حسیّاتی تشخیص وئرن عینک
یازار : میرزه عبدالصمد ملکی | بؤلوم : تكنولوژی
+0 به یه ن
حسیّاتی تشخیص وئرن عینک
آلمانین فرانهوفر تحقیقات انستیتوسو، حسیّاتی تشخیص وئره بیلن بیر عینک دوزلدیب. بو عینکده میکرو کیچیک بیر دوربین تعبیه اولوب کی مقابل طرفین چهره‌سینده‌کی حالتلری تشخیص وئریب اونون نه حالدا اولدوغونو خبر وئریر.
اوندان علاوه بو سیستم مقابل طرفین یاشی و جنسیتینی‌ده تشخیص وئره بیلیر.
بو تکنولوژی، مقابل طرفین حسیّاتینی تشخیص وئره بیلمه‌ین اوتیسم کیمی ناخوشلوقلاری اولان شخصلره فایدالی اولاجاق.
بو عینکله گؤرونن صحنه‌لر ذخیره اولور و سونرادان اونلارا باخماق اولار.
اوشاغین اوستونه قیشقیرمایین
یازار : میرزه عبدالصمد ملکی | بؤلوم : اجتماعی
+0 به یه ن
اوشاغین اوستونه قیشقیرمایین
اوشاغین اوستونه قیشقیرماق سیزدن «اؤزوندن چیخمیش بیر حیرصلی» تصویری یارادیر.
جسارتلی اوشاقلار اؤزلرینی بؤیوکلرله بیر گوجده و یا حتی اونلاردان داها گوجلو بیلرلر. سیزین غیر مناسب رفتاریز، اونلارین بو فکرینی داها دا آلوولاندیرار. یادیزدا اولسون اوشاقلار آتا آنالارنی کنترلدان چیخمیش گؤرنده گوونسیزلیک حسّ ائلرلر.
مطالعه‌لر اوشاقلارین تربیتینده قیشقیرماقدان استفاده ائله‌ین والدینلرین، بو عمل ایله اونلارا روحی صدمه ووردوقلارینی گؤستریر.
سیز، اوشاغین اوستونه قیشقیراندا اونو دا منفی عکس العمل گؤرستمگه سوق وئریرسیز. اونون بو عملی مقابلینده سیز داها دا آرتیق قیشقیریرسیز و بو دعوا بؤیویونجن دالیسی گلیر و مشکل‌ده حل اولمور. آما بو مسأله‌نین حلّی وار:
اطلاعاتیزی چوخالدین: بیرینجی آددیمدا سیزین قیشقیرماغیزا سبب اولان مسأله‌نی تاپین. اویناتمالی‌لارینی ائوه داغیدیب؟ نه‌منه سیزی غضبلندیریب؟ اونو تاپیب و وضعیتی آراملاتماق اوچون الیزدن گلن یولو آختارین.
اؤزوزه بیر داها قیشقیرماماغا سؤز وئرین: بو ایده ساده و فایداسیز نظره گله بیلر، آما هر رفتار دَییشیمینی، اؤزوزده مثبت خصوصیتلری تقویت ائله‌مکده اولدوغونو بیلین.
آرام دانیشین: بعض اتفاقلار دؤزولمز اولسا دا، آرام دانیشماغا چالیشین. اوشاقلارین‌دا ایشلریندن ال چکیب سیزه دقت ایله قولاق آسماقدان ساوای چاره‌لری یوخدور. بئله‌لیکله سیز آرام قالیرسیز و اوشاقلار و هامی بیر-بیرلری‌نین سؤزلرینه نئجه قولاق آسماغی اؤیرنیرلر.
انتظارلاریزی مدیریت ائله‌یین: قیشقیرماماغیزی ایسته‌سز، یولونو دا هامارلامالیسیز. عاغیللی حرکت ائله‌سز چتین ایش گؤرمک لازم گلمیه‌جک. اویناتمالیلارین داغیناقلیغینا گؤره اونا غضبلنیرسیزسه، اوینایا بیلدیگی اویناتمالیلارین ساییسینی آزالدین. نتیجه‌ده هم قیشقیرمازسیز و هم زحمتیز آزالار.
هر شئیی اورگیزه آلمایین: اوشاقلاریزین ایشلری باره‌ده اوتوروب دوشونورسز، اونلارین بعضاً سیزی غضبلندیرمه‌لری‌نین، قصد و غرضسیز اولدوغونو آنلایاجاقسیز.
مقایسه ائله‌مه‌یین و شاکر اولون: اؤزوزو آیری والدینلر و یا اوشاقلاریزی آیری اوشاقلارلا مقایسه ائله‌مک سیزی، خوشا گلمزلیکلره چاتان اوتوبانا سالار. یاشاییشا شاکرانه باخارساز داها آرتیق پوتانسیل‌لرین اولدوغونو گؤره‌جکسیز. اوشاقلاری سیزین اوشاقلار کیمی سالم اولمایان و قیشقیرمادان و اعتراض ائتمه‌دن یئرلرینی سیزینله دَییشمک آرزیسیندا اولان آتا آنالارا دوشونون.
منبع: psychologytodayhear
قاجار دؤرونده آمار
یازار : میرزه عبدالصمد ملکی | بؤلوم : تاریخ
+0 به یه ن
قاجار دؤرونده آمار
اؤلکه‌میزده بیرینجی آماری 1275 هجری قمری ایلینده مرحوم ناصرالدین شاه زمانی و میرزا آقاخان نوری‌نین صدر اعظملیق دؤره‌سینده اولدو. او آماردا، تهران شهری‌نین ائولری و بنالاری ساییلمیشدی.
دئیه‌سن همان ایل، وزارت طرفیندن جمعیتین سایی و اقتصادی دورومو باره‌ده آمار توتماق و جمعیت ساییسی، مسکن و جماعیتن گلیر میزانی‌نین بللی اولماسی اوچون، ایالتلرین حاکملرینه ده دستورالعمل وئریلمیشدی، آما فنی مشکل‌لره گؤره بو دستور اجرا اولونمادی. نهایتده میرزه عبدالغفار نجم‌الدوله‌نین واسطه‌سی ایله، تهرانین جمعیتینی تازا مئتودلارلا، تهران شهرینی بئش یئره بؤلمکله، 55 گون عرضینده ساییلدی و «دارالخلافه‌نین نفوس تشخیصی» آدیندا رساله‌ده یاییلدی. بو آمار توتمادا، تهران شهری بئش محله‌یه بؤلوندو: ارگ، عودلاجان، چال‌میدان، سنگلج و بازار. شهرین ائشیگینده‌کی محله‌لره ده بیر طبقه‌ده یئر وئریلمیشدی. بو آمارا اساساً تهران جمعیتی 1286 هجری قمری ایلینده 155736 نفردن آرتیق ایدی. بو سایی‌نین 147256 نفر غیر نظامی و 8480 نفر نظامی ایدیلر. بو آمارا اساساً، شهر جمعیتی‌نین یوزده 27-سی اون بئش یاشدان کئچیک ایدی.
تهران جمعیتی‌نین ایکینجی ساییلماسی، 1301 هجری قمری ایلینده اولدو. بو ساییلمادا دا تهران شهری همان بئش یئره بؤلونموشدو. مرحوم مظفرالدین شاهین دؤردونجو سلطنت ایلینده یعنی 1317-ده ده تهران بنالاری‌نین آماری توتولدو. بو آمار درویش حسن اخضر علیشاهین واسطه‌سی ایله حیاتا کئچیریلدی.
1336 هجری قمری ایلینده، دوغوم، اؤلوم، ائولنمه و بوشانمالارین ثبتی اوچون، ثبت احوال اداره‌سی تأسیس اولدو.
اشتهانی آزالدان مادّه
یازار : میرزه عبدالصمد ملکی | بؤلوم : ساغلاملیق
+0 به یه ن
اشتهانی آزالدان مادّه
لندنین امپریال کالج و انگلیسین گلاسکو دانشگاهی‌نین محققلری، اشتهانی یوزده اون دؤرد آزالدان بیر مادّه دوزلدیبلر. IPE آدلانان بو مادّه، انسان بدنینده پروپیونات یونونو تحریک ائلیر. بو یونون وظیفه‌سی باغیرساقدا‌کی فیبری سیندیریب دویما حسّینی یاراتماقدیر.
ایلکین آنالیزلرده، غذالاریندا بو مادّه‌نی اضافه‌لندیرنلر آریقلاییبلار.
دادی چوخ پیس اولان بو مادّه‌نی یئمک اوچون حتماً اونو چؤرک یا میوه ایله قاتماق لازمدیر.
بو مادّه‌نین اساس مشکلی، اونون بؤیوک باغیرساغا چاتماسی ایدی. چونکی اورا چاتمامیش کیچیک باغیرساقدا جذب اولوردو.
اشتهانی کنترل ائله‌ین هورمونلار بؤیوک باغیرساقدا اولورلار و بو مادّه جذبدن اوّل، بؤیوک باغیرساغا چاتمالیدیر.
محققلر، بو مشکلون حلّی اوچون گیاهلاردا اولان اینولین آدیندا طبیعی بیر کربوهیدراتدان استفاده ائله‌دیلر. IPE اینولین ایله قاریشیر و جذب اولمادان بؤیوک باغیرساغا داخل اولور.
بو محصول استفاده استفاده اولوندوغو آن، انسانین اشتهاسی یوزده اون دؤرد آزالیر.
بو محصولدا هئچ جانبی عارضه گؤرونمه‌ییب آما داوخانالاردا ساتیلماسی اوچون داها آرتیق آنالیزلره احتیاج وار.
امام حسنین (ع) خائن کؤمکلری
یازار : میرزه عبدالصمد ملکی | بؤلوم : دین
+0 به یه ن
امام حسنین (ع) خائن کؤمکلری
شیعه‌لرین ایکینجی امامی، امام حسن بن علی (ع)، حضرت علی‌نین (ع) شهادتیندن سونرا هجرتین قیرخینجی ایلینده خلافته چاتدی. او حضرتین قیسا مدتلی خلافت دؤره‌سی، آتاسی‌نین خلافت دؤره‌سی کیمی چوخلو چتینلیکلرله بیر اولدو.1
امام حسنین (ع) خلافت زمانی، جاسوسلارین و منافقلرین بول اولدوغو زمان ایدی.
بئله‌نچی شرایطه باخمایاراق امام حسن (ع) معاویه ایله جنگه تصمیم تودو و بو مسأله‌نی کوفه مسجدینده جماعته اعلام ائله‌دی. آما کوفه اهلی جنگه گئتمکده سوستلوق ائله‌دیلر و فقط عدی بن حاتم آدلی بیر قوجا آیاغا قالخیب کوفه‌لیلر دانلاییب امام حسندن (ع) اطاعت اولاراق نخیله‌یه یولا دوشدو و بیر عده ده اونون دالیسیجان گئتدیلر.2
امام، جماعتی معاویه علیهینه جنگه چاغیراندان سونرا، کوفه‌ده و بصره‌ده معاویه‌نین جاسوسلاری‌نین اولدوغونو بیلدی و ایکیسینی تاپاندان سونرا معاویه‌یه بئله یازدی: «دئیه‌سن جنگ آختاریسان، گؤزله کی تئزلیکده اونو گؤررسن . . .» 3
آما معاویه ظاهرده قوشون ییغیب کوفه‌یه حرکت ائتسه‌ده، آیری برنامه‌سی واریدی. اونون قصدی امام حسنی (ع) ترور ائله‌مگیدی. بو منظورا عمرو بن حریث و اشعث بن قیس و حجر بن الحارث و شبث ربعى‌نی هر بیرینی تک تک بو ایشه مأمور ائله‌دی.
تروریستلرین بیری امامی، نماز اوستو اوخ ایله هدف توتدو، آما امامین پالتاری‌نین آلتیندا کی زره، اوخا مانع اولدو. 4
معاویه‌نین آیری برنامه‌لری‌ده واریدی. او پول و وعده‌لرله امامین قوشونونا نفوذ ائله‌مک ایسته‌ییردی.
امامین کؤمکلری، معاویه‌نین غالب اولماسیندا یوخاری نقشلری واریدی. اونلارین لاپ تأثیرلیسی عبیدالله بن عباس ایدی کی امام اونا اینانیب قوشون باشچیلیغینی اونا تاپیشیرمیشدی.
عبیدالله بن عباس معاویه‌نین وعده‌لری قاباغیندا دایانماییب گئجه ایله 8 مین نفر قوشونلا بیرلیکده معاویه اوردوسونا قوشولدو. 5 بو بیر حالدا ایدی کی حضرت علی (ع) زمانی معاویه‌نین آدامی مکه‌ده اونون ایکی بالاجا اوشاغی‌نین باشینی کسمیشدی.6
سحر واختی نمازا قالخاندا، امام (ع) عبیدالله بن عباسین یوخلوغونو گؤرنده اونون یئرینه قیس بن سعد بن عباده انصارینی باشچیلیغا سئچدی. معاویه اونو دا یولدان چیخارتماغا چالیشسا دا بو ایشی باجارمادی. آما قوشون ایچینده شایعه‌لر سالماقلا اونلاری چاشباش قویدو.7
عبیدالله ابن عباس و آیری باشچیلارین اوز چئویرمه‌سی قوشونون وضعیتینی پریشان ائله‌میشدی. امام مدایندن قوشون ییغماغا گئتسه ده بو ایشه موفق اولمادی کی هئچ بلکه قوشونون بیر عده‌سی عصیان ائدیب او حضرتین خیمه‌سینه یوگوردولر و حتی او حضرتین سجاده‌سینی‌ده یاغمالادیلار. عبدالرحمن ازدى او حضرتین رداسینی چیگنیندن چکیب آلدی. حضرت رداسیز، آتا مینیب ساباطا طرف یوللاندی.
ساباطین مظلم آدلی قارانلیق یئرینه یئتیشنده، جراح بن سنان آدیندا بیر خائن امامین آتی‌نین جیلوونو توتوب دئدی: «حسن، سن‌ده آتان کیمی کافر اولدون.» و زهرلی خنجرینی امامین بودونا ووردو. خنجر سوموگه قدر کسدی.8
نهایتده شرایط امام حسنی (ع) صلحه مجبور ائله‌دی. امام حسن (ع) چوخ مقاومت ائله‌دی آما کؤمکلری‌نین داغیلماسی نتیجه‌سینده صلحه بویون وئردی.9
امام حسن (ع) معاویه ایله صلح ائلیه‌ندن سونرا کوفه حکومتینی بوشلاییب مدینه‌یه گئتدی. اونونلا بئله معاویه او حضرتدن ال چکمه‌دی و نهایتده، خانیملاری‌نین بیرینی توولاییب حضرته زهر ایچدیردی و او حضرت صفرین 28-ده شهادته چاتدی.10
قایناقلار:
[1] - محمد بن نعمان شیخ مفید، الارشاد فى معرفه حجج الله على العباد، سیدهاشم رسولى محلاتى، تهران، علمیه اسلامى، ج2، ص 5
[2] -ابى الفرج اصفهانى، مقاتل الطالبیین، کاظم المظفر،قم، دارالکتاب، ایکینجی چاپ، ص 39
[3] - شیخ مفید، همان
[4] - مجلس، محمد باقر؛ بحارالانوار بیروت ، الوفا، ایکینجی چاپ 1403 ،ج44 ،ص33
[5] - همان ،ص51 و یعقوبى، احمدبن ابى یعقوب؛ تاریخ یعقوبى، محمد ابراهیم آیتى، تهران، علمى فرهنگى نشریاتی، سکیزینجی چاپ ، 1378، ج2، ص141
[6] - یعقوبى، همان، ج2، ص107
[7] - ابوالفداء اسماعیل بن عمره بن کثیردمشقى، البدایه والنهایه، بیروت، دارالفکر، 1407، ج8، ص15
[8] - شیخ مفید، همان، ص8 و ابوجعفر محمد بن جریر طبرى، تاریخ الامم و الملوک، محمد ابوالفضل ابراهیم، بیروت، دارالثراث1378، ج5 ص195
[9] - طبرى ، همان
[10] -شیخ مفید، همان، ص12