Gmail ده بعضی دگیشیكلیكلر اولاجاق
یازار : میرزه عبدالصمد ملکی | بؤلوم : تكنولوژی
+0 به یه ن
Gmail ده بعضی دگیشیكلیكلر اولاجاق
گوگل الكترون پوستی راحاتلاتماق اوچون تازا دگیشیكلیكلر ائتمگی بیلدیریب. ایندیلیكده Gmailسرویسینده ایمیل یوللاماق اوچون Composeدویمه‌سینی باسماقلا مكتوب یازماغا كیچیك بیر صفحه آچیلیر. بوندان اوّل ایمیل گؤندرمگه تازا بیر صفحه‌یه گئتمك لازیم اولوردو و ایندیكی حالت قاباقكیندان داها آز واخت آپاریر.
آما گوگلین اعلامینا گؤره تازا دگیشیكلیكلرله ایندیكی حالتی دگیشیب الكترون پوستدان ایستیفاده ائله‌مگی داها دا راحاتلاداجاق.
میوه‌لری شیشه چكمه‌یین !
یازار : میرزه عبدالصمد ملکی | بؤلوم : ساغلاملیق
+0 به یه ن
میوه‌لری شیشه چكمه‌یین !
میوه یئمگین لاپ گؤزل فورمو اونلاری تازا-تازا یئمكدیر. سیز، قوناقلار گلمه‌دن میوه‌لری سویاندا اونلارین باتما احتیمالینی چوخالدیرسیز. اوزون سؤزون قیساسی میوه‌ده هر جور دخالت ائله‌مك خاریجی میكروبلارین اونا بولانماسی‌نین احتیمالینی چوخالدار.
میوه‌نین باتماسیندان علاوه غذایی دَیَری‌نین آزالماسی‌دا مطرحدیر. مثلاً Cویتامینی میوه‌لرده بول اولان ویتامیندیر. بو ویتامین؛ ایشیق، حرارت و اوكسیداسیون قاباغیندا درحال آرادان گئدر. دئمك اولار سیز قوناغین میوه‌سینی سویاندا اونا لوطف ائتمیش اولمورسوز بلكه میوه‌سی‌نین ویتامینلرینی آرادان آپاریرسیز و اونو ناخوشلوق معرضینده قویورسوز.
یاخشیسی بودور میوه‌لری تازا و سویولمامیش قوناق قاباغینا قویولا كی هر كس اؤز سلیقه‌سی ایله سئودیگی میوه‌نی یئیه.
اوشاقلارین سالدیرقانلیغینی آغیز سویونون آنالیزی ایله تشخیص وئرمك
یازار : میرزه عبدالصمد ملکی | بؤلوم : تكنولوژی
+0 به یه ن
اوشاقلارین سالدیرقانلیغینی آغیز سویونون آنالیزی ایله تشخیص وئرمك
آغیز سویونون آنالیزی اوغلان اوشاقلاری‌نین سالدیرقان اولوب اولمادیقلارینی تشخیص وئرمگه كؤمك ائلیه بیلر. «سینسیناتی» مریض‌خاناسی‌نین طیبّی آراشدیرمالار موركزی‌نین موطالیعه‌لرینه گؤره آغیز سویونداكی هورمونلارین غیلظتی ایله اوشاقلارین سالدیرقانلیغی‌نین آراسیندا رابیطه وار.
موحقیقلر 7 - 9 یاشلاریندا اولان اون یئددی اوشاغین آغیز سویوندان نمونه گؤتوروبلر. بو اوشاقلارین روحی موراقیبتلره احتیاجلاری اولدوقلاری مریض‌خانا طرفیندن تأیید اولموشدو.
بو نمونه‌لری اوچ؛ تستوسترون، دهیرواپیاندروسترون و كورتیزول هورمونلاری سطحینده آنالیز اولوندو.
موحقیقلر گؤردولر اوشاقلارین سالدیرقانلیغی‌نین حدّی بو هورمونلارین اندازه‌سی ایله رابیطه‌لیدیر. اونلار سالیم و ناخوش اولمایان اوشاقلارین آغیز سولارین‌دا آنالیز ائله‌دیلر. اله گلن نتیجه بو مسأله‌نی تأیید ائله‌دی.
بو موحقیقلر اینانیرلار آغیز سویونون واختیندا و دقیق آنالیزی‌نین آیری فایدالاری‌دا اولا بیلر. اونلارین نظرینه، آغیز سویونون هورمونلارینی آنالیز ائله‌مك ناخوشلارین درمانی اوچون طبیبلره كؤمك ائلیه بیلر.
افلاطونون اخلاق نظریه‌سی؛ سعادت آختاریشیندا
یازار : میرزه عبدالصمد ملکی | بؤلوم : دین
+0 به یه ن
افلاطونون اخلاق نظریه‌سی؛ سعادت آختاریشیندا
افلاطونون اخلاق نظریه‌سی سعادت آختاریشینا دایانیر. اینسانین حقیقی سعادتینی داشییان خئیره هیدایت اولوب. افلاطونا گؤره اخلاق سیاست شاخه‌لریندن ساییلیر. او ایجتیماعی عدالتده آختاریشدان سونرا اخلاقین ایكینجی تعبیری، شخصی عدالته دیقّت یئتیریب. افلاطونا گؤره دَیَر اوچ زاددان آرتیق دئییل:
1. گؤزللیك 2. عدالت 3. حقیقت
بونلارین اوچونون‌ده بیرلشدیرنی خئیر و یاخشیلیق اولوب بو اوچ معنا خئیرین آچیقلانمیش معناسیدیر.
افلاطون بعضآ اخلاقی «گؤزللیك» مقوله‌سیندن بیلیر و بعضاً «عدالت» مقوله‌سیندن ساییر.
«اخلاق گؤزللیك مقوله‌سیندندیر» دئیَنده منظورو گول كیمی حیسّی گؤزللیكلر دئییل بلكه منظورو گؤزل روحدان آسیلی اولان اینسان عملی‌نین گؤزللیگیدیر.
اینسان داخیله باخاندا ایشلری ایكی یئره بؤلور: گؤزل و چیركین، یاخشی و پیس. بو تقسیمده‌ده شكّ ائله‌مه‌ییب یاخشیله پیسی سئچمكده دلیله احتیاجی دویمور.
بو نظریه ایسلامی موتكلّیملرین مطرح ائله‌دیكلری «ذاتی حوسن و قوبح»دیر. بو سؤزده گؤزللیگین مركزی اینسان رفتاریدیر. آما افلاطون اونو اخلاق محوری بیلدیگی گؤزللیك روحدادیر. دئمك اولار روحون گؤزللیگی بوتون استعدادلاردان لازیم اولان حدّده ایستیفاده ائله‌مكده‌دیر. حیاتین نوختاسینی غریزه‌لرین بیرینه تاپیشیرماماق لازیمدیر. چونكی اینساندا شهویّه، غضبیّه، حب ذات، مقام و مال سئوگیسی وار. بو غریزه‌لرین آراسیندا تعادول یاراتماقلا روحا گؤزللیك وئرمك لازیمدیر. نتیجه‌ده بیر سری فضاییله چاتماق و رذاییلدن اوزاق اولماق.
بو نوع گؤزللیگی عدالتده آدلاندیرماق اولار، اونو داخیلی غریزه‌لرین تعادولو كیمی تفسیر ائتمك شرطیله، نه اینكی برابرلیك و حقّی حق صاحیبینه وئرمك معناسیندا.
افلاطون فضاییلی كسب ائله‌مكده معریفتین رولونا تأكید ائله‌مكله، اخلاقی معریفتی «موثول» واسیطه‌سیله تؤره‌نن ایشیق شوعاسی كیمی بیلیردی كی بوتون محدود خئیرلرین منبعی ساییلیر.
«خئیر میثالی»نی تانیماق بیزی خئیرین جورئیّاتی باره‌ده قضاوته ایمكان وئره‌جك. اونون باخیشیندا «شرّ» جهالت نتیجه‌سیدیر و ائله بونا گؤره اعتیقادی واریدی اینسانلاری ایكی موضوعدا تعلیم وئرمك لازیمدیر؛ بیر طرفدن فاضیله ایشلری اؤیرنه‌لر و آیری طرفدن عقل و ذهنلرینی فلسفه و ریاضیّاتلا تربیت ائده‌لر. طلب اولان معاریفی اؤیرنه بیلمه‌ین اینسانلار دا حیكمت اهلیندن تقلید ائتمه‌لیدیلر.
افلاطونون نظرینه اینسانین اوچ قوّه‌سی وار و هر بیریله موتناسیب بیر فضیلت وار:
1. شهوانی قوّه كی اونون فضیلتی اعتیدال‌دیر. 2. روحانی قوّه كی اونون فضیلتی شوجاعتدیر. 3. عقلانی قوّه كی اونون فضیلتی حیكمتدیر.
افلاطون روحون اوچ بؤلومونو «فاضیله شهر»ین اوچ بؤلومونه تای بیلیردی. اونون نظرینجه بو اوچ فضیلت بیر سیستمین جوزءلری ساییلیر و بو سیستمده هر بیری‌نین اؤز ایشی وار.
شوجاعت، موقاویمت و روحون مطلوب وضعیّتینده اولماسینی عؤهده‌سینه آلیب، اینسانی غیر معقول قورخولارا جومماقدان ساخلار. اعتیدال، شهوانی قوّه‌لری تنظیمه سالیب محدودلاشدیریر. حیكمت، روحون عقلانی بؤلومونه موناسیب معریفت وئریب روحون آیری ایكی بؤلومون واسیطه‌سی ایله حیمایت اولار.
افلاطون، فضاییلی بیر-بیرندن آیری بیلمكله برابر سقراط كیمی اونلارین بیرلیگینه‌ده اینانیردی. «حیكمت» فضیلتیندن آسیلی اولان خئیره معریفت تاپماق، تكجه اؤ بیری ایكی بؤلومو ایطاعته مجبور ائلیه بیلن شخصه ایمكانلیدیر. بئله‌لیكله فضیلتلر ماهیّتاً آیری اولسالار دا بیر شخصده یا هامیسی وار و یا هئچ بیری یوخدور.
افلاطونون بو نظریه‌سینده اولان موثبت نظریه و موسلمان عالیملری‌نین هامیسی‌نین قبول ائله‌دیگی نوقطه، اعتیدال مسأله‌سیدیر.
والدینین و اوشاقلارین دونیا گؤروشو
یازار : میرزه عبدالصمد ملکی | بؤلوم : دین
+0 به یه ن
والدینین و اوشاقلارین دونیا گؤروشو
ایسلام، اوشاقلارین هر یاشینا موناسیب دقیق تربیت برنامه‌سی وئریر. اوشاغین شخصیّتینده اثر قویان عامیللرین بیری اونون والدینی‌نین حیاتا اولان باخیشلاریدیر. آتا آنا صاحیب اولدوقلاری دونیا گؤروشو اساسیندا اوشاقلارلا داورانیرلار. ایسلام چالیشیب آتا آنانین دونیا گؤروشونو هیدایت ائدیب اونلاری دوزگون مسیرده یئرلشدیرسین. ایسلامین آتا آنایا واجیب بیلدیگی بیر مقام اونلارین اوشاقلارین بیر پارا حقلره صاحیب اولماقلارینی بیلمكلریدیر. بعضی ریوایتلره اساساً آتا آنا اوشاقلارین حقلری قارشیسیندا تسلیم اولمالیدیرلار. پیغمبر اكرم (ص) بویورور: « آتانین حقلرینی رعایت ائله‌مك اوشاغا واجیب اولدوغو كیمی، آتایا اوشاغی‌نین حقلرینی رعایت ائله‌مك واجیبدیر». بونا گؤره آتا آنا اوشاقلارلا سئودیكلری هر رفتاری ائده بیلمزلر.
آیری طرفدن ایسلام اوشاغین موختلیف یاشلاردا تربیتی اوچون دقیق برنامه‌سی وار. ایسلاما گؤره اوشاغین تربیتی عیبادت ساییلیر. هر كیم اوشاغین وضعیّتینی یاخشیلاشدیرماق اوچون كیچیك بیر ایش گؤرسه‌ده اَن بؤیوك معنوی اجرلر اونو گؤزلور.
والدینین تربیتی باخیشلاری ائله اولمالیدیر كی اوشاغا ایمانی تربیت وئره. اوشاقلارین یاشلارینا موناسیب ایسلامی رفتارلاری اونلارا اؤیرتمه‌لیدیر. اوندا اینسان سئوَرلیگی، ایمان، صداقت، اؤزونه اینانماق، عیبادته علاقه، اوروج نامازا علاقه و آللاها سئوگینی آرتیرمالیدیلار. بو ایشلر اوشاغی بوتون اینحیرافلار موقابیلینده بیمه ائلر.