(عج) رابیطه‌سی وار و ایندیه قدر نئچه ناخوشا شفا وئریب. بونلار اخیراً مهدویت ایدعاسی ائدنلرین تكجه بیر آزیدیر. | ||
