اوقیانوس تکینده سککیزینجی قاره تاپیلدی
یازار : میرزه عبدالصمد ملکی | بؤلوم : تكنولوژی
+0 به یه ن
اسپوتنیکین وئردیگی خبره گؤره، کبیر اوقیانوسونون درینلیگینده اونون جنوب غربینده، سککیزینجی قارّه کشف اولوندو.
استرالیالی، نیوزلندلی و تازا کالدونیالی محققلر بو کشفی Nature News مجلهسینده منتشر ائلهدیلر.
بو خبره گؤره، تازا تاپیلان قارّهنین مساحتی 5 میلیون کیلومتر مربع تخمین وورولوب. بو قارهنین بؤیوک قسمتی یعنی یوزده 94-و سویون ایچیندهدیر. بو قارهنین ائشیکده اولان بؤلومو تازا کالدونیا، و نیوزلندین شمالی و جنوبی جزیرهلرینه مربوط اولور.
عالملرین تحقیقینه گؤره، نیوزلند اؤلکهسی قدیم سوپر قارهده چاتلاما عمله گلمک تأثیرینده یارانیب. بو دَییشیکلیک یئرین قابیغینی تغییر وئریب و بو قارهنین بؤیوک قیسمینی سویا باتیریب.
محققلر تازا قارّهنی تاپماقلا، دونیا قارهلرینین 7-دن (اروپا، آسیا، آفریقا، استرالیا،جنوب قطبی، شمالی و جنوبی آمریکا) 8 قارهیه آرتیریلماسینی ایستیرلر.
بئلهنچی انسانلارلا مسافرته گئتمهیین
یازار : میرزه عبدالصمد ملکی | بؤلوم : اجتماعی
+0 به یه ن
تعطیل سفرینه گئتمک، ایش یورقونلوغونو چیخارتماغا و ذهنی دورولتماق اوچون لاپ یاخشی ایشلردن ساییلیر. تعطیلیز یاخشی و خوشلوقلا کئچسه، گوندهلیک یاشاییشیزا داها آرتیق انرژی ایله باشلایا بیلرسیز.
مسافرت، دسته جمعی اولاندا لذت و بهرهسی داها دا آرتیق اولار و سیز عایله و یا دوستلاریزین کناریندا یاخشی و لذتلی زمان کئچیردهسیز. ائله بونا گؤره ده همسفرلریزین کی اولدوغو چوخ مهمّدیر.
سفرده سیزین یولداشیز «خوش سفر» بیری اولسا سیزین بو سفریز لذتلی و خوش خاطرهلرله همراه اولاجاق. آما همسفریز مناسب اولماسا سفر نه اینکی خوش اولماز بلکه انسانین بورنوندان گلر.
مسافرته چیخاندا دقّت ائلهیین همسفریز آشاغیداکی نفرلردن اولماسین:
1. همیشه یوبانان انسانلار
بئله انسانلار سؤز وئردیکلری زمان گلمزلر و همیشه ده بو ایش اوچون مختلف بهانهلری اولار. اونلارلا سفره چیخساز واختیندا حاضر اولمازلار و برنامهنی بیر بیرینه وورارلار.
بئله انسانلارلا مسافرت مجبوریتینده اولساز گؤرمک ایستهدیگیز ایشلره، اونلارین داها تئز حاضر اولماسینی ایستهیین.
2. چوخ دانیشان انسانلار
سکوت قیزیلدیر. آما بو سؤز چوخلاری اوچون آنلامسیزدیر. دوزدور مسافرتده دانیشماق لحظهلری لذتلی و خاطرهلی ائلر، آما بعضاً انسان ساکت دایانیب گؤزل منظرهلری سیر ائتمک ایستر.
آما چوخ دانیشان انسانلار بونو آنلامازلار و حتی سیزین مطالعه و یا استراحت زمانی ویرر - ویرر دانیشارلار.
3. اؤزونو بَیَنمیش انسانلار
اؤزونو بَیَنن انسانلار فقط اؤز ایستکلرینه دقت ائلرلر و سیزی، اونلارا قازانان ایشلرین گؤرمهسینه مجبور ائلرلر.
مثلاً نه یئیهسیز، هارا گئدهسیز و نه اویونلار اوینایاسیز و حتی هاردا استراحت ائلهمگیزیده اونلار قرار وئرمک ایسترلر.
4. تنبل و حوصلهسیز انسانلار
دوزدور تعطیلات استراحت و آرامش اوچوندور آما تنبل انسانلار هفتهنین 7 گونونون 24 ساعتینی هئچ ایش گؤرمزلر.
اونلار مسافرتده ده گون اورتایاجان یاتارلار، ناهاردان سونرا یاتارلار البته چوخ شانسلی اولساز آخشام سیزینله بیر ایکی کلمه دانیشماغا غیرت گؤستره بیلرلر.
بئلهلیکله سفریز خاطرهسیز و تجربهسیز باشا چاتار.
5. حددن آرتیق حرکتلی انسانلار
بو انسانلار تنبللیگین ترسهسیدیلر. یعنی تنبللر تفریط ائلهسهلر بونلار دا افراط ائلرلر. اونلار سفریزین خوش آنلارینی کورلایا بیلرلر. مثلاً سحر ساعت 4-ده قالخیب داغا گئتمک ایستهیهجکلر.
دریانین لاپ پیس یئرینده اوزمک ایستهیهجکلر و حتی سفر بویو خطرلی ایشلر گؤرمک ایستهیهجکلر.
گؤزل و خاطرهلی مسافرت آختارساز بئله انسانلا سفره چیخمایین.
6. اؤزلری ایله بوللو چمدان آپاران انسانلار
گؤرورسن بیر هفتهلیک سفر اوچون اوچ عدد بؤیوک چمدان گؤتورورب. بوجور همسفر ال - آیاغا دولاشار و حتی بعضاً اضافه هزینهلره سبب اولار.
بو گونکی گونده، هارا گئدهجگیز و اورانین هاواسینین نئجه اولاجاغی چوخ راحت بللی اولار و نیاز دئییل مبادا گون اوچون هر زاد گؤتورهسیز.
7. عکس سالما دلیسی اولان انسانلار
مسافرته گئتمگی قالارگی خاطرهلرین بیریده عکس سالماقدیر. آما ائله زمانلار اولار کی انسان، دوربینی کنارا آتیب طبیعتدن لذت آپارماق ایستر. بئلهنچی آنلاردا عکس سالما دلیسی همسفریز اولسا، بو آنلاری سیزه زهر ائلر.
8. حددن آرتیق مقیّد و منظم انسانلار
هر ایشی برنامهلی گؤرمک یاخشی اولار آما بعضاً تازا موضوعلار قاباغا گلر کی برنامهنی دَییشمگه ارزشی اولار. اوّلکی برنامهیه مقیّد همسفریز اولسا، تازا و سورپریز لذتلری الیزدن آلار.
9. چوخ افادهلی انسانلار
هئچ هوتئلی بَیَنمزلر. هر هانسی رستورانا گئتسز اورانی کیفیر و مزخرف سایارلار و اؤزلرینی داها یوخاری یئره لایق گؤررلر.
بئله انسانلار اضافه هزینهلری تحمیل ائلهیندن سونرا هله نهایتده ده ناراضی قالارلار.
10. دئیینگن و ناراضی انسانلار
بعضیلری هر زادی بهانه ائلرلر. مثلاً طیاره یاریم ساعت یوبانسا او قدر میزیلدانارلارکی آدامین سفرینی هئچ ائلرلر. بئله انسانلار همیشه بیر شئیدن شکایتچیدیلر و هئچ واخت راضی اولمازلار.
بئله انسانلاری همسفر کیمی سئچمهسز داها راحت سفریز اولار.
لندن شهرداریسی هاوا بولانلیغینی آزالتماق اوچون تازا طرح وئریب
یازار : میرزه عبدالصمد ملکی | بؤلوم : عمومی
+0 به یه ن
ایرنانین وئردیگی خبره گؤره، لندن شهرینین شهرداری صادق خان، ایلده مینلر نفرین هاوا بولاننیغی تأثیرینده اؤلمهسی بارهده هشدار وئرمکله، هاوانی داها آرتیق بولاندیران ماشینلاردان اضافه عوارض آلینماسینا تأکید ائلهدی.
او دئدی: بو ایلین اوکتبر آییندان هاوانی داها آرتیق بولاندیران ماشینلارین اضافه عوارضی آلیناجاق. اونون دئدیگینه گؤره، یورو 4 استانداردی اولمایان ماشینلار کی نوعاً 2006-دن قاباغین محصوللاریدیلار، تازا مالیاتین مصداقلاری اولاجاقلار.
او آرتیردی: لندنین مرکزی منطقهلرینه داخل اولان بو ماشینلاردان 10 پوند آرتیق عوارض آلیناجاق.
انگلیسین «سلطنتی طبیبلر انجمنی»نین وئردیگی گزارشه گؤره، هاوا بولانلیغی ایلده 40 مین نفرین اؤلومونو تئزه سالیر و ایلده 20 میلیارد پوند بو اؤلکه اوچون هزینهسی اولور.
دیجیتال ترندزین وئردیگی خبره گؤره، «ایندی گوگو» شرکتی موبایللار اوچون، سینمایان و هر ضربهیه دواملی اولان مایع شوشه دوزلتمک ایستیر.
ProtectPax شوشهسی، نانو تکنولوژیسی ایله دوزلیر و اولا بیلر موبایل شرکتلریندن علاوه فضانوردی و طیاره شرکتلریده بو شوشهدن استقبال ائلهسینلر.
بو شوشهنین دوزلتمهسینده تیتانیوم دی اوکسیدی اؤزونو ژله فورمونا سالیر و ضریه و سوروتولمه مقابلینده انعطافلی اولاور.
بو شوشهنی دوزلدن شرکت، اونون یاقوت قدر محکم و ایشیق فیلتری اولدوغونو ادعا ائلیر کی بئلهلیکله تصویر داها گؤزل و آیدین اولور.
بو شوشه، نازیک لایهدن عبارتدیر کی اونو ایندیکی موبایل شوشهلرینه یاپیشدیرماقدان 10 دقیقه سونرا استفادهیه حاضر اولور.
ProtectPax شوشهسی موبایل، ساعت و تلوزیون و دیجیتال دوربینلر اوستونده آزمایشدن چیخیب و تئزلیکله 40 دولار قیمتینه بازارا یوللاناجاق.
یوخونو نئجه نظمه سالاق؟
یازار : میرزه عبدالصمد ملکی | بؤلوم : ساغلاملیق
+0 به یه ن
تحقیقلر ملاتونین هورمونونون انسانین یوخو مسألهسینه مستقیم تأثیرلی اولدوغونو گؤستریر. یوخوسوز اولساز، اولا بیلر ملاتونین کمبودی ایله اوزلشمیش اولاسیز.
ملاتونین، بدنین بیولوژیک ریتملرینی تنظیمه سالار و اؤزو، پاراکرین و آندوکرین کیمی آیری هورمونلارین آخدیرماسینی عهدهسینه آلیب. بو هورمون هابئله، بدنده آنتی اکسیداندیر و بدنین زهرینی آلیر.
بعضی یئمهلیلرده بو ماده یوخاری مقداردا وار:
آناناس، موز، ایکی باشلی آرپا، قولانچار (مارچوبه)، قاپیز و کدو توخومو کیمی بعضی میوهلرین و گؤیلرین قوروموش توخوملاری، گیردهکان و پوسته کیمی خوشکهبار، سوغان و زنجفیل، یوخونون نظمه دوشمهسینه سبب اولار.
بونلاردان علاوه راحت یاتماق اوچون، یاتیلان یئرین قارانلیق اولماسی مهم نقش اویناییر. یاتماغا بیر ایکی ساعت قالمیشدا ائوین ایشغینی آزالتماق یاخشی اولار.
یادیزدا اولسون سحر و ناهاردان سونرا گونش معرضینده اولماساز، بدنیزده ملاتونین تولیدی مختل اولار و گون بویو بدنیز سوست و یورقون اولار.
گون بویو فعال و گون قاباغیندا اولماغا چالیشین کی سحرلر داها قیوراق و دینج یوخودان دورا بیلهسیز.
جنّتین لاپ یاخشیلاری کیملردی؟
یازار : میرزه عبدالصمد ملکی | بؤلوم : دین
+0 به یه ن
جنّته یول تاپا بیلنلرین بعضیسینین مخصوص یئری وار.
بیر کیشی خانیمیسینا بئله تاپیشیریر: گئت خانیم فاطمه زهرانین (س) محضرینه سوروش کی من او حضرتین شیعهلریندنم یوخسا یوخ؟
او خانیم، خانیم فاطمه زهرانین (س) محضرینه چاتیب مطلبی سوروشور. خانیم زهرا (س) بویورور: امری ائلهدیگیمزی یئرینه گتیرسن و نهی ائتدیگیمیزدن اوزاق گزسن، بیزیم شیعهمیزسن یوخسا دئییلسن.
او خانیم ائوه قاییدیب خانیم فاطمه زهرانین (س) بویوردوغونو ارینه دئییر. کیشی، جوابی ائشیدندن سونرا ناراحت اولوب قیشقیردی: وای اولسون منه نئجه اولار انسان گناه و خطایا بولانماسین؟ بئلهلیکله من همیشه جهنّمده یاناجاغام.
او خانیم بیر داها خانیم فاطمه زهرانین (س) محضرینه چاتیب ارینین ناراحاتلیغینی و سؤزلرینه او حضرتین محضرینه یئتیردی. حضرت بویوردو: حیات یولداشینا دئ کی؛ دوشوندوغون کیمی دئییل چونکی بیزیم شیعهلریمیز جنّت اهلینین لاپ یاخشیلاریدیلار. آما بیزی و دوستلاریمیزی سئونلر و دوشمنلریمیزله دوشمن اولانلار، عملده گناهکار اولوب امر - نهیلریمیزله مخالفت ائدنلر آما دیلی و اورگی بیزیمله اولانلار دا بیزیم واقعی شیعهمیز اولماسا بئله، جنّت اهلیدیر. منتهی گناهلارینین پاکلاندیغیندان سونرا.
بلی، بئلهلیکله دونیا چتینلیکلری و یا قیامت عذابلاری و یا جهنمین اوّل طبقهسیندهکی کیفرلریله گناهدان پاکلاناندان سونرا، بیزه خاطر جهنمدن قورتولوب بیزیم رحمت کناریمیزدا منزل تاپاجاقلار.
منبع:بحار الانوار، ج ۶۸، ص ۱۵۵