مولانانین شعرلری ایمام علی‌نین (ع) معنوی مقامینی ان گؤزل حالتده تصویره چكیب
یازار : میرزه عبدالصمد ملکی | بؤلوم : دین
+0 به یه ن
 |
||
|
مولانانین امیرالمؤمنین حقّینده دئدیگی شعرلر تاریخ بویوندا او حضرت حقّینده دئییلن شعرلرین ان گؤزلیدیر. ایمام علینی(ع) معنوی جهتدن تحلیل ائدن و او حضرتین ایلاهی شخصیتین دوزگون تفسیر ائلیه‌ن مولانا اولوب كی بو ایشی ان گؤزل صورتده یئرینه یئتیریب. مولانا ایمام علی‌نین (ع) عمر بن عبدودله ساواشی‌نین جریانینی نقل ائله‌مكله او حضرتی ایلاهی عرشین قوشونا تشبیه ائله‌ییب كی ایلاهی عرشه قدر اوجالیب. آی, گئجه‌ده گئدنلری هیدایت ائدر, آییین دیلی اولسایدی ایتَنلری داها تئز هیدایت ائلردی, چونكی حضرت محمد (ص) گونش و حضرت علی (ع) ویلایت آییدیر. مولانا حضرتی آیا بنزه‌دیر كی اونون ویلایت ایشیقی هر یئری ایشیقلاندیریب و دیله گلسه, حقیقت یولونون موسافیرلرینی داها یاخشی هیدایت ائلر. چون تو بابی آن مدینه علم را/ چون شعاعی آفتاب حلم را* باز باش ای باب بر جویای باب/ تا رسد از تو قشور اندر لباب* باز باش ای باب رحمت تا ابد/ بارگاه ما له كفوا احد* مولانا «أنا مدینة العلم و علی بابها» نَبَوی حدیثینه ایشاره ائدیب, مولا علینی (ع) سخاوت و كرامت نمونه‌سی بیلیر. او مینلر نفرین ایشینی گؤرن صف‌سیندیراندیر. مولانانین اعتیقادینا گؤره ایمام (ع) بیر پهلواندیر كی نفسینه غالیب اولوب و اونون قیلینج وورماسی فقط حقّه خاطیردیر. مولانانین نظرینه گؤره مولا علی (ع) اؤز قاتیلین تانییر و اونا رحم ائلیر و هئچ واخت اونا غضبلنمیر. مولانانین باخیشیندا ایمام علی (ع) عدالت و حقّین كامیل مظهریدیر و او قدر شوجاعتی‌ایله بئله, صبر و دؤزوم مظهریدیر. هر حالدا مولانا بو موضوعنی ایكی‌یوز بئیتده قوشوب و هئچ كسین باره‌سینده بئله گؤزل شعر دئمه‌ییب و حقیقتاً ده حضرت علی‌نین (ع) معنوی مقامینی چوخ گؤزل تصویره چكیب. | ||
آل سعود اُحُد داغین ماغاراسین بتونلا دولدوردو
یازار : میرزه عبدالصمد ملکی | بؤلوم : دین
+0 به یه ن
|
|
||
|
آل سعود تازا عجیب بیر ایشده مدینه شیمالیندا یئرله‌شن ثنایا ماغاراسی‌نین آغزینی بتونلا دولدوردو. ثنایا ماغاراسی همان ماغارادیر كی پیغمبریمیز اُحُد ساواشیندا یارالانیب اورا سیغینمیشدی. بو ایش عربستان پادیشاهی امری ایله باش وئریب. داغین داشلاری و بتونلا ماغارانین آغزینی دولدوردولار و اوسته‌لیك داغین اتگینه‌ده ایك مأمور قویدولار كی هئچ كس داغا چیخانماسین. اونلار اگر آدلارین موسلمان قویوبلار بو ایش گؤرسه‌دیر كی تماماً پیغمبرین و ایسلامین ضیدّینه اللشیرلر و ایسلاملاری یالاندیر. حتّا اگر موسلمان‌دا اولماسالار بو ایش توریستی باخیمدان آخماق‌یانا ایشدن سووای هئچ نه دئییل. مگر اولار بیر عیدّه‌نین عشقی اولان داغین اتگینه مأمور قویاسان كی بو داغا چیخماق یاساقدیر؟!! | ||
معصوملارین قیافه سین نوماییش وئرمك اولارمی؟
یازار : میرزه عبدالصمد ملکی | بؤلوم : دین
+0 به یه ن
|
|
||
|
شیعه نیوزون وئردیگی معلوماتا گؤره اوروجلوق گونلرینده عربی شبكه‌لری طرفیندن "امام الفقها" آدیندا بیر سریال امام صادق "علیه السلام" زیندگانلیغی باره ده یاییلیر كی اوندا ایمام صادقین (ع) اوزو نوماییش وئریلیر. و بئله شایعه سالمیشدیلار كی آیت الله سید علی حسینی سیستانی (دام ظله) بو فیلیمین نوماییشی ایله موافیقدی. بو اساسدا موعظم‌له‌دن ایستیفتا اولدو كی ایستیفتا و جوابی بئله‌دیر: سوآل: بعضی مئدیالار آیت الله سید علی حسینی سیستانی ( دام ظله)’ آدینا نقل ائدیرلر كی او موبارك رمضان گئجه‌لرینده العراقیه كانالیندان یاییلان امام الفقها سریالی‌نین مؤحتواسی ایله موافیقدیر و دئییلیر كی سیز ایمام صادقین (علیه السلام) قیافه‌سی‌نین نوماییشین جاییز بیلیرسیز. آیا بو نقل قول دوغرودور؟ آللاه سیزه خئیر جزا عینایت ائله سین. آیت الله سیستانی نین نجف اشرفده كی دفترین جوابی: بو مطلب دوغرو دئییل. سئناریو یاییلماقدان قاباق آیت الله سیستانی یه وئریلمه‌ییب و معصوملارین قیافه‌سین گؤرستمگه هئچ ایجازه وئریلمه‌ییب و بوندان باشقا هر نقل قول دوغرو دئییل و باطیلدیر. بو ایستیفتانین اصلی بئله دیر:  | ||
قوجالیق روانشیناسلیغی
یازار : میرزه عبدالصمد ملکی | بؤلوم : اجتماعی
+0 به یه ن
|
|
||
|
قوجالیق اینسانین طبیعی سئیریدیر؛ قوجالارین روحی سیستملری جوانلارلا فرقلیدیر. قوجالار معمولاً حساس و دَیمه‌دوشر اولارلار, چونكی ایستیرلر اؤز یئرلرین حیفظ ائله‌سینلر, بیر حالداكی بعضاً آیریلاری اونون حالین رعایت ائله‌میرلر. قوجالار روانی جهتدن تئز صدمه گؤررلر و معمولاً روح دوشگونلویونه (افسورده‌لیگه) آماده‌دیرلر. اونلارین غوصه‌لی اولماقلاری طبیعی دئییل و جوانلاردان داها چوخ افسورده اولارلار و بو ناراحاتلیق اونلارین یوخولاریندا و ایشتهالاریندا اثر قویار. مثلاً بیر قوجانین دیابتی وار, روحیه‌سینه گؤره چالیشر بیر جورلوكله دؤره‌برین دیقّتین اؤزونه جلب ائلیه و بونا خاطیر داوالارین واختیندا آتمیر تا بیر آز حالی پوزولسون و دؤره‌بر اونا دیقت ائله‌سینلر. قوجالیق, ناخوشلوق ساییلماز آما اولا بیلر روحی لحاظدان بیر پارا موشكوللر یاراتسین كی اوندان موغایات اولماق و پرستارلیق ائله‌مك لازیم اولا. قوجالارین روحیه‌سین تانیماق كؤمك ائلر اونلارلا نئجه دانیشماق ایصلاح اولسون. قوجالارلا مشورت ائله‌مك لازیمدیر و گرك اونلاردان مصلحت و نصیحت ایسته‌نیلسین. بو شراییطده اونلار بؤیوكلوك حیسّ ائلرلر و اؤزلرینه ایناملاری چوخالار و قوجالیقلاریندان كئف ائلرلر. | ||
سوت محصوللاری چوخ یئیین
یازار : میرزه عبدالصمد ملکی | بؤلوم : ساغلاملیق
+0 به یه ن
|
|
||
|
ایفطارلا اوباشدانلیق آراسیندا واختین آزلیغی تأسوفله سبب اولور اوروج توتانلار سوت محصوللاری یئمه‌سینلر و بونا گؤره اوروجلوغون آخیرلرینده آرتیق ضعیفلیگه موبتلا اولسونلار. حیسّ ائله‌سیز كی حوصله‌سیز اولموسوز و یا اوروج توتماق اوچون بدنیزین گوجو قورتولوب, ائله بو گئجه‌دن ایفطاردان اوباشدانلیغا قدر زولبیه بامیه, ساری شیله, حالوا و ساییر شیرین یئمه‌لیلرین یئرینه, یاغسیز و شیرینی آز اولان سوت محصوللاریندان یئیین. ایستی سوت, پنیر, فیرنی و سوتلو آش بدنی تقویت ائله‌مگه یاخشی سئچیمدیلر. پاستوریزه سوتو قایناتمایین ایفطاردا و اوباشدانلیقدا داغ سو, چای و شربت یئرینه ایستی سوت ایچین. پاستوریزه سوتلری قیزیشدیماق اوچون اونلاری قایناتماق لازیم دئییل, بیر آز قیزیشدیرساز گؤرر. سوتو قایناتماق, اونداكی تركیبلری دَییشر و B ویتامینلرین آرادان آپارا و اونداكی كلسیومون جذبینی آزالدار. سوتلو آشین پروتئین ارزیشی چوخدور سوتلو آش یونگول, تئز هضم اولان و فایدالی غذادیر و اوندان علاوه شكری و یاغی یوخدور. اونون ان موهوم خاصیتی اوندا اولان دویو كربوهیدراتلاریدیر كی باغیرساقدا تدریجله هضم اولار و اوروجون آجالماسینا مانع اولار. بیرده دویویه سوت آرتیرماقلا, كؤپ و سوتون هضمیندن یارانان هضم موشكوللری‌ده آزالار. سوتلو آشین ارزیشی, سوتله دویونون قاریشماسینا گؤره چوخ یوخاریدیر. سوتلو آش تازا اوروج توتانلارا و ایستی گونلرده باش گیجللنمه توتانالارا یاخشی سئچیمدیر. بو غذالارین شیرینلیغین آز ائله‌سیز اؤزوزون حقّینده بؤیوك لوطف ائله‌میسیز. | ||
