din xadimi دین خادمی

انسان بدنینده هضم سیستمینه عاید اولان “مزنتر” آدلی یئنی ارگان کشف ائدیلیب. 

 خبر آژانسلاری‌نین وئردیگی خبره گؤره، 2012-جی ایلدن ایرلندلی پروفسور کئلوین کوففی‌نین آپاردیغی تحقیقاتلار نتیجه‌سینده معلوم اولوب کی، " مزنتر " آیری-آیری حصه‌‌لردن دئییل، بوتؤو ارگاندان عبارتدیر. بو کشف نتیجه‌سینده انسان بدنینده ارگانلارین سایی 79-ا یوکسلیب.

 ارگان اولاراق اعلان ائدیلن حصه‌‌جیگین ساختاری‌نین تام اولاراق نه‌دن عبارت اولماسی هله ده معیّن‌لشدیریلمه‌ییب. لاکین عالملر بو کشفدن سونرا، علمین انسان ارگانیزمی حقّینده 100 ایللردیر، سهو فکرده اولدوغونو اعتراف ائدیبلر. بو تحقیقن نتیجه‌سی The Lancet Gastroenterology & Hepatology نشریه‌سینده چاپ اولوب.

الف: یئری و ارزشی

اجتماعی رابطه‌لرین گوجلنمه‌سی‌نین اساسلی یول‌لاریندان بیری، پیسلیکلرین مقابلینده یاخشیلیق ائتمکدیر. پیسلیک یاخشیلیغینان جواب وئریلدیگی زمان، شخصین یاتمیش وجدانی آییلار و نفرتلر محبته چئوریلر. انسانلاری ایچ و وجدان محکمه‌سینده محاکمه ائتمک اوچون، فقط باغیشلاماق و یاخشیلیق یولوندان استفاده ائتمک اولار. بئله‌لیکله او، اؤز ایچینده اوتانار و پیس ایشینه گؤره شرمنده اولار.

مؤمن و اجتماعی انسان انتقام اهلی اولماییب، اؤزگه‌نین پیس عملی مقابلینده اونونلا قطع رابطه ائله‌مه‌ییب معاشرتینه ادامه وئرمه‌لیدیر. چونکی اوزاقلیق و رابطه‌سیزلیک داها اوزاقلیغیا و حتی دوشمنلیگه سبب اولا بیلر آما رابطه چوخالدیقجا دوستلوق احتمالی، چوخ مقداردا آرتار. بئله‌لیکله دوستلارین سایی گوندن گونه آرتار.

قرآن کریم بیزلره پیسلیک مقابلینده یاخشیلیق ائله‌مگه دعوت ائلیر. مثلاً فصلت سوره‌سی‌نین 34-جو آیه‌سینده بئله بویورور: وَلاَ تَسْتَوِی الْحَسَنَةُ وَلاَ الْسَّیِّئَةُ ادْفَعْ بِالَّتِی هِیَ أَحْسَنُ فَإِذَا الَّذِی بَیْنَکَ وَبَیْنَهُ عَدَاوَةٌ کَأَنَّهُ وَلِیٌّ حَمِیمٌ؛

البته دونیادا پیسلیک و یاخشیلیق برابر دئییل. پیسلیگی لاپ یاخشی شکلده دفع ائله کی سنینله اونون آراسیندا دوشمنلیک اولان شخص، سنینله دوست و قوهوم کیمی اولسون.

و یا قرآنین رعد سوره‌سی‌نین 22-جی آیه‌سینده مؤمنلرین باره‌سینده بئله بویورور:

وَیَدْرَءُونَ بِالْحَسَنَةِ السَّیِّئَةَ أُولئِکَ لَهُمْ عُقْبَى الدَّارِ؛

پیسلیگی یاخشیلیقلا زایل ائلرلر. باقی دونیانین خوش عاقبتی اونلار اوچوندور.

قرآنین کریم آیری سوره‌ده پیغمبری دوشمنلرینن مدارایا و کئچینمگه چاغیریر. . قرآن مؤمنون سوره‌سی‌نین 96جی آیه‌سینده بئله بویورور:

ادْفَعْ بِالَّتِی هِیَ أَحْسَنُ السَّیِّئَةَ نَحْنُ أَعْلَمُ بِمَا یَصِفُونَ؛

سن اونلارین آزار و اذیتلرینی داها یاخشی رفتارلا دفع ائله، بیز اونلارین دانیشیغی (نین جزاسینی) داها یاخشی بیلیریک.

امام رضا (ع) بو زمینه‌ده لاپ یاخشی اولگولردن ساییلیر. او حضرت بئله بویورور:

بیز اهل بیتین یولو، بیزه پیسلیک ائله‌یَنین مقابلینده یاخشیلیق ائتمکدیر. آند اولسون الله‌ا بو یولدا عاقبت بخیرلیک وار.( حمیری، قرب الاسناد، ص 386؛ کلینی، الکافی، ج 2، ص 488؛ مجلسی، بحارالانوار، ج 90، ص 367؛ بحرانی، تفسیر برهان، ج 1، ص 395.)

ب: نمونه‌لر

پیغمبر (ص) و اماملارین (ع) رفتاریندا بو باره‌ده چوخلو نمونه‌لر وار کی اونلارین نئچه‌سینی مثال اوچون بوردا گتیریریک.

بیرینجی:

قریش، حضرت محمدین (ص) اذیتی اوچون الیندن گلنی اسیرگه‌مه‌دی. او حضرته و اصحابینا یئمک یولونو باغلادی و اونلاری اوشاقلی بؤیوکلو اوچ ایل آج قویدو. اونلاری شکنجه وئرمکدان علاوه اونلاری اؤلدورمگه دا ال ووردو کی نهایتده او حضرت مکده‌دن مدینه‌یه کؤچمگه مجبور قالدی.

دفعه‌لرله مدینه‌یه حمله ائله‌دیلر و او حضرتین عزیزلرینی شهید ائله‌دیلر. عمیسی‌نین جسدینی مُثله ائله‌دیلر. هجرتین سککیزینجی ایلینده مکه شهری، مسلمانلار طرفیندن فتح اولدو و او حضرتین جارچیسی بئله ندا وئردی:

بو گون محبت و عطوفت گونودور، انتقام گونو دئییل !

سونرا هامینی آزاد قویدو و هئچ کسی محاکمه‌یه چکمه‌دی. بوتون قاتل‌لر باغیشلاندی مشرکلرین باشچیسی ابوسفیانین ائوی دارالأمان اولدو و اونا و اوغول‌لارینا او اؤلکه‌نین لاپ ارزشلیسی اولان 300 دوه وئریلدی. (مجلسی، بحارالانوار، ج 21، ص 91.)

ایکینجی:

ابن ملجمین زهرلی قیلینجی‌نین اثرینده حضرت علی (ع) هجرتین 40-جی ایلی‌نین رمضان آیی‌نین 19-جو گونو هوشدان گئتدی. نئچه لحظه سونرا حضرت هوشا گلنده امام حسن (ع) او حضرته بیر قاب سوت گتیردی. حضرت او سوتون بیر آزین ایچیب قالانینی ابن ملجمه وئرمگینی امر بویوردو. سونرا اوغلو امام حسنه (ع) بویوردو: اونون باره‌سینده سیزین بوینوزدا حقّیم وار. اونون یئییب ایچمه‌سین یاخشیلادین. اولدوغو آنا قدر اونونلا مهربان اولون و منیم یئییب ایچدیگیمدن اونا دا وئرین !

امامین سوتون ابن ملجمه آپاراندا او حضرتین سؤزلرینی اونا دئدیلر. ابن ملجم شرمنده‌لیکله سوتو ایچدی. (مجلسی، بحارالانوار، ج 42، ص 289؛ نوری، مستدرک الوسائل، ج 11، ص 79.)

بوتون کاییناتین ال - اله وئریب گونوموزو داغیتماغا مصمم اولدوغو گونلر هر بیریمیزین باشینا گله بیلر. آما حقیقتده بئله بیر شئیین حقیقتی یوخدور. اصلاً دونیانین بئله حمله‌نین تنظیمینه گوجو یوخدور. دونیانین قایدالاری اؤز یوللاریندا دوام ائلیرلر و بو، بیزیک کی بعضاً اونلارین یولو اوستونده دایانیریق. و یا عکسینه بیز ایسته‌مه‌دن بیرینی ناراحت ائدیریک. شاید بیرینه دَیمیشیق و یا بیری‌نین کاغاذلاری‌نین اوستونه سو تؤکموشوک. او دا اؤز الینده اولمایاراق حیرصلنیب.

بئله‌نچی شرایطده انسان اؤزونو کنترل ائتمه‌لی و جوّی اوندان آرتیق آلوولاندیرمامالیدیر. او آنلار اوچون بئش ساده یول وار کی ائلیه بیلک اؤزوموزو کنترل ائدک و جوّه حاکم اولاق.

1. حسّ ائتک، تأیید ائله‌مگه و جواب وئرمگه واخت قویون

مثلاً بیری سیزه توهین ائدن زمان ایلک ایشیز درین نفس چکمک اولسون. هاوانی آغ جیگرلریزه چکین و ائشیگه اؤتورن زمان، توهین ائدن شخصله اؤز آراسینداکی فاصله‌نی حسابلایین. بو فاصله‌نی آرادان آپارین. اؤز حسّلریزی دیله گتیرن زمان اونوندا حسّلرینه دقّتیز اولسون.

2. زهرلی انسانلاردان فاصله‌لی اولون

انسانلارین هامیسی سیزه ضربه وورماق فکرینده دئییل‌لر آما بعضیلری سیزه صدمه وورماقدان لذّت آپارارلار. بیز بو انسانلارین نییه بئله اولماقلاری باره‌ده تحلیل وئرمگه و یا اونلارین مرضینی تشخیص وئرمگه احتیاجیمیز یوخدور. واختیمیزی داها ارزشلی زادلارا صرف ائتمه‌لی‌ییک.

بیری اؤز عمدی و یا غیر عمدی اشتباهلاریندان عذر ایسته‌مه‌سه، بو بیر قیرمیزی پرچم علامتیدیر. و یا بیری سیزین عذروزو قبول ائله‌مه‌سه بو دا قیرمیزی پرچم ساییلیر. بئله فرض ائله‌یین اوشاق اوینونودور و او دردسر یاراتماق ایسته‌ییر. بوتون گوجوزو بئله‌نچی آداملاردان اوزاقلاشماغا صرف ائدین. آما بو شخص مشتری و یا رئیسیز و یا قاچا بیلمه‌دیگیز هر هانسی بیر شخص اولسا اونون یاراتدیغی دردسرلردن لذّت آپارین.

3. مقابل طرفی درک ائدین

اؤزوزو اونون یئرینه قویون. اونون مشکلونو حل ائله‌مگه یول آختارین. باخین گؤرون اونون اورگینی سیندیرمادان سؤزله اونو آراملادا بیلرسیز. بعضاً بالاجا گولومسه‌مه اونو بحراندان قورتارا بیلر.

4. اؤز گوونیزه اعتبار وئرمک اوچون اؤزگه‌نی معیار بیلمه‌یین

اؤز گوونیزی یاخشی درجه‌ده ساخلاماق اوچون دوستلارا و اطرافداکیلارا دایانساز، اونلارین گلیب سیزه ضعیفلتمگه قاپینی آچیق قویوبسوز. سیز قاپی‌نین آچارینی اؤز شادلیق موتوروزا تاپیشیرمالیسیز. اؤز ایچیزده اؤزوزه اعتماد و عشقی یارادا بیلمه‌سز، اطرافداکیلارین هیجان دالغالارینی آلاجاقسیز. اطرافداکیلارین چوخو دا سیزی تماماً تانیمیرلار و احتیاجلاریزین نه اولدغونو کامل بیلمیرلر.

گولون، اؤزوزو سئومک و عاشق اولماق حسّینی اؤزوزده تقویت ائدین کی اطرافین یوللادیغی دالغالار چوخ کیچیک و اهمیتسیز گؤرونسون.

5. اؤزوزدن موغایات اولماغا واخت قویون

پیس بیر حادثه و یا گوندن سونرا روحیه‌زی قایتارماغا اؤزوزه شاد برنامه‌لر نظرده آلین و ایندیکی زمانی درک ائله‌مگه اؤزوزه کؤمک ائدین.

خوشا گلمز سوآل‌لارین بیری‌ده بودور کی بیری سیزدن سوروشا: «ائله بیل بیر آز کؤکلیبسن؟ هن؟» مسلماً هئچ کسین بئله سوآلا جواب وئرمک مجبوریتینده قالماقدان خوشو گلمز و اؤز گوونی آزالار.

بو سوآل ایله اوز به اوز اولماماق اوچون سیزه بیر سئری ایشلر گؤرمگی پیشنهاد ائلیرم:

یئمک هوسلریزی کنترل ائله‌یین

بو ایش نه قدر ده چتین اولسا سیزین ساغلیغیز اوچون لازم بیر ایشدیر. یاخشی اولار هر نه تئزراق بو ایشی گؤره‌سیز.

هامی بیلیر کی سالم غذا برنامه‌سی استرسی آزالدار و روحیه‌نی گوجلندیرر.

کفایت قدر یاتین

تحقیقلر، آز یاتانلارین داها آرتیق روحی مشکل‌لره دوچار اولدوغونو گؤستریر. یوخو انسانین بئینینه ریکاوئری امکانی وئریر و صاباحین ایشلرینه داها گوجلو اولماغا امکان یارادیر. یوخوسوزلوق سیزین ساغلیغیزا ضرر وورار.

تحرکوز اولسون

هئچ اولماسا سحرلر پیاده‌رولیک ائله‌یین. یئریمگیز ائله یئیین‌ اولمالدیری کی نفس - نفس ووراسیز. یوخسا یاواش یئریمگه تحرک دئمک اولماز. ورزش ایله قان جریانی نظمه دوشر و بدنین بوتون هورمونلاری دوز ایشلر.

ساغلیغیزی کنترل ائله‌یین

نئچه مدتدن بیر حتماً آزمایشه گئدین کی ساغلیغیزین یئرینده اولدوغوندان مطمئن اولاسیز. ناخوشلوغون قاباغینی آلماق درماندان چوخ داها راحتدیر.

اجتماعی اولون

اوتانجاق‌دا اولساز جامعه‌دن اوزاق گزمه‌مه‌لیسیز. بحثلرده شرکت ائله‌یین، گولومسه‌یین، غریبه‌لرله دانیشین. دسته جمعی قرارلاشین و گزمگه گئدین. بو ایشلر سیزین اؤز گوونیزی و عزّتیزی آرتیرار.

مشغولیتیز اولسون

اولا یبلر انسان سئودیگی ایشلری گؤرمکله چؤرک قازانا بیلمه‌سین، آما اونلارا دا واخت آییرمالیدیر. بو ایش سیزی روحیه‌لندیرر و وارلیغیزین فایدالی اولدوغونو تأکید ائلر.

گونده‌لیک برنامه‌ز اولسون

گونون اوّل 10 دقیقه‌سینی اؤزوزه برنامه وئرمگه اختصاص وئرین. هر گونوز اوچون برنامه‌ز اولسون.

هر گونوزه بیر هدف تعریفله‌یین. همان گون هدفه چاتماساز دا اشکالی یوخدور.

چنین شیانگ یانگ شهرینده پیاده عابرلره اخطار وئرمک اوچون روبات پولیس دوزلیب.

بو روبات پولیس «هوبی» ایالتین مرکزی اولان شیانگ یانگ شهری‌نین مرکزینده نصب اولوب و قیرمیزی چیراقدان کئچن عابرلری دایاندیریر.

شهر مقاملاری‌نین اومیدی وار بو روباتین سایه‌سینده جماعت قیرمیزی چیراقدان رد اولما عادتلرینی باشدان چیخارتسینلار.

روبات پولیس، الی ایله علامتلر گؤستریر و باشینداکی دوربین ایله خطاکارلارین تصویرینی گؤتورور.