مغناطیس میدانی ایله سرطان موعالیجه اولور
یازار : میرزه عبدالصمد ملکی | بؤلوم : ساغلاملیق
+0 به یه ن
 |
||
|
«جنوبی كؤره» آراشدیرماچیلاری بیلدیلر كی مغناطیس میدانی باعیث اولور سرطان تومورلاری اؤزلرینی محو ائله‌سینلر و بئله‌لیكله اینسانین سرطان علیهینه گوجلو سیلاحی اولسون. جنوبی كؤره عالیملری بیر یول تاپیبلار كی مغناطیس میدانیندان سلول‌لاری هدف توتماق اوچون ایستیفاده ائدیرلر و نتیجه‌ده بو سلول‌لار اؤزلرینی آرادان آپارسینلار. بو آراشدیرماچیلار گؤرسدیبلر كی بو پروسه باغیرساق سرطانی باره‌ده اثرلیدیر. اونلارین قصدی وار بو یولی آیری سرطانلارین اوستونده‌ده سینایالار. مخصوص سیقنالین جوابیندا محو اولماغا محكوم اولموش سلول ییغیشیر و تیكه- تیكه اولور. آما سرطانلی موریدده بو سلول اؤلومو, باشا چاتمیر و سلول‌لار كونترول‌سوز صورتده چوخالیر. مغناطیسله موعالیجه كیچیك دمیر نانو ذرّه‌لره شامیل اولور كی آنتی‌بادیلره مربوط اولورلار. آنتی‌بادیلر خطرلی ماده‌لرله ساوشاماق اوچون, بدنین موحافیظه سیستمی واسیطه‌سی ایله دوزَلمیش پروتئینلردیر. بو دمیر نانو ذرّه‌لری تومورون سلول‌لارینا یاپیشیر و مغناطیس میدانی اولان زمان, بو مولكول‌لار بیر یئره ییغیشیب و اوتوماتیك اولاراق اؤلوم سیقنالینی آزاد ائدیرلر. بو آراشدیرمادا, قورساغین سرطانلی سلول‌لاری نانو ذرّه‌لرین معرضینده و ایكی میدانین آراسیندا یئرلشدی . سلول‌لارین یاریسیندان چوخو مغناطیس تأثیری آلتیندا اؤلدو, بیر حالدا كی بو پروسه ساغلام سلول‌لارا اثر قویمادی. بو آراشدیرمانین نتیجه‌لری نیچر متریالز مجله‌سینده یاییلیب. |
||
بوش قارینا ورزیش ائتمه‌یین
یازار : میرزه عبدالصمد ملکی | بؤلوم : ساغلاملیق
+0 به یه ن
|
||
|
بیر عیده بئله دوشونور كی توخ قارینا ورزیش ائله‌مك اورك بولانما گتیرر و بعضیلری بئله اینانیرلار كی بوش قارینا ورزیش ائله‌مك داها چوخ یاغین اریمه‌سینه سبب اولار. آغیر غذادان سونرا ورزیش باعیث اولار معده ناراحات اولسون. چونكی بو زمان بدنین بوتون انرژیسی غذانین هضمینه صرف اولور و قان جریانی داها چوخ هضم سیستمینه طرف گئدیر و عضله‌لره آز گئدیر. یاخشیسی بودور كی پروتئنلی, یاغلی و فیبرلری آغیر غذا یئیندن سونرا اوچ-دؤرد ساعته‌دك ورزیش اولمایا. آما یونگول غذادان ایكی ساعت سونرا ورزیش ائله‌مك اولار. |
||
قانسیزلیغین اون علامتی
یازار : میرزه عبدالصمد ملکی | بؤلوم : ساغلاملیق
+0 به یه ن
|
||
|
قانسیزلیق او موشكوللردندیر كی خانیملارین اكثری اونا موبتلادی آما چوخونون اوندان خبری یوخدور. حقیقتده قانسیزلیغین اكثراً علامتی اولمور و بعضاً آیری ناخوشلوغون علامتلریله قاریشیق دوشور. قانسیزلیغین تكجه تشخیص یولو قان آزماییشی اولسا دا بوردا بو ناخوشلوغون 10 علامتی ذیكر اولور كی اونلاری تشخیص وئرسز فوراً دؤكتوره گئدین. 1. دری‌نین رنگی آتیب: قانسیز اولاندا بدنیزین دریسی طبیعی رنگده اولسا دا دوداقلاریزین رنگی طبیعی رنگدن آچیق اولسا و یا بدنیزین دریسی خسته و سوست اولسا بو او دئمكدیر كی قانسیزسیز. 2. همیشه یورقونلوق احساسی: همیشه یورقونلوق احساس ائدیرسیز و حیس ائدیرسیز كی قاباقكیلارا تای گوجوز یوخدور؟ نظریزه گلیر كی گون بویو دایانیرسیز؟ بو قانسیزلیغین آشكار نیشانه‌سیدیر. روح دوشگونلویونون مین بیر روحی و فیزیكی عیلّتی‌ده اولسا, بو قانسیزلیغین موهوم علامتلریندن ساییلیر. 3. باش آغریسی و ایشتهاسیزلیق: قانسیزلار گون بویو باشلاری آغرییار و معمولاً غذایا مئیللری اولماز. بونلار قانسیزلیغین بیرینجی علامتلریندندیر. 4. خوشكیّت: بو دا قانسیزلیغین علامتلریندن ساییلیر و یئمك عادتلرین دگیشمه‌میش اورتایا گلر. مثلاً گؤی و میوه مصرفین آزالتمامیش یارانار. 5. دیقّتین آزالماسی: قانسیز اولساز گونده‌لیك مسأله‌لره دیقّتیز آزالار و ایشلریزی گؤرمك چتین اولار. 6. عجیب تغذیه: قانسیزلارین عجیب خاصیّتی وار كی تورپاق و كاغاذ كیمی یئمه‌لی اولمایان زادلاری یئسینلر. بو حالته «پیكا» دئییلیر و قانسیزلیغیزین موعالیجه‌سی اوچون فوراً دؤكتوره گئتمه‌لیسیز. 7. دیلیزده و آغزیزدا بیردن-بیره یارا گؤروشسه و یا اگر خانیم اولساز آیلیق عادتیز بیردن قطع اولسا, نیشان وئریر كی قانسیزسیز. 8. تنگی نفس: بو بیر جیدّی هوشداردیر. قانسیزلیغیزین شیدّتی چوخالاندا تنگی نفسه دوچار اولارسیز. نیه كی قانین نفس چكمه پروسه‌سینی ساغلایان قیرمیزی گلوبوللار آزالسالار قانا اوكسیژنین یئتیشمه‌سی آزالار. بو علامت اورتا و یا شیدّتلی اولا بیلر. 9. سویوق بارماقلار: ال-آیاغیز همیشه سویوق اولسا قانسیزسیز. بو مسأله اوردان یارانار كی قانین آزلیغینا گؤره ال و آیاغا قان آز یئتیشر. 10. ضعیفلیق و باش گیجللنمه: بتر قانسیزلیقدا سحر آیاغا دوراندا چوخ ضعیفلیك حیس ائدیرسیز و یا باشیز گیجللنیر. |
||
زنجفیل چایی ایضطیرابی آزالدار
یازار : میرزه عبدالصمد ملکی | بؤلوم : ساغلاملیق
+0 به یه ن
|
||
|
گونده بیر فینجان زنجفیل چایی, اینسانین اخلاقین دوزلدیب ایضطیرابین آزالدار و عین حالدا غذانین هضمی و جذبینه كؤمك ائدر. انگلیستانین تغذیه و ساغلاملیق موتخصیصلری دئییرلر: معده‌نین اسیدی غذانین هضمینه لازیمدیر و شخص موضطریب اولاندا بو اسیدین آخماسی موختل اولار. آما بیر ایستیكان داغ سویا تازا زنجفیل و لومو سالیب ایچماق هاضیمه‌نین تحریكی اوچون مؤعجیزه‌لی یولدور. زنجفیلده «جینگرول» آدیندا مخصوص و موهوم آنتی اوكسیدان وار كی بدنده ایضطیرابدان یارانان شیمیایی ماده‌لری آرادان آپارار. هابئله زنجفیل ایلتیهابی آزالتماقدا و شایع اولان تنفّوسی موشكوللر و قان دولانمانی یاخجیلاتماقدا فایدالیدیر. زنجفیل چایی خانیملاردا دا آیلیق عادتی اثرینده‌كی قارین ییغیشماسینی آزالدار. |
||
حركت چوخ اولدوقجا عؤمر چوخالار
یازار : میرزه عبدالصمد ملکی | بؤلوم : ساغلاملیق
+0 به یه ن
|
||
|
مونظم صورتده ورزیش ائتمك یاشلی اینسانلارین عؤمرون چوخالدار. استرالیانین موناش دانیشگاهی‌نین موحقیقلری تایوانلی موحقیقلرین ایش بیرلیگی‌ایله یاشلی اینسانلاردا بدنین حركتی و چكیسی‌نین اؤلومله رابیطه‌سینی بیلمك اوچون تایواندا 97-65 یاشدا اولان 1435 كیشی و خانیمی, 8 ایل بویوندا نظر آلتیندا ساخلادیلار. دؤكتور مارك والك ویست, موناش دانیشگاهیندان بو تحقیقین رئیسی دئییر اوست-اوسته یاشلی اینسانلاردا ضعیفله‌مك و یونگوللشمك دیری قالماغین خطره دوشمه‌سی دئمكدیر. اونون دئدیگینه گؤره, موحقیقلر بو تحقیقده باش تاپیبلار كی عضله‌سی آز اولان قوجالار (قوجالیق اثرینده قودرت و عضله بافتینی الدن وئرمك) و اسكلتلری كیچیك اولانلار اؤلوم خطرینه داها چوخ یاخین اولورلار, مخصوصاً او زمان كی فیزیكی حركتلری آز اولا. اوندان علاوه طبیعی و آرتیق چكی‌لری اولان قوجالار و پیاده یئریمك و داغچیلیق كیمی ورزیشلر ائدنلر داها ساغلام اولورلار و یاشاماق احتیماللاری چوخ اولور. بو موطالیعه بویوندا دقیق نتیجه آلماق اوچون یاش, جینس, ایجتیماعی-ایقتیصادی وضعیت و شخصی كیردار نظرده آلینیب. دؤكتور مارك والك ویست آخیرده دئدی كی قوجالارین حركتی چوخالسا, اؤلوم میقدارینی گؤزه گلیم میقداردا آزالتماق اولار و بو ایش هفته‌نین موختلیف گونلرینده مولاییم و آز ورزیشلرله گؤروله بیلر. |
||