سنّی و شیعه
یازار : میرزه عبدالصمد ملکی | بؤلوم : دین
+0 به یه ن
سنت اهلی ایچینده صوفیگرلیک عرفان و اهل بیته (ع) ارادت محفلی دیر.
شیعه دونیاسی سبّ و لعندن گؤردوکلری ضرری آیری زاددان گؤرمه‌ییب. بیز اهل بیت (ع) مکتبینی برچسبلی و غیر مناسب پاکتله‌مه ایله دنیایا تانیتدیرمیشیق.
شیعه و سنّی‌نین طبیعی اختلافلارنیی کنارا قویماقلا بو گونکی اختلافلارین اساس عاملی سیاست‌بازلیق اولوب و ایندی بیری بو اختلافی آزالتماق ایسته‌سه مباحثه و مذاکره یولی ایله یوخ بلکه سیاست یولی ایله داخل اولمالیدیر.
مهربانچیلیغین اساس عاملی تعامل و گئت-گل‌دیر
روایتلرده گلدیگی کیمی کدورتی و اختلافی آرادان آپارماغین لاپ گؤزل یولو هدیه آلیب وئرمک و صله رحمین آرتماسی و بونلارا اوخشار ایشلردیر.
شیعه و سنی عقیده‌سینده مشترک بیر عقیده ده امام زمان‌دیر (عج). فقط اختلاف بوردادیر کی شیعه‌یه گؤره آخرینجی امام یاشاییر و بیر گون ظهور ائده‌جک آما اهل سنته گؤره او حضرت امام حسنین نواده‌لریندن‌دیر و سونرا دونییا گله‌جک.
ادبسیز اوشاقلارلا نئجه رفتار ائدک؟
یازار : میرزه عبدالصمد ملکی | بؤلوم : اجتماعی
+0 به یه ن
اوشاقلارین قوناقلیق زمانی ادبسیزلیکلری‌نین عمده سببی اونلارا دقّت ائله‌مه‌مکدیر. اونلار آیری زمانلار آتا-آنانین دقّت مرکزی و محبتی آلتیندا اولورلار آما قوناقلیق زمانی دقّتلر اونلارین اوستونده گؤتورولوب قوناغا چؤنور و بو زمان اوشاق همان آلیشدیغی دقّتی تازادان جلب ائله‌مک اوچون بیر سئری هنجارسیز ایشلری گؤرمگه ال وورور.
بیر اوشاق جمع ایچینده یاراشمایان سؤزلر دیله گتیرنده و یا یاراماز ایشلر گؤرنده والدین محبتله اونا یاخینلاشیب اونو تحقیر ائتمه‌دن احتراملا اونون بو ایشی‌نین اشتباه اولدوغونو تذکر وئرمه‌لیدیلر. بئله‌نچی زمانلاردا سویوق قانلی اولماق چوخ مهم مسأله‌دیر. اوشاغین قاباغیندا دایانماق عوضینه اونون دقّتینی ماراقلی اولدوغو مسأله‌لره چکمک لازمدیر. مثلاً اونا بیر کتاب وئرمک، دیوارداکی قفسده اولان قوشون دیلی ایله اونونلا دانیشماق و . .. کیمی ایشلر.
خطرلی وسیله‌لر اوشاغین الی چاتمادیغی یئره قویولمالیدیر کی سونرا اونو اونون الیندن آلماق مجبوریتینده اولمایاسیز. اونا نه قدر «یوخ» ، «دَیمه» ، «ائله‌مه» کیمی سؤزلر آز ایشلتسز بیر او قدر یاخشی اولار. بیر شئیدن دقّتینی داغیتماق ایسته‌سز، دقّتینی اوندان داها جالب بیر شئیه طرف چکین.
اوشاقلاری هئچ واخت آما هئچ واخت جمع ایچینده تحقیر ائتمه‌یین و اشتباهلارینی هامی‌نین ایچینده دانیشمایین. بیر عملی‌نین اشتباه اولدوغونو بیلدیرمک ایسته‌سز، اونو خلوتجه اؤزو ایله دانیشمالیسیز.
بیر ده هر قوناقلیقدان قاباق، قوناقلیقدا نئجه داورانماغین یاخشی و مطلوب اولدوغونو اوشاقلا دانیشین و اوندان قایدالاری رعایت ائله‌مگه سؤز آلین.
حج سازمانی خبر وئردی: حج تمتع اوچون شرایط آماده اولدو
یازار : میرزه عبدالصمد ملکی | بؤلوم : دین
+0 به یه ن
حج و زیارت سازمانی عربستانلا توافقه یئتیشمک و تازا ایلین تمتع حجی اوچون شرایطین حاضر اولدوغوندان خبر وئردی. سازمانین دئدیگینه گؤره تازا ایلده 85 مین نفر بیزیم اؤلکه‌دن حجه مشرف اولاجاقلار.
سازمانین وئردیگی بیانیه‌ده بئله گلیب: اؤلکه‌میزین عزیز و مؤمن جماعتی‌نین خدمتینه یئتیریریک کی بو سازمانین عربستانین مقاملاری ایله دانیشیقلاری نتیجه‌سینده، نظرده اولان انتظاراتین تأمین اولماسی و امنیتلی و عزتلی حجین اجراسی اوچون معظم رهبرلیک مقامی و اؤلکه‌میزین مسئول‌لاری‌‌نین تأکیدی اساسدا، الله‌ین کؤمگی و نظری ایله 1396-جی ایلین حج موسمی اوچون 85 مین نفر هم‌وطنیمیزن مکه‌یه مشرف اولماسی اوچون شرایط یاراندی.
ام‌البنینین (س) اسلام امّتینه وئردیگی درسلر
یازار : میرزه عبدالصمد ملکی | بؤلوم : دین
+0 به یه ن
ام‌البنین هر گون عباسین (ع) اولادی‌نین الیندن یاپیشیب بقیع قبرستانینا گئدیب اؤز قوشدوغو شعرلری اوخویوب دردلی-دردلی آغلاردی. جماعت اونو دؤره‌له‌ییب آغلاشاردیلار.
حضرت ام البنینین (س) وفات تاریخی باره‌ده موثق خبرلر الده اولماسا دا او حضرتین مقامی و منزلتینه خاطر بیر گونو، رسمی تقویمده ضعیف روایتلره اساسلاناراق او حضرتین وفات گونو کیمی قید اولونوب.
امّ الْبَنین، فاطمه بنت حزّام، حضرت علی‌نین (ع) ایکینجی خانیمیسی، آتاسی ابوالمجْل حزّام بن خالد، بنی کلاب قبیله‌سیندن. (طبری، ۵/۱۵۳) آناسی لیلی یا ثمامه، سهیل بن عامر بن مالک‌ین قیزی ایدی. (ابن عنبه، ۳۵۶؛ غفاری،/۱۷۴)
خانیم زهرانین(س) وفاتیندان سونرا حضرت علی (ع) ام‌البنینله ائولنیب بو ائولیلیکدن 4 اوشاق صاحبی اولدولار: عباس، عبدالله، جعفر و عثمان. کی اونلارین دؤردو ده کربلا صحنه‌سینده شهادته چاتدیلار. (ابوالفرج، ۸۲ -۸۴؛ ابن عنبه، ۳۵۶؛ حسّون،/۴۹۶)
آما ام‌البنینین (س) اسلام امّتینه وئردیگی درسلر:
1. ام‌البنین کربلا صحنه‌سینده یوخیدی آما، اسیرلری مدینه شهرینه داخل ائله‌ینده بیر نفر اونون اوغلانلاری‌نین شهادتینی اونا خبر وئرمک ایسته‌دی، آما او ایل سؤزو بو اولدو: « منه حسیندن (ع) خبر وئرین». سونرا اوغلانلاری‌نین امام حسینله (ع) بیرلیکده شهید اولدوغونو ائشیدنده دئدی: «ائی کاش اوغلانلاریم و دونیادا نه وار حسینه (ع) فدا اولایدی آما او دیری قالایدی». (همو، ۴۹۶-۴۹۷؛ محلاتی، ۳/۲۹۳)
2. امام باقر(ع) بویوروب: او حضرت بقیعه گئدیب ائله یانیقلی مرثیه اوخویاردی کی قلبی‌نین قساوتینه رغماً مروان‌دا آغلاردی. (مقاتل الطالبین ص۵۶ و بحارالانوار ج ۴۵ ص ۴۰)
3. ام‌البنین هر گون عباسین (ع) اولادی‌نین الیندن یاپیشیب بقیع قبرستانینا گئدیب اؤز قوشدوغو شعرلری اوخویوب دردلی-دردلی آغلاردی. جماعت اونو دؤره‌له‌ییب آغلاشاردیلار. (ابوالفرج، ۸۵/چاپ قاهره/مصر)
طبیعی آنتی‌بیوتیک؛ ساریمساق شربتی
یازار : میرزه عبدالصمد ملکی | بؤلوم : ساغلاملیق
+0 به یه ن
تانیدیغز مشهور ساریمساقدان، آنتی بیوتیکدن نئچه برابر تأثیرلی شربت دوزلتمک اولار. البته آنتی بیوتیک تمامً حیات و بیوتیک ضدی‌دیر آما ساریمساق شربتی فقط چیرکی قورودار.
تانیدیغز مشهور ساریمساقدان، آنتی بیوتیکدن نئچه برابر تأثیرلی شربت دوزلتمک اولار. البته آنتی بیوتیک تمامً حیات و بیوتیک ضدی‌دیر آما ساریمساق شربتی فقط چیرکی قورودار. بو شربت چین ملّتی طرفیندن ایللر بویو بدنین امنیّت سیستمینی گوجلندیرمک اوچون استفاده اولونوب. بو شربتین دوزلتمه‌سی چوخ ساده‌دیر و ائوده اولان ملزمه ایله دوزلتمک اولار.
ساریمساق شربتی بدنین امنیت سیستمینی گوجلندیرر و قان فشاری و قانین پیس کلسترولونو تنظیمه سالار.
بو شربت سویوق دَیمه و آنفولوآنزانین‌دا قاباغینی آلار.
ساریمساق شربتی‌نین دوزلتمه طرزی:
لازم اولان موادّ:
8 دیلیم سویولوب ازیلمیش ساریمساق
200 میلی لیتر آلما سیرکه‌سی
200 میلی لیتر طبیعی بال
حاضرلانما طرزی:
سویولوب ازیلمیش ساریمساغین ایچینه بال و سیرکه‌نی آرتیرین و 10-15 دقیقه میکسِرله چالین.
سونرا اونو آغزی باغلی شوشه قابدا 5 گون بویو یخچالدا ساخلایین.
ماده لرین یاخشی ترکیبی اوچون اونو گونده بیر دفعه چالخالایین.
5 گوندن سونرا بو شربت ایچمگه حاضردیر.
نئجه مصرف ائدک؟
سحرلر نشتاب ایکی چای قاشیغی قدر شربتدن بیر لیوان سودا حل ائله‌ییب میل بویورون. شربتین توند دادی اولدوغونا گؤره اونو بیر قورتومدا ایچمه‌یین.
بو شربتی منظم ایچسز چوخلو عفونتلرین قاباغینی آلمیش اولارسیز.