din xadimi دین خادمی

سودا اوزن ماشین

ژاپن شركتی سودا اوزه بیلن یونگول برقی ماشین دوزلدیب.

سئل، طوفان، سونامی كیمی طبیعی بلالار زمانی معمولی ماشینلار ایشدن دوشور و انسانلارین جانین قورتارماغا فقط هلكوپتر و  كیچیك قاییقدن استفاده ائله‌مك ممكن اولور.

ژاپنلی‌لار بو موقعیّتلرده استفاده اولونا بیلن 460 كیلو گرم آغیرلیغیندا ماشین دوزلدیبلر. اونلار بو محصولو بازارا وئرمك نیّتینده‌دیلر.

بین المللی گزارشلره گؤره دنیانین باشا باشیندا چوخ یئرلر یاغینتیلارین چوخالماسی ایله اوز- اوزه قالاجاقلار.

Concept One آدلانان بو ماشینین بؤیوك مقیاسدا بلالاردا نئجه ایشله‌مه‌سی هله بللی دئییل.

بو ماشینین دوزلتمه ایده‌سی ژاپندا باش وئرمیش 2011-جی ایلی‌نین سونامیسیندن سونرا Fommشركتین مدیری «هیدو تسوروماكی»نین ذهنینه گلدی.

Concept One ماشینی آیری برقی ماشینلار كیمی، باطریسی‌نین دولدورماسی اوچون شارژ مركزلرینه احتیاجی وار و اضطراری وقتلرده ده بئله یئرلرین خدمت وئرمه‌سی امكانسیز اولار.

شركت، بو ماشینین شارژدان سونرا نه قدر سویون اوزونده قالما گوجونون اولماسینی هله دئمه‌ییب.

مذهب اختلافی سالماق و افراط، ملّی بیرلیگی داغیدار

حضرت آیت الله خامنه‌ای دولتلرین جماعتین دینی و مذهبی ایله رابطه قورماغی اونلارین موفقیت سببی بیلیب آرتیردیلار: بعضی افراطچی مذهبی جریانلارا اسلام مذهبلری آراسیندا اختلاف سالماغا امكان وئرمه‌مك لازمدیر.

معظم رهبرلیك مقامی‌نین سایتی‌نین وئردیگی خبره گؤره، اسلام انقلابین معظم رهبری حضرت آیت الله خامنه ای چهارشنبه گونو آذربایجانین رئیس جمهوری جناب الهام علی‌یئوله گؤروشده، ایكی اؤلكه‌نین قونشولوق و مذهبی، تاریخی و فرهنگی بیرلیكلرینی ایكی دولتین مناسبتلرینی تقویت ائله‌مگه تأثیرلی عامل ساییب و تأكید ائله‌دیلر: توافقلرین دالیسینی توتماق و سیاسی اراده ‌ایله بدخواهلارا فائق گلمكله ایكی دولت و ملّتین رابطه‌لرینی گوندن گونه محكملندیرمك اولار.

حضرت آیت الله خامنه ای جماعتین مذهبی اعتقادلاری ایله رابطه قورماغی دولتلرین موفقیتینه سبب اولماسینا تضمین كیمی بیلیب آرتیردیلار: بعضی افراطچی مذهبی جریانلارا اسلام مذهبلری آراسیندا اختلاف سالماغا امكان وئرمه‌مك لازمدیر.

او، مشترك اقتصادی كمسیونون تشكیلی باره‌ده ایران و آذربایجان رئیس جمهورلاری آراسیندا اولان توافقلری مطلوب ایش بیلیب دئدی: ایكی طرفین ظرفیتلری و امكانلاری ایله مقایسه‌ده ایكی اؤلكه آراسینداكی ایندیكی رابطه‌لر چوخ آزدیر و بو سفرین اقتصادی و بؤلگه‌سل رابطه‌لرین چوخالماسینا مقدمه اولماسینا اومیدیمیز وار.

حضرت زهرانین (س) سیره‌سینده عبادت و عبودیّت

هر مسلمان انسانین وظیفه‌لریدن بیری الله ایله رابطه قورماقدیر و اسلامدا بو ایشه عبادت دئییلیر. انسانین یارانما فلسفه‌سی‌ده عبادت و الله ایله هر طرفلی رابطه باغلاماقدیر. الله تعالا قرآنین كریمین الذاریات سوره‌سی‌نین 56-جی آیه‌سینده بو باره بویورور: «وَمَا خَلَقْتُ الْجِنَّ وَالْإِنسَ إِلَّا لِیَعْبُدُونِ، جن و انسی فقط منی عبادت ائله‌مكدن اؤترو یاراتدیم».

اسلامدا عبادتین مختلف اقسامی وار كی نماز كیمی بدن عبادتی، خمس كیمی مالی عبادت و حج و جهاد كیمی مال و بدن عبادتینه شامل اولور.

عبادتین خاص معناسی خالص و ایلاهی نیّت ایله اولان عمل‌لردیر. آما عبادتین عام معناسی، ظاهری عبادی اولمایان عمل‌لردیلر كی اونلاردا انسانی الله‌ـا یاخینلاتماق گوجو وار و عبادی عمل‌لره تبدیل اولا بیلرلر. تجارت، مطالعه و ایشله‌مك كیمی عمل‌لر كیمی گونده‌لیك گؤردویوموز ایشلر. آیری سؤزله عبادتی ایكی یئره بؤلمك اولار: واجب اولان عبادتلر، مستحب اولان عبادتلر.

حضرت فاطمه زهرانین (س) عابده، راكعه، ساجده، صوامه و قوامه كیمی مبارك لقبلری وار. او حضرت نه اینكی اؤزو عبادت اهلی ایدی بلكه عابدلرین الگوسی ساییلیر. بونا گؤره او حضرتین عبادی سیره‌سینی آراشدیرماق و عبادت قسملرینی او حضرتین عبادتلری ایله تطبیق ائله‌مك لازم ایشلردن ساییلیر.

حضرت زهرانین (س) ائوینده عبادت اوچون بیر محراب واریدی كی بو ایش اسلامی روایتلرده اونا تأكید اولموش دَیرلی و مستحب بیر عمل ساییلیر.

او حضرتین یاشاییشیندا وقت شناسلیق مخصوصاً عبادت باره‌سینده وقت شناسلیق چوخ جدّی صورتده رعایت اولونوردو. بو زمینه‌ده او حضرتین سحر تئزدن آییلماسی، جمعه‌نین آخشام ساعتلریندن عبادت اوچون استفاده ائتمه‌سی، گون باتان زمانلاردا عبادت و مناجات ائله‌مگی دقتّه لایق مقاملاردان ساییلیر.

او حضرتین عبادتلری همیشه حضور و معنویّت ایله دولو اولوردو. بو كیفیّتین كناریندا او حضرتین عبادتلری كمیّت باخیمیندان‌دا چوخ اولاردی. قرآن كریمین مزمل سوره‌سی‌نین 20- جی آیه‌سینده بئله گلیب: « إِنَّ رَبَّكَ یَعْلَمُ أَنَّكَ تَقُومُ أَدْنَى مِن ثُلُثَیِ اللَّیْلِ وَنِصْفَهُ وَثُلُثَهُ وَطَائِفَةٌ مِّنَ الَّذِینَ مَعَكَ وَاللَّهُ یُقَدِّرُ اللَّیْلَ وَالنَّهَارَ عَلِمَ أَن لَّن تُحْصُوهُ فَتَابَ عَلَیْكُمْ فَاقْرَؤُوا مَا تَیَسَّرَ مِنَ الْقُرْآنِ عَلِمَ أَن سَیَكُونُ مِنكُم مَّرْضَى وَآخَرُونَ یَضْرِبُونَ فِی الْأَرْضِ یَبْتَغُونَ مِن فَضْلِ اللَّهِ وَآخَرُونَ یُقَاتِلُونَ فِی سَبِیلِ اللَّهِ فَاقْرَؤُوا مَا تَیَسَّرَ مِنْهُ وَأَقِیمُوا الصَّلَاةَ وَآتُوا الزَّكَاةَ وَأَقْرِضُوا اللَّهَ قَرْضًا حَسَنًا وَمَا تُقَدِّمُوا لِأَنفُسِكُم مِّنْ خَیْرٍ تَجِدُوهُ عِندَ اللَّهِ هُوَ خَیْرًا وَأَعْظَمَ أَجْرًا وَاسْتَغْفِرُوا اللَّهَ إِنَّ اللَّهَ غَفُورٌ رَّحِیمٌ، حقیقتاً الله تعالی بیلیر كی سن و سن ایله اولانلار گئجه‌نین اوچدن بیرینه یاخین و یا یاریسینی و یا اوچدن بیرینی [نمازا] قالخیرلار. و گئجه- گوندوزو اؤلچن فقط الله‌دیر. [او] بیلیر كی [سیز] اونون حسابینی ابداً ساخلایا بیلمزسیز‌. اونا گؤره سیزی باغیشلار. [ایندی] امكانیزدا اولان قدر قرآندان اوخویون. [الله] تئزلیكله آرازدا ناخوشلارین اولدغونو بیلیر و آیری [بیر تعداد دا] یئر اوزونده سفر ائدیب الله روزیسی‌نین دالیسینجادیلار. و [بیر عدّه‌ده] الله یولوندا جهاد ائلیرلر. پس هر نه امكانیزدا اولورسا [قرآندان] اوخویون و نماز قیلیب زكات وئرین و الله‌ـا حسنه بورج وئرین و بوتون یاخشی ایشلری، اؤزوز اوچون قاباقجادان یوللایین. اونو الله یانیندا و داها آرتیق اجرله تاپاجاقسیز. و الله‌دان باغیشلانماق ایسته‌یین كی الله مهربان باغیشلایاندیر».

ایراندا قمری تاریخی‌نین گونش تاریخینه تبدیل اولونماسی

تقویمین قمری ایلیندن گونش ایلینه دَییشمگی ایله عینی زماندا آیلارین آدلاری‌دا دَییشدی. قدیم دؤرلردن او گونه‌جن اؤلكه‌میزین تقویمینده ایلین اون ایكی آیی؛ «حمل،‌ ثور، جوزا، سرطان، اسد، سنبله، میزان، عقرب، جدی» آدلانسا دا او گوندن سونرا بو آدلار؛ فروردین، اردیبهشت، خرداد،‌ تیر، مرداد، شهریور، مهر، آبان،‌ آذر، دی، بهمن، اسفند آدلاری ایله عوض اولوندو.

بو طرحی او گونون ملی مجلیسینه ارائه‌ ائدن، طهران وكیلی میرزا عبدالحسین خان وحیدالملك ایدی.

وحید الملك اؤز طرحینده یازیب:

دولت اداره‌لری محاسبه‌لری بورجلار اساسیندا (اویغور تاریخی اساسیندا) اولدوغو و دولتین بوتون رسمی ایشله‌ینلری‌ده معامله‌لرینی و حقوقلارینی‌دا همان نسق ایله جاری ائله‌دیكلری و غیر رسمی اداره‌لر و عموم جماعتین قمری آیلاردان استفاده ائتمكلرینه گؤره، چوخلو اختلافلار یارانیر و دولت ایشله‌ینلری‌نین ضررینه قورتولور. بو اختلافین آرادان گئتمه‌سینه گؤره آشاغیداكی طرحی، قانونی طرح یولو ایله مقدس مجلسه تكلیف ائدیرم:

1. ایللیك معامله‌لرده هر ایلین باشلانیشی حمل بورجوندان حسابلاناجاق.

2. بوتون آیلیق معامله‌لر بورجلار اساسیندا حسابلاناجاق.

توضیح: معامله‌لردن منظور اجاره، استجاره، اجرت، فحله‌لرین مزدی، ایشله‌ینلر، تجاری خدمتلر، صرافیلر و سایر كیمی اونلاردا مبلغ قید اولان قراردادلاردیر.

3. بیرینجی و ایكینجی مادّه‌لر 1328-جی ایلین حمل آیی‌نین اوّلیندن بوتون «ایران محروسه مملكتلری»نده اجرا اولوناجاق».

مجلس بو طرحه بئله جواب وئردی:

ملی شورا مجلسی/1328-جی ایلین صفر آیی‌نین 12-سی. مبتكرات اداره‌سیندن مجلس ریاستی اداره‌سینه،مبتكرات كمسیونونون آقای وحیدالملكون طرحینه گؤره راپورتو، مبتكرات كمیته‌سی‌نین 1328-جی ایلی‌نین بئشینده‌كی صورت جلسه‌سینه موافق اولاراق.

جناب وحیدالملكون، بوتون عمومی مشترك مبادله‌لر و معامله‌لرین تاریخ ثبتی و قمری تاریخیندن شمسی و بورجی تاریخینه دَییشمه‌سینه گؤره طرحی مذاكره اولوندو. او طرح اساساً دقّته لایق طرح اولسا دا عموم جماعتین آراسیندا جریان تاپماسی اوچون، عجالتاً بیر سئری اشكال‌لارلا اوزلشه‌جك. بونا گؤره كمسیون درین ملاحظه‌لره اساساً بو طرحین اجراسی اوچون اظهار عقیده‌سینی مسكوت قویور و اونون عمومی اجراسینی آیری بیر زمانا موكول ائلیر. آما بوتون دولتی دایره‌لرده اجرا اولونماسینی لازم بیلیر. –لسان الحكما».

حضرت علی علیه السلامین حكمتلی سؤزلری 10-6

6

وَ قَالَ عَلَیْهِ السَّلَامُ مَنْ رَضِیَ عَنْ نَفْسِهِ كَثُرَ السَّاخِطُ عَلَیْهِ وَ الصَّدَقَةُ دَوَاءٌ مُنْجِحٌ وَ أَعْمَالُ الْعِبَادِ فِی عَاجِلِهِمْ نُصْبُ أَعْیُنِهِمْ فِی آَجِلِهِمْ

امام علی (علیه السلام) (اؤزوندن راضیلیغین مذمّتی، یوخسوللارا صدقه‌‌ وئرمك و بخشش ائتمگین فایدالاری و هر كسین اؤز عملی‌نین ثواب و جزاسینا چاتاجاغی باره‌سینده) بویورموشدور:

اؤزوندن راضی كیمسه‌یه غضب ائدن چوخ اولار. (چونكی اؤزوندن راضی اولان كیمسه جماعتی خوار سایار و بونا گؤره ده هامی اونا غضب ائدر.) صدقه‌‌ خیرلی و شفا وئریجی درماندیر.

بنده‌لرین دنیاداكی عمل‌لری آخرتده گؤزلری اؤنونده اولاجاق.

7

وَ قَالَ علیه السلام اعْجَبُوا لِهَذَا الْإِنْسَانِ یَنْظُرُ بِشَحْمٍ وَ یَتَكَلَّمُ بِلَحْمٍ وَ یَسْمَعُ بِعَظْمٍ وَ یَتَنَفَّسُ مِنْ خَرْمٍ

امام علی (علیه السلام) (انسانین یارادیلیشی‌نین حیرت آمیزلیگی باره‌سینده) بویورموشدور:

بو انسانا (اونون یارادیلیشینا) حیرتله‌نین (اونون خلقتی باره‌سینده دوشونون كی، اونو یارادانین قدرت و باجاریغینی درك ائده‌سیز. یارادان اونو ائله یارادیب) كی، پیی ایله (گؤز ایله) گؤرور، اتله (دیل ایله) دانیشیر، سوموكله (قولاق ایله) ائشیدیر و دلیكدن (بوروندان) نفس آلیر!!

8

وَ قَالَ علیه السلام إِذَا أَقْبَلَتِ الدُّنْیَا عَلَى قَوْمٍ أَعَارَتْهم مَحَاسِنَ غَیْرِهم وَ إِذَا أَدْبَرَتْ عَنْهم سَلَبَتْهم مَحَاسِنَ أَنْفُسِهِمْ

امام علی (علیه السلام) (دنیانین مذمّتینده) بویورموشدور:

دنیا بیر دسته‌یه اوز توتان زمان باشقالاری‌نین یاخشیلیقلارینی موقّتی اولاراق اونلارا (نسبت) وئرر. اونلارا آرخا چئویرنده ایسه اونلارین اؤز یاخشیلیقلارینی دا آلار. (بیری امكانلی اولاندا و بیر مقاما چاتاندا دنیاپرستلر اونون اوچون یاخشیلیقلار اویدورارلار. یوخسول و امكانسیز اولاندا ایسه اونون اؤز كامل‌لیكلرینی ده یاددان چیخارارلار.)

9

وَ قَالَ علیه السلام خَالِطُوا النَّاسَ مُخَالَطَةً إِنْ مُتُّمْ مَعَهَا بَكَوْا عَلَیْكُمْ وَ إِنْ عِشْتُمْ حَنُّوا إِلَیْكُمْ

امام علی (علیه السلام) (جماعتله مهربان داورانماغین فایداسی باره‌سینده) بویورموشدور:

انسانلارلا ائله قایناییب-قاریشین و رفتار ائدین كی، اگر همین حالدا اؤلسه‌نیز (اونلاردان آیریلدیغیز اوچون) سیزه آغلاسینلار و اگر ساغ قالسانیز سیزینله انسیّتده اولماغا جان آتسینلار.

10

وَ قَالَ علیه السلام إِذَا قَدَرْتَ عَلَى عَدُوِّكَ فَاجْعَلِ الْعَفْوَ عَنْهُ شُكْراً لِلْقُدْرَةِ عَلَیْهِ

امام علی (علیه السلام) (دوشمنی باغیشلایاراق اونون گناهلاریندان كئچمك باره‌سینده) بویورموشدور:

دوشمنینی اله كئچیرن زمان اونو باغیشلایاراق گناهیندان كئچمگی اوندان اوستونلوك قدرتی‌نین (بو نعمتین) شكرو ائت.

نهج البلاغه توركجه (قیسا سؤزلر)